Attus 28 - Uhokri Gahegbetawni Nukune akak Sawmus

Pol kagehpika gavit kaybune

¹ Usuh danuh atere, usuh hiyeke ku ini kewgihri kewye Maltamnaw.

² Hiyeg kewgihriyenevwi ayge igkis ameve usuh kabayntiwa. Igkis hamehe nopsad tiket udahan awaku mwok akiswih. Igkis avuriw usuh ayge. Igkis ka gamnihrasima ukakuh.

³ Igme Pol pahadguhe gitimka. Ig sarayhpiye gitimka tiketrikut, ayge pahavwi kaybune pahaywotneye pese abetitak gitimka. Ig pese awaku awahni. Ayteke nikwe ig kagehe Pol giwak.

⁴ Neras kewgihriyenevwi hiyapni hene ku samah ner kaybune misekwe mawe Pol giwaku, igkis ikiygi ku ig kakehniye. Igkis awna: — Ke nuthube ner awayg umehekevutne. Ku avim inin Kiyavwiye Uhokri diyuhkiswig. Ig ka miya un ahakwa heneme kuri ig miyanek.

⁵ Heneme ig Pol sessehe kaybune hampa abetit tiket. In kaybune avuyi ka kehgi ariknawnema. Ig gidukwenewa makniw.

⁶ Nerasme hiyeg iveg gimkat adahan igkis hiyepnes ku samah ig miya. Igkis avuriwgi ba giwak wagawga ba kawk ba ig miya pahaye adahanek. Igkis waha ayivwad, ig ka miya. Ig gidukwenewa makniw. Igkis hiyapni hene, igkis uniyeh gihiyekemnikis. Igkis awna: — Ig ka hiyegma! Ig pahavwi Uhokri!

Polkis misakwa avit kewgihri

⁷ Ayteke ariwnteke ini pahavwi awayg kewye Puwbliw, ig awnase usuh givinwat. Ig kumadukene madikte hiyeg ayge avit ini kewgihri. Giwasra kennesa amun ku kiney usuh awehewne. Ig awnase usuh, usuh atere givinwat. Usuh misekwe ayge gimun adahan mpana hawkri. Igme avuriw usuh kabayntiwa.

⁸ Usuh ayge, ig Puwbliw gig kakahrip. Digiki utevgi. Ig nawe. Ig haritmin. Ig Pol hiyapni hene, ig atere iwasavgi. Ig piriyepkew gidahan. Ig sarayhe giwak givitit. Ayge ig makniwevgi.

⁹ Ayteke nikwe neras kewgihriyenevwi timapni hene ku samah ig makniwevgi, neras ku pariye kakahravye igkis danuh atere. Igkis hawata makniwepka.

¹⁰ Ayteke nikwe igkis kakanhaw wotuh ka aynsima. Igkis iki wotuh madikte umawkanitnene adahan utepkemni amadgew nawiy.

Polkis danuh avitit Roma

¹¹ Usuh mpiyase mpana kayg ayge. Ayteke usuh tivik amadgew pahamku nawiy kewyo “Uwohkiga Abes”. Egu nawiy aytonti avititak paytwempu Alexandriya. Eg ayipa wahe mwokwekri mpiya ayge avit ini kewgihri. Usuh katapte amadga egu nawiy. Adye usuh tarekwe.

¹² Usuh tivik. Usuh tivik. Usuh danuh tahan avitit paytwempu Sirakusa. Usuh misekwe ayge adahan mpana hawkri.

¹³ Ayteke usuh tivik kawerihwe akiw. Usuh manuksewmin adahan usuh kamaxne mayg he usuh danuhe avitit paytwempu Rejyu. Hewke mayg uvuvuke tiwriktak. Usuh hiyapni hene, usuh tarekwe. Usuh mpiyase pina hawkri, usuh danuh avitit paytwempu Pozwoli. Ayge usuh misekwe ariw nawiy.

¹⁴ Ayteke usuh ute aynesa Jesus gihiyegavu aygnenevwi. Igkisme awnase usuh adahan usuh misakwa gimunkis pahay paka. Usuh hiyapni hene, usuh misekwe ayge. Ayteke usuh tivikwiye avigku ahin tahan avitit paytwempu Roma ku kiney kiyavwiye Sezar misakwa.

¹⁵ Jesus gihiyegavu aynte Roma igkis timep wakuh ku usuh danuhe atere. Ayteke nikwe igkis pese paytwemputak igkis patiptake usuh atere avigkut ahin. Gaytakis patiptake usuh ayge paytwempu kewye “Ahigwi Appiyu”. Gaytakisme patiptake usuh ayge amun paha iwetrit kewye “Mpana Piyuket”. Ig Pol hiyapni hene ku samah igkis wew piyawakad adahan igkis gaytnihten, ig kabayha Kiyavwiye Uhokri ig bateke ginaktin.

¹⁶ Metakwa usuh danuh atere Roma. Ig ner suwtat gikivarakis ig isakse Pol misakwa ku kit ig misekwekere. Heneme pahavwi suwtat misakwa gikak adahan gavuriwten.

