Attus 23 - Uhokri Gahegbetawni Nukune akak Sawmus

Pol ay givetunkis judeyenevwi gikivarakis

¹ Igme Pol iveg gimkatkis neras hiyeg pahadguvunene ayge. Ig awna gitkis: — Nukebyuvwi, madikte nuhawkan amadga wayk nah nuhiyekemni barewbet giwtrik Kiyavwiye Uhokri.

² Igme ner muwvegviyene gikivarakis Ananiyas ig timapni hene, ig biwhbiyase Pol gitkis neras ku pariye tabirbetnene ayge gihumwa.

³ Ig Pol hiyapni hene, ig awna git Ananiyas: — Aysawnemenek Kiyavwiye Uhokri biwhpep hawata. Mmahkap pis kinise pivit? Pis bat ayge adahan pis nuhipetni ba nah wadityewatma giwtrik amekene Moís gikumadukan. Heneme piswatnene pis tarakse gikumadukan awaku ku samah pis biwhkiswen.

⁴ Neras hiyeg aygnenevwi gihumwa Pol igkis timapni inakni giwn hene, igkis awna git: — Ner awayg ku pariye pibiwhbiyasepten ig muwvegviyene gikivarakis. Ig Kiyavwiye Uhokri gihiyega. Pis mahivwihpig pis awna inakni hene.

⁵ Igme Pol timapni hene, ig awna gitkis: — Nukebyuvwi, nah ka hiyaknima ku ig muwvegviyene gikivarakis. Wake nah hiyaknibe hene nah ka awnakam inakni mmanawa Uhokri gannasan awna: — Ka yi muwaka mahivwih yikivara.

⁶ Ayteke ig Pol hiyap ku gaytakis neras hiyeg ku pariye pahadguvunene ayge ku igkis sadusewkis, gaytakisme farizewkis. Nikwe ig awna akak gihawna gitkis madikte hiyeg ayge. Ig awna: — Nukebyuvwi, nah farisew. Niguh hawata farisew. Nah waxwepka atan adahan yis nuhivetni ba nah wadityewatma awaku ku samah nah ihpa ku hiyeg kannikaw ariw gimiremnikis.

⁷ Ig Pol awna inakni, neras farizewkis kavusa katiwekbetkis gikakkis neras sadusewkis. Igkis gihiyekemnikis ibekhewbet

⁸ mmanawa gitkis neras sadusewkis hiyeg miyap ignes pisenwe gihawkankis ignes ka kannikaw akiw. Gitkis ahj yuma ay, ine anmapti yuma ay. Gitkisme farizewkis madikte ay. Gitkis hiyeg kannikaw ariw gimiremnikis.

⁹ Ayge nikwe kadukmanka ka aynsima. Gaytakis neras kannuheknevutnevwi farizewkis igkis kannikaw igkis awnamnih Pol. Igkis awna: — Ner awayg usuh ka hiyap mbaynema gikehni. Nawenetke pahavwi anmapti ba pahavwi ahj kinetihwe gikak avigku ahin.

¹⁰ Ayge nikwe igkis kadukmanbet ka ahawnasima. In keh ner suwtat gikivarakis avise gikak Pol ku nawenetke igkis sigkevginek. Ayteke nikwe ig awahkise suwtat atere adahan giwapkiswitni ayteke gibetitakis adahan gidiyesepten arikut suwtat givinkis.

¹¹ Igkis diyuhe atere, ayge tiyegem Kiyavwiye Jesus hiyapkiswe git Pol ig tabir gihumwa. Ig awna git: — Ka ba barukiswa. Ku samah kuwis pis kinetihwa nudahan ay Jerusalém, aysawnemenek pis kinetihwa nudahanek aynte paytwempu Roma hawata.

Judeyenevwi gahegbetawnikis adahan igkis giwmepten Pol

¹² Hewke akiw hawkanawa gaytakis neras judeyenevwi pahadguhwe adahan igkis ahegbetenes ginetnikis. Ayge igkis ikakse adahan givitkis ku igkis ax igkis higap nekwa igkis umehpiwa Pol.

¹³ Neras awaykemni mpiy paxnika madikwa (40) gikebikis ku pariye awnene inakni adahan giviktis.

¹⁴ Ayteke nikwe igkis atere gimkatkis neras muwveg kiyatyevwi gikakkis neras judeyenevwi giwewkistenkis. Igkis danuh atere, igkis awna gitkis: — Usuh kuwis kehe ukaksan pahatya uminuh ku usuh ax nekwa usuh umehpiwa Pol.

¹⁵ Kuri yis gikakkis ukivaravu, wasavanawnay gimin ner suwtat gikivarakis adahan ig waxwasa Pol atan yivetunat. Wasavanawnay gimin ke wotbe yis muwaka uti hiyakemnikibe waditte gidahan. Usuhme ay misakwa wahepbet adahan usuh giwmepten avit ig danuh atan. Henewatbaki igkis hiyeg awna.

¹⁶ Heneme Pol gegni gukamkayh takweye ig timevgikis ku samah igkis wahebbet adahan igkis giwmepten Pol. Ayteke nikwe ig tivik ig danuh atere suwtat givinekut. Ayge ig ekke madikte git Pol.

