Gálatas 3 - Uhokri Gahegbetawni Nukune akak Sawmus

Umaviswan akak ukehbetannenwa ka keh wis danuh git Uhokri

¹ Aa, yis hiyeg galasiyenevwi. Yis ka hiyakwa hawkri aynesnima. Minikwak ku aysaw usuh aynete yibet, usuh akki yit huwewe ku samah ig Kiyavwiye Jesus Cristo daddahkiswe aminat giyakni adahan ignewa keh wixwiy danuh git Kiyavwiye Uhokri. Pariyevahki hiyeg miyehkise inakni yit akak giyahmara?

² Nah ayepkerevye pahatwowa ayapka yit kuri. Mmahki ig Kiyavwiye Uhokri kawihkis Gitip uvititwiy? Ba awakuma ku samah wixwiy ihpene ariwn amekene Moís gikumadukan? Kawa, nukebyuvwi. Ig Kiyavwiye Uhokri kawihkis Gitip uvititwiy awaku ku samah wixwiy time gak Kiyavwiye Jesus Cristo, wixwiy kamaxwe givitit.

³ Mmah yis ka hiyak hawkri aynesnima? Ka ba yis hiyapknima ku wixwiy humaw Kiyavwiye Uhokri gihiyegavu awaku ku samah wixwiy kadahan Kiyavwiye Uhokri Gitip ay uvitwiy? Ya kuri, pariye yikehni? Mmah yivewkankam ku yimaviswan akak yikehbetannenwa keh yis misakwa gihiyegavu? Kawa. Ka innema keh yis humaw gihiyegavu minikwak.

⁴ Mmah madikte inakni unetni danuh yit mmah adahan waditnevyenen? Ka hiyap inma danuh adahan waditnevyenenma.

⁵ Ig Kiyavwiye Uhokri kawihkis Gitip gannu uvititwiy. Ig kehkis ka aynsima annut ay ubetwiy. Mmah ig keh hene awaku ku samah wixwiy ihpene ariwn amekene Moís gikumadukan? Kawa, nukebyuvwi. Ig keh hene awaku ku samah wixwiy time gak Kiyavwiye Jesus Cristo, wixwiy kamaxwe givitit.

Abraawh humaw kibeyne giwtrik Uhokri awaku ig kamaxwa givitit

⁶ Kiyeminahnabay gimin amekene Abraawh. Ig amekene Abraawh kamaxwa givitit Kiyavwiye Uhokri kabayntiwa. Inneki keh ig Kiyavwiye Uhokri hiyavgi kewa kibeynebe giwtrik.

⁷ Ayge nikwe wixwiy ku pariye kamaxwenevwi givitit Kiyavwiye Uhokri wixwiy amekene Abraawh gihiwhivwi igyewatnene.

⁸ He yis hiyeg kane judeyenevwima ig Kiyavwiye Uhokri hiyavyi kewa kibeynevwibe giwtrik awaku ku samah yis kamaxwene givitit. Minikwak Uhokri gannasan akki inakni kabayka gitkis amekenegben. In akki ku samah ig Kiyavwiye Uhokri ekke kibeyne inetit git amekene Abraawh. Avim ini ig awna git: “Aysawnemenek pis utipkis kabayka gitkis madikte hiyegiviyenevwi amadga wayk.” Henewatbaki ig Kiyavwiye Uhokri awna.

⁹ Ayge nikwe madikte hiyeg ku pariye kamaxwenevwi givitit Kiyavwiye Uhokri ke amekene Abraawhbe, ignes uti kabaykanek hawata ku samah ig amekene Abraawh uti kabayka.

Ku wis kamaxwa avitit umaviswan akak ukehbetannenwa wis hiya mbaykanen

¹⁰ Ku pahavwi awna: “Nah mpiksaw ihpa amekene Moís gikumadukan nikwe Kiyavwiye Uhokri hiyavun ku nah kibeyne hiyeg” heneme in ka danuh ku samah gihiyekemni aya, aysawnemenek ig hiyapkiska mbeyne gitnek avatra gitaraksan nikak. Mmanawa ini amekene Moís gikumadukan awna: “Pugamawka yis ka taraksa pahatnema inin kumadukaki ku pariye tamak ay amadga inin kagta. Ku yis taraksa pahatwowa iwit, yis hiyapkiska mbeyne yitnek.”

¹¹ Heneme hiyawa hiyeg iha ariwn amekene Moís gikumadukan madikte heneme ka innema keh Kiyavwiye Uhokri hiyap pahavwinema kewa kibeynebe giwtrik. Inakni kahayak huwewe wotwiy awaku Uhokri gannasan awna: “Pahavwi ku pariye kakamaxwan givitit Kiyavwiye Uhokri, ignewa kibeyne giwtrik Kiyavwiye Uhokri, ig aymuhwanek gimun Kiyavwiye Uhokri adahan avanenekwa.”

