Filipénses 1 - Uhokri Gahegbetawni Nukune akak Sawmus

Usuh awahkis kabayka yimin

¹ Nah Pol gikak kiyavwiye Timotyu ku pariye gibukvig Jesus Cristo, usuh awahkis kabayka yimin yis Cristo Jesus gihiyegavu ayge avit paytwempu Filivus. Hawata usuh awahkis kabayka yimin yis giwewkistenkis ayge. Hawata usuh awahkisni yimin yis ku pariye hiyeknevwi gikakkis Jesus gihiyegavu ayge.

² Wigwiy Kiyavwiye Uhokri gikak Ukivarawiy Jesus Cristo gabaykis yikaknek. Igkis kariswehse yiyakninek.

Nah piriyepkewne yidahan

³ Avanenekwa ku aysaw nah ivegminene nuhiyekemni yidahan, nah kabayha Kiyavwiye Uhokri yidahan.

⁴ Ku aysaw nah piriyepkaw yidahan, avanenekwa nah piriyepkaw akak ka aynsima batekka.

Kibeyne yis ayavan

⁵ Nah kabayha Kiyavwiye Uhokri awaku ku samah yis ayavan adahan nah akki Kiyavwiye Uhokri ginetni muwapuw. Ku samah yis wagese yihiyekemni minikwak, nikwe yis kavusa ayavan adahan avanenekwa. Kibeyne.

⁶ Nah hiyakni ku Kiyavwiye Uhokri ku pariye wageswiye yihiyekemni, ig wagesninek kabayntiwa avigkutavriknawa ku samah gimawkan kuri aytakihan he amaksemni hawkrinek ku aysaw Cristo Jesus danuh adahan ig pisenwevye akak inin hawkri.

⁷ Ik adahan nah iveg yivitit hene mmanawa nah batek yikak kabayntiwa avititakwa nuyakni. Kibeyne yis ka mara nukakuh ku samah nah ay ariku parakseket. Yis nawnamnihten. Yis ekkene gitkis hiyeg ku nah awnene kibeyne inetit, yis hawata yis ekkene inwata kibeyne inetit. Nikwe ig Kiyavwiye Uhokri iki yawayginek hawata ku samah ig iki nawaygi.

⁸ Ig Kiyavwiye Uhokri hiyakni ku nah inyewa nah batek yikak mpinevevye. Ig Cristo Jesus ay nuvituh ig keh nah batek yikak hawata ku samah ig batek yikak.

Nuviryepkawni yidahan

⁹ Nah piriyepkaw yidahan adahan yis tiviknene amniheknene pawtak ka aynsima akiw, adahan yis wagahkisnene yihiyekemni pawtak kahadbe yis hiyak ku pariye inyewatnene waditnene.

¹⁰ Kahadbe yis avuriw yihiyekemni adahan yis amava he kibeynenen hiyakemniki nibetit. Numawkan yis barewvitye yuma yitaraksan giwtrik Cristo avim ini hawkri ku aysaw ig aytanek.

¹¹ Numawkan yis kehnenekwa kabayka ayta giwntak Jesus Cristo. Ayge nikwe Kiyavwiye Uhokri kiyathaka ig kabayhaka avanenekwa.

Ka sam nah ay ariku parakseket

¹² Nukebyuvwi, nah ikene yinetni kahadbe yis hiyakni ku inin mbeyne ku pariye danuh nutuh in keh Kiyavwiye Uhokri ginetni hiyakkan muwapuw.

¹³ Kuri madikte kiyavwiye Sezar gisuwtatavu ay payak gikakkis madikte nawenyevwi hiyeg igkis hiyakni ku nah ay ariku inin parakseket awaku ku samah nah kinetihwene gimin Cristo.

¹⁴ Hawata akiw kaba madikte ukebyuvwiy ku pariye kamaxwenevwi givitit Kiyavwiye Jesus igkis ka aynsima gibokakkis akiw adahan ekkenes Kiyavwiye Uhokri giwn awaku ku samah nah kibokaye ay parakseket.

¹⁵ Gaytakis hiyeg ay kinetihwenes gimin Cristo adahan suguhne nnetni awaku igkis atihapnan. Gaytakisme kinetihwenes gimin Cristo awaku ku samah igkis amnihnevun.

¹⁶ Igkis batek nukakuh mmanawa igkis hiyakni ku Kiyavwiye Uhokri iki nutuh ini annivwit adahan nah ekkene ginetni muwapuw.

¹⁷ Nerasme ku pariye suguhnevwi nnetni igkis kinetihwenes giminwata Cristo. Heneme igkis kinetihwenes hene ka adahanma hiyeg kamaxwa givitit Cristo, heneme adahan ignes kamaxwa avitit gidahankiswa gihiyekemnikis. Givewkankis igkis kihawnenes nukamaxka akiw.

