Ebréws 9 - Uhokri Gahegbetawni Nukune akak Sawmus

Uhokri givin amedgene inin in he arakaknen adahan Uhokri givin inurikyene

¹ In Kiyavwiye Uhokri gahegbetawni pitatye gikak amekene Moís in akki ku samah amawka hiyeg keh ay givetun Kiyavwiye Uhokri. Hawata in akki ku samah amawka igkis keh Kiyavwiye Uhokri givin. Heneme he adahan amedgenenen inin.

² Nikwe igkis ahegbete paha payt adahan Kiyavwiye Uhokri givin. In kehka akak puwikne amar. In kadahan pirikna xam. Ini pitatye xam kewye Kiyavwiye Uhokri giwskeki. Ayge ariku ini xam kadahan pahat abukri akekri ku pariye kadahan mpuse abukri ay atiwbuku atawnibdi. Aygwata kadahan pohow axtet akak Kiyavwiye Uhokri gibuguta guhamadga.

³ Aharaptakme aveynivye amaptenten ayge ini xam kewye Kiyavwiye Uhokri giwskeki kiyatenene.

⁴ Ayge avetun ini xam kadahan pohow piriyepkewket kehka karukri wahano adahan bukehne iyaygti imihnevye givetunat Kiyavwiye Uhokri. Arikume xam kadahan Uhokri gahegbetawni atiy. Egu kiyes awasvit pohowte akak karukri wahano ku kiney bayahka noras pikananano tip akak Uhokri gahegbetawni tamakave ay gumadgakis. Hawata ayge avetun ini xam kadahan pohow kagap kehka karukri wahano, ku pariye kadahan aynesa “maná” ariku ku kakak Kiyavwiye Uhokri ikap gihiyegavu minikwak. Hawata akiw aygewata ini amekene Arawh gisuga ku pariye hiyantinene akiw.

⁵ Ayge guhamadga egu kiyes kadahan gahehpakkis piyana ahj kewye “kegubih”. Igkis humaw areketni ku igwa Kiyavwiye Uhokri ayge akak madikte gikiytani. Gihanpikis digikak guvitmin egu kiyes, avitmin ini iwetrit adahan miyehkisne taraksaki git Kiyavwiye Uhokri. Madikte ini ariknebdi in arakak adahan ka aynsima hiyakemniki heneme ka ik adahan nah akkamnihni yit ku avim inin.

⁶ Avim ini ku aysaw madikte Kiyavwiye Uhokri givin ahegbet, ignes muwveg kavusa keh gannivwikis ayge. Takunipti igkis parak arikut ini pitatye xam adahan igkis kehnes ini gannivwikis.

⁷ Heneme ignewa ner pahavwi muwveg ku pariye kiyatenene ignewa ik adahan parak arikut avesrivye xam. Ig parak atere pahapo. Ig parak pahaywowa adahan pahak kamukri. He igwa ka ik adahan parak henenwatma. Amawka ku ig ewk migat atere. Ig sakta egu kiyes akak ini migat adahan nekketni givetunat Kiyavwiye Uhokri kahadbe igme mpiyasa gihiyegavu gitaraksankis ku pariye igkis kane hiyak. Pitatye ig akka migat adahan mpiyasene gidahankite gitaraksan. Butte nikwe gidahankisme gihiyegavu.

⁸ Kiyavwiye Uhokri Gitip ka isaksa madiktema hiyeg danuh givetunat Kiyavwiye Uhokri arikut ini avesrivye xam adahan marihwa in humaw arakak udahanwiy. In areketni wotwiy adahan ku aysaw hiyeg kawihne ini payt Kiyavwiye Uhokri givin amedgene inin, amun ini nikwe ahin kote wokate adahan igkis inyewa pasamrak gikak Kiyavwiye Uhokri ay gimun.

⁹ In kibeyne arakak udahanwiy ku avim inin. Ku wixwiy kakanhaw git Kiyavwiye Uhokri ku wixwiy umah puwikne udukwenavrikwiy adahan katiwnihne utaraksanwiy, in kote kehte uhiyekemniwiy avigkutavrik ku samah Kiyavwiye Uhokri gimawkan.

