Efésyus 6 - Uhokri Gahegbetawni Nukune akak Sawmus

Kiyathanay yig, kiyathanay yinag

¹ Yis bakimnayh, ihpanay yig giwn. Ihpanay yinag guwn. Ihpanay guwnkis akak Kiyavwiye Jesus gihiyekemni. Ku yis iha guwnkis hene, yis keh wadit.

² Inakni Uhokri gikumadukan. In pitatye giwn ku pariye akak ig ikaksa kabayka gitkis neras ku pariye ihpenevwi. Ig awna: — Kiyatha pig, kiyatha pinag.

³ Ku pis ihpa guwnkis, pis uti kabaykanek, pis aymuhwa kiyabawkate ay amadga inin.

⁴ Yisme awaykemni, ka yi muwaka keh yikamkayh kanaktinema yikak. Heneme aymuhnigkis kabayntiwa. Bukihnay gitaraksankis giwkis. Hiyakemnihnigkis akak Uhokri gihiyekemni.

Ihpanay yikivara giwn

⁵ Ku aysaw yis kannivwiye gidahan pahavwi, ihpanay giwnkis neras yikivara amedgenevwi inin. Kiyathanigkis kabayntiwa. Ihpanay giwnkis avititak yiyakni hawata ku samah yis ihpa Cristo giwn.

⁶ Ka yi muwaka ikaw kema pahavwima giwtrik gikivara ig kannivwiye, giharavrikme ig ka kannivwikere. Ka yi muwaka kannivwi adahannenwatma hiyeg amadgaya inin batek yikak, heneme kannivwinay awaku ku samah yis Cristo gibuk yis kehne Kiyavwiye Uhokri gibetki avititak yiyakni.

⁷ Kannivwinay akak madikte yibetki. Kannivwinay ke gidahanbe Ukivarawiy Kiyavwiye Uhokribe, ke wotbe yis ka kannivwiyema gidahan hiyegma amadgaya inin.

⁸ Mmanawa aysawnemenek igwa Ukivarawiy Kiyavwiye Uhokri katiwnihwiynek adahan ku pariye ukehniwiy ay amadga inin. Ku pahavwi keh kabayka, kabaykanewa ig Kiyavwiye Uhokri iki git. Hennebaki ig katiwnih madikte hiyeg ku pariye bukitwiyevwi ku pariye kane bukitwiyevwima.

⁹ Yisme ikivarati, amawka ku yis hawata keh kabayntiwa gikakkis yibuk. Ka yi muwaka puwimahgikis. Mmanawa aynte inurik yis kakivaranata gikakkis yibuk. Avuriwnabay. Ig Kiyavwiye Uhokri ka mpiyasa pahavwinema gikehni henenwatma.

Jesus gihiyekemni umaptentenwiy giw wavitye

¹⁰ Amaksemni nukebyuvwi, iwnay yawaygi giwntak Ukivarawiy ku samah yis pahavwiwa gikak. Kawihminawnay akak gidahanwa gidatni mmanawa ig ka gidatnisima udahanwiy.

¹¹ Wewnay ahegbetnenekwa gavit wavitye ke pahavwi suwtatbe ig wew ahegbet akak madikte giyakok. Ig kawihminaw akak gisimsa sivari adahan gimaptenten giw givetunya. Yisme ka kawihminaw akak sivarima, yis kawihminaw akak ini hiyakemniki ku pariye Kiyavwiye Uhokri iki uvititwiy adahan umaptentenwiy giw wavitye adahan ig ka kiniswiy.

¹² Mmanawa wixwiy kavetunyanata adahan wixwiy mpithigkis. Heneme ignes uvetunyavuwiy igkis ka hiyegma amadgayama inin. Igkis inurikyenevwi gikivarakis. Igkis yumanene givitkis. Igkis maygekwenevwi. Igkis mbeyevye gihiyekemnikis. Igkis detyevwi. Igkis kumadukenevwi inin hawkri ku pariye ke wotbe in abetnene amisnavyebe.

