Gálatas 2 - Uhokri Gahegbetawni Nukune akak Sawmus

Nuhiyekemni hehpekuye ku samah Cristo giwatnivwi pitatyevwi

¹ Ariwnteke ini madikawku kamukri akak paxkabu arawna (14), nah diyuhe avitit Jerusalém akiw. Kiyavwiye Barnabe tivik nuhapti. Usuh iwe kiyavwiye Titu hawata tivik uhapti.

² Nah atak atere awaku igwa Kiyavwiye Uhokri akki nutuh ku ig muwaka nah atere. Usuh danuh atere, nah akkamnih gitkis Jesus gihiyegavu ayge ku pariye nnetni gitkis hiyeg kane judeyenevwima. Nah akkamnihni gitkis igkiswonakis neras ku pariye wewkisnevwi Jesus gihiyegavu ayge kahadbe igkis hiyap ba nah akki tarakisnema iwit. Nah akkamnihni gitkis ku nawenetke igkis ikiy nnetni he nukehbetannenwa he waditnevyenen.

³ Kibeyne, igkis amava inakni nuwnuh kabayntiwa. Igkis ka muwaka nah uniyeh nnetni aynesnima. Ig kiyavwiye Titu ayge nukakuh. Ig ka judeyenema. Ig ka hiwhkama givit ku samah usuh judeyenevwi uhiyekemni. Heneme igkis ka mpiksig adahan ig hiwhka. Igkis awna: — Ka sam. Ig ka judeyenema.

⁴ Heneme ayteke hiyeg danuh atere ku pariye kanumwa ukebuyvwiy Jesus gihiyegavu bawa he giwnkisnen. Igkis danuh he yawayanen adahan ku samah wixwiy isahptaw ariw judeyenevwi gihiyekemnikis givitimpi Cristo Jesus. Igkis awna wotuh: — Mmahkay yis ka hiwhkise Titu givit? Amawka wixwiy mpiksaptih madikte Jesus gihiyegavu adahan ignes iha judeyenevwi gihiyekemnikis.

⁵ Usuh hiyapni hene, usuh ka ihpekere inakni giwnkis aynesnima. Mmanawa usuh muwaka yis wew avanenekwa akak Uhokri gihiyekemni inyewatnene. Usuh ka muwaka in payebdakaw akak judeyenevwi gihiyekemnikis.

⁶ Igkisme neras ku pariye wewkisnevwi Jesus gihiyegavu ayge, igkis ku pariye kiyatyevwi ayge, igkis tuguhkis gihiyekemnikis hehpekuye nukakuh. Igkis ka muwaka nah uniyeh nnetni aynesnima. Heneme uyay ka iha hiyeg giwnkis ininewatma awakuma ku samah ignes kiyatyevwi giwtrikkis hiyeg amedgenevwi inin. In ka samwa nutuh aynesnima. Ka innema keh Kiyavwiye Uhokri kiyatha pahavwi.

⁷ Heneme kibeyne, igkis neras kiyatyevwi igkis hiyakni ku ig Kiyavwiye Uhokri awahkiswen hawata ku samah ig awahkise kiyavwiye Pedru. Igme kiyavwiye Pedru awahkiska adahan ig ekkene Kiyavwiye Uhokri ginetni gitkis hiyeg judeyenevwi. Nahme awahkiska adahan nah ekkene Kiyavwiye Uhokri ginetni gitkis hiyeg kane judeyenevwima.

⁸ Ig Kiyavwiye Uhokri kawihe usuh piyamate. Ig ike givitit kiyavwiye Pedru ini gannu adahan ig humaw ka gannusima adahan ekkene Kiyavwiye Uhokri giwn gitkis hiyeg judeyenevwi. Nah hawata ig ike nuvitit inin nannuh adahan nah ekkene Kiyavwiye Uhokri giwn gitkis hiyeg kane judeyenevwima.

⁹ Ig kiyavwiye Tiyagu gikak kiyavwiye Pedru, gikak kiyavwiye Joawh, igkis ku pariye Jesus gihiyegavu aygnenevwi kamew givititkis, igkis hiyapni hene ku samah ignewa Kiyavwiye Uhokri awahkisun, igkis sumuhe nuwakuh giwtrikneswa madikte hiyeg ku pariye pahadguvu ayge. Igkis awna wotuh: — Wixwiy kehne pahatwowa annivwit. Usuhme ekkene Kiyavwiye Uhokri giwn gitkis hiyeg judeyenevwi. Pisme gikak kiyavwiye Barnabe yis ekkene Kiyavwiye Uhokri giwn gitkis hiyeg ku pariye kane judeyenevwima.

¹⁰ Ininewa pahat arikna usuh muwaka adahan yis keh akiw, kiyenabay ukebyuvwiy madiptavye ay ubetuh ay Jerusalém adahan yis amnihsgikis gitkis ukebyuvwiy ayteke. Nah timapni hene, nah ayipa ahegbet adahan nah kehne hene akak madikte nubetki.

Nah akki Pedru gitaraksan git

¹¹ Heneme ariwnteke ini ig kiyavwiye Pedru ayta danuhpene wotuh atan avitit paytwempu Antiyokiya. Ayge ig kabahte uniyehkise gihiyekemnikis ukebyuvwiy ku pariye kane judeyenevwima adahan igkis wew akak judeyenevwi gihiyekemnikis. Nah hiyapni hene, nah awna gikak pahepkatak adahan nah ekkene gitaraksan git. Kuri, nah akkite yit ku samah in humaw.

