Attus 25 - Uhokri Gahegbetawni Nukune akak Sawmus

Judeyenevwi kamiya Pol git Pórsyu Festu

¹ Igme Pórsyu Festu ku samah ig humaw hiyaptigi, ig danuh atan avitit paytwempu Sesareya. Ayteke mpiyasa mpana hawkri ig tivik avitit paytwempu Jerusalém.

² Ig danuh atere, neras muwveg kiyatyevwi gikakkis neras judeyenevwi giwewkistenkis igkis hiyapni hene, igkis kamiye Pol git.

³ Igkis aye git Pórsyu Festu: — Kiyavwiye, uya amnih usuh. Usuh muwaka pis waxwase Pol atan avitit Jerusalém. Igkis awna inakni hene adahan giwmasepten avigku ahin.

⁴ Igme Pórsyu Festu kaytwa giwnkis: — Kawk. Pol ig kamaxkare aynte Sesareya. Nah akkite yit ku pariye nah keh. Nah misakwa ay adahan aynesa hawkri. Ayteke nah diyuhe atere.

⁵ Ku ig keh mbayka, hiyawa gaytakis yiwewkisten atak nuhapti atere avitit Sesareya adahan kamiyig ayge. Ayge igkis akka nutuh ku pariye Pol gikehni.

⁶ Ayteke ig Pórsyu Festu mpiyase madikawku hawkri akiw ayge Jerusalém. Ayteke pisenwa, ig diyuhe avitit Sesareya. Hewke akiw ig batahkiswe atere amadgat gevwi adahan ku kiney ig hiyekne gikakkis hiyeg. Ayteke ig humakise Pol givetunat.

⁷ Ig Pol danuh atere, neras judeyenevwi ku pariye danuh avititak Jerusalém igkis hiyapni hene, igkis kiyarawnihevgi. Igkis kamiyevgi ayge. Igkis awna ku ig keh ka aynsima mbayka heneme ka hiya igkisma akki ku inyewa ig keh ini mbayka mmanawa yuma pahavwinema gaytakis hiyavgi keh mbayka akakwa giwtyakkis. Igkis awna he gikehbetankisnen.

Pol ay givetun Pórsyu Festu

⁸ Ayteke ig Pol ekkevye git Pórsyu Festu ku ig ka keh mbayka. Ig awna git: — Nah yuma nukehnisima. Nah ka taraksa amekene Moís gikumadukan. Nah kawnata pataha Kiyavwiye Uhokri Givin. Ine nah kawnata dakuh hiyeg gikakkis romanyenevwi gikivarakis.

⁹ Igme Pórsyu Festu timapni hene, ig awna git: — Ba pis atekere avitit Jerusalém adahan nah hiyapi ayge ba pis keh henewatma? Ig awna inakni hene kahadbe neras judeyenevwi giwewkistenkis batek gikak.

¹⁰ Igme Pol hiyakni ku neras judeyenevwi giwewkistenkis aharitne giwmasepten. Nikwe ig kaytwa giwn: — Kawk. Nah ka atekere atere. Nah kuwis ay pivetun pis hiyaptigi gidahan ukivarawiy kiyavwiye Sezar. Kiskama pis hiyavun baki nah wadityewatma ku avim inin. Nah yuma nukehnisima gitkis nuyaki judeyenevwi. Pis hiyakni kabayntiwa kuwis.

¹¹ Wake nah taraksevyebe, wake nah kakehniyebe adahan pis umahkisun, nah ka ayapkama pit adahan pis amnihun. Nah ahegbetkama adahan nah umahkiswa adahan nah katiwnihpiye nutaraksan. Heneme ku samah igkis kamiyevun wasaymkanen, nikwe ka hiya pisma ikanuh giwakuritkis. Nah atekere gitwa ukivarawiy kiyavwiye Sezar adahan igwa hiyavun ba nah wadityewatma.

¹² Ig Pórsyu Festu timapni hene, ig ahegbete ginetni gikakkis gihiyegavu kiyavwiyegben. Pisenwa ig awna git Pol: — Pis atekere git ukivarawiy kiyavwiye Sezar. Nikwe nah awahkispi gimkanit.

Porsyu Festu kinetihwa gikak Agripa

¹³ Ariwnteke ini aynesa hawkri akiw pahavwi ikivarat kewye Agripa danuh atere Sesareya. Gisamu kiyavuno Berenisi danuh gihapti. Egkis danuhpanos git Porsyu Festu.

