Ebréws 10 - Uhokri Gahegbetawni Nukune akak Sawmus

Puwikne gimig waditnevyenen

¹ Ku samah ig Kiyavwiye Uhokri akki inakni gikumadukan git amekene Moís in ke wotbe ig ekkenebe git pahak ahehpaktibe adahan ini kabayka ku pariye ig me ikinemet gitkis gihiyegavu. In ka inyewatma. In he areketninen aynesawa. Yis hiyak ku samah neras muwvegviyenevwi igkis akka puwikne gimig givetunat Kiyavwiye Uhokri. Takunipti mpuse pahak kamukri igkis akka inwata migat akiw. Heneme in ka hiya akehka hiyeg avigkutavrik ku samah Kiyavwiye Uhokri gimawkan adahan avanenekwatma.

² Wake igkis inyewatbe sagahptaka ariw givathawnikis, nikwekam igkis ka kayahkam givathawnikis akiw. Ayge nikwe igkis muwvegviyenevwi ka akkakam migat givetunat Kiyavwiye Uhokri akiw. Nikwekam pahayewvikam igkis ekkepni ikeyvikam kuwis.

³ Heneme in ku samah igkis akka migat givetunat Kiyavwiye Uhokri mpuse pahak kamukri, in he kawih adahan kiyeksene givathawnis gitkis.

⁴ Mmanawa pak gimig akak kabrit gimig in ka hiya inma barewbetha uhiyekemniwiy ariw uvathawniwiy.

⁵ Inneki keh ku aysaw ig Cristo pareke abet uhawkanwiy ig awna git Kiyavwiye Uhokri. Giwn: “Ini ku samah hiyeg akka puwikne gimig pivetunat, ini ku samah igkis kakanhaw pit, ka innema huwit avigkutavrikut ku samah pimawkan. Inneki keh pis keh inin nuvituh humaw adahan nah kehne ku pariye inyewa pibetki.

⁶ Pis ka inyewatma batek akak puwikne ku pariye bukahka pahavwite pivetunat ig umahka gidukwenavrikkis hiyeg adahan katiwnihne gitaraksankis. Ka innema huwit avigkutavrikut ku samah pibetki.

⁷ Nah hiyapni hene, nah awna pit: ‘Kiyavwiye Uhokri, nop nah ay kuri adahan nah kehne ku pariye inyewa pimawkan hawata ku samah pannasan awna nudahan.’ Henewatbaki Uhokri gannasan akki wotwiy ku ig Cristo awna inakni.

⁸ Pitatye ig awna: “Pis ka inyewatma batek akak puwikne gimig, ine akak kakanhawka, ine akak puwikne umahka, ine akak puwikne bukahka. In ka danuh avigkutavrikutma ku samah pimawkan.” Inakni giwn henewa, nukebyuvwi. Hiyawa amekene Moís gikumadukan aya gitkis hiyeg adahan igkis kehni hene heneme ini gikehnikis kote danuhte avigkutavrikutma ku samah Kiyavwiye Uhokri gimawkan.

⁹ Ayteke ariwntak inakni iwit ig awna: “Kiyavwiye Uhokri, nop nah ay kuri adahan nah kehne ku pariye inyewa pimawkan.” Akak ku samah ig awna inakni ig mpiyaksa inakni amekene Moís gikumadukan adahan umehne puwikne adahan ig kannikasene niwenyan ini ku samah Cristo umahkiswe udukwenavrikwiy.

¹⁰ In avigkutavrik ku samah Kiyavwiye Uhokri gimawkan adahan wixwiy humaw barewvitye giwtrik akak ku samah ig Jesus Cristo ike givit udukwenavrikwiy pahayewvi.

¹¹ Neras muwveg amedgenevwi inin tabira givetun Kiyavwiye Uhokri mpuse hawkri adahan igkis kehne gannivwikis givetunat. Takunipti igkis iwi akebwata puwikne ku pariye umahkatinene gidukwenavrikkis hiyeg, igkis bukahgi givetunat Kiyavwiye Uhokri. Heneme ini ka hiyati akatiwnihka hiyeg gitaraksankis.

Uhokri kawihkis gihiyekemni uvititwiy

¹² Igme Cristo umahkiswe pahayewvi adahan katiwnihpiye gitaraksankis adahan avanenekwa. Pisenwa ini gannivwi, ig batahkiswe gihumwa Kiyavwiye Uhokri ayge amun ini iwetrit ku pariye kane nikiytanisima kihehaptak.

