Ebréws 5 - Uhokri Gahegbetawni Nukune akak Sawmus

Amawka muwveg wadithebdih gidahankiswa gitaraksankis

¹ Madikte muwveg ignes he hiyegnen amadgayavu inin. Igkis kaniyka gibetitakis giyakikis hiyeg adahan igkis gawnamnihtenkis git Kiyavwiye Uhokri adahan igkis wadithebdihne gitaraksankis gikak Kiyavwiye Uhokri. Igkis kakanhaw git Kiyavwiye Uhokri gidahankis gihiyegavukis. Igkis bukah puwikne givetunat Kiyavwiye Uhokri, puwikne ku pariye umahka gidukwenavrikis hiyeg adahan katiwnihne gitaraksankis. Henewatbaki gannivwikis.

² In ka ariknawnema gitkis igkis awnamnihkevutnevwi adahan igkis ehwa gikakkis gihiyegavukis. Ka mahikonema adahan igkis kiyaknihwa gikakkis neras ku pariye kane hiyak hawkri, gikakkis neras ku pariye taraksavye. In ka mahikonema gidahankis mmanawa igkis awnamnihkevutnevwi igkis hehpekuye ke igkisbe.

³ Awaku ini amawka igkis bukah puwikne givetunat Kiyavwiye Uhokri adahan katiwnihpiye gidahankiswa gitaraksankis hawata ku samah igkis keh gidahankis gihiyegavukis.

Igwa Uhokri kaniy ku pariye hiyeg humaw muwveg

⁴ Yuma pahavwinema hiyeg kawih giwnteknewa ini annivwit kiyatye adahan ig humaw muwveg awnamnihkevutne gidahankis hiyeg. Amawka igwa Kiyavwiye Uhokri kaniygi hawata ku samah minikwak ig kaniye amekene Arawh adahan igme humaw judeyenevwi gawnamnihtenkis.

⁵ Ig Cristo kawnata kawih giwntakma ini annivwit kiyatye adahan ig humaw hiyeg gawnamnihtenkis. Igwa Kiyavwiye Uhokri kaniygi. Ig awna git: — Pis nukamkayh, ku avim inin nah akkap ku pis igyewa nukamkayh.

⁶ Ig hawata awna git amadgatak nawenyewa gannasan. Giwn: — Pis humaw hiyeg gawnamnihtenkis adahan avanenekwa. Pikiytani kewa amekene Mewkisedekibe gikiytani.

Ku samah Jesus umahkiswe, in keh ig kannuhwa amin ku pariye ihpaki

⁷ Ku samah ig Kiyavwiye Jesus ihtikeknete ay amadga inin, ig kayah hawata ke wixwiybe. Avim ini ig amnihswe git Kiyavwiye Uhokri ku pariye ignewa hiya giwiwhka abetitak miyaka. Ig piriyepkaw git akak madikte giwakemni. Ig suke gikantak. Ig tihene kihaw. Igme Kiyavwiye Uhokri timep giviryepkawni mmanawa gayapni abet giviryepkawni in adahan ig keh Kiyavwiye Uhokri gibetkinen.

⁸ Ig ka miyakere heneme ig umahkiswe mmanawa innewa Kiyavwiye Uhokri gibetki. Hiyawa ig Kiyavwiye Jesus ig Uhokriwa gikamkayh heneme amawka ku ig hawata kannuhwa abetimpi gihiyvan mbeyne. Ini ku samah ig keh ini gibetki ku pariye ig ka kehkere in keh ig kannuhwa kabayntiwa amin ku pariye ini ihpaki Kiyavwiye Uhokri giwn.

⁹ Kibeyne, ig ihe giwn avigkutavrik ku samah Kiyavwiye Uhokri gimawkan. Ayge nikwe ig humaw atiwkekne isahptawka gidahankis madikte ku pariye ihpenevwi giwn. Ig keh igkis isahptaw adahan avanenekwa.

¹⁰ Igwa Kiyavwiye Uhokri kanumgi ku ig hiyeg gawnamnihtenkis. Ig awna ku gikiytani kewa amekene Mewkisedekibe gikiytani.

Yis ke bakimnayhbe kote hiyakte hiyakemniki

¹¹ Nukebyuvwi, nah kadahan ka aynsima inetit akiw adahan nah ekkene yit amin inakni hiyakemniki. Heneme mahiko adahan nah kinetihwa nimin awaku yis ka ikatuswa arit nuwnuh.

¹² Yis kuwis ayiparivye ariwntak ku samah yis wageswe Jesus gihiyegavu. Yis kiskama adahan yis kannuhekne heneme yis kote ikte adahan yis kannuhak. Yis kuviknene muwaka hiyeg adahan yikannuhten amin akavuska hiyakemniki amin Uhokri gihiyekemni. Yis kewa bakimnayhbe nopsanyovwinene ku pariye sus he ihintakutnenwa, ignes kote ikte adahan ax kiyavwiyegben gimanakis.

¹³ Bakimnayh ku pariye sus he ihintakutnenwa igkis ka hiyak hawkri. Igkis kote hiyakte ku pariye kabayka akak mbayka.

¹⁴ Ignesnewa hiyeg kiyavwiyegben hiyak hawkri awaku igkis kuwis kawih gihiyekemnikis adahan igkis hiyeknes ku pariye kabayka akak mbayka. Ignesnewa ik adahan igkis ax kiyavwiyegben gimanakis. Yis hawata, yis ku pariye kuwisnene kawih Uhokri gihiyekemni, yis ku pariye kuwisnene keh ku pariye kabay, yis ik adahan kannuhwenene akiw.