Filipénses 2 - Uhokri Gahegbetawni Nukune akak Sawmus

Ikawnay ke wotbe yis pahavwiwatbe hiyeg pawtak

¹ Yis keh nah batek nnaktin ka aynsima heneme nuvewkan muweke yit aynesa yihiyekemni adahan yis keh nah batek nubetkiyavriknawa. Ba ik adahan nah, yikebyi Jesus gihiyega, iki yihiyekemni aynesa akiw? Kibeyne, wixwiy Jesus gihiyegavu iwenekuye wawaygiy giwntak Cristo. Wixwiy darihnekuye gamnihra. Wixwiy darihweknekuye gikak Kiyavwiye Uhokri Gitip. Wixwiyweke amnihak pawtak.

² Inneki keh nah aya yit numawkan yis ikaw pahatwowa yihiyekemni, pahatwowa yibetki pawtak, ke wotbe yis pahavwiwatbe hiyeg pawtak.

³ Nah aya yit numawkan yis ka kiye yivitnenwatma. Numawkan yis ka ikaw kiyatema giw pahavwi. Heneme ikawnay ke wotbe yis yumahbe yikiytanibe. Ikiynabay nawenyevwi hiyeg ku igkis pi kiyate yiw.

⁴ Ka ba yi muwaka kiye kabayka yidahanyekatnema. Kiyenabay hawata kabayka gidahankis nawenyevwi hiyeg.

Jesus ikewvi warikap ke wotbe ig yumahbe gikiytani

⁵ Iwinabay Cristo Jesus gihiyekemni ku samah ig ka kiye givit aynesnima.

⁶ Ignewa Uhokri heneme ig ka iveg avitit ini gibunuga ku samah ig Uhokri.

⁷ Giwnteknewa ig madiptiswe adahan ig humaw kewa ibuktibe. Ig kinagsaw ig humaw hiyeg amadgaya inin.

⁸ Ig hiyeg amadgaya inin, ig ikewvi ke wotbe ig yumahbe gikiytanibe aynesnima. Ig ihpatrune giwn Wigwiy he ig umahkiswe. Pi mbayte akiw ig umahkiswe amin giyakni.

Madikte hiyeg paberetusawnek gitivut Jesus

⁹ Inneki keh ig Kiyavwiye Uhokri keh ig humaw pi kiyate mpiy madikte hiyeg. Ig keh giw pi kiyathakante ariw madikte hiyeg giwkis.

¹⁰ Nikwe aysawnemenek madikte hiyeg inurikyenevwi, gikakkis madikte hiyeg amedgenevwi inin, gikakkis madikte hiyeg miyaravye anaviyavu wayk, igkis kiyathenekuye Kiyavwiye Jesusnek. Avim ini igkis paberetusawnek gitivut adahan igkis kumadukasewviyes git.

¹¹ Igkis madikte awnenekuye: — Jesus Cristo igi Ukivarawiy. Inneki keh Wigwiy Kiyavwiye Uhokri ig kabayhaka.

Igwa Uhokri wawayghetniwiy

¹² Nukebyuvwi kibeynevwi, yis avanenekwa iha nuwnuh ku aysaw nah ayge yibet. Kuri nah pi muwakate yis iha nuwnuh ku aysaw nah yuma ayge. Kuwis ig Kiyavwiye Uhokri keh wixwiy isahptaw ariw mbayka. Nikwe uyay ka isaksaw arit mbayka akiw. Uyay keh kabaykanenwa. Ihpanay Kiyavwiye Uhokri giwn akak madikte yikiytani akak madikte yavisni ku nawenetke yis tarakse.

¹³ Mmanawa ignewa Kiyavwiye Uhokri keh wixwiy kehkere gibetki. Ig hawata ikene wawaygiy adahan wixwiy avanenekwa kehnenekwa ini gibetki.

Humawnay ke abukribe giwtrikkis hiyeg

¹⁴ Nah aya yit adahan avanenekwa yis ka awnptaw adahan yis ka karatonaw.

