Efésyus 5 - Uhokri Gahegbetawni Nukune akak Sawmus

¹ Wixwiy Kiyavwiye Uhokri gikamkayuvwi gibetkivu. Ku samah ukamkayh gibetki ig ahehpaw, hawata amawka ku wixwiy ahehpa Kiyavwiye Uhokri.

² Amawka wixwiy wew akak wamnihra hawata ku samah Cristo ka gamnihrasima ukakwiy. Ig umahkiswe udukwenavrikwiy adahan katiwnihpiye utaraksanwiy. Ini gamnihra keh Kiyavwiye Uhokri bateke ginaktin ke wotbe ig ayhpiyebe imihgi.

Ka yi muwaka daxtasaw arit patahwaki

³ Yis Kiyavwiye Uhokri gihiyegavu barewvityevwi. Nikwe ka yi muwaka daxtasaw arit aynesnima patahwaki. Ka yi muwaka daxtasaw arit mahayakemniki ine arit miyahawka. Ine ka yi muwaka kinetihwa pawtak nimin aynesnima.

⁴ Ka yi muwaka awna mbeyevyema iwit, ine iwit puwvuki, ine yisamanawni mbeyevyema. Ka kis adahan wixwiy Kiyavwiye Uhokri gihiyegavu awna hene. Pi kabayte wixwiy awna kabaykanen, wixwiy kibeyhene Kiyavwiye Uhokri takunipti.

⁵ Yis kuwis hiyakni kabayntiwa ku hiyeg powkemnavye, patahwavye ignes ka kawih Uhokri gikumadukan. Igkis ka kawih Cristo gikumadukan. Ine hiyeg miyarhawatruvye ignes kawnata kawih Uhokri gikumadukan awaku igkis pi batekte akak ariknebdi mpiya giw Kiyavwiye Uhokri.

⁶ Ka yi muwaka kinikiswa gitkis hiyeg ku pariye awna ku ini patahwaki ka sam. Ka ba yis hiyap ku inakni giwnkis waditnevyenen? Ig Kiyavwiye Uhokri ka batek akak ini patahwaki. Ig ivukenek hiyeg patahwavye hanpa arimkanit biyukwiki mmanawa ignes ka ihpatrunema giwn.

⁷ Ka yi muwaka darihwak gikakkis hiyeg ku pariye kehnevwi hene.

Uhiyakemniwiy ke wotbe in kabutennebe

⁸ Amawka wixwiy ka amava patahwaki abetit uhiyekemniwiy mmanawa kabutniki ka amava amisnavye nibetit. Minikwak wixwiy ke wotbe uhiyekemniwiy ay abet amisnavyenen. Kurime in ke wotbe uhiyekemniwiy ay abet kabutnikibe awaku ku samah wixwiy pahavwiwa gikak Ukivarawiy. Nikwe wewnay akak kibeyne hiyakemniki akak yihiyekemni ke wotbe kabutennebe.

⁹ Hiyeg ku pariye gihiyekemnikis kabutenne igkis ka gabaykisima. Igkis wadityevwi. Igkis awna hiyakemniki ku pariye inyewatnene. Mmanawa kabutniki ka waditnevyenenma.

¹⁰ Ku yis wew akak yihiyekemni kabutenne hene, amun ini nikwe yis keh Kiyavwiye Uhokri gibetki takunipti.

¹¹ Heneme ku pariye hiyeg misanap gihiyekemnikis, ignes gikehnikis waditnevyenen. Yuma kabayka abet gihiyekemnikis. Yisme ka yi muwaka amava ini gihiyekemnikis waditnevyenen. Heneme kehnay igkis hiyaka gitaraksankis akak yihiyekemni kibeynewa.

¹² Mmanawa ini gihiyekemnikis ku pariye ignes keh ayamaw in ka aynsima mbayka nibet. Wis marenpi kinetihwa nimin.

¹³ Heneme ku kabutniki uguh arikna, ayge nikwe ini arikna kahayak huwewe. Hawata ku hiyeg taraksavye hiyavyi yis wew akak kibeyne hiyakemniki, ayge nikwe igkis hiyeke ku gidahankis gihiyekemnikis mbeyevye. Nawenetke ini yibutni wages gihiyekemnikis adahan igkis hawata gihiyekemnikis kabutenne.

¹⁴ Inneki keh ig Kiyavwiye Uhokri awna: — Pihiyekemni ke wotbe in himaknabe. Wadisniba. Pihiyekemni ke wotbe in miyarevyebe. Kannikasanaba pihiyekemni adahan in aymuhwa akiw. Nikwe ig Cristo uguhni.

