Ebréws 11 - Uhokri Gahegbetawni Nukune akak Sawmus

Amekenegben ka aynsima gikamaxwankis

¹ Nah akkite yit ku pariye kamaxwaki. Kamaxwaki keh wis hiyakni ku yis uti ku pariye umawkan. Hiyawa wis ka hiyapni, heneme wis hiyakni avititak uyakni ku in kuwis ahegbet udahan.

² Uhawkrivwiy amekenegben ka aynsima gikamaxwankis givitit Kiyavwiye Uhokri. Inneki keh ig Kiyavwiye Uhokri annasa kibeyne iwit giminkis.

³ Ku samah wixwiy kamaxwa givitit Kiyavwiye Uhokri, nikwe wixwiy hiyakni ku ig Kiyavwiye Uhokri keh inin hawkri humaw akak giwnnenwa. Inin ariknebdi ku pariye wixwiy hiyap ku avim inin in humaw ariwntak ku pariye hiyeg kane hiyap.

⁴ Amekene Abew kamaxwene givitit Kiyavwiye Uhokri. Inneki keh ig iki gikan git Kiyavwiye Uhokri ku pariye kabaytenene ariw amekene Kayh gidahan. Inneki keh ig Kiyavwiye Uhokri annasa kibeyne iwit gimin amekene Abew. Ini ku samah ig amava gikan git innewa akki wotwiy huwewe ku ig hiyap amekene Abew kibeyne giwtrik. Hiyawa ig amekene Abew miya minikwak heneme kuviknene ig ekkenene wotwiy adahan ku samah Kiyavwiye Uhokri batek akak kamaxwaki.

⁵ Amekene Enoki ig hawata kamaxwenewagivitit Kiyavwiye Uhokri. Inneki keh Kiyavwiye Uhokri iwevgi. Ivegi ig tivik gimkat. Ig yuma ay amadga inin akiw mmanawa Kiyavwiye Uhokri iwevgi. Wixwiy hiyakni ku ig kamaxwa givitit Kiyavwiye Uhokri awaku avit Uhokri gannasan kinetihwa amin ku samah Kiyavwiye Uhokri iwevgi, in kinetihwa amin ku samah ig keh Kiyavwiye Uhokri ka aynsima batek.

⁶ In kahayak huwewe wot ku wis ka kamaxwa givitit Kiyavwiye Uhokri nikwe ka ik adahan wis keh ig batek. Mmanawa adahan hiyeg danuh git Kiyavwiye Uhokri amawka ku igkis iha ku Kiyavwiye Uhokri ay. Hawata amawka ku igkis iha ku ig utipkis kabayka gitkis neras ku pariye mpiksewnevwi giharit.

⁷ Amekene Noé ig hawata kamaxwenewagivitit Kiyavwiye Uhokri. Inneki keh ig ihe giwn. Ig Kiyavwiye Uhokri ike ginetni amin ini mbayka nehmnikuhpiye ku pariye kane hiyapkarati. Igme amekene Noé timapni hene, ig ihe giwn. Ig kehe pahamku nawiy nopsadnano adahan bisiket. Ayge nikwe gimunyavu isahptaw. Amun ini nikwe, ig hiyeke neras nawenyevwi hiyeg amedgenevwi inin ku igkis ka ihpekerema Kiyavwiye Uhokri giwn. Hawata akiw ku samah ig kamaxwa givitit Kiyavwiye Uhokri inneki keh Kiyavwiye Uhokri hiyavgi kibeyne giwtrik ke madikte hiyegbe ku pariye kamaxwenevwi givitit Kiyavwiye Uhokri.

⁸ Amekene Abraawh ig hawata kamaxwenewagivitit Kiyavwiye Uhokri. Inneki keh ig ihe Kiyavwiye Uhokri giwn adahan ig tivik avitit nawenyewa waxri akiw ku pariye ig Kiyavwiye Uhokri ikakse git. Ig tivik ig ka hiyak ku kitwiye ig.