¹³ Ayge ig he wahepnenen he ku aysaw givetunyavu sibuhkiswika git.

¹⁴ Ku samah ig umahkiswa pahayewvi, ig keh wixwiy avigkutavrik ku samah Kiyavwiye Uhokri gimawkan adahan avanenekwa, wixwiy ku pariye barewvithaki ariw uvathawniwiy.

¹⁵ Kiyavwiye Uhokri Gitip hawata ig akki wotwiy ku inakni inyewa mmanawa ig awna inakni hene ay gibiyrik pahavwi Uhokri gawneve. Pitatye ig awna:

¹⁶ “Kuri nah akkite yit ku pariye nahegbetawninek gikakkis nuhiyegavu aysawnemenek. Aysawnemenek nah kawihkis nuhiyekemni givititkisnek. Nah ka tamakni amadgat tipnenwatma. Heneme nah tamakni abetit gihiyekemnikis.”

¹⁷ Butte ig awna: “Nah ka kiyeminati givathawnikis, gitaraksankis akiw.”

¹⁸ Ku samah ig Kiyavwiye Uhokri bayahminawiy hene ariw utaraksanwiy, nikwe wixwiy ka muwaka akka ariknawnema akiw givetunat Kiyavwiye Uhokri adahan katiwnihne utaraksanwiy akiw.

Uyay danukwa kennesa git Uhokri

¹⁹ Kuri, nukebyuvwi, abet uhiyekemni ik adahan takunipti wixwiy parak atere akak madikte ubokawiy wadite arikut Kiyavwiye Uhokri giwskeki inurikyene awaku ku samah ig Kiyavwiye Jesus sukase gimig udukwenavrikwiy.

²⁰ Ig kuwis woke nukune ahin udahanwiy, ahin dehetniki. Mmanawa avim ini ku aysaw ig sigkase gih, avim ini Kiyavwiye Uhokri giwskeki amaptenten in hawata sigke.

²¹ Hawata akiw wixwiy gihiyegavu kadahan wawnamnihtenwiy ku pariye avitminte, kiyate giwkis madikte muwveg amedgeyene inin.

²² Nikwe uyay danukwa kennesa git Kiyavwiye Uhokri avititakwa uyakniwiy wixwiy kamaxwene givitit kabayntiwa. Ku samah amekenegben saktaki akak migat adahan sagahptene givathawnikis, uyay danukwa gihumwat Kiyavwiye Uhokri akak uyakniwiy ke wotbe saktakibe akak Kiyavwiye Jesus gimig adahan sagahptene uvathawniwiy abetitak uhiyekemniwiy, kahadbe wixwiy ka kayah ini uvathawniwiy akiw. Hawata akiw ku samah ignes amekenegben avit igkis parak Kiyavwiye Uhokri givinekut igkis sukuhptaw akak un adahan barewvithene givitkis, uyay danukwa gihumwat Kiyavwiye Uhokri akak uhiyekemniwiy kuwis sukuhbetaka akak un barewye giwntak Kiyavwiye Uhokri.

²³ Uyay kamaxwa kabayntiwa avitit ini Kiyavwiye Uhokri gikaksan kabayka wotwiy. Uyay akkin gitkis hiyeg akak madikte ubokawiy. Uyay ka miniwbetaw niw. Mmanawa ku pariye Kiyavwiye Uhokri awna, inakni ka waditnevyenenma.

²⁴ Uyay avuriwak pawtak. Uyay hiyakemnihak pawtak adahan wixwiy amnihak adahan wixwiy keh kabayka gikakkis madikte hiyeg.

²⁵ Gaytakis hiyeg kuwis miniw ariw lammes. Uyay ka muwaka kehni hene. Uyay pahadguhwa takunipti adahan ikene wawaygiy pawtak. In ka aynsima muwakte ku avim inin mmanawa in kahayak huwewe wotwiy ku Ukivarawiy kennesa gidawnhan.

Ku pahavwi miniw giw Uhokri, ig hiyap mbeynenek

²⁶ Mmanawa ku wis hiyak kabayntiwa ku samah Uhokri gihiyekemni inyewatnene, heneme ku wisnewa misekwekere akak utaraksan, nikwe yuma pahavwinema akiw adahan katiwnihne utaraksan udahan.

