Ebréws 3 - Uhokri Gahegbetawni Nukune akak Sawmus

Jesus kiyate giw amekene Moís

¹ Nikwe nukebyuvwi kibeynevwi, yis ku pariye Kiyavwiye Uhokri kaniy adahan yis humaw inurikyenevwi, uyay iki utewiy gitnen Kiyavwiye Jesus. Ig Uhokri giwatni adahan ig kinetihwene wotwiy gidahan. Ig hawata wawnamnihtenwiy adahan ig kinetihwene git Kiyavwiye Uhokri udahanwiy. Ignewa ku kavit wixwiy kamaxwa. Ignewa ku pariye wixwiy ikaw gihiyegavu.

² Ig Kiyavwiye Jesus takunipti keh gawahkisten gibetki hawata ku samah amekene Moís keh gawahkisten gibetki minikwak ku kavim ig wewkisne madikte Kiyavwiye Uhokri gihiyegavu aynte amadga amatap.

³ Heneme ig Kiyavwiye Jesus ig ka aynsima kiyate giw amekene Moís hawata ku samah pahavwi paytevutne ig ka aynsima kiyate ariw ini payt ku pariye gikehni.

⁴ Yuma payt humaw henenwatma. Madikte payt kadahanyekuye nikehten. Hawata madikte hiyeg kadahanyekuye gikehtenkis. Ignewa Kiyavwiye Uhokri akehten madikte ariknebdi.

⁵ Igme amekene Moís takunipti keh Kiyavwiye Uhokri gibetki gikakkis madikte gihiyegavu. Ig keh gibetki kewa pahavwi ibuktibe ig kannivwiye ariku gikivara givin. Henewa ig humaw arakak adahan ku pariye nehmnikuhpiye.

⁶ Igme Cristo ig hawata keh Kiyavwiye Uhokri gibetki takunipti gikakkis Kiyavwiye Uhokri gihiyegavu. Heneme ig keh gibetki kewa pahavwi ikamkaytibe, ig kumadukene gig givin. Wixwiynewa Kiyavwiye Uhokri givin. Ku wixwiy ka isahkiswa ariw ukamaxwanwiy, ku wixwiy udukweneywa kamaxwenenekwa givitit Kiyavwiye Uhokri, ku wixwiy bateknenekwa akak ini kabayka ku pariye wohpanwiy, ayge nikwe wixwiy humaw inyewa Kiyavwiye Uhokri givinek.

Avuriwnabay ku nawenetke yis isahkis yikamaxwan

⁷ Kiyavwiye Jesus ka aynsima kiyate giw amekene Moís. Nikwe avuriwnabay ku samah Kiyavwiye Uhokri Gitip awna amadgatak Uhokri gannasan. Giwn: — Ataybiswanabay git Kiyavwiye Uhokri ku avim inin. Giwn:

⁸ Ka yi muwaka humaw kane ihpatrunema kema ignesma yihawkrivwi. Ayge amadga amatap igkis ka aynsima wakaymnisun awaku ku samah igkis ka kamaxwa nuvitit. Avim ini igkis hikekun takunipti baki nah aywatma gikakkis. Giwnkis: ‘Kiyavwiye Uhokri yuma ay ukakwiy. Kineyva gannu? Wake ig keh annutbe, nikwekam wixwiy kamaxwa givititkam wixwiy hiyakkam ku ig ay ukakwiykam.’

⁹ Bawa takunipti nah kehne annut adahan areketni gitkis ku inyewa nah ay gikakkis henewa danuhe adahan paxnika madikwa (40) akebi kamukri. Hiyaksa igkisme gidukweneswa ka kamaxwa nuvitit.

¹⁰ Ku samah igkis ka kamaxwa nuvitit inneki keh nah ka batek.’ Avim ini nah awna: ‘Igkis taraksevwa igkis! Avanenekwa igkis taraksa. Igkis ka wew aynesnima avigku nuhiyekemni.’

¹¹ Ini ku samah nah ka batek akak gitaraksankis in keh nah ikakse gidahankis adahan igkis ka uti ini mayeket ku pariye kuwisnene nah ahegbete gidahankis. Henewatbaki in Uhokri gannasan awna.

¹² Nukebyuvwi, avuriwnabay ku pariye hiyakemniki ay avit yiyakni ku nawenetke yis hawata yihiyekemni mbeyevye akak pukuhpawka in keh yis miniw giw Kiyavwiye Uhokri ku pariye igyewatnene.

¹³ Nah kuwis akki yit ku samah Uhokri gannasan awna. In awna: “Ataybiswanabay git Kiyavwiye Uhokri ku avim inin.” Nikwe ikinay yihiyekemni pawtak takunipti gidahan Kiyavwiye Uhokri avim ini ku aysaw inakni iwit “ku avim inin” in kawih udahanwiy. Ikinay yihiyekemni pawtak takunipti kahadbe yuma pahavwinema yaytak kinikiswa arit gitaraksan in keh ig ka iha giwn Kiyavwiye Uhokri nikwe.

¹⁴ Mmanawa wixwiy kuwis pakebyeknevwi gikak Cristo. Madikte kabayka ku pariye gidahan Cristo in udahanwiywata. Amawka kuri ku wixwiy udukweneywa kamaxwenene givitit Kiyavwiye Uhokri ku samah pitatye, han pitatit he danuhe umaksemniwiy. Ayge nikwe wixwiy utinek madikte ini kabayka ku pariye gidahan Cristo.

¹⁵ Inakni Uhokri gannasan kawih udahanwiy, nukebyuvwi. Ataybiswanabay nikwe git Kiyavwiye Uhokri ku avim inin. Ka yi muwaka humaw kane ihpatrunema kema ignesma amekenegben. Ayge amadga amatap igkis ka aynsima wakaymnise Kiyavwiye Uhokri.

¹⁶ Hiyawa igkis kuwis timap Kiyavwiye Uhokri giwn heneme igkisnewa wakaymnisnene Kiyavwiye Uhokri awaku ku samah igkis ka kamaxwa givitit. Uyay akki nutuh. Mmah igkis ku pariye wakaymnisene Kiyavwiye Uhokri mmah igkis ka hiyak Kiyavwiye Uhokri? Ihi, igkis hiyaknig. Igkisnewa ku pariye ig amekene Moís ayipa wiwhe giwakutakis hiyeg ejituyenevwi kuwis.

¹⁷ Nah ayayi akiw. Pariye hiyeg keh Kiyavwiye Uhokri ka batek adahan paxnika madikwa (40) akebi kamukri? Nah akkite yit. Igkisnewa ku pariye taraksavye. Avatra ini Kiyavwiye Uhokri makisrihpigkis ayge amadga amatap.

¹⁸ Hawata nah ayavyi. Kadahan Kiyavwiye Uhokri ikaksa adahan ignes ka uti ini mayeket ku pariye kuwisnene ig ahegbete gidahankis? Igkisnewa ku pariye kane ihpenevwima giwn.

¹⁹ In kahayak huwewe wot ku igkis ka uti ini mayeket awaku igkis ka kamaxwa givitit Kiyavwiye Uhokri.