¹³ Nikwe amawka ku wixwiy kawihminaw akak ini hiyakemniki ku pariye Kiyavwiye Uhokri iki uvititwiy adahan umaptentenwiy giwkis neras wavityempu ku aysaw igkis ayta ukawihpitniwiy. Kahadbe pisenwa ukeryiwiy gikakkis, wixwiy udukweneywa tabirnene amadga hawkri akak kibeyne hiyakemniki.

¹⁴ Nikwe wewnabay ahegbetnenekwa ke pahavwi suwtatbe. Ig kawihminaw akak gikabutik adahan ig ahegbet patiptak gikakkis givetunyavu. Yisme kawihminaw akak hiyakemniki ku pariye inyewatnene. Hawata akiw ku samah ig suwtat kawihminaw akak gimaptenten gidukmadgaya, yisme kawihminaw akak Kiyavwiye Uhokri gabay adahan yuma mbayka parak avitit yiyakni.

¹⁵ Hawata akiw ku samah ig suwtat ahegbetnenekwa akak gikaswatni gikugkavrik, yisme misakwa ahegbetnenekwa adahan ekkene inakni kibeyne inetit adahan ku samah Kiyavwiye Jesus kabeyhebdih uhawkanwiy gikak Kiyavwiye Uhokri.

¹⁶ Hawata akiw ku samah ig suwtat wew akak ini arab adahan gimaptenten ariw yakot, yisme avanenekwa wew akak yikamaxwan adahan yimaptenten giw wavitye mmanawa ig ke wotbe ig wahapseptenbe akak yakot kadawehpiyebe adahan ig tuguhkisne wawaygiy.

¹⁷ Hawata akiw ku samah ig suwtat wew akak gisuvren sivari adahan mpithene gitew, yisme mpitha yihiyekemni giw wavitye. Ku aysaw ig idiswiye gihiyekemni abetit yihiyekemni, yis wiwhwa niw, mmanawa kuwis yis isahptaw niw. Ku samah ig suwtat kerye gikak givetunya akak giwana, yisme suguh wavitye akak Kiyavwiye Uhokri Gitip giwana. In giwana innebaki Kiyavwiye Uhokri giwn.

Uhokri giwn uyakok adahan suguhne wavitye

¹⁸ Suguhnig akak yiviryepkawni takunipti mataytak. Ayapnay git Kiyavwiye Uhokri adahan ig ikene yawaygi. Avanenekwa isaksanay Kiyavwiye Uhokri Gitip huwitha yiviryepkawni. Misakwanay avuriw adahan yis piriyepkaw avanenekwa. Ka yi muwaka matiswa yiviryepkawni. Misakwanay piriyepkewnenekwa gidahankis madikte Kiyavwiye Uhokri gihiyegavu.

Piriyepkawnabay nudahan

¹⁹ Uyay piriyepkaw nudahan hawata. Ayapnabay git Kiyavwiye Uhokri adahan ig iki iwit nutuh ku aysaw nah ekkene giwn. Ayapnay git adahan ig iki nuboka, adahan nah ekkene huwewe inakni kibeyne inetit ku pariye hiyeg minikwak kotenene hiyakte.

²⁰ Ku avim inin nah ay ariku parakseket awaku ku samah nah ekkene inakni kibeyne inetit. Heneme nah nudukwenewa Uhokri giwatni. Piriyepkawnabay nudahan kahadbe nah ekkene Kiyavwiye Uhokri giwn akak madikte nuboka ku samah Kiyavwiye Uhokri gimawkan nah keh.

Nah awahkis kabayka yimin

²¹ Kuri nah awahkis kiyavwiye Tikiku yimin. Ig ukebyi kibeyne. Ig kabivwiye kannivwi gidahan Ukivarawiy. Ku aysaw ig danuh aterenek, ig akki yit madikte ku samah nuwskawni ay.

²² Adahanikwa ini nah awahkisgi atere yimin, marihwa yis hiyak ku samah nuwskawni ay, in ikene yawaygi.

²³ Nukebyuvwi, Wigwiy Kiyavwiye Uhokri gikak Ukivarawiy Jesus Cristo kariswehse yiyakninek. Igkis keh yis amnihak pawtaknek awaku ku samah yis kamaxwene givitit.

²⁴ Ig Kiyavwiye Uhokri gabay yikaknek madikte yis ku pariye batekyevwi gikak Ukivarawiy Jesus Cristo takunipti.