Attus 4 - Uhokri Gahegbetawni Nukune akak Sawmus

Pedru gikak Joawh kamaxwika

¹ Ku samah ig Pedru gikak Joawh igkis awnempiye inakni iwit hene, neras judeyenevwi gimuwvegakis patiptakevgikis atere payak gikak gikivarakis neras avuriwnevwi Kiyavwiye Uhokri Givin gikakkis neras sadusewkis akiw.

² Gitkis sadusewkis hiyeg miyap ignes pisenwe gihawkankis igkis ka kannikaw akiw. Igkis ka batek ku samah Pedru gikak Joawh awna ku ik adahan hiyeg kannikaw ariw gimiremnikis mmanawa Kiyavwiye Jesus kuwis kannikew ariw gimiremni.

³ Igkis danuh atere gitkis, igkis kamaykiswigkis. Ku samah ayipa misanpi kuwis, igkis paraksasevgikis arikut parakseket adahan wahevye takuwanek adahan igkis awnene gikakkis.

⁴ Heneme, kibeyne, ka aynsima hiyeg ku pariye timepnevwi inakni Pedru giwn igkis ihe inakni giwn. Avim ini pohowku mil (5.000) gikebikis kamaxwevyes givitit Kiyavwiye Jesus.

Pedru gikak Joawh ay givetunkis judeyenevwi gikivarakis

⁵ Hewke akiw neras judeyenevwi gikivarakis gikakkis giwewkistenkis gikakkis neras kannuhekevutnevwi amin amekene Moís gikumadukan, igkis madikte pahadguhwa atere Jerusalém.

⁶ Ner muwvegviyene gikivarakis amekene Anas ig ayge gikakkis gikebyuvwi. Ayge amekene Kayfas gikak Joawh gikak Alixandre gikakkis nawenyevwi gikebyuvwi igkis ayge gikak amekene Anas.

⁷ Ayteke nikwe igkis waxwase Pedru gikak Joawh tahan givetunatkis. Igkisme danuh atere, igkisme ayavgikis: — Kitak yis uti ini yannu adahan yis kehne ini ku pariye yikehni ay? Pariyeva iki yit ini yikumadukan, akebi yis hiyeg?

⁸ Igme Pedru ayge ig gitiphewne Kiyavwiye Uhokri, ig kaytwa giwnkis: — Kiyavwiyegben, yis ukivara, yis uwewkisten,

⁹ mmahki yis ayap usuh amin ini kabayka ku pariye usuh kehe gidahan ner awayg dathuvye? Mmah yis ayap usuh amin ku samah ig makniw?

¹⁰ Usuh akkamnihnite yit kahadbe yis hiyak. Umawkan madikte hiyeg izhaewyenevwi hiyak. Usuh amnihgi akak gannu Kiyavwiye Jesus Cristo Nazaréyene. Ignewa yis daddahkiswinig heneme Kiyavwiye Uhokri kannikasevgi ariw gimiremni. Ignewa Kiyavwiye Jesus gannu keh ner awayg makniw, ig tabir ay yiwtrik.

¹¹ Ignewa Kiyavwiye Jesus ke nor tipbe ku pariye Uhokri gannasan kinetihwa gumin. In awna: — Hiyeg kehnes paha payt tiptiye, igkis tukuhe pohow tip. Givewkankiskam ku egu tip ka kawihkam. Bawa egu tip eg awaygte ariw madikte. Eg humaw adahan payt Neras Uhokri gawnevevu pitatyevwi gikakkis Uhokri giwatnivwi igkis humaw kewa ini payt awakube. Igme Jesus Cristo ig humaw ke payt akoksabe ku pariye pi awaygte ariw madikte. Wixwiyme humaw ke abukabetbe ke avinvitbe ku pariye wagahkisbetaki givititkis. Nor tip arakak gidahan Kiyavwiye Jesus. Yis tukuhpig bawa ig ka aynsima kabayte giwkis madikte hiyeg.

