Filipénses 3 - Uhokri Gahegbetawni Nukune akak Sawmus

Minikwak nah mpiksaw keh Uhokri gibetki akak nukehbetannenwa

¹ Nukebyuvwi, nah aya yit bateknay giwntakwa Kiyavwiye Uhokri. Kuri nah muwaka iki yit yihiyekemni ku pariye kuwis nah akki yit. Nah ka ehwa awna inakni iwit yit kahadbe yis ka taraksa.

² Pukuhpawnabay giwkis hiyeg ku pariye gihiyekemnikis kene puwiknebe mbayavye ku pariye awna: “Amawka ku yis hiwhka yivit ku samah amekene Moís gikumadukan awna. Ku yis ka hiwhkama yivit, yis ka humaw Kiyavwiye Uhokri gihiyegavu.”

³ Bawa wixwiy ku pariye inyewa gihiyegavu wixwiy ka humaw gihiyegavu awakuma ku samah wixwiy hiwhka uvitwiy, heneme awaku ku samah wixwiy kiye Kiyavwiye Uhokri givitimpi igyewa Gitip, wixwiy iveg givititnen Cristo Jesus akak madikte ubetkiwiy. Wixwiy ka iveg avitit umaviswanwiy akak ukehbetanwiynenwatma adahan innima keh wixwiy humaw Kiyavwiye Uhokri gihiyegavu.

⁴ Wake umaviswan akak ukehbetannenwa keh wis danuh git Kiyavwiye Uhokri, nikwekam ik adahan nah danuh gitkama minikwak mmanawa avim ini nah pi mpiksawte keh Kiyavwiye Uhokri gibetki giwkis madikte hiyeg.

⁵ Ku samah nnaguh sarayhun amadgat hawkri mpiyesa pahay paka nah hiwhka nuvituh adahan areketni ku nah Uhokri gihiyega. Nah pahavwi gaytakis izhaewyenevwi gikamkayhkis. Nah gihiwhi amekene Benjamih. Nah igyewa judeyene. Hawata akiw nah wageswa farisew mmanawa ignes mpiksawte adahan ihpa amekene Moís gikumadukan.

⁶ Avim ini nah mpiksaw iha amekene Moís gikumadukan he nah hiyapkis mbeyne gitkis Jesus gihiyegavu awaku ke nutuhbe ignes suguh ini gikumadukan. Nahme nutuh nah avigkutavriknawa ini amekene Moís gikumadukan. Nutuh nah ka taraksin aynesnima.

⁷ Minikwak nah nuvewkankama ku ini numaviswan akak nukehbetannenwa in keh nah uti kabayka giwntak Kiyavwiye Uhokri bawa kawa. Bawa in he wadityevyenen. Bawa inere mpithanan adahan nah uti kabayka giwntak Kiyavwiye Uhokri. Kurime ku samah nah kuwis kamaxwa givitit Cristo, ini nukehbetan in ka ariknawnema nutuh akiw.

Ininewa numawkan adahan nah mataka Cristo gihiyekemni

⁸ Henewatbaki in. Madikte nukehbetan ka ariknawnema nutuh akiw. Kuri nah hiyak Cristo Jesus nukivara. Nah pahavwiwa gikak. Ini ka aynsima kabayte nutuh ariw madikte nukehbetan. Nah padeke madikte awaku nah giharitne Cristo. Ini hiyakemniki ku pariye kibeyne nutuh minikwak, kurime in humaw nutuh ke niwbibe. Ininewa numawkan adahan nah mataka Cristo gihiyekemni.

⁹ Numawkan nah takunipti nah pahavwiwa gikak, kahadbe nah wadit giwtrik Kiyavwiye Uhokri ka awakuma ku samah nah iha amekene Moís gikumadukan heneme awaku ku samah nah kamaxwa givitit Cristo. Ini ku samah nah kibeyne giwtrik Kiyavwiye Uhokri in ka nukehbetanma nuwnteknewatma. Heneme ig Kiyavwiye Uhokri hiyavun nah kibeyne giwtrik awaku ku samah nah kamaxwa givitit Cristo.