¹⁰ Ini hiyakemniki minikweknene in ka dax uhiyekemniwiy. He uvitwiynen in dax. In kinetihwa amin axka, amin higapka, amin ku samah wixwiy sukuhptaw. Inakni hiyakemniki kawih gidahankis hiyeg ininewa he ku aysaw Kiyavwiye Uhokri akki gitkis gihiyekemni nawenyewa akiw ku pariye kabaytenene akiw.

Uhokri givin inurikyene kiyate iwetrit adahan wawnamnihtenwiy

¹¹ Kibeyne, ini gihiyekemni ku pariye kabaytenene in kuwis ekkepka wotwiy. Cristo kuwis danuh adahan ig humaw wawnamnihtenwiy git Kiyavwiye Uhokri. Ignewa awnamnihkevutne ku pariye ka aynsima kiyatenene. Kuri ig wawnamnihtenwiy aynte amun Kiyavwiye Uhokri givin ku pariye kabaytenene ku pariye avigkutavrikte ku samah Kiyavwiye Uhokri gimawkan. Ig ayge amun Kiyavwiye Uhokri givin inurikyene ku pariye ka hiyegma amadgayavu inin gikehnikisma.

Cristo gimig kiyate ariw puwikne gimig

¹² Ig Cristo ka muwaka adahan ig danuh atere arit Kiyavwiye Uhokri giwskeki inpawatma kema muwvegma amadgaya ininma. Pahayewvi ig danuh atere kuwis. Ine ig kawnata katiwnih gihiyegavu gitaraksankis akakma kabrit gimigma kawnata akak pak gimigma. Heneme ig katiwnih utaraksanwiy akak gidahanwa gimig adahan avanenekwa.

¹³ Gitkis neras amekenegben ku pahavwi daxe miyaviye amawka ku ig saktaki akak migat adahan wiwhpiye ini givathawni givititak. Ig saktaki akak kabrit gimig, ku kawk akak pak gimig, ku kawk akak pak akamkayh gihewra. Ayge nikwe ig ik adahan ig tabira givetunat Kiyavwiye Uhokri akiw. Mmanawa ig puwikne gimig kuwis barewvithe givit.

¹⁴ Ku yis hiyap ku puwikne gimig ik adahan barewvitha uvitwiy, inkata Cristo gimig akiw? In ka aynsima kabayte akiw. In ik adahan barewbetha uhiyekemniwiy. Ig Cristo ignewa Kiyavwiye Uhokri. Kiyavwiye Uhokri Gitip dehetniki ay givit. Ig barewvitye avigkutavrik ku samah Kiyavwiye Uhokri gimawkan hene ig umahkiswe udukwenavrikwiy. Ini gimig ik adahan wages uhiyekemniwiy. In wages uhiyekemniwiy ariw ukehbetanwiy ku pariye waditnevyenen adahan wixwiy kehne gibetki Kiyavwiye Uhokri dehetniye.

¹⁵ Adahanikwa ini ig Kiyavwiye Uhokri ahegbete nawenyewa gahegbetawni ukakwiy givitimpi Cristo. Ku samah ig umahkiswe udukwenavrikwiy amun ini nikwe ig katiwnih utaraksanwiy ku pariye wixwiy keh ku samah wixwiy akakte ini pitatye gahegbetawni ukakwiy. Kuri nikwe wixwiy ku pariye Kiyavwiye Uhokri humak gimkat wixwiy inyewa darih ini kabayka dehetniki ku pariye ig ikakse wotwiy.

Jesus gimiremni keh gahegbatawni nukune ukakwiy in humaw

¹⁶ Ku pahavwi hiyeg ikaksa madikte gewkanbet gitkis gihiyegavu, ignes gihiyegavu ka darihni kurinewatma. Avit igkis darihni amawka ku ig pahavwi miyavwanek.

¹⁷ Ku ig miyap, nikwe igkis darihni. Heneme ku ig kote miyate, yuma hiyeg nidarihetni.

¹⁸ Hawata akiw ku aysaw Kiyavwiye Uhokri ahegbete ini pitatye ginetni gikakkis gihiyegavu igkis ka uti henenwatma ini kabayka ku pariye ig ikakse gitkis. Avit igkis darihni, amawka ku pahavwi miya ig suka gimig.

