Ebréws 13 - Uhokri Gahegbetawni Nukune akak Sawmus

Kehnay Uhokri gibetki

¹ Batekaknabay pawtak adahan avanenekwa ke wotbe yisweke pakebyeknebe guwntak pahavuwa inagti.

² Kaba yi miniwbetaw ariw ini adahan yis amava hiyeg kabayntiwa yivinekut. Gaytakis hiyeg igkis keh hene igkis amava ahj givinekutkis heneme igkis ka hiyakwa ku aysaw.

³ Avuriwnabay hiyeg kamaxkarempu ariku parakseket. Avuriwnigkisbay kabayntiwa ke wotbe yis aygwatabe gikakkisbe ariku ini parakseket. Avuriwnabay neras ku pariye hiyepnevwi mbeyne ke wotbe yis aygwata hiyepnenebe mbeyne payak gikakkisbe.

⁴ Kiyathanabay yimaryesa. Ka yi muwaka arewhatak pawtak. Kiyavwiye Uhokri hiyapkis mbeynenek gitkis neras ku pariye mahayakemnavye ku pariye powkemnavye.

⁵ Ka yi muwaka ikaw kowtyakuvyema aharit karukri. Bateknay akak ku pariye kuwis ay yiwaku. Mmanawa Kiyavwiye Uhokri awna wotwiy: “Nah kuwis pidahan. Nah ka ikispiti. Nah ka miniwbetawti piw.”

⁶ Inakni iwit iki wawaygiy adahan wixwiy awnene: “Nah hiyak ku Kiyavwiye Uhokri ay nukakuh, inneki keh nah ka avis gibohrikis hiyeg. Igkis ka hiya nusamanak.”

⁷ Kiyeminanabay giminkis neras amekenegben atiwkeknevwi ku pariye kuwis ekke Kiyavwiye Uhokri giwn yit. Ivegminanay yihiyekemni amin ku samah gihiyekemnikis, hawata amin ku samah giwewnikis, hawata amin ku samah gimiremnikis. Kamaxwanabay givitit Jesus Cristo hawata ke igkisbe.

⁸ Ig Jesus Cristo ku samah ig minikwak, ig hawata kuri avim inin, ig hawata adahan avanenekwa akiw. Aterenewa wixwiy kannuhwa kamaxwa givitit ke igkisbe.

Arikna amadgaya inin ka iki wawaygi

⁹ Uyay ka muwaka isaksa nawenyewatma hiyakemniki adahan in matekbete yihiyekemni. Amawka ku wixwiy iwi uhiyekemniwiy gawaygi ariwntak Kiyavwiye Uhokri gamnihra ku samah ig amnihwiy he wamnihkawiynen. Innewa kabay. Wixwiy ka uti uhiyekemniwiy gawaygi ariwntakma ku samah wixwiy ihpene judeyenevwi gikumadukankis amin axka. Ka innema iki pahavwinema gawaygi.

¹⁰ Neras muwvegviyenevwi ku pariye kannivwiye ariku Kiyavwiye Uhokri givin amedgene inin igkis ax ariwntak ini puwikne ku pariye umahka gidukwenavrikkis gihiyegavukis. Igkis iwenes gawaygikis giwntak igi puwikne. Heneme ku pariye iwi gawaygikis hene igkis ka hiya igkisma iwi gawaygikis giwntakma Kiyavwiye Jesus ku pariye umehpika udukwenavrikwiy.

Ka sam wixwiy kawih maraki ke Jesusbe

¹¹ Ig Kiyavwiye Jesus ig ikaw kewa ner puwiknebe ku pariye umahka pahaywowa mpuse pahak kamukri. In puwikne gimig ewkka arikut ini xam kewye “Kiyavwiye Uhokri giwskeki kiyatenene”. In ewkka atere gavit ner muwveg ku pariye kiyatenene adahan ig nekketni givetunat Kiyavwiye Uhokri adahan igme bayahmina gihiyegavu ariw givathawnikis. Akebi ner puwikne avim ini ig ka axka gavitkis neras muwvegviyenevwi heneme givit bukahka piyawakte ariw paytwempu.

¹² Ig Kiyavwiye Jesus ig hawata umahkiswe piyawakte ariw paytwempu adahan ig bayhminasevye gihiyegavu givathawnikis akak gidahanwa gimig.

