Efésyus 4 - Uhokri Gahegbetawni Nukune akak Sawmus

Tuguhkisnay yihiyekemni pawtak

¹ Inneki keh nah ku pariye ay ariku parakseket gidahan Kiyavwiye Uhokri nah aya yit adahan yis ikaw Uhokriyanbetnewa mmanawa adahanikwa ini ig Kiyavwiye Uhokri humekwewiy gimkat.

² Ikawnay tuwatevye huwipegevye. Kiyaknihwanay pawtak. Ka yi muwaka kiyimwihwa akak hiyeg gitaraksankis, heneme yis amavin akak madikte yamnihra.

³ Huwithasanay yihiyekemni git Kiyavwiye Uhokri Gitip adahan ig tuguhkis yihiyekemni pahatwowa. Misakwanay ahegbet adahan tuguhkis yihiyekemni pawtak. Pasamraknay pawtak.

Wixwiy ke wotbe wixwiyweke pahavwiwatbe uvitwiy pawtak

⁴ Mmanawa wixwiy ke wotbe wixwiy pahavwiwatbe uvitwiy pawtak. Wixwiy kadahan igwata Uhokri Gitip. Wixwiy wahepne inwata kabayka. Mmanawa ig Kiyavwiye Uhokri humekwewiy madikte gimkanit.

⁵ Wixwiy madikte kadahan pahavwiwa Ukivarawiy pawtak. Wixwiy kadahan pahatwowa ukamaxwanwiy givitit. Wixwiy kadahan pahatwowa ukewvenwiy adahan wixwiy amevene ini ku wixwiy gidahan.

⁶ Wixwiy madikte kadahan pahavwiwa Uwohkigawiy pawtak, pahavwiwa Wigwiy. Ig kumadukawiy wixwiy madikte. Ig keh gannivwi ukakwiy wixwiy madikte. Ig misakwa ay uvitwiy wixwiy madikte.

Wixwiy kadahan arakembet wannuwiy

⁷ Heneme wixwiy mpuse kadahanyekuye wannuwiy ku pariye Cristo gikan uvititwiy adahan kehne arakembet kabayka. In ikaka uvititwiy ku samah Cristo gimawkan.

⁸ Henewa in ku samah Uhokri gannasan awna. In awna: — Ku samah ig wagehe inurikut ig ayipa wanekbete gihawkankis givetunyavu. Ayteke nikwe aytontak inuriktak ig kakanhaw gitkis hiyeg.

⁹ Avuriwnay inakni iwit ku samah in awna: “Ig wagehe inurikut.” Ig Cristo giwetri in aynte inurik. Ku wis hiyap ku ig wagehe inurikut nikwe in kahayak huwewe wot ku avit ini ig kuwis muhuke inuriktak atan warikwit. He ig danuhe ta warikwit ariw madikte iwetrit amadga wayk ku kiney hiyeg miyaravye giwetrikis.

¹⁰ Ig ku pariye muhuke inuriktak igwata ku pariye wagehe ta inurikut pi inute ariw madikte iwetrit aynte inurik kahadbe ig kumaduka madikte muwapuw.

¹¹ Aytohtak inuriktak ig kakanhaw gitkis hiyeg. Ig iki givititkis waytakwiy gannu adahan ignes humaw Uhokri giwatnivwi. Givititkisme waytakwiy ig iki gannu adahan ignes humaw Uhokri gawnevevu. Givititkisme waytakwiy akiw ig iki gannu adahan ignes wagesnes hiyeg gidahan Kiyavwiye Uhokri. Givititkisme waytakwiy akiw ig iki gannu adahan ignes giwewkistenkis gihiyegavu. Givititkisme waytakwiy akiw ig iki gannu adahan ignes gikannuhtenkis gihiyegavu.

Uyay tiviknene he ku aysaw uhiyekemniwiy avigkutavrik ku samah Cristo gihiyekemni

¹² Ig iki ini gannu uvitwiy wixwiy gihiyegavu adahan wahegbeteptenwiy kannivwiye gidahan, marihwa wixwiy wagahkis uhiyekemniwiy pawtak. Amun ini in ke wotbe Cristo givit aymuhwabe.

¹³ Wixwiy tiviknene hene he wixwiy madikte kamaxwa givitit Kiyavwiye Uhokri gikamkayh kabayntiwa, he wixwiy pehetenene uhiyekemniwiy gikak, he wixwiy wageswe kiyavwiyebetnawa abet uhiyekemniwiy avigkutavrik ku samah Cristo gihiyekemni.

¹⁴ Gimawkan wixwiy ka miyeh ini uhiyekemniwiy kibehtenwatma kema bakimnayhma. Ku uhiyekemniwiy hene, wixwiy humaw kewa parawbe kabobohwe awaku mayg. Ik adahan wixwiy kinikiswa gitkis hiyeg ku pariye wasaymaw wotwiy adahan ukinseptenwiy.

