Gálatas 1 - Uhokri Gahegbetawni Nukune akak Sawmus

Nah Pol awahkis kabayka yimin

¹ Nah Pol, Uhokri giwatni. Nah awahkis inin kagta yimin. Ig Kiyavwiye Jesus Cristo ignewa nawahkisten gikak Wigwiy Kiyavwiye Uhokri ku pariye kannikasevgi ariw gimiremni, igkisnewa nawahkisten. Nah ka awahkiska gavitma pahavwinema hiyeg amadgayama inin, ine Kiyavwiye Uhokri kawnata kawih hiyeg amedgenevwi inin adahan ignes nawahkisten.

² Nah gikakkis madikte ukebyuvwiy Jesus gihiyegavu ku pariye ay nukakuh, usuh awahkis kabayka yimin yis Jesus gihiyegavu galasiyenevwi.

³ Ig Wigwiy Kiyavwiye Uhokri gikak Ukivarawiy Jesus Cristo gabaykis yikaknek. Igkis kariswehse yiyakninek.

⁴ Kibeyne, ig Kiyavwiye Jesus Cristo igwa umahkiswe udukwenavrikwiy adahan katiwnihpiye utaraksanwiy. Ig umahkiswe kahadbe wixwiy isahptaw ariw inin hawkri ahiyekemni mbeyevyenen. Henewa Wigwiy Kiyavwiye Uhokri gimawkan.

⁵ Kibeyne gidahan Kiyavwiye Uhokri takunipti adahan avanenekwa. Ameh.

Ka ba yi iha kinisekevutnevwi ginetnikis

⁶ Nukebyuvwi nah wakaymni yidahan ka aynsima. Ig Kiyavwiye Uhokri humekwewiy adahan wixwiy misakwa akak Cristo gabay. Hiyaksa yisme aynewa yis isahkiswe giw adahan yis ihpene nawenyewa hiyakemniki akiw ku pariye yis ikiy ku in kibeyne.

⁷ Bawa yumahwa kibeyne hiyakemniki akiw. Nah time yak ku gaytakis hiyeg ayge yibet igkis matekbetene yihiyekemni. Igkis yiwegespitni ariw inakni unetni yit gimin Cristo ku pariye usuh kuwis ekke yit.

⁸ Kuwis usuh ekke yit Kiyavwiye Uhokri ginetni ku pariye inyewatnene. Ku pariye hiyeg ayta akka yit nawenyewa inetit ariw inakni, ig Kiyavwiye Uhokri hiyapkis gitkisnek. Wake usuhnewa ekkene yit nawenyewa inetit akiw, ig Kiyavwiye Uhokri hiyapkiskam wotuhnek. Wake pahavwi ahj muhuke inuriktak ig ekkene nawenyewa inetit wotwiy akiw, ig Kiyavwiye Uhokri hiyapkiskam gitnek.

⁹ Kuri nah akkite yit akiw ku pariye amakohnokwa usuh akki yit. Ku hiyeg ayta ekkene yit inetit nawenyewa ariw inakni ku pariye usuh kuwis ekke yit, ig Kiyavwiye Uhokri hiyapkis gitkisnek.

Nah ka aharitnema adahan hiyeg batek nukakuh

¹⁰ Igkis hiyeg matekbetenevwi yihiyekemni igkis awna numinuh ku inakni nnetni ka ariknawnema. Igkis awna ku nah he awna inetit ku pariye hiyeg batek timap. Bawa ka henema, nukebyuvwi. Nah ka aharitnema adahan hiyeg amedgenevwi inin adahan ignes batek nukakuh. Nah aharitne adahan ignewa Kiyavwiye Uhokri batek nukakuh. Nah ka kehnema hiyeg amedgenevwi ininma gibetkikisnen. Wake nah kehnebe hiyeg amedgenevwi inin gibetkikisnenwatbe, nikwekam nah Cristokama gibukam.

