Ebréws 12 - Uhokri Gahegbetawni Nukune akak Sawmus

Uyay kamaxwa givitit Uhokri kabayntiwa ke amekenegbenbe

¹ Igkis amekenegben kuwis ekke kabayntiwa ku samah igkis kamaxwene givitit Kiyavwiye Uhokri. In ke wotbe igkis gidukweneswa ay ukakwiybe adahan ikenebe wawaygiybe. Uyay wiwhminaw nikwe ariw madikte ku pariye mpitha wixwiy kamaxwa givitit Kiyavwiye Uhokri. Uyay wiwh uhiyekemniwiy ariw ini hiyakemniki mbeyevyenen ku pariye wages uhiyekemniwiy kibehtenwa. Uyay ka tuguhkis ukamaxwanwiy. Uyay tiviknene kamaxwene givitit Kiyavwiye Uhokri adahan wixwiy inyewa darih ini kabayka ku pariye kuwis ahegbet udahanwiy.

Uyay kamaxwa givitit Uhokri kabayntiwa ke Jesusbe

² Uyay iveg givitit Kiyavwiye Jesus. Giwntak ig Kiyavwiye Jesus wixwiy kavusa kamaxwa givitit Kiyavwiye Uhokri. Gitnewa wixwiy misakwa akiw. Ku aysaw ig Kiyavwiye Jesus aynete amadga inin ig ka tuguhkisti gihiyekemni. Ig mpiksew aharit ini batekka ku pariye kuwis ahegbet gidahan he ig umahkiswe amin giyakni. Ig ka aynsima marekepka heneme in ka sam git. Inneki keh kuri ig bat ay gihumwa Kiyavwiye Uhokri amun ini iwetrit ku pariye kane nikiytanisima kihehaptak.

³ Ivegminanay yihiyekemni gimin Kiyavwiye Jesus ku samah ig hiyap mbeyne ka aynsima ay giwakukis hiyeg taraksavye. Heneme ig ka tuguhkis gihiyekemni aynesnima. Ivegminanay yihiyekemni gimin adahan yis kawnata tuguhkis yihiyekemni adahan yis kawnata isahkis yikamaxwan.

⁴ Mmanawa yis kote mpiksawte ativut taraksaki he yis sukase yimig kema igma.

Uhiyvan mbeyne adahanikwa bukihne utaraksan wow

⁵ Kuwis ig Kiyavwiye Uhokri awna wotwiy kibeyne iwit adahan ikene wawaygiy abet mbeyne. Mmah yis ku miyehpin kuwis? Ig awna wotwiy ke gikak ikamkaytibe. Giwn: — Nukamkayh, ku aysaw Kiyavwiye Uhokri isaksa mbeyne adahan in danuh pit, ka muwaka mpiyasin ke wotbe in ka giwntakma. Ine ka muwaka tuguhkis pikamaxwan ku aysaw ig akka pit pitaraksan.

⁶ Mmanawa ignesnewa ku pariye ig batek gikakkis, ig isaksigkis adahan igkis hiyap mbeyne. Ig isaksigkis adahan igkis hiyap mbeyne adahan gikannuhtenkis wew wadit. Ignesnewa ku pariye ig amava adahan igkis humaw gikamkayuvwi, ig bukih gitaraksankis giwkis. Henewatbaki ig Kiyavwiye Uhokri awna.

⁷ Amavanay ini mbeyne nikwe. Inin yihiyvan mbeyne in areketni yit ku ig Kiyavwiye Uhokri hiyekne yikak hawata ku samah pahavwi igti hiyak gikak gikamkayh. Yuma pahavwinema ikamkayti ay ku pariye gig ka hiyakma gikak adahan gikannuhten adahan ig wew wadit.

⁸ Kiyavwiye Uhokri isaksa mbeyne adahan in danuh gitkis madikte gikamkayuvwi adahan gikannuhtenkis adahan igkis wew wadit. Ku pis ka hiyapti mbeyne, in arakak ku pis ka gikamkayewatma Kiyavwiye Uhokri pis ka wayvuka giwntak.