¹⁹ Inneki keh minikwak igkis umah puwikne. Ku aysaw amekene Moís pitatye akki gitkis gihiyegavu madikte Uhokri gikumadukan, avim ini ig iwe pahakti asarimna ariwntak “issopu” akak muwtoh asivgi duwbetye wanakka atere nibetit. Ig idisni ahakwat pak akamkayh gimig payegbitak akak kabrit gimig payegbitak akak un. Ayteke ig sakbohe Uhokri gikumadukan akak ini migat. Ayteke ig saktave madikte hiyeg nikak.

²⁰ Avim ini ig awna gitkis hiyeg. Giwn: — Kuwis Kiyavwiye Uhokri ahegbete ginetni ukakwiy. Inin migat in keh gahegbetawni humaw. Ku wixwiy iha inakni giwn, nikwe inin migat areketni wotwiy ku inyewa wixwiy darih ini kabayka ku pariye ig ikakse udahanwiy.

²¹ Ig amekene Moís ig hawata ig sakte Kiyavwiye Uhokri givin akak migat. Hawata akiw ig saktave madikte ariknebdi ku pariye neras muwvegviyenevwi kawih ayge ariku Kiyavwiye Uhokri givin.

²² Ig Moís gikumadukan awna adahan hiyeg kawih migat adahan barewvithene kaba madikte arikna. Henewatbaki in. Ku pahavwi ka miya, ku ig ka sukasa gimig, nikwe yuma hiyeg bayahminaka ariw gitaraksan.

²³ Inneki keh ig amekene Moís kawih puwikne gimig adahan barewvithene ini Kiyavwiye Uhokri givin akak madikte ariknebdi ayge. Mmanawa in he arakaknenwa adahan ku pariye inyewa ahawkri aynte inurik. Heneme aynte inurik ayge amawka kawih migat ku pariye kabaytenene ariw puwikne gimig.

²⁴ Mmanawa ig Cristo ka awnamnihwiy arikuma ini Kiyavwiye Uhokri giwskeki amadgaya inin ku pariye kehka gavitkis hiyeg amadgayavu inin ku pariye he ahehpaktinen adahan ku pariye inyewatnene. Kawa. Ig pareke tahan inurikut ku kiney ig hiyavak pahepkatak gikak Kiyavwiye Uhokri adahan ig wawnamnihtenwiy atere.

²⁵ Ine ig ka parak atere kiberevutnema adahan ig katiwnihne udahanwiy utaraksanwiy akak gimig. Ner muwveg ku pariye kiyatenene ay amadga inin ig parak arikut Kiyavwiye Uhokri giwskeki kiyatenene mpuse pahak kamukri. Ayge ig katiwnihne gihiyegavu gitaraksankis akak migat kane gimigma. Igme Cristo ka henema.

²⁶ Wake ig muwaka adahan ig katiwnih utaraksanwiy kiberevutnabe, nikwekam amawkankam ig umahkiswa kiberevutnakam ku samah akavuska hawkri. Igme ka keh henema. Ig hiyapkiswe wotwiy pahayewvi kuri amaksemni hawkri adahan ig bayahminasawiy ariw uvathawniwiy akak ku samah ig umahkiswe udahanwiy.

²⁷ Amawka madikte hiyeg amadgayavu inin miya pahayewvi. Ayteke ariwntak gimiremnikis igkis hiyapka ba igkis kibeynewatma adahan igkis katiwnivwevye avatra gitaraksankis.

²⁸ Ig Cristo ig kuwis miya pahayewvi udukwenavrikwiy adahan ig katiwnihpiye utaraksanwiy. Ig ka katiwnih pahavwinenwatma hiyeg gitaraksan. Ig katiwnih ka aynsima hiyeg gitaraksankis. Aysawnemenek ig hiyapkiswa wotwiynek akiw, heneme ka adahanma katiwnihpiyema utaraksanwiyma akiw. Kawa. Ig hiyapkiswa wotwiynek pahaynewat akiw adahan ig kehpiye wixwiy inyewa isahptaw ariw utaraksanwiy adahan ig hiyapkisne ka aynsima kabayka wotwiy wixwiy ku pariye giwnpetnivwi.