Ebréws 2 - Uhokri Gahegbetawni Nukune akak Sawmus

Avuriwnabay ku nawenetke yis miyehe wamnihtenwiy

¹ Kiyavwiye Uhokri gikamkayh ka gikiytanisima. Amawka nikwe ku wis kiyenenekwa inakni inetit gimin ku pariye kuwisnene ekkepka wot ku nawenetke wis miyehpig. Ku wis miyehpig, wis humaw ke pahamku umuhbe ku pariye ka wanak kabayntiwatma eg bohpika avit amiyan.

² Ig Kiyavwiye Uhokri gikamkayh ka aynsima kiyate giwkis ahj. Madikte ku pariye ahj giwn, henewa in danuh. Ku pariye hiyeg taraksin, ku pariye hiyeg ka ihpin, ig katiwnivwe nivatra.

³ Inme Kiyavwiye Jesus giwn in ka aynsima kiyate akiw ariw ahj giwnkis. Ku wixwiy ka aminama ariw giwn, wixwiy katiwnivwenek nivatra. Yuma bisiket udahanwiy. Ig kuwis akki wotwiy adahan wamnihkawiy kibeynewatnen ku samah ig keh wixwiy isahptaw ariw arakembet mbayka adahan wixwiy uti ka aynsima kabayka. Igkit ekke ini wamnihkawiy gitkis hiyeg. Ayteke neras gikannuhnivwi ku pariye timepnevwi inakni giwn ignesme ekkepni wotwiy. Igkis akki wotwiy ku inakni inyewa.

⁴ Nikwenewa igwa Kiyavwiye Uhokri hawata akki wotwiy ku inakni inyewa. Mmanawa ig ike gannu givititkis adahan igkis keh annut adahan areketni ku ig ay gikakkis. Ig kehkis annut gitkis ku pariye keh hiyeg wakaymni, kibeyne annut ku pariye hiyeg amadgayavu inin ka hiya nikehka. Hawata akiw ig ibekhe Gitip gannu givuwiwkis mpuse gihiyegavu ku samah gimawkan.

Cristo wageswe ihtikekne adahan ig wamnihtenwiy

⁵ Ka gitkisma ahj Kiyavwiye Uhokri kumadukasa ini hawkri nukune, ku kamin wixwiy kinetihwene kuri.

⁶ Kawa. Ka gitkisma. Mmanawa ay pahak iwetrit amadga Uhokri gannasan ku kiney pahavwi awna, giwn: “Kiyavwiye Uhokri, pariyeki hiyeg ta pit, ku pariye amadgaya inin, adahan pis kiyegi hene? Ig amadgaya inin, ig ka ariknawnama adahan pis iki pihiyekemni ta git.

⁷ Heneme, kibeyne, pis ike git ka aynsima gannu, ka aynsima gikiytani. Pis kehe gikiytani warikapte aynesa ariw ahj gikiytanikis.

⁸ Pis kumadukasa madikte ariknebdi git.” Henewatbaki ig pahavwi awna. Inakni iwit awna ku ig Kiyavwiye Uhokri kumadukasa madikte ariknebdi wotwiy. Madiktehwa. Yuma ariknawnema ka kumadukaka wavitwiyma. Nukebyuvwi, wixwiy kote hiyapte ini humaw.

⁹ Heneme kibeyne, wixwiy kuwis hiyap Kiyavwiye Jesus. Ig ikaw aynesa warikapte giwkis ahj mmanawa ig wageswe ihtikekne kahadbe ig umahkiswene gidukwenavrikkis hiyeg. Heneme kuri ig Kiyavwiye Uhokri iki git Kiyavwiye Jesus ka aynsima gidatni, ka aynsima gikiytani awaku ku samah ig umahkiswe udahanwiy. Henewa, ig Kiyavwiye Uhokri gabay keh ig Kiyavwiye Jesus kayah miyaka gidahankis mpuse hiyeg.