¹⁷ Ayteke nikwe ig Pol watihe pahavwi ikivarat adahan madikawku madikwa (100) suwtat. Ig awna git: — Uya waxwa ner takweye git yikivara. Ig kinetihwekere gikak.

¹⁸ Igme timapni hene, ig iwe ner takweye ig waxwevgi gimkat gikivara. Ig danuh atere, ig awna git: — Ner kamaxkare Pol ig watihpevun. Ig aye nutuh adahan nah waxwa ner takweye pimkat. Ig kinetihwekere pikak.

¹⁹ Ig suwtat gikivarakis timapni hene, ig sumuhe ner takweye giwaku. Ig wewkiswe gikak atakesa. Ig awna git: — Pariye pinetni nukakuh?

²⁰ Igme kaytwa giwn: — Neras judeyenevwi kuhwekwa ahegbete ginetnikis adahan igkis ayepne pit adahan pis waxwase nukukri Pol givetunatkis neras judeyenevwi gikivarakis ku samah igkis kehnes givahdukawnikis takuwanek. Igkis awna pitnek wasaymkanen ku igkis muwaka uti hiyakemniki waditte gimin nukukri.

²¹ Ka ba muwaka ihpa inakni giwnkis. Paxnika madikwa (40) gikebikis awaykemni kadasevye ig. Igkis kehe gikaksankis adahan givitkis ku igkis ax igkis higap nekwa igkis umehpiwa nukukrinek. Igkis ahegbet kuri adahan giwmepten. Igkis kuri he wahepnenen pinetni adahan ku kabet pis awahkis nukukri atere.

²² Igme suwtat gikivarakis timapni hene, ig awna git: — Hiyawa pis diyuhe pivinwat. Heneme ka ba kinetihwa inakni git pahavwinema hiyeg. Igme tivik.

Suwtat gikivarakis awahkis Pol gimin Félix

²³ Ayteke nikwe ig suwtat gikivarakis hiyak ku samah ig keh. Ig watihe piyana ikivarat adahan madikawku madikwa (100) suwtat. Igkis danuh atere, ig awna gitkis: — Ahekbetawnay adahan yis atak avitit paytwempu Sesareya. Ahekbetanay pina madikawku madikwa (200) gikebikis suwtat. Iwapnay yihapti ntewnehker madikwa (70) gikebikis awaykemni aduhyamadga kaway. Hawata akiw iwapnay yihapti pina madikawku madikwa (200) gikebikis suwtat akak karuvun. Pesnay ku avim inin tiyegem.

²⁴ Ahekbetanay pahavwi kaway gidahan Pol adahan ig wew giduhyamadga. Waxwanigbay kabayntiwa gimkanit Felix.

²⁵ Pisenwa inakni gawnan ig anniri amadga pahak kagta han:

²⁶ — Kiyavwiye Felix, nah Kilawdiyu Lisyas awahkis kabayka pimin. Pis kibeyne hiyaptigi.

²⁷ Ku avim inin nah awahkis pimin pahavwi awayg giw Pol. Judeyenevwi kamaxwig. Igkis kaba umehpig. Ayteke nikwe nah danuh atere akak nusuwtatavu nah amnihpig mmanawa nah hiyak ku ig romanyene.

²⁸ Ayteke nah hiyekerevye pariye kavatra neras judeyenevwi kamiyevgi. Nikwe nah waxwasevgi givetunatkis gikivarakis ku samah igkis kehnes givahdukawnikis.

²⁹ Ayge nah uti ku igkis judeyenevwi kamiyevgi avatra ku samah ig ka ihpa judeyenevwi gikumadukankis. Ini ka sam wot wis hiyeg romanyenevwi. Nikwe ig yuma mbaynema gikehni adahan wis umahkisgi ine adahan wis sarayhkisgi arikut parakseket.

³⁰ Henneme nah time gakkis neras judeyenevwi ku igkis ahegbete ginetnikis adahan igkis giwmepten. Inneki keh aynewa nah awahkiswig pimin. Nah kuwis awna gitkis neras judeyenevwi adahan igkis kamiyig pivetunat. Henewatbaki ner suwtat gikivarakis awna.

³¹ Ayteke nikwe misanpiki danuh, neras suwtat ihe giwn gikivarakis. Igkis iwe Pol igkis tivik. Igkis wew hewke tiyegem. Metakwa igkis danuh avitit paytwempu Antipatridi.

³² Hewke gaytakis neras suwtat diyuhe givinwatkis. Igkis ikise Pol ay giwakukis neras suwtat aduhyamadga kaway.

³³ Igkisme tivik waxwe Pol tahan avitit paytwempu Sesareya. Igkis danuh atere, igkis ute Felix ayge. Ayteke igkis ike ini kagta git. Igkis ike Pol giwakuwit. Pisenwa igkis tivik.

³⁴ Igme Felix ivegbohe ini kagta. Ayteke ig aya Pol: — Kiney pis amadga wayk? Igme kaytwa giwn: — Silisiyamnaw.

³⁵ Igme awna git: — Nah timap pinetni kuwewanek ku aysaw neras pikamyehpitnivwi danuh. Ayteke nikwe ig avuriwkiswig gitkis gisuwtatavu aynte ariku Erodis givin.