¹⁰ Nah kuwis ahegbete nuhiyekemni adahan nah ka aynsima hiyakte Cristo gihiyekemni akiw. Numawkan nah hiyak ini gidatni ku pariye gikankasepten ariw gimiremni. Nah kuwis ahegbet adahan nah hiyap ku pariye mbeyne ig hiyap. Numawkan nuhiyekemni hawata ke gidahanbe ku samah ig umahkiswe gidukwenavrikkis hiyeg.

¹¹ Kahadbe nah hawata nah kannikasaka ariw miyaka.

Nah kote matakate Cristo gihiyekemni

¹² Nah kote matakate Cristo gihiyekemni ku samah numawkan. Nah kote danuhte avigkutavrikut ku samah Kiyavwiye Uhokri gimawkan. Heneme nah mpiksewnene adahan nah danuh avigkutavrikut ku samah gimawkan. Mmanawa ig Cristo kidiswen adahanikwa nah danuh nivigkutavrikut.

¹³ Nukebyuvwi, nah kote danuhte nivigutavrikut heneme nah akkite yit pahatwowa arikna nah keh. Nah ikaw ke pahavwibe ku pariye danuhkere kibehtenwa aharit kibeyne kabayka. Ig ka sarayh givegi giharavrikut butte. Ig sarayh givegi han pitatit. Nah hawata nah wiwh nuhiyekemni ariw nuhiyekemni minikweknene. Nah ivegminene nuhiyekemni aminnenwa Cristo gihiyekemni. Ini pahatwowa arikna nah keh.

¹⁴ Nah mpiksewne adahan nah hiyap ba nah huwit avigkutavrikut ku samah Kiyavwiye Uhokri gimawkan kahadbe nah wagehnene kahadbe nah mataka ini kabayka ku kadahan Kiyavwiye Uhokri awnasawiy awaku ku samah wixwiy pahavwiwa gikak Cristo Jesus.

¹⁵ Amawka wixwiy ku pariye kuwis avigkutavrik ku samah Kiyavwiye Uhokri gimawkan amawka wixwiy wew akak inwata hiyakemniki adahan wixwiy mpiksaw wew pi waditte akiw adahan avigkutavriknawa. Ku kiney wixwiy tarakse ig Kiyavwiye Uhokri akki wotwiynek.

¹⁶ Ku wixwiy wew wadit ku samah Kiyavwiye Uhokri kuwis akki wotwiy, ayge nikwe ig woka uhiyekemniwiy akiw adahan wixwiy wew pi waditte akiw.

¹⁷ Nukebyuvwi, ahehpanay ku samah nah wew. Ivegnay hawata givititkis neras ku pariye wewnevwi ke usuhbe adahan yis ahehpigkis ku samah igkis wew.

Ka aynsima hiyeg isaksaw arit gimirihwankis amadgaya inin

¹⁸ Mmanawa ka aynsima hiyeg ay ka wew kema usuhma. Ayipa nah kuwis kinetihwa yit giminkis ka aynsima. Kuri nah kinetihwate yit pahaynewata akiw. Nah ivegminene nuhiyekemni giminkis he nah suke nukantak. Igkis suguhne ini Cristo gihiyekemni ku samah ig umahkiswe amin giyakni.

¹⁹ Igkis kuwis kiduhe hanpa arimkanit biyukwiki. Igkis isaksaw arit gimirihwankis amadgaya inin. Innewa humaw giwohkigakis. Igkis ka mara akak gitaraksankis. Igkis pi kehpiva giwantikis akak gitaraksankis. Igkis ivegminenekwa gihiyekemnikis amin arikna amadgaya inin.

Wixwiy inurikyenevwi

²⁰ Wixwiyme ka henema, nukebyuvwi. Wixwiy inurikyenevwi. Kuri wixwiy wahepne wamnihtenwiy Kiyavwiye Jesus Cristo ku aysaw ig ayta inuriktak

²¹ adahan wageswiye inin uvitwiy ku pariye amadgaya inin. Ayge ig wages uvitwiy adahan in humaw inurikyene ke gidahanbe. Ig awegeswitni akak ini gidatni ku kakak ig kumaduka madikte arikna.