¹⁸ Heneme ka sam nutuh. Nah batek ku samah hiyeg kinetihwene gimin Cristo. Gaytakis kinetihwenes gimin akak gihiyekemnikis kane wadit. Gaytakisme kinetihwenes gimin inyewa. Kibeyne, igkis kinetihwenekuyes gimin Cristo. Inneki keh nah batek. Ihi, nah avanenekwa batek.

¹⁹ Nah hiyepne mbeyne ay parakseket heneme nah hiyakni ku in wageswa kabayka nudahanek. In wageswa kabayka nudahan awaku yis piriyepkaw nudahan, igme Jesus Cristo Gitip ayavevun.

Nah ka muwaka Jesus mara nukakuh

²⁰ Ininewa numawkan nah ka mara akak nuvituh ay. Ininewa nuwhpan. Numawkan nah kinetihwene gimin Cristo akak madikte nuboka ku samah inpawa nah keh. Nah ka aynsima muwekepkere adahan nah ka marakwig aynesnima. Nah ka hiyak ba nah miya ay ba kawk. Heneme ku nah miyap, nah muwaka miya akak Cristo gidatni ay nuvituh. Nah ka muwaka marakwig. Hawata ku nah ka miya, nah ka muwaka nah marakwig akak nuhiyekemni amadga inin.

²¹ Nutuh ku nah misakwa ay amadga inin, ig Cristo misakwa ay nuvituh ig ekkene gihiyekemni nuvitimpi. Heneme ku aysaw nah miyanek, ayge nah ka aynsima hiyakte Cristo mpiy ku samah nah hiyakgi ay amadga inin.

²² Heneme ku samah nah aynete, ik adahan nah wagesne hiyeg gidahan Cristo. Inneki keh nah ka hiyak ku pariye kabayte nudahan. Ba adahanma nah misakwa ay adahan nah ekkene Kiyavwiye Uhokri giwn ba kawk. Ba adahanma nah miya nah tivik inurikute.

²³ Nuhiyekemni matekbet mmanawa nah muwaka nah tivik gimkat Cristo adahan nah misakwa ayge gimun inurik. In ka aynsima kabayte nudahan.

²⁴ Heneme ku nah misakwa ay amadga inin, in ka kabayte yidahan.

²⁵ Inneki keh nah hiyakni ku nah misakwa ay yikak adahan aynesa hawkri akiw. Kahadbe yis kamaxwate givitit Cristo akiw, yis batekte akiw ku samah yis kamaxwa givitit.

²⁶ Hawata akiw yis pi kabayhate Jesus Cristo akiw awaku ku samah nah kote miyate nah ayta danuha yit akiw.

Kiyaknihwanay abetnewa mbeyne

²⁷ Heneme ka samwa ku pariye danuh nutuh. Nah ayap yit amawka yis ikaw Uhokriyanbetnewa. Hiyawa nah ayta yawasay, hiyawa nah ka ayta, heneme numawkan nah tima yak ku yis kamaxwene givitit Kiyavwiye Jesus akak pahatwowa yihiyekemni. Numawkan nah timap yak ku yis mpiksewnekuye akak pahatwowa yibetki adahan yis kinetihwene gimin Cristo gitkis hiyeg kahadbe ignes kamaxwa givitit.

²⁸ Numawkan nah timap yak ku yis ka avis aynesnima gibohrikis neras ku pariye suguhnevwi yiwn. Uhokri isaksa kane uhokriyanvuma keh ku pariye mbayka igkis kehkere yikak. Nikwe ini mbayka ku pariye gikehnikis yikak in areketni huwewe gitkis ku igkis kis adahan uti mbeyne avatra ini gihiyekemnikis amebyemni. Yisme yidahan ka henema. Yis isahptawnek. Mmanawa ini mbayka ku pariye kane uhokriyanvuma gikehnikis yikak in ka kehyi ariknawnamanek. In he keh yis pi mpiksawte giharit Kiyavwiye Uhokri akiw. Ayge nikwe ig keh yis isahptawnek.

²⁹ Mmanawa ku samah wixwiy Cristo gihiyegavu, ig Kiyavwiye Uhokri iki wotwiy pitana kabayka. Ka ininewatma ig iki wotwiy ini kabayka adahan wixwiy kamaxwa givitit Cristo, heneme hawata ig iki wotwiy ini kabayka adahan wixwiy hiyepne mbeyne gidahan.

³⁰ Kuri avim inin yis hiyepne mbeyne hawata ke nahbe. Minikwak yis hiyavun ayge ku samah nah hiyap mbeyne. Kurime yis timap nakuh ku nah hiyepne mbeyne akiw. Akebwata inin mbeyne yis hawata hiyepne gidahan Cristo. Heneme ka sam. In wageswanek kabayka yidahan hawata.