Gálatas 4 - Uhokri Gahegbetawni Nukune akak Sawmus

Moís gikumadukan ka kumadukawiy akiw

¹ Nah akkite yit pahatwa abektey akiw kuri avim inin. Ku pahavwi awayg ikaksa gewkanbet git gikamkayisa, nikwe madikte gidahan ner bakimni. Heneme ig bakimni kote kumadukin awaku ig nopsesnite. Ig ke pahavwi ibuktibe awaku ig kumadukaka gavitkis gikavriwten.

² Ignes gikavriwten hiyak gikak he ku aysaw gikivayavrik danuh ku samah gig ikaksin.

³ Wixwiy hawata ke ner bakimnibe. Minikwak in ke wotbe ukivayavrikwiy kote danuhte. Wixwiy kumadukaka avit hiyakemniki amadgaya inin.

⁴ Heneme ku aysaw ahawkanavrik danuh ku pariye Kiyavwiye Uhokri ikaksin, ig awahkise gikamkayh uminwiy. Igme kanagsaw gut pahavu tino amadgaya inin, ig kumadukasaw arit amekene Moís gikumadukan

⁵ adahanikwa wixwiyme isahptaw ariw ini amekene Moís gikumadukan kahadbe wixwiy humaw Kiyavwiye Uhokriwa gikamkayuvwi.

⁶ Ku samah wixwiy humewvi gikamkayuvwi, igme Kiyavwiye Uhokri awahkise gikamkayh Gitip uvititwiy. Igme Gitip keh wixwiy kighaw git Kiyavwiye Uhokri wixwiy kanumgi “Pa, Niguh”.

⁷ Han pitatit wixwiy ka kema ibuktima akiw. Wixwiy kuri gikamkayuvwi. Ku samah wixwiy gikamkayuvwi, nikwe wixwiy darih madikte ini kabayka ku pariye gikaksan git gikamkayh.

Ku wis kumadukasaw arit Moís gikumadukan amun ini wis diyuhkiswa butte akiw

⁸ Minikwak yis hiyeg kane judeyenevwima yis ka inyewatma hiyak Kiyavwiye Uhokri. Yis kumadukasaw gitkis yiwohkigavu ku pariye kane Uhokrima.

⁹ Heneme kuri yis kuwis ute Kiyavwiye Uhokri, ka yisma uti Kiyavwiye Uhokri, heneme ig Kiyavwiye Uhokri utevyi. Kuri nikwe mmah yis diyuh akiw amin ini hiyakemniki ku pariye he amadgaya ininnen? Mmah yis diyuh akiw amin ini yimavusan keh Kiyavwiye Uhokri gibetki akak yikehbetannenwa? Akebi ini hiyakemniki yuma nikiytani. In yuma nawaygi. Mmahki yis kumadukasaw arit? Mmah yis misekwekere ke ibuktibe akiw?

¹⁰ Yis kuwis kavusa kiyatha hawkri payak gikakkis judeyenevwi. Yis kiyathene ameremnit payak gikakkis, yis kiyathene gifetrakis, yis kiyathene ini peheknene kamukri ku pariye igkis kiyatha.

¹¹ Nah avis yikak ku nawenetke ini nannivwi ayge yibet in he waditnevyenen.

Minikwak yis amavan kabayntiwa

¹² Nukebyuvwi, nah aya yit. Ikawnabay ke nahbe mmanawa nah kuwis ikaw ke yisbe. Nah judeyene heneme nah ikaw ke wotbe nah ka judeyenema ke wotbe nah ka kumadukakima gavit amekene Moís gikumadukan. Minikwak ku samah nah aynete yikak yis ka ehwa akak ini nuhiyekemni. Mmahkay kuri yis ehwe nikak?

¹³ Yis hiyakni ku nah danuh atere yit nah misekwe ayge yibet awaku ku samah nah ka kabimne. Inneki keh nah misakwa ayge nah ekkene Kiyavwiye Uhokri ginetni yit.

¹⁴ Hiyawa ini mbeyne ay nuvituh, heneme in ka hamahwa yivitit. Avim ini yis ka tukuhminaw nuwhu. Yis ka asanun. Yis amavan kabayntiwa ke wotbe yis amevevyebe pahavwi ahjbe giwntak Kiyavwiye Uhokri. Yis amavan ke wotbe yis amevevyebe Cristo Jesusbe.

¹⁵ Kuri kineyki ini yibetki nukakuh? Inyewa, minikwak in huwewe nutuh ku yis batek nukakuh mpinevevye. Avim ini, wake yis hiya asamanakbe kawenyana nuwtyak, yis warakkam yiwtyakkam adahan yis kawenyana nuwtyak akak yidahanwa yiwtyak.

Kuri kinisekevutnevwi yiwegeswitni ariw nuhiyekemni

¹⁶ Mmah kurime yis ka batek nukakuh akiw? Mmah yit kuri nah kuwis wageswe yivetunya awaku ku samah nah ikene yit ini hiyakemniki ku pariye inyewatnene?

¹⁷ Neras yikannuhten kinisekevutnevwi igkis yikinseptihten heneme yivewkan adahan kabayka bawa kawa. Bawa adahan mbayka. Igkis muwaka yiwegeswitni ariw nuhiyekemni kahadbe yis mpiksaw amin gidahankis gihiyekemnikis.

¹⁸ Nah ka awna inakni adahanma nah gatihpetnikisma. Ku hiyeg kinistay adahan kabayka, nah batek akak ini. In kabay adahan hiyeg kinistay adahan kabayka avanenekwa, ka ininewatma ku samah nah aygema yikak.