¹⁵ Heneme gimawkan wixwiyme awna inyewa iwit akak Kiyavwiye Uhokri gamnihra ay uvitwiy. Ig muwaka wixwiy wageswa hawata ke Cristobe, uhiyekemniwiy avigkutavrik ku samah gihiyekemni. Mmanawa ignewa Cristo utewiy.

¹⁶ Wixwiyme ku pariye pahavwiwa gikak Cristo wixwiy humaw givit. Igme kumaduka givit. Giwnteknewa wixwiy hamehbetaki givitit. Wixwiy mpuse kewa giwanbetbe. Wixwiy ayavekbet pawtak ku samah wixwiy hiya asamanak. Ayge nikwe wixwiy wagahkisak pawtak akak gamnihra ay uvitwiy. Amun ini in ke wotbe Cristo givit aymuhwenenebe.

Padekwinay yihiyekemni minikweknene

¹⁷ Kuri nah aya yit gidahan Ukivarawiy adahan yis ka wew akiw kema nerasma ku pariye kane ikewkere git Kiyavwiye Uhokri. Gihiyekemnikis waditnevyenen

¹⁸ misanap. Ka ik adahan igkis hiyak hiyakemniki. Igkis yuma Kiyavwiye Uhokri gidehetni ay givitkis awaku igkis ka hiyak Uhokri gihiyekemni. Mmanawa igkis pitihe gihiyekemnikis giw Kiyavwiye Uhokri.

¹⁹ Gihiyekemnikis ke wotbe in taretrevyebe. Igkis ka kayah ku pariye maraki. Igkis ikatuswa arit patahwakinen. Igkis uti barew gitkis. Igkis keh arakembet ku pariye kane kabay.

²⁰ Kawki henema yis kannuhwa giwntak Cristo.

²¹ Kuwis yis timap giwn yis kannuhwa giwntak ku samah yis pahavwiwa gikak. Inyewatnene hiyakemniki ay givit.

²² Nikwe padekwinay yihiyekemni minikweknene ku pariye ke wotbe tiviknene mbeynene awaku in kinikiswa arit yivit amirihwan.

Kawihminawnay akak yihiyekemni nukune

²³ Wagesnay inere yihiyekemni kuri adahan nukunewa hiyakemniki akiw.

²⁴ Kawihminawnay takunipti akak ini yihiyekemni nukune ku pariye igwa Kiyavwiye Uhokri iki uvititwiy. In kewa gidahan gihiyekemnibe. Ini hiyakemniki ka adahanma waditnevyenenma. In inyewa. In keh wixwiy wew barewvitye waditye.

²⁵ Nikwe ka yi muwaka kinisak pawtak akiw. Ka yi muwaka awna pahatnema iwit ku pariye he inetitapnen. Awnanay ku pariye iwit inyewatnene. Mmanawa wixwiyweke pahavwiwa uvitwiy pawtak. Ku wixwiy kinisekbet, in ke wotbe wixwiy huwivwihnebe uvitwiy.

²⁶ Ku yis ka batek akak pahavwi gihiyekemni, ka yi muwaka kiyimwihwa nikak adahan in taraksasevyi. Miyehpini kibehtenwa avit misanpi.

²⁷ Ka yi muwaka iki iwetrit arit wavitye gihiyekemni ay abet yihiyekemni.

²⁸ Ku pahavwi ba gamevwi, amawka ig ka amevwi akiw. Kawki inenewatma ig ka amevwima akiw, heneme kuri amawka ig mpiksaw kannivwi kibeyne annivwit kahadbe ig kadahan arikna adahan amnihne pahavwi ku pariye madiptivye.

²⁹ Ka ba yi isaksa pahatnema iwit mbeyevyema pes yibiyaptak. Heneme awnanay ku pariye kibeyne iwit adahan wagahkisne gawaygikis neras ku kakak yis kinetihwene. Awnanay adahan ikene gibunugakis.

³⁰ Ka yi muwaka wakaymnisa Kiyavwiye Uhokri Gitip. Ig barewvitye. Ig ka amava patahwaki. Ku samah ig ay uvitwiy, ig humaw areketni wotwiy ku wixwiy Kiyavwiye Uhokri gihiyegavu he ku aysaw wixwiy wageswanek avigkutavrik ku samah ig Kiyavwiye Uhokri gimawkan.

³¹ Ka yi muwaka misakwa kanaktinbetnema akiw. Ka yi muwaka kamabyanaw akiw. Ka yi muwaka misakwa dagawnawbetnema akiw. Ka yi muwaka iki iwetrit arit karatonka ine arit kanumtaki ine arit amiyhawka.

³² Amnihaknay pawtak akak madikte yamnihra. Bayahminaknay pawtak ariw yitaraksan hawata ku samah Kiyavwiye Uhokri bayahminevwiy ariw utaraksanwiy awaku ku samah wixwiy pahavwiwa gikak Cristo.