Ebréws 8 - Uhokri Gahegbetawni Nukune akak Sawmus

¹ Nukebyuvwi, inyewa ku samah nah kinetihwa yit. Henewa ig wawnamnihtenwiy, Cristo ig avigkutavrik ku samah Kiyavwiye Uhokri gimawkan. Mmanawa ig kuwis bat aynte inurik gihumwa Kiyavwiye Uhokri amun ini iwetrit ku pariye kane nikiytanisima kihehaptak.

² Ayge ig awnamnihwiy aynte ku kiney Kiyavwiye Uhokri giwskeki ayge ariku Kiyavwiye Uhokri Givin ku pariye inyewatnene. Ini givin ka hiyegma amadgayavu inin gikehnikisma. Igwa Kiyavwiye Uhokri keh.

Muwvegviyenevwi amadgayavu inin ignes he arakaknen gidahan Jesus

³ Mpuse muwveg ku pariye kiyatenene igi gannivwi adahanikwa ig kakanhewne git Kiyavwiye Uhokri. Ig akka givetunat Kiyavwiye Uhokri pahavwi puwikne gimig ku pariye umahka gidukwenavrikkis gihiyegavu adahan katiwnihpiye gitaraksankis gikak Kiyavwiye Uhokri. Nikwe ig ner ku pariye udahanwiy umuwvegawiy, ig hawata akka givetunat Kiyavwiye Uhokri gimig pahavwi ku pariye umehpika adahan katiwnihpiye utaraksanwiy gikak Kiyavwiye Uhokri.

⁴ Kibeyne, in ke wotbe ig kuwis keh henebe aynte inurik. Wake ig aybe amadga inin, nikwekam ig ka isaksaka adahan ig wageswa muwveg. Mmanawa neras muwvegviyenevwi ku pariye ekkene puwikne gimig givetunat Kiyavwiye Uhokri ku samah amekene Moís gikumadukan awna, igkis kuviknene ay.

⁵ Heneme gannivwikis ay amadga inin in he ahehpaktinen in he arakaknen adahan ku pariye inyewa ahawkri aynte inurik. Henewatbaki. Mmanawa minikwak ku aysaw ig amekene Moís ahegbet adahan kehkisne Kiyavwiye Uhokri givin, avim ini ig Kiyavwiye Uhokri awna git: — Avuriwnaba kabayntiwa adahan pis kehkis madikte hehpekuye ku samah nah kuwis akki pit aynte avit ini waxri imuwadnene. Ka muwaka keh nawenyewatma aynesnima akiw.

⁶ Igme Kiyavwiye Jesus ku samah ig awnamnihwiy aynte inurik, in gannivwi ka aynsima avitminte ariw gannivwikis neras muwvegviyene amadgayavu inin. Ig Kiyavwiye Jesus gannivwi in ka aynsima avitminte ariw neras gannivwikis, hawata ku samah ini Kiyavwiye Uhokri gahegbetawni ukakwiy givitimpi Kiyavwiye Jesus in ka aynsima avitminte ariw gahegbetawni givitimpi amekene Moís. In ka aynsima avitminte ariw inakni gahegbetawni mmanawa ku pariye gikaksan wotwiy ku avim inin in avitminte ariw ku pariye gikaksan gitkis amekene Moís gihiyegavu minikwak.

Uhokri gahegbetawni nawenyewa ukakwiy ariw minikwak

⁷ Wake inakni pitatye gahegbetawni humaw kabayntiwatbe, nikwekam Kiyavwiye Uhokri ka muwakapkam adahan ahegbeta nawenyewatma ukakwiykam.

⁸ Heneme in ka humaw kabayntiwatma mmanawa neras hiyeg ka ihpin. Inneki keh ig Kiyavwiye Uhokri awna: — Aysawnemenek nah ahegbeta nukunewa akiw gikakkis neras izhaewyenevwi. Henewatbaki, nah ahegbeta nawenyewa nukune akiw gikakkis hiyeg judeyenevwi.

⁹ In nawenyewa ariw ku pariye nah kuwis ahegbete gikakkis amekenegben minikwak ku kavim nah wiwhkiswigkis avititak Ejitumnawtak. Avim ini nah ke wotbe nah sumuh giwakukisbe hawata ke pahavwi igtibe ku samah ig sumuh gikamkayh giwaku adahan gitukepten. Heneme igkis kiniswen igkis tarakse nahegbetawni gikakkis. Nah hiyapni hene, nah miniwvi giwkis.

¹⁰ Kurime nah akkite yit ku pariye nah ahegbetanek gikakkis nuhiyegavu judeyenevwi aysawnemenek. Aysawnemenek nah kawihkis nuhiyekemni givititkisnek. Nah ka tamakni he amadgat tipnenwatma. Heneme nah tamekninek avitit giyaknikis. Avim ini nah humaw igyewa giwohkigakisnek igkisme humaw igkisyewa nuhiyegavunek.

¹¹ Avim ini igkis ka muwaka kannuhak pawtak numinuh. Yuma pahavwinema muwaka kinetihwa git gidahewekten adahan ig hiyak Kiyavwiye Uhokri. Yuma pahavwinema muwaka kinetihwa git gikebyi adahan ig hiyak Kiyavwiye Uhokri. Mmanawa avim ini igkis madikte hiyeknekuye nah. Neras ku pariye yumanene gikiytanikis payak gikakkis neras ku pariye kiyatyevwi igkis madikte hiyakunek.

¹² Madikte ini kahayaknek awaku ku samah nah bayahminigkisnek ariw gitaraksankis. Mmanawa avim ini nah ka kiyeminati givathawnikis akiw. Henewatbaki in Uhokri gannasan awna.

¹³ Inakni iwit ku pariye ig Kiyavwiye Uhokri awna adahan ku samah ig ahegbeta nukunewa akiw gahegbetawni ukakwiy, inakni areketni wot ku ini pitatye gahegbetawni in he waditnevyenen. Mmanawa ku pariye arikna waditnevyenen ku pariye mugumguvye in he mpiyevyenen.