⁹ Metakwa ig danuh atere avitit inere waxri ku pariye Kiyavwiye Uhokri gikaksan git. Heneme ig ka darihni aytnihtema adahan in humaw gidahanwatma. Ig wewvari ayge ke wotbe ig he danuhpenenen. Heneme ig gidukwenewa kamaxwenene givitit Kiyavwiye Uhokri. Givin he paytbetnen. Hawata gikamkayh amekene Izaki givin he paytbetnen. Hawata gihiwhi amekene Jakó givin he paytbetnen. Ini waxri hawata in Kiyavwiye Uhokri gikaksanwata gitkis heneme igkis kawnata darihni aytnihtema.

¹⁰ Igme amekene Abraawh gidukwenewa kamaxwene givitit Kiyavwiye Uhokri. Mmanawa ig hiyakni ku aysawnemenek ig danuhnek avitit ini paytwempu ku pariye Kiyavwiye Uhokri gikehni ku pariye dahwa adahan avanenekwa.

¹¹ He amakano Sara avim ini metakwa eg kamaxwa givitit Kiyavwiye Uhokri. Inneki keh eg kakamkayvi akak gukivaven. Mmanawa eg ikiy ku pariye Kiyavwiye Uhokri awna in ka waditnevyenenma. Eg kamaxwa givitit ku inyewa ig keh ku samah gikaksan gut.

¹² Ayge nikwe ka aynsima hiyeg humaw giwntak amekene Abraawh. Hiyawa ig pahavwiwa, hiyawa ig kiyavarivye kuwis adahan ig kakamkayh, heneme gikamkayuvwi kibihwa ka aynsima kewa waravyube kewa kayhbe. Ka ik adahan pukuhgikis.

¹³ Neras amekenegben kamaxwenevwi igkis hawata kamaxwe givitit Kiyavwiye Uhokri he adahan gimiremnikis. Ku samah igkis miyarap igkis kote darihte madikte ku pariye Kiyavwiye Uhokri gikaksan gitkis. Heneme igkis ke wotbe igkis hiyapnibe abet gihiyekemnikis ke pahavwibe ku pariye hiyap barewye iwetrit piyawakad gavitkig. Igkis awna: “Kibeyne. Kuwewanek wixwiy danuh aterenek.” Igkis awna: “Usuh he danuhpasakinenwa ay amadga inin. In ka inyewatma uwaxig ay.”

¹⁴ In kahayak huwewe wot ku pariye hiyeg awna inakni hene, ignes mpiksewnes aharit gidahankiswa giwaxigkis.

¹⁵ Wake igkis mpiksewnesbe aharit ini waxribe ku kitak igkis pes, ikkama adahan igkis diyuh atere akiw.

¹⁶ Heneme igkis mpiksewnes aharit paha waxri ku pariye kabaytenene, paha waxri inurikyene. Inneki keh Kiyavwiye Uhokri ka mara gikakkis, ig ka mara ku aysaw hiyeg kawohkigasigkis gikak. Kawa. Ig hiyapni hene, ig ahegbete paha givinkis.

¹⁷ Igme amekene Abraawh ku samah ig kamaxwa givitit Kiyavwiye Uhokri kabayntiwa, ig kibokehwe kakanhaw ignewa gikamkayh Izaki git avim ini hawkri ku aysaw ig Kiyavwiye Uhokri hikeke gikamaxwan. Ig kuwis iha inakni Kiyavwiye Uhokri gikaksan git adahan ig ka aynsima gihiwhivwi. Heneme ig ahegbet umah gikamkayh ku pariye pahavwiwatnene adahan gikan git Kiyavwiye Uhokri.

¹⁸ Hiyawa ig Kiyavwiye Uhokri kuwis awna git ku gihiwhivwi pesnek giwntak gikamkayh Izaki, heneme ig ahegbet umahgi gidahan Kiyavwiye Uhokri.