¹³ Nikwe uyay misakwa git avawyewa giwkis neras judeyenevwi gihiyekemnikis. Ku wixwiy kawih maraki, ka sam. Ig Kiyavwiye Jesus hawata kawih maraki ka aynsima.

¹⁴ Mmanawa wixwiy yuma udahanwiy paytwempu ay amadga inin ku pariye dehwevye adahan avanenekwatma. Heneme wixwiy mpiksewne aharitne ini paytwempu ku pariye nehmnikuhpiye.

Ku wixwiy kabayha Uhokri abetnewa mbeyne, in humaw ke ukanwiybe git

¹⁵ Nikwe uyay danukwa kennesa git Kiyavwiye Uhokri givitimpi Kiyavwiye Jesus. Uyay ka muwaka akka puwikne givetunat. Uyay he kabayhig adahan avanenekwa. Uyay woka ubiywiy adahan wixwiy awnanenekwa “kibeyne” git. Ku wixwiy keh hene, in humaw kewa ukanwiybe git Kiyavwiye Uhokri.

¹⁶ Hawata akiw ka yi muwaka miyeh adahan yis keh kabayka pawtak adahan yis amnihak pawtak. Ku wixwiy keh hene, in hawata humaw ke ukanwiybe git Kiyavwiye Uhokri. In keh ig batek ka aynsima.

Ihpanay giwnkis yiwewkisten

¹⁷ Ihpanay giwnkis neras yiwewkisten. Kumadukasawnay gitkis. Mmanawa igkis akavriwten yihiyekemni. Aysawnemenek igkis akkaw git Kiyavwiye Uhokri madikte ku samah igkis avuriwyi. Ku yis iha giwnkis, igkis avuriwyi akak batekka. Heneme ku yis ka iha giwnkis, igkis avuriwyi akak kadniki. Mmanawa ku yis ka iha giwnkis, nikwe inakni giwnkis ka ayavay aynesnima.

Piriyepkawnay udahan

¹⁸ Hawata nukebyuvwi, piriyepkawnabay udahan. Gaytakis hiyeg pukuhpaw ubohri heneme usuh hiyakni ku uyakni barewvit ariw taraksaki yikak, mmanawa usuh battukewnene wew wadit avanenekwa.

¹⁹ Nah ka aynsima ayapte yit adahan yis piriyepkaw nudahan kahadbe Kiyavwiye Uhokri awahkisun diyuh yimkanit kibereminte akiw.

Nah piriyepkaw yidahan

²⁰ Nah piriyepkaw yidahan git Kiyavwiye Uhokri ku pariye kariswehsevye uyakni, ku pariye kannikase Ukivarawiy Jesus ariw gimiremni. Ig Kiyavwiye Jesus ukavriwtenwiy hawata ku samah pahavwi muwtohvutne kibeynewatbe ig avuriw givigvu kabayntiwa he ig umahkiswa adahan gamnihtenkis. Kibeyne, ku samah ig sukase gimig in keh Kiyavwiye Uhokri gahegbetawni ukakwiy humaw adahan avanenekwa.

²¹ Nah aya git Kiyavwiye Uhokri adahan ig iki yit madikte ini kabayka ku pariye muwekne yit adahan yis kehne Kiyavwiye Uhokri gibetki. Nah aya git adahan ig keh wixwiy wageswa avigkutavrik ku samah gimawkan givitimpi Kiyavwiye Jesus Cristo ku pariye kane gikiytanisima adahan avanenekwa. Ameh.

Uhokri gabay yikaknek

²² Nukebyuvwi, nah aya yit adahan yis ataybiswa arit inakni nuwnuh ku samah nah ikene yihiyekemni ku avim inin. Mmanawa inakni nuwnuh in matkusa.

²³ Nah hawata ikene yinetni ku ig ukebyi kiyavwiye Timotyu kuwis pekkiswika arikutak parakseket. Ku ig danuh nutuh kiberemin, ig ayta danuhpa yitnek payak nukakuh.

²⁴ Usuh awahkis kabayka giminkis neras yiwewkisten payak yikak madikte yis Jesus gihiyegavu aygnenevwi. Ukebyuvwiy avititekne Italyamnaw igkis hawata awahkis kabayka yimin.

²⁵ Kiyavwiye Uhokri gabay yikaknek madikte yis!