⁹ Hawata akiw wixwiy kiyatha wigwiy amedgenevwi inin ku aysaw igkis bukihnes utaraksanwiy wowiy. Igkata Wigwiy inurikyene akiw? Amawka wixwiy kumadukasawte git. Ayge nikwe wixwiy aymuhwa gimun adahan avanenekwa.

¹⁰ Ignes wigwiy amedgenevwi inin igkis ukannuhtenwiy adahan ka kiyabawkadima hawkri. Igkis hiyak ukakwiy ku samah igkis hiyap giwtrikkis. Igme Kiyavwiye Uhokri hiyak ukakwiy adahan ig kehne kabaykanenwa udahanwiy. Gimawkan wixwiy wageswa barewvitye ke igbe.

¹¹ Ku aysaw wig hiyapkis mbeyne wot, avim ini wis ka batek, in ke wotbe in kadniki udahanbe. Heneme ku pariye hiyeg amava ini mbeyne adahan gikannuhtenkis adahan wew wadit, aysawnemenek igkis uti kariswehwakinek, igkis kannuhnek keh kabaykanen.

Avuriwnabay adahan yis ka tuguhkis gabay Uhokri

¹² Nikwe ku aysaw yis hiyap mbeyne danuh yit, ka yi muwaka isaksaw arit. Heneme iwinay yawaygi kiyeste akiw.

¹³ Wewnay akak madikte yawaygi. Ka ba yi wew tarakisnema. Mpiksawnay wew wadit adahan yis ka biyuksasema pahavwinema hiyeg gihiyekemni heneme yis ikene gawaygi git.

¹⁴ Pasamraknabay gikakkis madikte hiyeg. Wewnay akak yihiyekemni barewbet. Ku uhiyekemni ka barewbetma, wis ka ik adahan hiyap Kiyavwiye Uhokri.

¹⁵ Avuriwaknabay pawtak kahadbe yuma pahavwinema yaytak tuguhkisne gabay Kiyavwiye Uhokri. Avuriwnabay kahadbe yuma kanaktinka humaw ayge yibet. Ku yis kanaktinbet, in keh yis kayah ke wotbe manegusbe hiyan ayge yibet. In keh ka aynsima hiyeg kiyimare.

¹⁶ Avuriwnabay kahadbe yuma mahayakemniki humaw ayge yibet. Avuriwnabay kahadbe yuma pahavwinema yaytak kane hiyak ku samah Uhokri gihiyekemni. Avuriwnay kahadbe yuma pahavwinema sarayh ini kabayka ku pariye ikaksaka wotwiy kahadbe yuma pahavwinema ikaw kema amekene Esaúma ku pariye ikiswiye madikte ini kabayka ku pariye ikaksaka git aharit pahakwowa miruk axka.

¹⁷ Yis hiyakni ku ariwnteke ini ig ivegmine gihiyekemni aharit ini kabayka heneme ig kuwis biyuk nikak. Ig ka hiya igma iwini akiw. Hiyawa ig suka gikantak aharitne ini kabayka heneme ig ka hiya igma iwini akiw.

Kuri ka mahikonema adahan wixwiy danukwa kennesa git Uhokri

¹⁸ Nukebyuvwi, ka aynsima kabayka kuwis ekkepka wotwiy. Ku avim ini ku aysaw wixwiy danukwa kennesa git Kiyavwiye Uhokri, wixwiy ka hiyap akebi ini kibohriki ku pariye amekenegben gihiyvankis aynte amadga amatap. Wixwiy ka hiyap ariknawnema akebi amadgaya ininma. Wixwiy ka hiyap ini waxri imuwadnene pahatema akakma tiket. Wixwiy kawnata hiyap amisnavyad mitibnene. Wixwiy kawnata timap kamaygviyad kimanene. Kawa.

¹⁹ Ku aysaw wixwiy danukwa kennesa git Kiyavwiye Uhokri, wixwiy ka timap tohompet agighaka kema igkisma. Wixwiy kawnata timap ikuvimnat awnene iwit. Neras hiyeg ku pariye timep inakni igkis avisasew ka aynsima igkis amnihswe git Kiyavwiye Uhokri adahan ig ka timapkisni gitkis akiw.