Pol kinetihwa gitkis hiyeg judeyenevwi avit Roma

¹⁷ Ayteke ariwnteke ini mpana hawkri, ig Pol awnase givinwat madikte judeyenevwi giwewkistenkis ku pariye misekwenevwi ayge Roma. Igkis pahadguvu gimun, ig awna gitkis: — Nukebyuvwi, aynte Jerusalém nah awika, nah ikepka giwakuritkis hiyeg romanyenevwi. Heneme nah ka taraksa gikakkis ukebyuvwiy judeyenevwi, ine nah kawnata taraksa amekenegben gihiyekemnikis.

¹⁸ Igkis romanyenevwi igkis hikekun baki nah kakehniyewatma. Pisenwa igkis awna: “Ig yuma mbaynema gikehni. Ka kis adahan wis umahkisgi. Amawka wis isahkiswig.”

¹⁹ Igkis muwaka isahkisun heneme neras uwewkistenwiy ayge ka muwaka igkis isahkisun. Inneki keh nah ayep gitkis neras romanyenevwi adahan igkis awahkisun atan gimin kiyavwiye Sezar adahan igwa hiyavun baki nah wadityewatma. Nah ka ayta kamiyenema ukebyuvwiy judeyenevwi.

²⁰ Inneki keh nah awnasevyi pahadguhwa nutuh adahan nah kinetihwene yikak. Madikte wixwiy hiyeg judeyenevwi wixwiy wahepnenekwa gidawnhan Uhokri gikanyan adahan ukumaduketniwiy. Nah kinetihwene gimin gitkis hiyeg. Avatra ini nah kamaxwika, nuwan wanamin akak inin xen ku avim inin.

²¹ Igkisme kaytwa giwn: — Neras hiyeg aynte Judeyamnaw igkis ka awahkis pahaknema kagta uminuh adahan igkis akki wotuh ku pariye pikehni. Neras ku pariye danuhpenevwi atan igkis kawnata akki wotuh ariknawnema. Igkis ka mbayha piw.

²² Henneme usuh time arak ku samah hiyeg muwapuw mbeyhene giwkis neras ku pariye wewnenevwi akak Kiyavwiye Jesus gihiyekemni. Inneki keh usuh timepkere piwn gidahankis.

²³ Nikwe igkis kaniye pahay hawkri adahan igkis timepnes Pol giwn. Ayteke abet ini hawkri ka aynsima hiyeg danuh atere git. Igkis kabubuk ayge givinwa. Igme Pol kinetihwa gitkis amin Uhokri gikumadukan. Ig akkamnihni gitkis mataytak. Ig ekkene gitkis madikte ku pariye amekene Moís gikumadukan kinetihwa gidahan Uhokri gikanyan adahan ukumaduketniwiy. Ig ekkene gitkis madikte ku pariye Uhokri gawnevevu pitatyevwi kinetihwa gidahan. Ig awna gitkis: — Kiyavwiye Jesus ignewa Uhokri gikanyan adahan ukumaduketniwiy.

²⁴ Igkis hiyeg timapni hene, gihiyekemnikis ibekhewbet. Gaytakisme ihe giwn, gaytakisme ka iha giwn.

²⁵ Ayteke igkis tivikbet, gihiyekemnikis ka pakekwanema. Igme Pol awna gitkis pahat iwit akiw. Ig awna: — Kiyavwiye Uhokri Gitip keh amekene Izaíyas awna inyewa iwit giminkis amekenegben. Giwn:

²⁶ “Ataknaba kinetihwa gitkis piyaki judeyenevwi. Awnanaba han: ‘Yis ataybiswa arit Kiyavwiye Uhokri giwnek kabayntiwa heneme yis ka pukuhinek. Yis iki yitew arimkanit giwnek kabayntiwa heneme ka paduk yitiwrikutnek.

²⁷ Hiyeg amadgayavu inin pet gihiyekemnikis. Pet gitaybikis. Manan giwtyakkis. Ayge nikwe ka ik adahan giwtyakkis hiyap ku pariye hiyakemniki inyewatnene, ine kawnata ik adahan gitaybikis timap ku pariye hiyakemniki inyewatnene, ine kawnata ik adahan gihiyekemnikis pukuhpin. Ayge nikwe igkis ka wages gihiyekemnikis numkat adahan nah makniwgikis.’” Giwnapnawa amekene Isaias.

²⁸ Nah ikene yinetni ku avim inin kahadbe yis hiyak ku inakni inetit adahan Kiyavwiye Uhokri gamnihra in kuwis awahkiska giminkis hiyeg ku pariye kane judeyenevwima. Igkisme timapni. Igkis ihpinek.

²⁹ Pisenwa inakni gawnan, neras judeyenevwi pese. Igkis tivik iniyekbetikis akak ahawna.

Pol misakwa avit Roma

³⁰ Igme Pol misekwe ayge kamaxkan ariku paha payt ku pariye ig gisunpan adahan katiwnihka. Ig misekwe ayge adahan pikana kamukri. Amun ini ig amava madikte hiyeg ku pariye danuhpene git.

³¹ Ig kinetihwene gitkis amin Uhokri gikumadukan gimin Kiyavwiye Jesus Cristo. Ig kinetihwene gitkis hiyeg akak madikte giboka. Yuma hiyeg mpithig ayge.