¹⁹ Ig ivegmine gihiyekemni ku Kiyavwiye Uhokri ik adahan ig kannikasa gikamkayh ariw gimiremni. Henewa in danuh ke wotbe ig iwevyebe gikamkayh ariw gimiremnibe.

²⁰ Igme amekene Izaki ig hawata kamaxwenewagivitit Kiyavwiye Uhokri. Inneki keh ig ikakse kabayka nehmnikuhpiye gitkis gikamkayuvwi Jakó gikak Ezaú.

²¹ Igme amekene Jakó ig hawata kamaxwenewagivitit Kiyavwiye Uhokri. Inneki keh ku aysaw ig me miyapmet ig ikakse kabayka gitkis piyananene gikebikis José gikamkayuvwi. Avim ini ig siguw amin gisuga ig kibeyhene Kiyavwiye Uhokri.

²² Igme amekene José ig hawata kamaxwenewa givitit Kiyavwiye Uhokri. Inneki keh ku aysaw ig me madike gidehetnimet ig awna ku aysawnemenek gihiyegavu izhaewyenevwi pesenek avititak ini waxri Ejitumnaw. Ini gikamaxwan keh ig aye gitkis adahan igkis iwe gap gihaptikis.

²³ Hawata akiw amekene Moís gig gukak ginag egkis hawata kamaxwanos givitit Kiyavwiye Uhokri. Inneki keh ku aysaw gukamkayhkis Moís amadga wayk egkis kibokahwe ayempig adahan mpana kayg. Egkis hiyapni hene ku samah ig barewye bakimni, egkis kamaxwa givitit Kiyavwiye Uhokri adahan ig mpitha Faraó adahan ig ka umahkisgi. Nikwe egkis ka avis.

²⁴ Igme amekene Moís ig hawata kamaxwenewa givitit Kiyavwiye Uhokri. Inneki keh ku aysaw ig kiyavwip ig tukuhminew ariw ini ku samah ig kanumka Faraó gihiwhi.

²⁵ Ig kaniy adahan ig hiyepne mbeyne payak gikakkis Kiyavwiye Uhokri gihiyegavu mpinekata ig hiyepne batekka adahan aynesa hawkri ay amadga inin, ku pariye keh ig taraksa gikak Kiyavwiye Uhokri.

²⁶ Git in kabayte adahan ig hiyap mbeyne gidahan Cristo mpinekata ig misakwa akak madikte ini igiska adahan Ejitumnaw. Mmanawa ig hiyakni ku ig daxnek gitiwni giwntekne Kiyavwiye Uhokri.

²⁷ Ini gikamaxwan keh ig amekene Moís pese avititak Ejitumnaw. In keh ig ka avis abohri gikivara Faraó gidagoni. In keh ig ka tuguhkis gihiyekemni. Mmanawa in ke wotbe ig hiyap Kiyavwiye Uhokribe ku pariye kane hiyapkarati akakma iwtyakti amadgaya inin.

²⁸ Ini gikamaxwan keh ig umahkise muwtohyan gitkis gihiyegavu. Igkisme iwe gimig, igkis tamaknume mpuse lapot nikak kahadbe ner ahj umehekevutne ig hiyapni hene, ig ka dax hiyeg gikamkayhkis ku pariye eggutye atere.

²⁹ Ini gikamaxwan keh igkis gihiyegavu manuke ini parahwokwa Duwweh ke wotbe igkis waywe amadgew waygbe. Igkisme neras ejituyenevwi ku aysaw igkis haraksevgikis avigku gihinakis in digisasevgikis igkis aniksew madikte.

³⁰ Neras amekenegben judeyenevwi hawata igkis kamaxwenewagivitit Kiyavwiye Uhokri. Awaku ini gikamaxwankis igkis hakuhkise ini batakka ayaranwa paytwempu Jerikó akak giwewnikisnen nanwew adahan ntewnehker hawkri.

