Ebréws 4 - Uhokri Gahegbetawni Nukune akak Sawmus

¹ Nukebyuvwi, ku akak inin ig Kiyavwiye Uhokri kuviknene kadahan pahayku mayeket ahegbet udahanwiy. Uyay pukuhpaw ku nawenetke wixwiy ka huwit avigkut.

² Mmanawa wixwiy hawata, wixwiy kuwis timap kibeyne inetit adahan isahptawka hawata ke igkisbe amekenegbenbe. Heneme igkis timapni waditnevyenen awaku ku samah igkis timapni heneme igkis ka kamaxwa nivitit.

Kamaxwenevwi uti mayeketnek

³ Wixwiyme ku pariye kamaxwenevwi avitit inakni Kiyavwiye Uhokri giwn wixwiy uti ini mayeketnek ku pariye ig Kiyavwiye Uhokri kuwisnene ahegbete udahanwiy. Wixwiy uti ini mayeket ku pariye igkis ka uti. Mmanawa ig Kiyavwiye Uhokri awna: — Nah ka batek akak gitaraksankis aynesnima. Inneki keh nah ikakse gidahankis adahan igkis ka uti ini mayeket ku pariye kuwisnene nah ahegbete gidahankis. Ini mayeket kuwis ahegbet gidahankis ku samah yumahte hawkri heneme igkis ka utipni.

⁴ In kahayak huwewe wot ku in kuwis ahegbet mmanawa Uhokri gannasan awna ku arimkanitwiye ntewnehkevye hawkri ig Kiyavwiye Uhokri mayeke ariw madikte gikehavan. Mmanawa madikte ahegbet kuwis.

⁵ In hawata kahayak huwewe wot ku igkis amekenegben ka utipni mmanawa Uhokri gannasan awna: — Igkis ka utinek ini mayeket ku pariye kuwisnene nah ahegbete gidahankis.

⁶ Nikwe pahayku mayeket adukwenewa ay ahegbet adahan hiyeg uti. Neras amekenegben ku pariyekit ekkepka gitkis kibeyne inetit adahan isahptawka igkis ka utipni awaku igkis ka ihpa Kiyavwiye Uhokri giwn.

⁷ Awaku ini ig Kiyavwiye Uhokri ikakse nawenyewa hawkri akiw adahan hiyeg uti ini mayeket. Ini hawkri in ku avim inin. Ariwnteke ini ku samah igkis amekenegben ka huwit atere kibite kamukri akiw ig ikaksin udahanwiy gibiyrik amekene Davi. Ig ikaksin akak inakni iwit ku pariye nah kuwis akkin yit, inakni iwit ku pariye kavusa han: — Ataybiswanabay git Kiyavwiye Uhokri ku avim inin. Ka yi muwaka humaw hene kane ihpatrunema.

⁸ Ig amekene Joswe ig waxwe neras amekenegben gikamkayhkis avitit ini waxri ku pariye kuwis Kiyavwiye Uhokri ahegbete gidahankis gihiyegavu. Heneme igkis ka uti mayeket ayge. Wake igkis utipnibe, nikwekam ig Kiyavwiye Uhokri ka awnakam aysawnemenek akiw adahan wixwiy utipni ku avim inin.

⁹ Nikwe pahayku mayeket adukwenewa ahegbet udahanwiy wixwiy Kiyavwiye Uhokri gihiyegavu. Ik adahan wixwiy mayak hawata ku samah ig Kiyavwiye Uhokri mayeke arimkanitwiye ntewnehkevye hawkri.

¹⁰ Mmanawa ig Kiyavwiye Jesus kuwis danuh arit ini mayeket. Ig kuwis mayeke ariw madikte gannivwi amadgatak inin hawata ku samah ig Kiyavwiye Uhokri kuwis mayeke ariw madikte gikehavan amadgatak inin. Ig kuwis wadithebdihe uhawkanwiy gikak Kiyavwiye Uhokri ku samah ig umahkiswe udukwenavrikwiy.

¹¹ Nikwe nukebyuvwi, uyay mpiksaw aharit ini mayeket ku pariye ig Kiyavwiye Uhokri kuwis ahegbete udahanwiy. Uyay avuriw ku nawenetke wixwiy ka huwit nivigkut awaku ku samah wixwiy ka ihpa giwn Kiyavwiye Uhokri ke igkisbe.

Uhokri giwn padukte ariw pahamku iwan

¹² Mmanawa Kiyavwiye Uhokri giwn detye. In keh ka aynsima annut. In padukte ariw pahamku iwan pebkaknano guyaw. Egme pahamku iwan paduk tahan warikwit ku kiney ukisut avatiptakni. He eg parak tahan abetit uvirik. Inme Kiyavwiye Uhokri giwn in padukte akiw. In paduk ku kiney udehetni patiptak akak uhiyekemni. In ivega ku pariye abet uhiyekemni avit uyakni.

¹³ Yuma ariknawnema ayemwene giw Kiyavwiye Uhokri. Aysawnemenek amawka ku wixwiy akkamnih git madikte ku pariye ukehniwiy ay amadga inin. Heneme in kuwis kahayak huwewe madikte git. In kuwis ke wotbe in mawasavit giwtrik.

Jesus wawnamnihtenwiy ku pariye kibeynewatnene

¹⁴ Kibeynekata wixwiy kadahan pahavwi wawnamnihtenwiy ku pariye kibeynewatnene. Ig pahavwi kuwis danuh atere git Kiyavwiye Uhokri inurikut. Ig awnamnihkevutne ku pariye kabaytenene giwkis madikte. Ig Kiyavwiye Jesus, Kiyavwiye Uhokri gikamkayh. Ku wixwiy hiyap ku ignewa wawnamnihtenwiy, uyay kamaxwa givitit kabayntiwa.

¹⁵ Ig wawnamnihtenwiy ig pukuha ukayhawni kabayntiwa mmanawa ig kuwis mpiye abetiw ini. Ig kuwis hiyap mbeyne. Ig kuwis hikekka adahan ba ig taraksa hawata ke wixwiybe. Igme yuma gitaraksan.

¹⁶ Nikwe uyay kibokahwa danukwa git Kiyavwiye Uhokri takunipti. Uyay ka muwaka mara danukwa kennesa gihumwat ku kiney ig betnene amadga gevwi ig hiyapkisne gabay wotwiy. Ayge wixwiy uti amnihkanek. Ayge ig ikene wawaygiy ku aysaw wixwiy yuma udahanwiy wawaygiy.