¹² Inme amekene Moís gikumadukan in ka keh wis kamaxwa givitit Kiyavwiye Uhokri. In keh wis kamaxwa avitit umaviswan akak ukehbetannenwa. Mmanawa in amekene Moís gikumadukan awna: “Pahavwi ku pariye ihpenenekwa ariwn madikte inakni kumadukaki, ignewa aymuhwanek gimun Kiyavwiye Uhokri adahan avanenekwa.”

¹³ Heneme ku wixwiy taraksepni, pugamawka ku wixwiy hiyapkiska mbeyne wotwiy. Igme Cristo ig hiyapni hene, ig keh wixwiy isahptaw ariw awaku ku samah ignewa hiyapkiska mbeyne git udukwenavrikwiy. Mmanawa in Uhokri gannasan awna: “Pahavwi ku pariye mawihpika aminat ah, ignewa Kiyavwiye Uhokri hiyapkisne git.” Henewatbaki in Uhokri gannasan awna.

Ku wis kamaxwa givitit Cristo, wis uti kabaykanen

¹⁴ Kibeyne, ig Cristo umahkiswe udukwenavrikwiy kahadbe ini kabayka ku pariye ig Kiyavwiye Uhokri ikakse git amekene Abraawh kahadbe in hawata danuh yit yis ku pariye kane judeyenevwima. Ayge nikwe wixwiy kuri kibeyne giwtrik Kiyavwiye Uhokri adahan wixwiy aymuhwa gimun adahan avanenekwa. In danuh wotwiy awaku ku samah wixwiy kamaxwa givitit Jesus Cristo. Hawata akiw ig umahkiswe udukwenavrikwiy kahadbe wixwiy madikte kadahanyekuye Gitip ku pariye gikaksan wotwiy. Wixwiy kadahan Gitip ay uvitwiy awaku ku samah wixwiy kamaxwa givitit Jesus Cristo.

Uhokri kuwis ikaksa kabayka wotwiy. Ig ka wagahkis gikaksan akakma amekene Moís gikumadukan

¹⁵ Nukebyuvwi, nah kehte yidahan abektey akak hiyeg gihiyekemnikis amadgayavu inin. Ku piyana hiyeg amadgayavu inin ahegbete ginetnikis, ku aysaw in kuwis humewvi kuwis, igkis ka hiya igkisma dunihni akiw. Igkis kawnata hiya igkisma iki nivitminat akiw. Hawata ig Kiyavwiye Uhokri gahegbetawni gikakkis hiyeg.

¹⁶ Ig Kiyavwiye Uhokri ayipa ikakse kabayka git amekene Abraawh gikak gihiwhi. Avuriwnay ku samah inakni iwit ka awna ku ig ikaksin gitkis “gihiwhivwi” ku pariye ka aynsima gikebikis, heneme in awna ku ig ikaksin git “gihiwhi” ku pariye pahavwiwatnen. Ner gihiwhi, igi Cristo.

¹⁷ Kuri nah diyuh amin nnetni kaksene yit. Minikwak ig Kiyavwiye Uhokri ikakse kabayka git amekene Abraawh gikak gihiwhi. Ayipa in gikaksan humewvi giwtrik Kiyavwiye Uhokri. Ayteke ariwnteke ini kibite kamukri mpiye, paxkavut madikawku madikwa akebi akak mpana madikwa arawna (430). Ariwnteke ini ig Kiyavwiye Uhokri ike gikumadukan git amekene Moís. Heneme in amekene Moís gikumadukan ka hiya inma dunih Kiyavwiye Uhokri gikaksan git amekene Abraawh gikak gihiwhi. Kawnata hiya inma pisenwa nikak.

¹⁸ Neras kinisekevutnevwi awna: “Ku wixwiy ka iha ariwn amekene Moís gikumadukan, nikwe wixwiy kawnata uti ini kabayka ku pariye Kiyavwiye Uhokri ikakse wotwiy.” Nukebyuvwi, inakni giwnkis ka wadit. Wake henewatbe ku samah inakni giwnkisbe, nikwekam amekene Moís gikumadukan in pisenwekam akak Kiyavwiye Uhokri gikaksan wotwiy he gikannenwa. Heneme ka henema. Ig Kiyavwiye Uhokri ike kabayka git amekene Abraawh he awaku ku samah ig ikaksepni git he gikannenwa. Ig ka iki git awakuma ku samah ig ihpene amekene Moís gikumadukan.