¹⁰ In kabay ig Kiyavwiye Uhokri isaksig adahan ig hiyap mbeyne hene. Kiyavwiye Uhokri inyewa ka gihiyekemnisima. Madikte humaw giwntak. Madikte humaw gidahan. Ig muwaka iwi ka aynsima hiyeg git adahan igkis humaw ke wotbe gikamkayuvwibe adahan ig iki gikiytani givititkis. Ignewa Kiyavwiye Jesus keh hiyeg isahptaw adahan ignes humaw Kiyavwiye Uhokri gikamkayuvwi. Ig giwewkistenkis arimkat isahptawka. Nikwe in kabay ig Kiyavwiye Uhokri isaksig adahan ig hiyap mbeyne. Ini gihiyvan mbeyne in humaw ke wotbe gahegbeteptenbe adahan ig humaw uwewkistenwiy avigutavrik ku samah Kiyavwiye Uhokri gimawkan.

¹¹ Mmanawa wixwiy ku pariye sagahptaka ariw uvathawniwiy wixwiy kuri ke wotbe wixwiy pakebyeknebe gikak ner ku pariye usagahptihpitniwiy ariw uvathawniwiy. Wixwiy kadahan igwata Wigwiy. Awaku ini ig Kiyavwiye Jesus ka mara kanumwiy gikebyuvwi adahan ig ikaw hehpekuye ke wixwiybe.

¹² Amadgatak Uhokri gannasan ig Kiyavwiye Jesus awna: — Kiyavwiye Uhokri, nah kinetihwate pimin gikakkis nukebyuvwi. Nah kabayhapte akak avat abet lammes payak gikakkis ignes pihiyegavu.

¹³ Hawata ig awna akiw: “Nah kamaxwenewata givitit Kiyavwiye Uhokri payak gikakkis.” Hawata ig awna akiw: — Nah ay gikakkis nukebyuvwi ku pariye Kiyavwiye Uhokri gikan nutuh.

¹⁴ Ku samah wixwiy gikebyuvwi wixwiy ihtikekne, nikwe ig Kiyavwiye Jesus kinagsaw, ig wageswe ihtikekne hawata ke wixwiybe. Ku samah ig ihtikekne, ig ik adahan ig umahkiswa. Abetimpi ini ku samah ig umahkiswe ig pisenwe akak gidatni ner wavitye gikivarakis, ku pariye atiwkekne miyaka.

¹⁵ Ayge nikwe ig keh wixwiy isahptaw, wixwiy ku pariye takunipti wanakka akak aviska awaku ku samah wixwiy avisne abohri miyaka.

¹⁶ Henewa ig ka parak abet gihawkankis ahj. Kawa. Ig parak abet udahanwiy uhawkanwiy wixwiy amekene Abraawh gihiwhivwi.

¹⁷ Adahanikwa ini ig wageswa ihtikekne hawata ke wixwiy gikebyuvwibe. Pugamawka ig keh hene kahadbe ig humaw kibeyne awnamnihkevutne udahanwiy git Kiyavwiye Uhokri. Ku samah ig wageswa ihtikekne nikwe ig ka aynsima kayahte udahanwiy. Awaku ini ig humaw kibeyne awnamnihkevutne wowtrikwiy wixwiy hiyeg. Ig hawata humaw kibeyne awnamnihkevutne giwtrik Kiyavwiye Uhokri awaku ig keh Kiyavwiye Uhokri gibetki. Ig wadithebdih uhawkanwiy gikak Kiyavwiye Uhokri akak ku samah ig katiwnihe utaraksanwiy gikak.

¹⁸ Ig kuwis mpiya abetiw mbeyne amadga inin, adahan ig hikekka adahan ba ig taraksa, heneme ig mpiyasemni. Inneki keh ig hiya asamanak adahan parak abet uhawkanwiy wixwiy ku pariye hawata hikekka adahan ba wixwiy taraksa.