¹⁵ Marihwa yis yuma yitaraksan giwtrikkis hiyeg, ine ay avit yiyakni. Ikawnabay Uhokriyanbetnawa ay gibetkis hiyeg. Ka yi muwaka keh aynesnima mbayka. Hiyawa yis misakwa ay gibetkis hiyeg kane givathawnikisima kane wadityevwima, yisme amawka yis ikaw kabayntiwa yuma yivathawni. Humawnay ke abukribe giwtrikkis hiyeg adahan yis uguhne gihiyekemnikis akak

¹⁶ iwit kibeyne ku pariye keh igkis aymuhwa gimun Kiyavwiye Uhokri adahan avanenekwa. Ku yis wew hene, nikwe nah batek ka aynsima avim ini hawkri ku aysaw Cristo ayta adahan hiyekne gikakkis hiyeg. Avim ini nikwe nah batek ka aynsima ku samah nannivwi numaviswan ayge yibet in ka waditnevyenenma.

Bateknabay ke nahbe

¹⁷ Nukebyuvwi, ini yikamaxwan ku samah yis kamaxwene givitit Kiyavwiye Jesus ini humaw ke nukanhube git Kiyavwiye Uhokri. Nawenetke nah umehpika avatra ku samah nah ekkene ginetni yit, heneme in ka sam nutuh. Ku nah umahkiswa yidahan, in batekka nutuh. Nah muwaka ibakha ini batekka yivuwiw.

¹⁸ Numawkan yis hawata batek ke nahbe adahan yis batek payak nukakuh.

Nah awahkis Timotyu atere iwasavyi

¹⁹ Gikak Kiyavwiye Jesusnek nah awahkis kiyavwiye Timotyu kiberemin atere yimin adahan nah timepne yak ku samah yiwskawni ayge kahadbe nah batek nnaktin.

²⁰ Ig kiyavwiye Timotyu ig inyewa batekye yikak ig wakaymni yidahan hawata ke nahbe. Yuma hiyeg kema igma.

²¹ Mmanawa madikte hiyeg aharit kabayka gidahankisnen, gidahanme Jesus Cristo ignes ka aminama.

²² Igme kiyavwiye Timotyu ka henema. Yis kuwis hiyak ku samah ig kibeyne kabivwiye. Ig ekkene Kiyavwiye Uhokri ginetni payak nukakuh kewa ikamkayhtibe gikak igtibe.

²³ Nikwe ku aysaw nah hiyak ku pariye arikna danuh nutuh ay, nah awahkisgi atere yimin.

²⁴ Gikak Kiyavwiyenek nah hawata danuhpa atere yit kiberemin.

Kuri nah awahkis Epafroditu yimin

²⁵ Ke nutuhbe nah awahkis kiyavwiye Epafroditu diyuh atere yit pisenwate. Kibeyne, yis awahkisgi atan nutuh adahan nayavetni nukavriwten. Nah batek gikak ke wotbe ig nukebyibe. Ig kannivwiye mpiksaw payak nukakuh.

²⁶ Heneme kuri nah awahkiswig ig diyuhe yit mmanawa ig kadni yiharit madikte. Ig wakaymni ku samah yis time gak ku ig kakahrip.

²⁷ Henewa ig kakahrivwa ig. Kaba ig miyap. Heneme, kibeyne, Kiyavwiye Uhokri amnihpig ig hawkemnihwa akiw. Hawata akakwata ini ig Kiyavwiye Uhokri amnihpen adahan nah ka kiyimwih nnaktin akiw.

²⁸ Nah awahkisgi yimin kibehtenwa kahadbe yis hiyavgi yis batek yinaktin akiw. Ini mpiyesa madikte kiyimwihwaki abetitak nuhiyekemni.

²⁹ Amavanigbay akak batekka akak kabayhaki gidahan Kiyavwiye Uhokri. Kiyathanigbay ku samah akisyi gidahan.

³⁰ Mmanawa ig ka kavigsa givit ay adahan ig kannivwiye gidahan Cristo he ig kakahrip. Ig kaba umahwe awaku ku samah ig nayavetni yidahan.