Attus 26 - Uhokri Gahegbetawni Nukune akak Sawmus

Pol ay givetun Agripa

¹ Ig Agripa timapni hene, ig awna git Pol: — Hiyawa pis akki wotuh ku pariye pikehni. Ayteke nikwe ig Pol tareke giwak adahan ig kaytwene giwn akak kiyabawkad iwit. Ig awna:

² — Kiyavwiye Agripa, nah ay pivetun ku avim inin adahan nah ekkevye pit ku nah ka keh madikte ini mbayka ku pariye neras uyakiwiy judeyenevwi awna numinuh. Nah batek numinuh ku samah nah ay pivetun

³ mmanawa pis hiyak kabayntiwa uhumpawniwiy wixwiy hiyeg judeyenevwi. Pis hiyak madikte uhiyekemniwiy. Neras uyakivwiy kamiyevun ka aynsima. Nikwe nah aya pit adahan pis kiyakniwa timap nuwnuh.

⁴ Madikte hiyeg judeyenevwi hiyak ku samah nuwewni awenketeke ku samah nah takwayete. Igkis hiyak ku samah nuwewni aynte Jerusalém.

⁵ Igkis hiyakun ku nah ku samah nah amadga wayk nah farisew. Wake igkis muwaka akki inaknibe pit, igkis hiyakkam arakak. Usuh farisewviyene usuh ihpate amekenegben gihiyekemnikis.

⁶ Kiyavwiye Uhokri ikakse gitkis amekenegben ku ig kannikasa hiyeg ariw gimiremnikis. Nah ay pivetun ku avim inin awaku ku samah nah ihpa inakni giwn.

⁷ Kaba madikte uyakivwiy judeyenevwi ihpa inakni giwn. Ku samah ignes wahemnete ini hawkri danuh adahan ig kannikasigkis igkis ay kiyathenes Kiyavwiye Uhokri takunipti. Heneme ku avim inin, Kiyavwiye, ignesnewa judeyenevwi kamiyevun avatra ini.

⁸ Mmahki yisnewa judeyenevwi ka hiya yisma ihpa ku ig Kiyavwiye Uhokri kannikasa pahavwi ariw gimiremni?

⁹ Henneme nahwata minikwak nah kawnata ihpa inakni. Avim ini nah mpithene hiyeg adahan ignes wageswa Jesus gihiyegavu. Nah keh arakembet gitivutkis gihiyegavu. Nah nuvewkankama ku ini nukehni in waditnakama.

¹⁰ Innewa nukehni minikwak aynte Jerusalém. Avim ini igkis muwveg kiyatyevwi ike nutuh kumadukaki adahan nah kamaxne ka aynsima Jesus gihiyegavu. Nah kamaxwigkis, nah sarayhpigkis arikut parakseket. Ayteke ku aysaw igkis muwveg kiyatyevwi umahkiswigkis avim ini nah tuguhkis nuhiyekemni hehpekuye gikakkis. Nah ka iki tip seynoma arikut gatiykis adahan ignes amnihka.

¹¹ Ayteke nah tivik danuhpene kiberevut arit madikte judeyenevwi gileglisakis. Ayge nah keh mbeye hawkri gikakkis Jesus gihiyegavu. Nah mpiksaptihpigkis adahan igkis tukuhwe giw Kiyavwiye Jesus. Avim ini nah ka aynsima dagawne gitkis. Nnaktin wagewge. Nikwe nah haraksevgikis muwapuw adahan nah hiyapkisne mbeyne gitkis.

¹² Adahanikwa ini nah tivik haraksene igkis avitit paytwempu Damasku. Nah atere gihamadgatakis muwveg kiyatyevwi.

Pol akki ku samah ig wages gihiyekemni

¹³ — Nah ayge avigkunene ahin, Kiyavwiye, pahaye adahan puwipka abet, nah hiye kabutniki aytwe inuriktak. In tigigihwete ariw kamuw. In uguhpen. In uguhe nuhaptiyevwi.

¹⁴ Usuhme tuguhe waygborit. Nah timap pahat ikuvimnat awna nutuh wownavrikwiy judeyenevwi. In awna: “Sawlu. Sawlu. Mmahki pis hiyapkisne mbeyne nutuh? Pis suguhnene nuhiyekemni pis kayahte avit piyakni.”

¹⁵ Nahme kaytwa giwn: “Pariyekap, Kiyavwiye?” Giwn: “Nah Jesus ku pariye pis hiyapkisne mbeyne nutuh.

¹⁶ Kannikaw kuri. Tabira. Nah hiyapkiswe pit ku avim inin mmanawa kuwis nah kaniyvep adahan pis humaw nuwatni. Numawkan pis akka gitkis madikte hiyeg ku pariye pihiyvan akakwa piwtyak ku avim inin. Hawata numawkan pis akka gitkis ku pariye nah akki pit aysawnemenek.

¹⁷ Nah ay pikak ku kitwiye pis. Nah mpithapnek giwkis hiyeg judeyenevwi. Nah hawata mpithapnek giwkis hiyeg ku pariye kane judeyenevwima. Ku avim inin nah awahkispi atere giminkis neras ku pariye kane judeyenevwima.