³¹ Amakano Rabi, nor tino powkemnivyo, eg hawata kamaxwano givitit Kiyavwiye Uhokri. Eg ameve kabayntiwa amekene Joswe giwatnivwi yawayavu. Inneki keh eg ka umahka payak gikakkis neras jerikoyenevwi kane ihpekere Kiyavwiye Uhokri giwn.

³² Ay ka aynsima hiyeg akiw ku pariye kamaxwenevwi givitit Kiyavwiye Uhokri. Nah ka kahawkan kinetihwa gimin amekene Jideawh, gimin amekene Baraki, gimin amekene Sansoh, gimin amekene Jefte, gimin amekene Samwe, gimin amekene Davi, giminkis madikte Kiyavwiye Uhokri gawnavevu pitatyevwi.

Hiyeg gikamaxwankis bisiksevgikis ariw mbeyne

³³ Igkis amekenegben kamaxwenevwi keh arakembet annut awaku ku samah igkis kamaxwa givitit Kiyavwiye Uhokri. Igkis mateke ka aynsima waxribdi. Igkis wewkise gihiyegavukis wadit. Igkis darihe ku pariye Kiyavwiye Uhokri gikaksan gitkis. Gikamaxwankis sabukise kawokwine gibiykis.

³⁴ In hawata awakase tiket kadawehpiye ay ganwakis. In hawata bisiksevgikis ariw giwmepkakkis akak iwan. Awaku gikamaxwankis neras ku pariye yumanene gidatnikis igkis humewvi detyevwi. Igkis humaw detyevwi adahan kerye gikakkis givetunyavukis. Igkis mateke ka aynsima nawotunyevwi gisuwtatavukis.

³⁵ Awaku gikamaxwankis tinogben darihe gukamayhkis akiw mmanawa ignes kannikasaka ariw gimiremnikis. Heneme gaytakis kamaxwenevwi ka henema. Awaku gikamaxwankis igkis biptepka he igkis miyarap. Wake igkis tukuhwevyebe giw Kiyavwiye Uhokri, nikwekam igkis isahkiskakam. Heneme igkis ka tukuhwekere giw. Igkis kamaxwa givitit Kiyavwiye Uhokri mmanawa igkis hiyakni ku igkis kannikasakanek adahanikwa inurik adahan igkis uti gidehetnikis kabaytenene.

Gaytakisme hiyeg gikamaxwankis keh igkis hiyap mbeyne

³⁶ Gaytakisme hiyap mbeyne akak mahivwihka akak biwhka, he gaytakis wanakminepka akak xen, gaytakisme sarayhpika arikut parakseket.

³⁷ Gaytakisme kamaxwenevwi padaktavepka akak tip, gaytakisme bukihbetepka akak kirikiri, gaytakisme umehpika akak iwan. Gaytakisme wewnamah madiptavye. Gikawihnikis he muwtoh gimarnenwa akak kabrit gimar. Igkis hiyapkiska ka aynsima mbeyne gitkis, ka aynsima mbayka.

³⁸ Hiyeg amedgenevwi inin yuma gikiytanikiswa gitivutkis neras kamaxwenevwi. Heneme ignes keh mbeye hawkri gikakkis, igkisme he igkis bisike giwkis. Ayge igkis wewnamahkis muwapuw amadgew amatap, avitiw waxri imuwadnene. Igkis kavinhaw arikuw tip, arikuw miyokwiye.

³⁹ Awaku gikamaxwankis ig Kiyavwiye Uhokri annase kibeyne iwit giminkis neras amekenegben. Heneme igkis kote darihte madikte kabayka ku pariye Kiyavwiye Uhokri gikaksan gitkis.

⁴⁰ Mmanawa Kiyavwiye Uhokri wahevye nawenyevwi hiyeg kamaxwa givitit akiw. Ig wahevye wixwiy kuriwkenevwi avim inin. Adahan ig iki wotwiy kabayka kabaytenene payak gikakkis neras amekenegben. Adahan wixwiy humaw payak gikakkis avigkutavrik ku samah Kiyavwiye Uhokri gimawkan.