Filipénses 4 - Uhokri Gahegbetawni Nukune akak Sawmus

Kabeywotvinay pawtak

¹ Nikwe nukebyuvwi, nah aya yit ka yi muwaka isahkis yihiyekemni ayta giwntak Kiyavwiye Jesus. Nukebyuvwi kibeynevwi, nah kadni yiharit ka aynsima. Yis nubetkivu. Yis keh nah batek. Yis utipkis ka aynsima kabayka nutuh.

² Nah aya pit kiyavuno Epodya hawata pit kiyavuno Sintiki adahan yis kabeywotvi pawtak. Yis Uhokriyan. Ikawnay Uhokriyanbetnawa.

³ Pisme nukagmada kibeyne, nah aya pit hawata adahan pis ayavigkis watekbeta guhawkankis mmanawa egkis kannivwiyos payak nukakuh adahan ekkene Kiyavwiye Uhokri ginetni. Egkis hawata kannivwiyos payak gikak kiyavwiye Kilementi payak gikakkis nawenyevwi ku pariye giwkis tamakka amadga Kiyavwiye Uhokri gikagtan adahan dehetniki.

Uhokri kariswahsa uyakniwiy

⁴ Bateknabay yinaktin giwntak Kiyavwiye Uhokri takunipti. Nah aya yit pahaynewata akiw, bateknay yinaktin.

⁵ Ikawnay huwipegevye gikakkis madikte hiyeg. Kibeyne Kiyavwiye Jesus gidawnhan kennesa kuwis.

⁶ Ka yi muwaka kiyimwihwa akak ariknawnema. Piriyepkawnabay adahan madikte. Ayapnay git Kiyavwiye Uhokri madikte ku pariye yimawkanitnene. Kabayhanigbay abetimpi ini yiviryepkawni.

⁷ Ayge nikwe ig Kiyavwiye Uhokri kariswehse yiyakninek. Wixwiy kote pukuhate ini ku samah ig kariswehse uyakniwiy. Ig avuriw uhiyekemniwiy adahan yuma kiyimwiki parak avitit uyakniwiy. Ig keh hene awaku ku samah wixwiy pahavwiwa gikak Cristo Jesus.

Ivegminanay yihiyekemni amin hiyakemniki kibeynewatnene

⁸ Amaksemni, nukebyuvwi, nah aya yit ivegminanabay yihiyekemni amin ku pariye hiyakemni adahan kiyathaki, amin ku pariye hiyakemniki waditye, amin ku pariye hiyakemniki adahan batekka, amin ku pariye hiyakemniki barewbetye, amin ku pariye hiyakemniki kibeynewa. Ikinay yihiyekemni adahan ku pariye kabayka, adahan ku pariye hiyakemni kisnene adahan kabayhaki.

⁹ Wewnabay ku samah yis kuwis kannuhwa nuwntak. Ikawnabay ku samah yis kuwis hiyap nah ikaw. Ayge nikwe ig Uhyokri ku pariye atiwkekne kariswahwaki ig ayge yikaknek.

Kibeyne yis amnihun

¹⁰ Nah ka aynsima batek, nah kabayha Kiyavwiye Uhokri awaku ku samah yis metakwa yis ayavan akiw. Nah hiyakni ku yis kuwis battukaw ka aynsima hawkri adahan yis nayavetni heneme yis ka ik. Kurime yis metakwa ayavan akiw. Kibeyne.

¹¹ Nah ka awnakere ku nah ka amava madiptiki. Mmanawa kuwis nah kannuh batek abetnewa madikte mbeyne ku pariye danuh nutuh.

¹² Nah kannuh wew henen nuwakyekata. Hawata akiw nah kannuh wew akak mpiy ku samah numawkanitnene. Ka sam ku pariye ay nuwakuh. Nah kannuh batek avanenekwa. Ku nah kabiha, in ka sam nutuh. Ku nah mativwe, in kawnata sam nutuh. Ku nah igisye, in ka sam nutuh. Ku nah madiptivye, in kawnata sam nutuh.

¹³ Nah kadahan nawaygi adahan nah amava madikte ku pariye danuh nutuh awaku ku samah nah pahavwiwa gikak Cristo. Ignewa ikene nawaygi.

¹⁴ Heneme yis keh kabayntiwa ku samah yis amnihpen kuri ku aysaw nah abetnewa ini mbeyne.

¹⁵ Henewa yis keh. Minikwak ku samah nah kavusa akka Kiyavwiye Uhokri ginetni, yis ayavan. Akaka nutepkemni ariwntak Masedôniyamnaw yis ahegbete yinetni nukakuh adahan yis awahkis karukri numinuh nahme amavin. Yisnenwa filipiyenevwi yisnewa nayavetni hene.

¹⁶ Kibeyne, yis ka ayivwihwa adahan nayavetni. Pimavut yis awahkis kakanhawka numinuh avim ini ku aysaw nah ayge avit paytwempu Tesalônika.

¹⁷ Nah ka muwakapkam ini yikan nutuh heneme nah muwaka yis uti ini kabayka ku pariye kawih yidahan awaku ku samah yis amnihnevun.

¹⁸ Kuri nah kadahan madikte ku pariye numawkanitnene nutuh, mpiy ku samah numawkanitnene. Nah yuma numawkan akiw mmanawa nah kuwis darih yikan nutuh ku pariye yawahkisni numinuh giwaku kiyavwiye Epafroditu. Ini yikan keh Kiyavwiye Uhokri batek ginaktin ke wotbe ig ayhpiyebe imihgibe. Ig amavin akak madikte gibetki.

¹⁹ Ig Kiyavwiye Uhokri diyuhkis yiwaknek. Ig iki yitnek madikte ku pariye yimawkanitnene. Ig iki yitnek kabayka kibeynewatnene kane nikiytanisima inuriktak. Ig iki yitnek awaku ku samah yis pahavwiwa gikak Cristo Jesus.

²⁰ Kibeyne. Uyay kabayha Wigwiy Kiyavwiye Uhokri takunipti adahan avanenekwa. Ameh.

Nah awahkis kabayka yimin

²¹ Nah awahkis kabayka yimin madikte yis Cristo Jesus gihiyegavu ayge. Ukebyuvwiy ay nukakuh igkis hawata awahkis kabayka yimin.

²² Madikte Kiyavwiye Uhokri gihiyegavu ay awahkis kabayka yimin. Ignekis neras ku pariye kannivwiyevwi ay givineku kiyavwiye Sezar igkis pi awahkiste kabayka yimin.

²³ Ig Kiyavwiye Jesus Cristo gabay yikaknek.