Ignewa Cristo akki gihiyekemni nutuh

¹¹ Igkis hiyeg hawata awna ku nnetni ka giwntakwatma Kiyavwiye Uhokri. Nukebyuvwi, nah ikene yinetni ku avim inin kahadbe yis hiyakni kabayntiwa ku inakni nnetni kawki gikehbetanma pahavwi hiyeg amadgayama inin.

¹² In ka akkaka nutuh gavitkisma hiyeg amedgenevwima inin. Kawki igkisma nukannuhten. Ignewa Kiyavwiye Jesus Cristo ku pariye akkin nutuh abet nuhiyekemni.

¹³ Yis kuwis timap nakuh ku samah minikwak nah wewnete akak judeyenevwi gihiyekemnikis. Avim ini nah keh mbeyevye hawkri gikakkis Kiyavwiye Uhokri gihiyegavu. Numawkan nah pisenwevye akak ini gihiyekemnikis. Nah mpiksaw gitivutkis akak madikte nudatni. Mmanawa ke nutuhbe ignes suguhnebe Kiyavwiye Uhokri.

¹⁴ Avim ini nah aharitpiye ininewa judeyenevwi gihiyekemnikis. Nah iwte gihiyekemnikis giwkis ka aynsima nukebyuvwi judeyenevwi ku pariye nukekwenevwi. Mmanawa nah mpiksaw ka aynsima adahan nah kehne ku samah amekenegben gihiyekemnikis.

¹⁵ Heneme kibeyne, avit nah amadga wayk ig Kiyavwiye Uhokri ayipa kaniyven kuwis. Ayteke nikwe ig humekwen gimkat akak gabay adahan nah humaw gihiyega.

¹⁶ Ig akki gikamkayh nutuh adahan nahme gekketni gitkis hiyeg ku pariye kane judeyenevwima. Nah hiyapni hene, nah ka atak kibehtenwatma gitkis hiyeg amedgenevwi inin adahan igkis nukannuhten amin Cristo gihiyekemni.

¹⁷ Nah ka atak gimkatkis Kiyavwiye Jesus giwatnivwi pitatyevwi ku pariye misekwenevwi aynte Jerusalém. Heneme nah tivik temkete amadgate amatap kewye Arabyamnaw. Nah danuh atere, ayge igwa Kiyavwiye Jesus Cristo nukannuhten. Ayteke pisenwa nah diyuhe ta arimkanit paytwempu Damasku akiw.

¹⁸ Mpanabu kamukri nah mpiyasa nah ka atak atere Jerusalém. Ayteke metakwa nah atak atere gimkanit kiyavwiye Pedru adahan nah giyaweswitni atere. Nah misakwa ayge gimun adahan madikawku hawkri akak pohowku arawna (15).

¹⁹ Nah ka hiyap pahavwinema gaytakis Jesus giwatnivwi akiw. Nah hiyap ignewa Jesus gisamwi kiyavwiye Tiyagu. Yuma akiw.

²⁰ Henewatbaki in. Nah kanum Kiyavwiye Uhokri nawneve. Inin nannasan in kawki wasaymkama. Ignewa Kiyavwiye Jesus nukannuhten.

Jesus wagese nuhiyekemni madikte

²¹ Pisenwa nudawnhapni ayge Jerusalém nah tivik avitit Siriyamnaw. Nah danuh atere, ayteke nah tivik akiw avitit Silisiyamnaw.

²² Heneme Jesus gihiyegavu aynte judeyamnaw igkis ku pariye kamaxwenevwi givitit Cristo, avim ini igkis kote hiyavunte.

²³ Igkis he time nakuhnen. Hiyeg awna gitkis: “Ner ku pariye minikwak kehne mbeyevye hawkri ukakwiy, kuri ig ekkene inwata hiyakemniki ku kavitit wixwiy kamaxwa. Minikwak ig pisenwevye akak ini uhiyekemniwiy. Kurime ig ka henema akiw.”

²⁴ Igkis timapni hene, igkis kabayha Kiyavwiye Uhokri nudahan.