¹² Ignewa Kiyavwiye Jesus keh wixwiy isahptaw. Yuma nawenyewatma ahin ikaka wotwiy akiw amadga hawkri adahan wixwiy danuhne git Kiyavwiye Uhokri.

judeyenevwi gikivarakis mpithevye Pedru gikak Joawh

¹³ Igkis judeyenevwi gikivarakis igkis hiyapni hene ku samah Pedru gikak Joawh igkis kinetihwenes akak madikte gibokakkis, igkis wakaymnibdi gidahankis ka aynsima. Igkis awna: — Mmahki igkis ka avis ubohriwiy? Igkis ka kannuhyema hiyeg. Igkis hiyeg henenwatnen yumanene gikiytanikis. Ayteke igkis hiyekevgikis, igkis awna: — Igkis Jesusmin gidahewekten. Inneki keh igkis kinetihwenes akak gibokakkis hene.

¹⁴ Igkis gikivarakis ka hiya igkisma diyuhkis ginetnikis aynesnima. Mmanawa ner awayg makniwtinene ig tabirnene ay giwtrikkis ayge gihumwakis Pedru.

¹⁵ Ayteke nikwe igkis hiyapni hene, igkis pekkise Pedru gikak Joawh kabaywakat adahan igkis ahegbetenes ginetnikis igkiswonas.

¹⁶ Ayge igkis kinetihwenes pawtak, igkis awna: — Mmah wixwiy keh gikakkis kuri? Madikte hiyeg aynenevwi avit Jerusalém ignes kuwis hiyak ku samah igkis keh ini kibeyne annut. Wixwiy ka hiya wixwiyma awna kawk.

¹⁷ Ka sam. Uyay puwimahgikis adahan igkis ka kinetihwa gimin Jesusmin akiw kahadbe ini ginetnikis ka ibakhaw.

¹⁸ Pisenwa gahegbetankis inakni ginetnikis, igkis watihpevgikis adahan parak akiw. Igkisme pareke atere, igkisme awna gitkis: — Ka ba yi kinetihwa gimin Jesusmin akiw. Ka yi kannuh hiyeg gimin akiw.

¹⁹ Igme Pedru gikak Joawh igkis kaytwa giwnkis: — Mmah yis yivewkan kabayte giwtrik Kiyavwiye Uhokri adahan usuh ihpate yiwn ariw Kiyavwiye Uhokri giwn? Hiyawa yiswa kaniy.

²⁰ Usuh ka hiya usuhma sabuk ubiyuh adahan ku pariye usuh hiyap Kiyavwiye Jesus keh. Usuh ka hiya usuhma sabuk ubiyuh adahan ku pariye usuh timap ig awna.

²¹ Igkisme gikivarakis hiyapni hene, igkis puwimehpigkis akiw. Pisenwa igkis isahkiswigkis. Igkis ka hiya gisamanakkis adahan igkis bukihni giwkis mmanawa igkis avise ku nawenetke neras hiyeg paytwempuyenevwi hayruke gikakkisnek givatrakis. Mmanawa madikte hiyeg kibeyhenes Kiyavwiye Uhokri ayge awaku ku samah ner awayg makniw.

²² Mmanawa igi awayg makniwtinene ig mpiy paxnika madikwa (40) kamukri gaw.

Jesus gihiyegavu aya gibokakkis git Uhokri

²³ Ig Pedru gikak Joawh ku aysaw igkis isahkiswika, igkis awna: — Uya iwasa ukebyuvwi. Igkis tivik gimkatkis Kiyavwiye Jesus gihiyegavu. Igkis danuh atere, igkis ekke gitkis madikte ku samah neras muwveg kiyatyevwi gikakkis neras giwewkistenkis igkis pitimnak gikakkis.

²⁴ Igkisme timapni hene, igkis madikte piriyepkewnekuye git Kiyavwiye Uhokri akak pahatwowa gihiyekemnikis. Igkis awna: — Kiyavwiye Uhokri, pis keh en, pis keh waxri, pis keh parahwokwa, pis keh madikte ariknebdi ay amadga inin.