¹² Ig danuh atere wotuh, ayge ig axnenekwa takunipti payak gikakkis ukebyuvwiy ku pariye kane judeyenevwima. Ayteke kiyavwiye Tiyagu gidahewekten danuh atere. Ig kiyavwiye Pedru hiyapni hene, ig higihwe ayteke giwkis ukebyuvwiy kane judeyenevwima ke wotbe ig ka axkere gikakkisbe. Ayge nikwe ig ax avawyewa giwkis awaku ig marekevwe gibohrikis kiyavwiye Tiyagu gidahewekten. Ig marekevwe gibohrikis awaku gitkis ka kabay adahan judeyene ax gikak kane judeyenema ku pariye kane hiwhkama givit.

¹³ Neras judeyenevwi ayge ku pariye kamaxwenevwi givitit Kiyavwiye Jesus igkis hiyapni hene, igkis yamehevwe hawata ke kiyavwiye Pedrube. He igkis wagese kiyavwiye Barnabe gihiyekemni hawata.

¹⁴ Igkis ka keh wadit. Igkis ka inyewatma ihpene Kiyavwiye Uhokri ginetni. Igme Kiyavwiye Uhokri gimawkan adahan madikte gihiyegavu darihwak pawtak. Nah hiyapni hene, nah awna gikak kiyavwiye Pedru giwtrikneswa madikte hiyeg. Nah awna git: — Pis judeyene heneme avit kiyavwiye Tiyagu gidahewekten danuh atan pis ikaw hawata ke ukebyuvwiybe ku pariye kane judeyenevwima. Pis darihwak gikakkis. Amun ini pis ka ihpenema uhiyekemniwiy wixwiy judeyenevwi. Pis awna: “Ka sam. In kabay git Uhokri”. Pedru, ku piswa ka iha ini uhiyekemniwiy, mmahki pivewkan kuri pis wageswiye neras ukebyuvwiy ku pariye kane judeyenevwima adahan igkis iha uhiyekemniwiy?

¹⁵ Wis anaktintak judeyene. Wis ka kema nerasma kane judeyenevwima ku pariye kane hiyak hawkri.

¹⁶ Wis anaktintak judeyene heneme wiswa hiyak ku ini ku samah pahavwi ihpene uhiyekemniwiy, ka innema keh Kiyavwiye Uhokri hiyavgi ig kibeyne giwtrik. Heneme ku wixwiy kamaxwa givitit Cristo Jesus innebaki keh ig hiyavwiy kewa kibeynevwibe giwtrik. Inneki keh wixwiy judeyenevwi hawata kamaxwa givitit Cristo Jesus kahadbe Kiyavwiye Uhokri hiyavwiy kewa kibeynevwibe giwtrik ka awakuma ku samah wixwiy ihpene uhiyekemniwiy heneme awaku ku samah wixwiy kamaxwene givitit Cristo. Ig Kiyavwiye Uhokri ka hiyap pahavwinema hiyeg kibeyne giwtrik awakuma ku samah ig ihpene judeyenevwi gikumadukankis. Henewatbaki nah awna git kiyavwiye Pedru.

Cristo ka keh hiyeg humaw taraksavye

¹⁷ Ku aysaw wixwiy iveg givitit Cristo adahan ignewa keh wixwiy kewa kibeynevwibe giwtrik Uhokri, nikwe wixwiy ka wew avigkutavrik judeyenevwi gikumadukankis akiw. Nawenetke pahavwi hiyap gaytakis Uhokriyanvu ku pariye ka hiwhkama givitkis, ig hiyap gaytakis akiw ku pariye ax pakir arih. Ig hiyapni hene ig awna: “Yis tarakse Uhokri gikumadukan. Nikwe nutuh yikamaxwan givitit Cristo keh yis humaw taraksavye”. Nukebyuvwi, inakni iwit ka wadit. Cristo ka kehti hiyeg humaw taraksavye.

¹⁸ Heneme ku wixwiy diyuhe amin ini hiyakemniki ku pariye wixwiy kuwisnene miniw ariw, amun ini nikwe wixwiy inyewa tarakse.

¹⁹ Innewa judeyenevwi gikumadukankis, in womhasepten avatra utaraksanwiy nikak. Nah hiyapni hene, in ke wotbe nahwa umahkiswe niw adahan nah ka wew nikak akiw heneme adahan nah wew gikak Kiyavwiye Uhokri.

Nah daddahkis nuhiyekemni amadgaya inin

²⁰ Mmanawa in ke wotbe nah kuwis daddahkise nuhiyekemni minikweknene aminat Cristo giyaknibe. Amun ini ku samah ig umahkiswe minikwak in hawata in ke wotbe in umahkiswebe payak gikak. Nikwe in ke wotbe nah miyarevyebe ay amadga inin. Yis hiyavun ke wotbe nahnebe ay bawa ka nahnema. Cristobaki, ig ay nuvituh. Ku samah nah aynete amadga inin kuri, nah kamaxwenenekwa givitit Kiyavwiye Uhokri gikamkayh ku pariye amnihpen ku pariye umahkiswe nudukwenavrik giwnteknewa.

²¹ Nah ka tukuhwekere ariw ini Kiyavwiye Uhokri gabay. Wake judeyenevwi gikumadukankis keh wixwiy humaw kibeynevwibe, nikwekam ig Cristo umahkiswe he waditnevyenenkam.