²⁰ Mmanawa ini waxri ku kavititak ig Kiyavwiye Uhokri awna in mpinevevye nikiytani. In ka ik adahan ariknawnema daxni. He puwikne kawnata ik adahan daxni. Neras hiyeg ka dat ativut inakni iwit adahan ku pariye daxni pugamawka ku ig padaktepka akak tip.

²¹ Ku pariye igkis hiyap ayge in ka nibohrisima gitkis. He igwa amekene Moís awna: “Nah avis ka aynsima. Nah sagka ka aynsima.”

²² Udahanwiyme ka henema, nukebyuvwi. Ku aysaw wixwiy danukwa kennesa gihumwat Kiyavwiye Uhokri, in ke wotbe wixwiy danuhnebe avitit ini Kiyavwiye Uhokri giwaxig inyewatnene. Henewa, in ke wotbe wixwiy danuhnebe avitit ini paytwempu ku kiney inyewa Kiyavwiye Uhokri dehetniye giwskeki, avitit Jerusalém inurikyene kivunnene akak ahj.

²³ Wixwiy danuh kennesa gitkis Kiyavwiye Uhokri gikamkayuvwi kiyatyevwi ku pariye tamakavu giwkis aynte inurik ku kiney igkis pahadguvunene akak madikte batekka. Wixwiy danuh kennesa git igwa Kiyavwiye Uhokri ku pariye hiyekne gikakkis madikte hiyeg. Wixwiy danuh kennesa gitkis hiyeg kibeynevwi ganmapkis ku pariye kuwisnene miyarap pitatyevwi, igkis kuwis isahptaw ariw madikte mbeyne.

²⁴ Wixwiy danuh git Kiyavwiye Jesus ku pariye kavitimpi ig Kiyavwiye Uhokri ahegbete gahegbetawni nukunewa ukakwiy, ku pariye ke wotbe ig saktevyebe uyakniwiy akak gimig adahan miyehkisne utaraksanwiy. Ini gimig ka aya git Kiyavwiye Uhokri adahan diyuhkisnema gimig kema amekene Abew gimigma. Heneme gimig adahanikwa amnihkisne hiyeg git Kiyavwiye Uhokri.

Uhokri mukusasa waxri akak en

²⁵ Avuriwnabay adahan yis ataybiswa arit Kiyavwiye Uhokri giwn. Neras amekenegben ku pariye ka ataybiswekere arit Kiyavwiye Uhokri giwn ku pariye ekkepka gitkis amadga inin gavit amekene Moís igkis ka uti bisiket ariw ini mbeyne ku pariye danuh gitkis minikwak. Wixwiykata akiw. Ku wixwiy miniw ariw Kiyavwiye Uhokri giwn ku pariye ekkepkawotwiy inuriktak, wixwiy ka aynsima hiyapte mbeyne akiw.

²⁶ Avim ini minikwak giwn ahawna mukusase waxri. Heneme kuri ig ikakse wotwiy ku ig keh kihawnate akiw. Giwn: Kuri pahaynewata akiw nah mkusasa ka ininewatma waxri, heneme payak akak en.”

²⁷ Inakni giwn “kuri pahaynewata akiw” inakni akki wot huwewe ku aysawnemenek ig Kiyavwiye Uhokri pisenwanek akak madikte gikehavan payak akak inin hawkri, kahadbe ininewa ku pariye kane ik adahan in mukusasaka in misakwa adahan avanenekwa.

²⁸ Kibeyne, nukebyuvwi, wixwiy ikepka wotwiy Uhokri gikumadukan ku pariye kane ik adahan in mukusasaka. Uyay kabayha Kiyavwiye Uhokri adahan ini. Uyay keh gibetki akak madikte wavisniwiy akak madikte kiyathaki.

²⁹ Mmanawa Uwohkigawiyig kewa pahayku tiketbe ku pariye bukah madikte ku pariye patehwevye.