Efésyus 3 - Uhokri Gahegbetawni Nukune akak Sawmus

Nah Uhokri giwatni yimin yis hiyeg kane judeyenevwima

¹ Inneki keh nah piriyepkewnenekwa yidahan, nah Pol, nah ku pariye ay ariku parakseket givatra Kiyavwiye Jesus Cristo. Nah ay ariku parakseket awaku ku samah nah ekkene Kiyavwiye Uhokri giwn yit yis hiyeg kane judeyenevwima.

² Nuvewkan yis kuwis time nak ku samah Kiyavwiye Uhokri kaniyven akak gamnihra adahan nah ekkene ini gamnihra yit yis hiyeg kane judeyenevwima.

³ Igwa Kiyavwiye Uhokri akki nutuh ini gihiyekemni ku pariye minikwak hiyeg kote hiyakte. Inneki keh nah akkin yit amadgatak inin kagta akak inakni aynesnene iwit.

⁴ Numawkan yis ivegbohin yis pukuha ini nuhiyekemni gidahan Cristo ku pariye minikwak hiyeg kote hiyakte.

⁵ Minikwak Kiyavwiye Uhokri ka akki ini gihiyekemni gitkis hiyeg amadgayavu inin. Kurime ig Kiyavwiye Uhokri Gitip akkin gitkis giwatnivwi gikanyanvu gikakkis gawnevevu.

⁶ Nah akkite yit ku pariye ini Uhokri gihiyekemni. In adahan ku samah yis hiyeg kane judeyenevwima darih inwata kabayka ku pariye gihiyegavu judeyenevwi darihnek. Yis hawata humaw Cristo givit. Yis hawata utivwata madikte ini kabayka ku pariye Kiyavwiye Uhokri ikakse gitkis gihiyegavu. Yis utipni awaku ku samah yis amava Kiyavwiye Uhokri ginetni, yis kamaxwa givitit Cristo Jesus.

⁷ Ig Kiyavwiye Uhokri akak gabay akak gidatni ig keh nah humaw giwatni yit adahan nah ekkene inakni kibeyne inetit yit.

⁸ Nutuh nah pi warikapte giwkis madikte Kiyavwiye Uhokri gihiyegavu. Heneme ig iki nutuh ini gannu adahan nah ekkene Cristo gitkis hiyeg kane judeyenevwima, adahan nah ekkene gitkis ini Cristo gihiyekemni ku pariye kibeynewatnene.

⁹ Ig muwaka nah kahayaksa gitkis madikte hiyeg ku samah ini gihiyekemni ku pariye minikwak hiyeg kote hiyakte. Ig Uhumtenwiy humawkariwka ig ahegbete ginetni hene. Heneme ig kote akkinte gitkis hiyeg.

Kuri inurikyenevwi hiyak ku samah Uhokri ka gihiyekemnisima

¹⁰ Kurime avim inin ig Kiyavwiye Uhokri muwaka madikte inurikyenevwi gikivarakis mbeyevyenen gikakkis madikte ku pariye kumadukanevwi aynte inurik ig muwaka igkis hiyak ku samah ig ka gihiyekemnisima. Ku aysaw igkis hiyap ini kabayka ku pariye ig keh gikakkis gihiyegavu, ayge nikwe igkis hiyakni kabayntiwa ku ig ka gihiyekemnisima.

Uhokri amavawiy kabayntiwa

¹¹ Ku samah yumahte hawkri ig Kiyavwiye Uhokri ahegbete ini gihiyekemni adahan ku pariye kabayka Ukivarawiy Jesus Cristo keh udahanwiy.

¹² Kuri ik adahan wixwiy danukwa git Kiyavwiye Uhokri akak madikte ubokawiy. Wixwiy hiyakni ku ig amavawiy kabayntiwa mmanawa wixwiy pahavwiwa gikak Cristo, wixwiy kamaxwene givitit.

¹³ Nikwe ka yi muwaka dunih yiyakni ku samah nah hiyepne mbeyne yivatra. Ka ba yi barukinama. Hiyawa yis batek mmanawa ini areketni yit ku nah batek yikak ka aynsima.

Cristo gamnihra ka ayabawkasima, ka avugbokanisima

¹⁴ Ku aysaw nah ivegmina nuhiyekemni amin Uhokri gihiyekemni, in keh nah paberetusaw nah piriyepkaw ta git. Ignewa Wigwiy.

¹⁵ Igyewa igti ahawkri. Ig gigkis madikte Uhokriyanvu, neras ku pariye inurikyenevwi payak ukakwiy wixwiy amedgenevwi inin hawkri.

¹⁶ Nah piriyepkaw git adahan ig ikene yawaygi akak gabay kibeynewatnene adahan yis humaw awaygye abet yihiyekemni giwntak Gitip.

¹⁷ Adahan ig Cristo misakwa kabayntiwa ay avit yiyakni awaku ku samah yis kamaxwene givitit. Numawkan yis amava gamnihra kabayntiwa adahan in misakwa ay yivit ku samah ah ahanpabet mutuhwa kabayntiwa waykekut, in ka isahkiswa niw aynesnima.

¹⁸ Ayge nikwe yis payak gikakkis madikte gihiyegavu barewvityevwi yis ik adahan pukuha kabayntiwa ku samah in Cristo gamnihra. Mmanawa ini gamnihra in ka ayabawkasima, in ka avugbokanisima, in ka amihnisima, in ka amunisima akiw.

¹⁹ Hiyawa wis ka hiya wisma pukuhpin madikte, heneme numawkan yis hiyakni kabayntiwa. Numawkan igwa Kiyavwiye Uhokri kawihkiswa yivitit pahavwite.

Kibeyne gidahan Uhokri

²⁰ Kibeyne gidahan Kiyavwiye Uhokri. Gidatni ay uvitwiy in ka nidatnisima. Akak ini gidatni ig keh mpiy ku pariye wayapni git. Uhiyakemni ka ik adahan kawih madikte kabayka ku pariye ig keh udahanwiy.

²¹ Kibeyne gidahan Kiyavwiye Uhokri adahan madikte ini kabayka ku pariye ig keh gidahankis gihiyegavu, ku aysaw igkis pahavwiwa gikak Jesus Cristo. Uyay kabayhig akiwka akiwkanek, avanenekwa avanenekwa. Ameh.