²⁷ Amawka ku wiswa katiwnihni. Nikwe kiskama wis avis. Mmanawa aysawnemenek ig Kiyavwiye Uhokri hiyapkisnek mbeyne ku pariye kane abohrisima gitkis hiyeg ku pariye kane wewkere akak gihiyekemni. Avim ini ig dakarasevgikisnek akak tiket ahawkri.

²⁸ Minikwak ku pahavwi ka kumadukasaw arit amekene Moís gikumadukan, ig umehpika, yuma amnihka gidahan aynesnima. Ku ig hiyapka gavitkis piyana ba mpana gikebikis hiyeg ku samah ig kumadukasewne arit nawenyewa giwohkiga, nikwe ig umehpika pisenwate.

²⁹ Igkata akiw pahavwi ku pariye kane kumadukasewkere git Kiyavwiye Uhokri gikamkayh akiw? Ig ner kis adahan ig utipte mbayka akiw. Ku pahavwi ka kumadukasewkere git Kiyavwiye Jesus, amun ini nikwe ig ikene Kiyavwiye Jesus gimig waditnevyenen ku pariye ig sukase gidahan adahan ig humaw gihiyega adahan ig barewvit ariw givathawni. Amunwata ini ig miyathene Kiyavwiye Uhokri Gitip ku pariye areketni git gamnihra Kiyavwiye Uhokri. Ivegminanay ku samah ig ner kis adahan ig utipte mbayka akiw.

³⁰ Mmanawa wixwiy hiyakni ku ig Kiyavwiye Uhokri detye. Ignewa ku pariye awna: — Nahwa diyuhkis mbayka gitkis hiyeg. Nahwa keh igkis katiwnih. Hawata gannasan awna: — Igwa Ukivarawiy Kiyavwiye Uhokri hiyak gikakkis gihiyegavunek.

³¹ Ku wis ay giwaku Kiyavwiye Uhokri dehetniye adahan ignewa hiyak ukak, ik adahan wis avis ka aynsima. In ka abohrisima.

Kamaxwanay givitit Uhokri ke pitatyebe

³² Nukebyuvwi, kiyeminahnabay amin yikamaxwan minikweknene ku aysaw ig Kiyavwiye Uhokri pitatye uguhe yihiyekemni. Avim ini hawkri yis hiyap ka aynsima mbeyne heneme ini mbeyne ka tuguhkis yikamaxwan. Yis yidukwenewa kamaxwene givitit Kiyavwiye Uhokri kabayntiwa.

³³ Yaytak mahivwihpika giwtrikkis hiyeg yis hiyapkiska mbeyne yit gavitkis. Yaytakme hiyap mbeyne awaku yis kiboka amnih neras ku pariye hiyapkiska mbeyne gitkis.

³⁴ Yis kiboka amnih neras ku pariye padekwika arikut parakseket. Hiyawa yis xuwahminepka madikte, heneme yis amavin akak batekka. Mmanawa yis hiyakni ku yis kadahan kabayka kabaytenene akiw ku pariye igkis ka hiya axiwhak.

³⁵ Nukebyuvwi, kuwis yis kamaxwa givitit Kiyavwiye Uhokri ka aynsima. Ka yi muwaka isahkis ini yikamaxwan kuri. Mmanawa aysawnemenek in keh yis uti ka aynsima kabayka.

³⁶ Amawka ku yis mpiksaw keh Kiyavwiye Uhokri gibetki aynesa akiw kahadbe pisenwa yis darih madikte ini kabayka ku pariye Kiyavwiye Uhokri gikaksan udahanwiy yis ka biyuk nikak.

³⁷ Kiyeminanay ku pariye Uhokri gannasan awna. In awna: — Ka ayivwadima hawkri akiw adahan ig ku pariye nehmnikuhpiye adahan ig danuh atan. Ig ka ayivwihwa.

³⁸ Ku pariye hiyeg tiviknene kamaxwene nuvitit, igi nah hiyavginek kibeyne nuwtrik, ig aymuhwa numunuhnek adahan avanenekwa. Igme ku pariye miniwviye nuwhu, ig keh nah ka bateknek. Henewatbaki ig Kiyavwiye Uhokri awna.

³⁹ Wixwiyme ka henema, nukebyuvwi. Wixwiy ka miniw giw he wixwiy biyuk giw. Kawa. Wixwiy kewa nerasbe ku pariye kamaxwenevwi givitit igkis aymuhwa gimun Kiyavwiye Uhokri adahan avanenekwa.