²⁵ Kiyavwiye, minikwak pitip awna givitak pihiyega uhawkri amekene Davi. Giwn: “Mmahki madikte hiyeg dagawnebdi git Kiyavwiye Uhokri? Mmahki igkis suguhpig? Mmahpaki hiyeg gihiyekemnikis waditnevyenen hene?

²⁶ Madikte gikivarakis hiyeg amedgenenevwi inin igkis ahegbete ginetnikis adahan igkis suguhnes Kiyavwiye Uhokri. Madehkis ikivarat tuguhkis gihiyekemnikis hehpekuye adahan igkis kavetunsenes Kiyavwiye Uhokri adahan igkis kavetunsenes Cristo, ku pahavwi Uhokri gikanyan adahan ukumaduketniwiy.”

²⁷ Piwnapnawa, Kiyavwiye. Metakwa inakni piwn humaw ku avim inin. Ig kiyavwiye Erodis gikak kiyavwiye Ponsiyu Pilatus gikakkis ignes hiyeg ku pariye kane judeyenevwima gikakkis ignes hiyeg ku pariye izhaewyenevwi, igkis madehkis tuguhkis gihiyekemnikis hehpekuye adahan igkis kavetunsenes Kiyavwiye Jesus ku pariye pikamkayh barewvitye ku pariye pikanyan adahan ukumaduketni.

²⁸ Igkis kehe madikte mbayka gikak Kiyavwiye Jesus ku pariye pis isakse adahan igkis keh. Bawa ayipa minikwak pis akak pidatni akak pihiyekemni pis ayipa ahegbete pinetni adahan ini mbayka danuh git.

²⁹ Kiyavwiye, iveg ku samah neras puwimah usuh ku avim inin. Uya amnih iki wawaygi usuh pihiyegavu adahan usuh ekkene piwn akak madikte uboka.

³⁰ Uya sarayh piwak adahan pis piyih kakahribdavye. Uya iki pannu uvitit giwntak pikamkayh barewvitye Kiyavwiye Jesus adahan areketni pidatni kahadbe madikte hiyeg wakaymni gidahan.

³¹ Pisenwa inakni giviryepkawnikis, ini iwetrit ku kiney igkis pahadguvunene in segke. Ayge avim ini Kiyavwiye Uhokri Gitip kawihpigkis. Ariwnteke ini igkis akka Kiyavwiye Uhokri giwn akak madikte gibokakkis.

Jesus gihiyegavu amnihak pawtak

³² Avim ini madikte ku pariye kamaxwenevwi givitit Kiyavwiye Jesus igkis pahatwowa gihiyekemnikis. Yuma pahavwinema gaytakis mpihpak amin akiw. Igkis pasumpak madikte pawtak.

³³ Ig Kiyavwiye Jesus giwatnivwi igkis kinetihwenes akak ka aynsima gannukis amin Kiyavwiye Jesus gikankawni. Kiyavwiye Uhokri gabay ayge gikakkis madikte.

³⁴ Yuma hiyeg ayge muwekne git ariknawnema. Madikte hiyeg ku pariye kadahanyevwi giwasrakis igkis piyukwin. Madikte ku pariye kadahanyevwi payt igkis piyukwin. Ayteke igkis ewk akakuravig ku pariye gaviykankis.

³⁵ Igkis ikepni giwakuritkis Kiyavwiye Jesus giwatnivwi. Igkisme giwatnivwi igkis ibakhase nor karukri givuwiwkis mpuse Jesus gihiyegavu, igkis amnihgikis ku samah ignes gimawkankis.

Barnabe piyuk giwasra

³⁶ Ayge pahavwi awayg. Ig amekene Levi gihiwhi. Ig ariwntak waxri Xipremnaw. Giw José. Igkisme Kiyavwiye Jesus giwatnivwi sarayh giben Barnabe. Inakni wownavrikwiy “Wawayghetniwiy”.

³⁷ Avim ini ig Barnabe piyuke giwasra. Ayteke ig ewke akakuravig ku pariye gaviykan. Ig ikepni giwakuritkis Kiyavwiye Jesus giwatnivwi.