¹⁴ Egkis misekwe ayge gimun adahan kibite hawkri. Avim ini ig Porsyu Festu kinetihwe gikak Agripa gimin Pol. Ig awna git: — Ku samah kiyavwiye Felix tivik ig ikise pahavwi paraksepkare ay nuwakuh.

¹⁵ Amakohnokwa nah danuhpene avitit Jerusalém. Ayge neras muwveg kiyatyevwi gikakkis neras judeyenevwi giwewkistenkis igkis kamiye ner paraksepkare nutuh. Igkis awna nutuh: “Uya umahkiswig udahan.”

¹⁶ Nahme awna gitkis: “Usuh hiyeg romanyenevwi usuh ka umahkis hiyeg henenwatma. Pitatye usuh watiha gikamyehpitnivwi adahan ignes ayta uvetunat payak gikak ner gikamyehnikis. Ayge ig kahawkan adahan igwa akki wotuh ku pariye gikehni. Ayteke nikwe usuh hiyavgi ba ig kakehniyewatma adahan usuh umahkisgi.”

¹⁷ Ayteke nikwe igkis judeyenevwi danuh atan. Nah hiyapni hene, nah ka ayivwihwa ayge. Hewke akiw nah batahkiswe atere amadgat nevwi adahan ku kiney nah hiyekne gikakkis hiyeg. Ayge nah iwapkise Pol nuvetunat.

¹⁸ Ayteke nikwe igkis judeyenevwi giwewkistenkis kamiyevgi nutuh. Nah nuvewkankama ku igkis akki nutuh ku samah ig keh ka aynsima mbayka. Heneme igkis ka akki nutuh hene.

¹⁹ Igkis he awna ku Pol ka wewnema avigkutavrik ku samah hiyeg judeyenevwi gihiyekemnikis. Hawata akiw ig ekkene ku pahavwi miyaviye kewye Jesus ku ig ivegnene akiw.

²⁰ Nah ka hiyak asamanak akak inakni giwnkis. Nikwe nah aya Pol: “Ba pis atekere avitit Jerusalém adahan nah hiyapi ayge baki pis wadityewatma?”

²¹ Igme Pol kaytwa nuwnuh: “Kawk. Nah atekere git ukivarawiy kiyavwiye Sezar adahan igwa hiyavun baki nah wadityewatma.” Nikwe nah avuriwkiswig ariku parakseket adahan ig wahevye adahan nah awahkisgi gimkanit ukivarawiy kiyavwiye Sezar.

²² Ig Agripa timapni hene, ig awna git Pórsyu Festu: — Nahwa timepkere ner awayg ginetni. Igme kaytwa giwn: — Barika. Takuwanek pis timap ginetni.

²³ Hewke akiw ig Agripa gukak kiyavuno Berenisi egkis kawihe gubereswetnikis. Egkis pareke atere arikut pahayku xam nopsadnene. Ka aynsima suwtat gikivarakis pareke payak gukakkis. Awaykemni kiyatyevwi ariwntak paytwempu Sesareya igkis hawata pareke gukakkis. Egkis danuh atere, igme Pórsyu Festu iwapkise Pol guvetunatkis.

²⁴ Igme danuh atere, igme Porsyu Festu awna gitkis: — Kiyavwiye Agripa, kiyavwiyegben, madikte yis ku pariye aynenevwi ku avim inin. Ku avim inin yis hiyap ner awayg ku pariye madikte judeyenevwi giwewkistenkis kamiye. Igkis kamiyevgi aynte Jerusalém. Igkis kamiyevgi ay. Igkis awna nutuh: “Pugamawka ig umehpika.”

²⁵ Henneme nah ka uti mbaynema gikehni adahan umahkisgi. Igme awna nutuh: “Nah muwaka ukivarawiy kiyavwiye Sezar igwa hiyavun ba nah wadityewatma.” Nahme kaytwa giwn: “Nah awahkispi gimkanit.”

²⁶ Amawka kuri nah awahkis pahak kagta gimin ukivarawiy kiyavwiye Sezar adahan nah ekkene git ku pariye Pol gikehni. Heneme nah ka hiyak kabayntiwatma ku pariye nah awnanek amadga ini kagta. Inneki keh nah waxwasevgi yivetunat. Kiyavwiye Agripa, nah muwakate piswa hiyavgi. Numawkan pis uti ku pariye mbayka gikehni. Ayteke nikwe nah akkinek amadga ini kagta.

²⁷ Mmanawa nah ka hiya nahma awahkis pahavwi kamaxkare gimin ukivarawiy kiyavwiye Sezar, nah ka akki git huwewe ku pariye gikehni.