Ebréws 6 - Uhokri Gahegbetawni Nukune akak Sawmus

Uyay tiviknene kannuhwenene gimin Uhokri akiw

¹ Uyay ikaw kiyavwiyebetnewa abet uhiyekemniwiy. Uyay ka misakwa henenwatma akak ini akavuska hiyakemniki gimin Cristo ku pariye kuwisnene yis kannuhka nimin. Uyay tiviknene kannuhwenene amin Uhokri gihiyekemni akiw. Nah ka kannuhyi akiw amin ku samah amawka wixwiy wages uhiyekemniwiy ariw ukehbetanwiy ku pariye waditnevyenen, adahan wixwiy kamaxwene givitit Kiyavwiye Uhokri.

² Ka ik adahan nah kannuhyi akiw amin ku samah ukewvenwiy, ine amin ku samah wixwiy sarayh uwakwiy givititkis hiyeg, adahan piriyepkewne gidahankis, ine amin ku samah ukankawniwiy ariw miyaka, ine amin ku samah taraksavye ivukaka hanpa arimkanit biyukwiki avatra gitaraksankis.

³ Gikak Kiyavwiye Uhokrinek wixwiy tiviknene han pitatit, wixwiy kannuhwate akiw.

Avuriwnabay adahan yis ka piyawakwima giw Uhokri he yis ka ik adahan diyuh git akiw

⁴ Mmanawa ku hiyeg kuwis uguhka gihiyekemnikis gavit Kiyavwiye Uhokri, hawata ku igkis kuwis amava Kiyavwiye Uhokri gikan wot inuriktekne, hawata ku igkis kuwis kadahan Kiyavwiye Uhokri Gitip ay givitkis,

⁵ hawata ku igkis kuwis hiyakni kabayntiwa ku Kiyavwiye Uhokri giwn in kibeynewa, hawata ku igkis kuwis kawih Kiyavwiye Uhokri gannu adahan inin hawkri nukune,

⁶ heneme ku aysawnemenek igkis miniw giw Kiyavwiye Uhokri he igkis biyuk giw, nikwe igkis ka hiya igkisma diyuh adahan igkis kamaxwa givitit Kiyavwiye Uhokri akiw. Ku igkis kiduhe hanpa avigkut ku pariye gihiyekemnikis neras hiyeg minikweknene ku pariye gidaddahkiswitni Kiyavwiye Uhokri gikamkayh, in ke wotbe igkis gidaddahkiswitnibe akiw, in ke wotbe igkis mahivwihkiswigbe gitkis hiyeg akiw.

⁷ Nukebyuvwi, wixwiy kewa amutrivwibe gidahan Kiyavwiye Uhokri. Ku wixwiy ikaw ke gamutravwibe ku pariye avanenekwa amava mwok inuriktekne, ku kiney hawata kabaynonenwa amutri hiyan gidahan akivara, ku wixwiy ikaw hene, nikwe wixwiy uti ka aynsima kabayka giwntak Kiyavwiye Uhokri.

⁸ Heneme ku wixwiy ikaw ke amutrivwibe ku kiney he pudukunenwa hiyan akak ewakti, nikwe wixwiy waditnevyenen. Nikwe kennesa uhawkanavrikwiy adahan Ukivarawiy miniw wowiy adahan wixwiy bukahavepka.

Uyay mpiksaw gikak Uhokri han pitatit

⁹ Kibeyne, nukebyuvwi kibeynevwi, yis ka henema. Hiyawa nah kinetihwa gidahankis hiyeg ku pariye kene amutrivwibe ku pariye waditnevyenen heneme nah kamaxwa yivitit ku yisnewa kewa ini amutrivwibe kabaytenene yis uti kabaykanek yis isahptawnek.

¹⁰ Ig Kiyavwiye Uhokri ig waditye. Ig ka miyeh yannivwi ku samah yis kannivanene gidahan. Ig ka miyeh ku samah minikwak yis amnih gihiyegavu, kuviknene yis amnihgikis, awaku ku samah yis batekye gikak Kiyavwiye Uhokri.

¹¹ Ininewa numawkan adahan yis mpuse yaytak mpiksaw han pitatit he danuhe yimaksemni kahadbe yis inyewa darih ini kabayka ku pariye wohpanwiy.

¹² Numawkan yis ka ehwa gikak Kiyavwiye Uhokri. Numawkan yis ikaw hawata ke ignesbe ku pariye kuwis darihe ini kabayka ku pariye Kiyavwiye Uhokri gikaksan gitkis awaku ku samah igkis kamaxwenenekwa givitit Kiyavwiye Uhokri igkis kiyaknihwenenekwa he ku aysaw igkis darihpin.

Uhokri gikaksan wotwiy in kahayaknek wotwiy

¹³ Kiyeminahnabay gimin amekene Abraawh. Minikwak Kiyavwiye Uhokri ikakse kabayka git amekene Abraawh. Ku samah yuma hiyeg kiyate giw Kiyavwiye Uhokri, nikwe igwa humaw gawneve adahan givit.

¹⁴ Ig awna git amekene Abraawh: — Nahwa awna pit ku nah ka uniyehti nuhiyekemni ariw ku pariye nah ikaksene pit ku avim inin. Nah iki ka aynsima kabayka pitnek. Nah keh pis kakamkayh, pis kahiwhi ka aynsimanek.

¹⁵ Ig amekene Abraawh timapni hene, ig kiyaknihwenenekwa he ku aysaw inakni giwn danuh git. Ayge nikwe metakwa ig darih ini Kiyavwiye Uhokri gikaksan git.

¹⁶ Ku aysaw wis ikaksa arikna git pahavwi, ku wis uti pahavwi hiyeg kiyathakante wow adahan ig humaw wawneve, nikwe ig pahavwi ka pukuhpaw ukak. Ig hiyakni ku inyewa wis keh ku samah wis ikaksa git.

¹⁷ Ig Kiyavwiye Uhokri muwaka neras ku kit ig ikakse kabayka adahan igkis hiyakni kabayntiwa ku inyewa ig keh ku samah ig ikaksa gitkis. Inneki keh igwa humaw gawneve adahan givit adahan ku samah ig ka uniyehti gihiyekemni akiw.

¹⁸ Inakni giwn adahan ku samah ig ikaksa wotwiy kabayka payak akak inakni giwn adahan ku samah ig ka uniyehti gihiyekemni, inakni pitenemnene iwit ka hiya mpiyaki. Mmanawa ka ik adahan Kiyavwiye Uhokri kinis. Nikwe inakni giwn pitenemnene in ikene wawaygi kabayntiwa mmanawa wixwiy kuwis bisike git Kiyavwiye Uhokri adahan wixwiy darih ini kabayka ku pariye gikaksan wotwiy.

¹⁹ Ku samah pahamku nawiy kamaxwa avitit guyokman inme guyokman ka warak in kamaxgu kabayntiwa, hawata wixwiy kamaxwa avitit Kiyavwiye Uhokri gikaksan kabayka wotwiy. Inakni gikaksan in ke iyokmantibe ku pariye kamax adahan avanenekwa. In kamaxwiy gikak Kiyavwiye Uhokri aynte inurik aharaptak ini kamis amaptenten Kiyavwiye Uhokri giwskeki kiyatenene.

²⁰ Ig Kiyavwiye Jesus igkit danuh atere wowiy adahan ig wawnamnihtenwiy adahan avanenekwa. Ignewa awnamnihkevutne ku pariye kiyatenene kewa amekene Mewkisedekibe.