Amekene Moís gikumadukan in kawih adahan areketni ku samah wixwiy taraksa Uhokri gihiyekemni

¹⁹ Nawenetke pahavwi yaytak timapni hene, ig awna: “Ya ini amekene Moís gikumadukan? Mmahki in kawih gidahankis hiyeg?” Nukebyuvwi, nah akkite yit. In kawih adahan areketni gitkis hiyeg ku samah ignes taraksa Uhokri gihiyekemni. Adahanikwa ini in ekkepka gitkis hiyeg gavit amekene Moís. Igkisme ahj akki gitkis nerras hiyeg ku inakni gikumadukan inyewa giwntakwa Kiyavwiye Uhokri. In kawih gidahankis ininewa he ner amekene Abraawh gihiwhi danuhnek. Mmanawa ig Kiyavwiye Uhokri ikakse kabayka git ner gihiwhi he gikannen.

²⁰ Kuri nukebyuvwi ku aysaw pahavwi ikaksa kabayka gitkis hiyeg he gikannen, ig ka muwaka pahavwinema hiyeg akiw adahan avuriwne neras hiyeg baki igkis inyewatma iha ini gahegbetawni gikakkis. Nikwe ig Kiyavwiye Uhokri ka ikaksa ini kabayka git amekene Abraawh gihiwhi givitimpi pahavwi nawenyewa hiyeg akiw. Ig awna git igyewa.

²¹ Nawenetke pahavwi yaytak timapni hene, ig awna: “Ku hene nikwe, in amekene Moís gikumadukan suguh Kiyavwiye Uhokri gikaksan kabayka wotwiy.” Nukebyi, ka muwaka awna inakni hene. In amekene Moís gikumadukan in kabay heneme in ka hiya inma keh wixwiy aymuhwa gimun Kiyavwiye Uhokri adahan avanenekwatma. Wake gikumadukan hiya akehkabe wixwiy aymuhwa gimun Kiyavwiye Uhokri, nikwekam in ikeyvikam. Wixwiy ka muwakakam nawenyewatma akiw adahan in keh wixwiy humaw kibeynevwi giwtrik Kiyavwiye Uhokri.

²² Heneme in Uhokri gannasan akki ku samah madikte hiyeg taraksa gikumadukan. In akki ku madikte wanamnave awaku givathawnikis. In akki inakni kahadbe wixwiy kamaxwa givitit Kiyavwiye Jesus Cristo adahan ig watakminevwiy kahadbe wixwiy darih ini kabayka ku pariye Kiyavwiye Uhokri ikakse git.

Moís gikumadukan ukavriwten ininewa he Cristo danuhpiwanek

²³ Minikwak avit wixwiy kamaxwa givitit Kiyavwiye Jesus Cristo, usuh judeyenevwi ay awaku amekene Moís gikumadukan adahan in ukavriwten he ku aysaw ahawkanavrik danuh adahan usuh kamaxwa givitit Cristo.

²⁴ Avim ini usuh kewa bakimnayhbe. Inme amekene Moís gikumadukan in kewa pahavwibe ku pariye gannivwi adahan avuriwne bakimnayh adahan bukihne gitaraksankis giwkis. In ukavriwten ininewa he ku aysaw Cristo danuhpiwanek adahan usuh kamaxwa givitit adahan ig inyewa bukih utaraksan wow ig keh usuh kibeyne giwtrik Kiyavwiye Uhokri.

²⁵ Kurime ku samah usuh kuwis kamaxwe givitit Cristo, nikwe ini ku kavit usuh avuriwka minikwak in ka kumadukaw akiw.

Ku samah wixwiy pahavwiwa gikak Uhokri gikamakayh amun ini wixwiy hawata Uhokri gikamkayuvwi

²⁶ Innewa ukamaxwanwiy givitit Cristo Jesus, innewa keh wixwiy humaw Kiyavwiye Uhokri gikamkayuvwi mmanawa in ukamaxwanwiy keh wixwiy pahavwiwa gikak Cristo Jesus.

²⁷ Madikte wixwiy ku pariye kawihkiska givitit Cristo, ig Cristo ay uvitwiy.

²⁸ Kuri wixwiy madikte hehpekuye giwtrik Kiyavwiye Uhokri. Ku pariye judeyene, ku pariye kane judeyenema, ku pariye ibukti, ku pariye kane ibuktima, ku pariye awayg, ku pariye tino, wixwiy madikte hehpekuye giwtrik Kiyavwiye Uhokri. Wixwiy pahavwiwa pawtak kuri awaku ku samah wixwiy pahavwiwa gikak Cristo Jesus.

²⁹ Ku samah wixwiy pahavwiwa gikak Cristo, nikwe wixwiy hawata amekene Abraawh gihiwhi. Amun ini nikwe wixwiy darih inwata kabayka ku pariye Kiyavwiye Uhokri ikakse git amekene Abraawh gihiwhi.