Ka yi muwaka biyuksa hawkri gidahan Uhokri

¹⁵ Avuriwnabay yihiyekemni ba in kabayntiwatma. Ka yi muwaka wew akak hiyakemniki puwvuki. Heneme wewnay akak kibeyne hiyakemniki.

¹⁶ Ku avim inin wixwiy abet kiyimwiki. Nikwe amawka ku wixwiy keh kibeyne annivwit gidahan Kiyavwiye Uhokri takunipti. Ka yi muwaka biyuksa pahaynema hawkri gidahan.

¹⁷ Ka yi muwaka ikaw kema hiyegma ku pariye kane hiyak hawkri. Aharitnay adahan yis hiyak ku pariye Kiyavwiye Uhokri gimawkan yit.

Wewnay gitiphaw Uhokri

¹⁸ Ka ba yi uwkihwa akak higapka adahan in kumaduka yihiyekemni. Mmanawa in hiyapkis ka aynsima mbeyne wot. Heneme wewnay takunipti gitiphaw Kiyavwiye Uhokri adahan ignewa kumaduka yihiyekemni.

¹⁹ Kinetihwanay pawtak akak avat gidahan Kiyavwiye Uhokri. Paknay avat kiyathene Kiyavwiye Uhokri. Paknay akak Kiyavwiye Uhokri Gitip. Paknay, agighanay git Ukivarawiy avititakwa yiyakni.

²⁰ Kabayhanay Wigwiy Kiyavwiye Uhokri giwavrik Ukivarawiy Jesus Cristo. Avanenekwa kabayhig adahan madikte ku pariye danuh yit.

²¹ Ihpaknay pawtak awaku ku samah yis kiyatha Cristo.

Ihpanay yigihgi giwn

²² Yis tinogben, ihpanay yigihgi giwn kabayntiwa hawata ku samah yis ihpa Kiyavwiye Uhokri giwn.

²³ Mmanawa awaykemni kumaduka gihayokis hawata ku samah Cristo kumaduka wixwiy gihiyegavu. Ig ke wotbe ig utewiybe. Wixwiyme ke wotbe wixwiy givitbe. Ig wamnihtenwiy.

²⁴ Nikwe amawka ku tinogben ihpa gugihgikis giwnkis kabayntiwa hawata ku samah Cristo gihiyegavu ihpa Cristo giwn.

Amnihnay yihayo

²⁵ Yis awaykemni, amnihnay yihayo kabayntiwa hawata ku samah Cristo amnihwiy wixwiy gihiyegavu. Ig amnihpewiy he ig umahkiswe udahanwiy.

²⁶ Ig umahkiswe udahanwiy marihwa wixwiy humaw gihiyegavu barewvityevwi. Ku samah pahavwi sukuhptaw akak un adahan barewvithene givit, ig hawata ig barewvithewiy wixwiy ku pariye kene givitbe. Heneme ig ka kawih un. Ig kawih Kiyavwiye Uhokri gannasan. Ku aysaw wixwiy ihpa inakni giwn, in barewbetha uhiyekemniwiy.

²⁷ Gimawkan gihiyegavu humaw kewa givitbe kane nibereswansima git. Gimawkan ini givit yuma nivathawni, yuma nimebyemni, yuma patawvitnema aynesnima. Gimawkan in barewvitye avigkutavrik ku samah gibetki.

²⁸ Amawka awaykemni amnih gihayokis hawata ku samah igkis amnih givitkis. Ku pahavwi amnih gihayo, amun ini in ke wotbe ig amnih givitwatbe.

²⁹ Yuma pahavwinema waytakwiy ku pariye ka batekma akak givit. Heneme ig avuriw givit kabayntiwa. Ig nikepten. Hawata ke Cristobe ku samah ig avuriw gihiyegavu.

³⁰ Mmanawa wixwiy ayvekuye givit Cristo.

³¹ In Uhokri gannasan awna: — Ku aysaw pahavwi awayg maripkaw, ig tivik giw gig gukak ginag. Ig hamah gukak gihayo. Amun ini nikwe egkis piyamate humaw ke wotbe egkis pahavwiwatbe guvitkis.

³² Inakni kibeyne hiyakemniki ku pariye hiyeg minikweknene kane pukuhpa. In kibeynewa. Ke nuthube in arakak adahan ku samah Cristo pahavwiwa givit gikakkis gihiyegavu.

³³ Heneme in hawata arakak udahanwiy. Amawka mpuse awayg amnih gihayo hawata ku samah ig amnih givit. Egme gihayo amawka eg kiyatha gugihgi.