¹⁸ Nah awahkispi adahan pis woka gihiyekemnikis. Adahan pis wagesgikis ke wotbe ariw misanpiki arimkat kabutniki. Adahan pis wagesgikis ariw Satanas gikumadukan arimkat Uhokri gikumadukan. Ayge nikwe igkis bayahminaka ariw gitaraksankisnek, igkis darih giwetrikisnek ay gibetkis neras ku pariye nuhiyegavu awaku ku samah igkis kamaxwenevwi nuvitit.” Henewatbaki in ku samah ig Kiyavwiye Jesus awna nutuh.

¹⁹ Kiyavwiye Agripa, nah timapni hene, nah ihe inakni giwn ku pariye ig ekke nutuh inuriktak.

²⁰ Nah tivik muwapuw kinetihwene gitkis hiyeg. Nah awna gitkis: “Wagesnabay yihiyekemni ariw yitaraksan. Iwinabay Uhokri gihiyekemni. Wewnabay takunipti akak ini yihiyekemni nukunewa ini yiwewni nukunewa. Ininewa arakak ku yis inyewa wages yihiyekemni.” Inakni nah kinetihwene gitkiskit neras hiyeg ayge paytwempu Damasku. Ayteke nah kinetihwa hene gitkis hiyeg aynte avit paytwempu Jerusalém. Ayteke nah kinetihwene gitkis hene muwapuw avit Judeyamnaw. Pisenwa nah kinetihwene hene givuwiwkis hiyeg ku pariye kane judeyenevwima.

²¹ Avatra ini, gaytakis judeyenevwi igkis kamaxwen. Igkis kamaxwen aynte ariku Kiyavwiye Uhokri Givin. Igkis nuwmepten.

²² Henneme ig Kiyavwiye Uhokri amnihpen. Kibeyne ig amnihun avanenekwa. Awaku ini nah ay ku avim inin nah tiviknene kinetihwene gidahan Kiyavwiye Jesus gitkis madikte hiyeg. Nah ikene ginetnikis gitkis hiyeg kiyatyevwi, gitkis hiyeg ku pariye ikaka yumanene gikiytanikis, madehkis. Nah kinetihwa amin inwata inetit ku pariye Uhokri gawnevevu pitatyevwi kinetihwa nimin, ku pariye amekene Moís kinetihwa nimin ku in danuhnek. Nah ka awna nawenyewatma iwit.

²³ Igkis awna ku amawka Cristo hiyap mbeyne amawka ig miyap, ig kannikaw ariw gimiremni. Ig Kiyavwiye Jesus ig pitatye hiyeg ku pariye kannikaw ariw gimiremni adahan ig ka miya akiw. Ayge nikwe ig humaw ke paha abukribe adahan uguhne uhiyekemniwiy wixwiy judeyenevwi payegbitak gikakkis hiyeg ku pariye kane judeyenevwima.

Agripa ka wageskere gihiyekemni

²⁴ Ku samah ig Pol awnempiye inakni iwit hene, ig Porsyu Festu kabiman git: — Aa, Pol. Pis puwvup. Pis kannuhwe mpinevevye. Ini keh pis puwvup.

²⁵ Igme Pol kaytwa giwn: — Kawa, kiyavwiye. Nah ka puwvu. Nah awna iwit inyewatnen waditnene.

²⁶ Ig Agripa hiyak madikte ku pariye nah ekkene yit. Inneki keh nah awna akak nuboka ay givetun. Ig kuwis timap arak madikte ini ku kamin nah kinetihwene ku avim inin. Mmanawa in hiyakan muwapuw. In ka ayamawnema.

²⁷ Kiyavwiye Agripa, ba pis ihpa giwnkis Uhokri gawnevevu pitatyevwi? Nah hiyakni ku pis ihapni.

²⁸ Igme Agripa kaytwa giwn: — Mmah pis pivewkan ku pis mpiksan adahan nah kurinewa wageswa Cristoyan?

²⁹ Igme Pol awna git: — Innewa nayapni git Kiyavwiye Uhokri. Nah muwaka pis wageswa Cristoyan ba kurinewa ba kuwewanek. Nah muwaka madikte yis ay wageswa hehpekuye ke nahbe. Ininewa nah ka muwaka yis wanakminaka ke nahbe. Igkisme hiyeg ayge awna: — Uyay miseke inakni inetit adahan avim inin.

³⁰ Ayteke ig Agripa kannikew gikak Porsyu Festu gukak kiyavuno Berenisi. Madikte hiyeg kannikewbet.

³¹ Egkis pese arikutak xam. Ayge egkis kinetihwa pawtak. Egkis awna: — Ner awayg ig yuma mbaynema gikehni. Ka kis adahan ig umahkiska ine adahan ig sarayhka arikut parakseket.

³² Igme Agripa awna git Pórsyu Festu: — Wake Pol ka kaniybe adahan ukivarawiy kiyavwiye Sezar hiyavgi ba ig wadityewatma, nikwekam wis isahkiswigkam. Heneme kuri amawka pis awahkiswig gimkanit ukivarawiy kiyavwiye Sezar.