Efésyus 2 - Uhokri Gahegbetawni Nukune akak Sawmus

Minikwak uhiyekemni ka kabay

¹ Minikwak wixwiy miyaravye giw Kiyavwiye Uhokri awaku uvathawniwiy hawata awaku utaraksanwiy gikak.

² Avim ini wixwiy wewne akak hiyakemniki amadgaya inin. Wixwiy wewne akak wavitye gikivarakis hawkrine ahiyekemni. Mmanawa ignewa wavitye gikivarakis ku pariye kumaduka hiyeg kane ihpenevwima Kiyavwiye Uhokri giwn.

³ Minikwak wixwiy madikte wewnekuye henep. Nikwe avim ini hawkri wixwiy kehne uhiyekemniwiy amadgaya inin abetki. Wixwiy keh madikte ku pariye uhiyekemniwiy tuguh, akak ku pariye umirihwanwiy ahiyekemni tuguh. Wixwiy wayvuka hawata ke madikte hiyegbe akak ini uhiyekemniwiy ay uvitwiy ku pariye Kiyavwiye Uhokri ka batek nikak aynesnima. Amun ini nikwe wixwiy ikaksaka adahan biyukwiki giw Kiyavwiye Uhokri avatra ini uvathawniwiy.

He wamnihkawiynen Uhokri amnihwiy

⁴ Heneme, kibeyne, ig Kiyavwiye Uhokri ka gamnihrasima. Ig batek ukakwiy mpinevevye.

⁵ Ig batek ukakwiy he avim ini ku aysaw wixwiy miyaravye giw awaku uvathawniwiy. Inneki keh ig kannikasevwiy ariw ini miyaka payak gikak Cristo amun ini ku aysaw ig kannikasevgi ariw gimiremni. Wixwiy ka kiseweknema adahan ig amnihwiy, heneme he wamnihkawiynen ig amnihpewiy.

⁶ Ig ke wotbe ig kuwis iwevwiybe inurikut payak gikak Cristo. Ayge nikwe ig keh wixwiy kumadukanek payak gikak Cristo aynte inurik awaku ku samah wixwiy pahavwiwa gikak Cristo.

⁷ Ayge nikwe ig ekkene akiwka akiwkanek ku samah gamnihra in kibeynewatnene. Ig akkin hene akak ku samah ig ka gabayisima ukakwiy wixwiy ku pariye pahavwiwa gikak Cristo.

⁸ Innewa gamnihra keh wixwiy isahptaw ariw uvathawniwiy awaku ku samah wixwiy kamaxwene givitit Cristo. In ka ariwntakma umaviswanwiy wowntaknema. In ayta giwntak Kiyavwiye Uhokri. In gikan wotwiy he wamnihkawiynen.

⁹ Kawki ukehbetanwiyma kabayka keh wixwiy danuh git Kiyavwiye Uhokri. Nikwe ka ik adahan wixwiy ikaw ku wixwiy kibeyne wowntekneyma.

¹⁰ Ignewa Kiyavwiye Uhokri ku pariye keh wixwiy kibeyne. Ig keh wixwiy humaw amadga inin adahanikwa wixwiy kehne ku pariye kabaykanen. Pitatye wixwiy ka keh ini kabayka. Ig hiyapni hene, ig keh uhiyekemniwiy humaw nukunewa akiw ku samah wixwiy pahavwiwa gikak Cristo. Mmanawa humawkariwka ig ikiswanaw udahanwiy adahan wixwiy kehne ini ku pariye kabaykanenwa.

Wixwiy kewa pakebyeknebe pawtak.

¹¹ Yis hiyeg kane judeyenevwima ku aysaw yis wayvuka amadga inin yis ka Uhokri gihiyegavuma. Ka aynsima hiyeg judeyenevwi ku pariye hiwhka givitkis adahan arakak ku ignes Kiyavwiye Uhokri gihiyegavu, igkis miyathay igkis kanumyi ku “yis ka hiwhkavuma yivit”. Ka yi muwaka miyeh ku samah yiwskawni avim ini.

¹² Avim ini yis avawyewa giw Cristo. Yis ka gaytakisnema Kiyavwiye Uhokri gihiyegavu aynesnima. Yis ke nawotunyevwibe git. Ka yitma Kiyavwiye Uhokri ikaksa kabayka. Yis ka wahapnema kabayka aynesnima inuriktak. Yis ka hiyak Kiyavwiye Uhokri amadga inin. Yis ka hiyak ba Kiyavwiye Uhokri ay amadgama hawkri.