Nah kayah yidahan adahan yis ikaw Uhokriyanbetnewa

¹⁹ Yis ke nukamkayuvwibe nubetkivube. Nah kayah yidahan akiw kewa pahavu tinobe eg kayah gukamkayhbe ku samah eg battukaw eg hiyap ba hiya igma amadga wayk. Nahme kayah ku samah nah battukewnene yidahan nah hiyap ba yis ikaw Uhokriyanbetnewa ke Cristobe.

²⁰ Nah atekere misekwekere ayge yibet kuri kahadbe nah awna akak nubiyuhwa yit, nah ka awna amadgama kagta akiw. Nah avise yikak mmanawa nah ka hiyak ku samah yihiyekemni kuri.

Ku wis kumadukasaw arit Moís gikumadukan wis ke ibuktibe

²¹ Yis ku pariye ihpekere ariwn amekene Moís gikumadukan, mmahkay yis ka pukuha ku samah ig amekene Moís ganhan?

²² Ini ganhan kinetihwa amin ku samah amekene Abraawh kakamkayh piyana gikebikis. Ig kakamkayh pahavwi gukak tino bukitwiyo guw Agar. Ariwnteke ini ig kakamkayh pahavwiwa akiw gukak gihayo Sara ku pariye ka ibuktima. Gukamkayh giw Izaki.

²³ Eg tino bukitwiyo gukamkayh ig amadga wayk ku samah amekene Abraawh mpiksaw kakamkayh akak gikehbetannenwa. Egme gihayo kane bukitwiyoma gukamkayh ig amadga wayk ku samah Kiyavwiye Uhokri gikaksan git amekene Abraawh ku aysawnemenek ig kakamkaynek.

²⁴ Ini ku pariye danuh git amekene Abraawh minikwak, in humaw areketni wot adahan ku samah Uhokri gihiyekemni. Noras piyananano tinogben egkis humaw arakak adahan ku samah Kiyavwiye Uhokri ahegbete ginetni pimavut gikakkis gihiyegavu. Egme pahavu tino eg arakak adahan ku samah Kiyavwiye Uhokri ahegbete ginetni gikak amekene Moís aynte avit ini waxri imuwadnene kewye Sinay. Hiyeg ku pariye kumadukasaw arit amekene Moís gikumadukan ignes ke ibuktibe arit ini gikumadukan. Eg ibukti Agar eg arakak adahan ini.

²⁵ Ku samah eg arakak gidahankis neras hiyeg avitnenevwi ini waxri kewye Sinay aynte Arabyamnaw, eg hawata eg arakak gidahankis hiyeg ku pariye paytwempuyenevwi Jerusalém amadgaya inin. Mmanawa ignes iha ariwn amekene Moís gikumadukan kahadbe igkis humaw kibeyne giwtrik Kiyavwiye Uhokri. Igkis ke wotbe igkis ibuktibe ke amakano Agarbe gikak gukamkayh.

Ku wis kamaxwa givitit Jesus wis ka kema ibuktima

²⁶ Egme nor tino kane bukitwiyoma egu arakak gidahankis hiyeg ku pariye paytwempuyenevwi Jerusalém inurikyene. Ignes kamaxwa givitit Kiyavwiye Jesus adahan ignewa keh igkis humaw kibeyne giwtrik Kiyavwiye Uhokri. Wixwiy Jesus gihiyegavu wixwiy kewa gukamkayhbe nor kane bukitwiyoma.

²⁷ Uhokri gannasan kinetihwa amin inakni. In awna: “Pis ku pariye kote kamukante, hiyawa pis batek pimin. Pis ku pariye kotenano sarayhti pikamkayh amadga wayk, hiyawa pis kabiman akak batekka. Mmanawa pis ku pariye yumanano pikamkayh, aysawnemenek pis kakamkayhnek ka aynsima kibite guw ku pariye kigihgunyo.” Henewatbaki in Uhokri gannasan awna.

²⁸ Nukebyuvwi, wixwiynewa amekene Abraawh gihiwhivwi ku pariye Kiyavwiye Uhokri ikakse git amekene Abraawh. Kiyavwiye Uhokri ikakse wixwiy git hawata ku samah ig ikakse gikamkayh Izaki git.

²⁹ Ig amekene Abraawh gikamkayh ku pariye wayvuka awaku ku samah ig mpiksaw kakamkayh akak gikehbetannenwa ig ner gikamkayh pitimnak gikak ner gikamkayh ku pariye wayvuka awaku ku samah Kiyavwiye Uhokri Gitip keh ig wayvuka. Ku avim inin wixwiy hawata. Ig Kiyavwiye Uhokri Gitip keh uhiyekemniwiy wayvuka akiw git Kiyavwiye Uhokri. Igkisme hiyeg ku pariye mpiksewnes humaw Kiyavwiye Uhokri gikamkayuvwi akak gikehbetankisnenwa, igkis pitimnak ukakwiy.

³⁰ Ka sam. In Uhokri gannasan awna: Awahkisnaba nor tino bukitwiyo gute tivikte payak gikak gukamkayh. Nor tino bukitwiyo gukamkayh ig ka darihti aynesnima ini kabayka ku pariye Kiyavwiye Uhokri ikakse gut nor tino kane bukitwiyoma gukamkayh. Henewatbaki in Uhokri gannasan awna.

³¹ Nikwe nukebyuvwi, wixwiy ka kema nor tino ibuktima gukamkayh. Wixwiy kewa nor tinobe kane bukitwiyoma gukamkayh.