¹³ Kurime yis ka henema akiw. Kuri yis pahavwiwa gikak Cristo Jesus. Yis ku pariye minikwak piyawakad giw Kiyavwiye Uhokri kurime yis kennesa gihumwa awaku ku samah ig Cristo sukase gimig udahanwiy.

¹⁴ Mmanawa igwa Cristo ig keh wixwiy kabeywotvi pawtak. Ig keh usuh hiyeg judeyenevwi yikak yis hiyeg kane judeyenevwima ig keh wixwiy kewa pakebyeknebe pawtak. Minikwak uhiyekemniwiy ibekhewbet. Avim ini wixwiy ka batekak pawtak. Igme pisenwe akak ini uhiyekemniwiy ku pariye mpithawiy pawtak adahan wixwiy ka pasamrak. In ke wotbe pahak iyarad ay uyegbiwiybe ku pariye umaptentenwiy pawtak adahan wixwiy ka darihwak.

¹⁵ Kibeyne, ig Cristo kuwis pisenwe nikak. Ku samah ig umahkiswe udukwenavrikwiy, ig keh wixwiy isahptaw ariw amekene Moís gikumadukan adahan wixwiy ka kumadukaka avit inakni giwn akiw. Nikwe ig keh wixwiy pibohranene hiyegviyene humaw pahabuwa hiyeg mmanawa wixwiyweke Cristo gihiyegavu. Inneki keh wixwiy pasamrak pawtak ay.

Wis pibohranene hiyegviyene danuh git Uhokrinek

¹⁶ Hawata ig wageswiy wixwiy pibohranene hiyegviyene avigkut ku samah Kiyavwiye Uhokri gimawkan. Mmanawa ayge amin giyakni givit pahavwiwa miya. Ayge nikwe ig bayhminase ini uvathawniwiy ku pariye Kiyavwiye Uhokri kane batek nikak.

¹⁷ Ayteke ig ayta, ig kabeywotey yis hiyeg kamaxwanevwi givitit Cristo ku pariye kane judeyenevwima ku pariye minikwak piyawakad giw Kiyavwiye Uhokri. Hawata ig kabeywote usuh hiyeg kamaxwanevwi givitit Cristo ku pariye judeyenevwi ku pariye kennesa gihumwa Kiyavwiye Uhokri.

¹⁸ Ig Cristo ignewa ahin adahan wixwiy pibohranene hiyegviyene danuh git Kiyavwiye Uhokri. Ku samah wixwiy kadahanyekuye Gitip ay uvitwiy, nikwe wixwiy danuhnekuye git Kiyavwiye Uhokri.

¹⁹ Kuri yis hiyeg kane judeyenevwima yis ka nawotunyema git Kiyavwiye Uhokri akiw. Yis kawnata nawotunyema ariw inurik. Heneme yis inurikyenevwi payak gikakkis madikte Kiyavwiye Uhokri gihiyegavu barewvityevwi. Yis Kiyavwiye Uhokri gihiyegavu kuri.

Wixwiy Uhokri givin

²⁰ Madikte Kiyavwiye Uhokri gihiyegavu igkis kewa paha paytbe gidahan Kiyavwiye Uhokri. Neras Uhokri gawnevevu pitatyevwi gikakkis Uhokri giwatnivwi igkis humaw kewa ini payt awakube. Igme Jesus Cristo ig humaw ke payt akoksabe ku pariye pi awaygte ariw madikte. Wixwiyme humaw ke abukabetbe ke avinvitbe ku pariye wagahkisbetaki givititkis.

²¹ Wixwiy ke wotbe wixwiy wanekbetaki aminat payt akoksabe mmanawa wixwiy kamaxwa givitit Jesus Cristo. Hawata wixwiy ke wanekbetakibe pawtak ku samah paha payt arewkanbet wanekbetaki pawtak. In ke wotbe wixwiy humaw paha leglis adahan kiyathene Ukivarawiy.

²² Ku samah yis hawata kamew givitit Kiyavwiye Jesus Cristo ke usuhbe, in ke wotbe yis hawata wanekbetakibe pahanene payt ukakuh adahan humewne Kiyavwiye Uhokri givin. Wixwiy Kiyavwiye Uhokri givin mmanawa Kiyavwiye Uhokri Gitip misakwa ay uvitwiy.