Attus 21 - Uhokri Gahegbetawni Nukune akak Sawmus

Jesus gihiyegavu awna: “Ka ba atak avitit Jerusalém”

¹ Ayteke usuh ekkew gitkis usuh tarekwe. Usuh manuke wadit. Usuh danuh tahan avitit kewgihri Kós. Ayteke usuh tivik. Hewke akiw usuh danuh tahan avitit paytwempu Rodes. Ayteke usuh tivik tahan avitit paytwempu Patara.

² Usuh danuh atere, ayge usuh ute pahamku nawiy ku pariye kennesa gutepkemni avitit Fenisiyamnaw. Usuh hiyapni hene, usuh manuksew gumadgat, usuh tivik.

³ Ayteke usuh danuh kennesa ahumwat kewgihri Xipremnaw, usuh mpiye awvre adakamnew, kihehavriktak. Adye usuh tivik avitit Siriyamnaw. Ayge usuh minehwe avitit paytwempu Tiru adahan nawiy miyakavawno.

⁴ Ayge usuh ute Kiyavwiye Jesus gihiyegavu aygnenevwi. Usuh misekwe ayge gimunkis adahan pahay paka. Avim ini ig Kiyavwiye Uhokri Gitip ekke gitkis ku pariye nehmnikuhpiye git Pol. Igkis hiyapni hene, igkis awna git: — Ka ba atak atere avitit Jerusalém. Pis umehpika aygenek.

⁵ Igkisme ka ihpa inakni giwnkis. Pisenwa wowskawni ayge usuh tivikwiye atere. Igkis uwaxwepten paytwemputak payak gukakkis gihayokis, madikte gikamkayhkis. Ayge parawkigbi usuh paberetusaw usuh piriyepkaw.

⁶ Ayteke usuh ekkewviye pawtak usuh katapte gumadgat nawiy. Igkisme diyuhe givinwatkis.

⁷ Ayteke usuh tarekwe ariwntak ini paytwempu Tiru. Usuh danuh tahan avitit paytwempu Pitolemayda. Ayge usuh wagehe gumadgatak nawiy usuh tivik adahan aytnihne Jesus gihiyegavu aygnenevwi. Usuh danuh atere, usuh misekwe pahay hawkri gimunkis.

Pol misakwa gimun Filip

⁸ Hewke usuh tarekwe akiw usuh danuh tahan avitit paytwempu Sesareya. Ayge usuh danuhpene git Filip. Usuh misekwe ayge gimun. Ig gannivwi adahan wagesne hiyeg gidahan Kiyavwiye Uhokri. Ig gibetitakis neras ntewnehkernene awaykemni ku pariye kaniyka adahan igkis hiyeknes gikakkis Jesus gihiyegavu aynte Jerusalém.

⁹ Ig kadahan paxnika gukebikis gise himanovwiyo. Egkis kabunuga akak Kiyavwiye Uhokri gannu adahan awnanos iwit ku pariye pes giwntak Kiyavwiye Uhokri.

¹⁰ Igkis misekwe ayge gimun Filip adahan kibite hawkri. Ayteke pahavwi awayg Uhokri gawneve danuh atere. Ig danuh ariwntak judeyamnaw. Giw Agabu.

¹¹ Ig danukwe git Pol, ig iwe gakabutik. Ayge ig wanakmine gidahanwa gibagwan akak giwak. Ig awna: — Kiyavwiye Uhokri Gitip awna: “Henneki neras judeyenevwi gikivarakis aynte Jerusalém igkis kehnek akak inin akabutikti akivara. Igkis wanakminevginek hawata ku samah nah wanakminaw. Igkis ikevginek giwakuritkis neras kane judeyenevwima adahan ignesme giwmeptenek”.

¹² Igkis timapni hene, usuh gikakkis ukebyuvwiy aygnenevwi usuh awna git Pol: — Kiyavwiye, ka ba atak atere avitit Jerusalém.

¹³ Igme kaytwa giwnkis: — Mmahki inin kanmaki madikte hene? Yis keh nah katiw avit nuyakni. Nah ka ahegbet adahan ininewatma parakseketma, nah ahegbet adahan nah umahkiswene aynte Jerusalém gidahan Kiyavwiye Jesus.

¹⁴ Igkis ka hiya igkisma mpithig. Nikwe igkis tinwohew igkis awna: — Igwa Kiyavwiye Uhokri hiyak gikak.

Pol danuh avitit Jerusalém

¹⁵ Ariwnteke ini pisenwa wowskawni ayge, usuh ahegbete wewkanbet, usuh tivik gihapti Pol tahan avitit Jerusalém.

¹⁶ Gaytakis Jesus gihiyegavu sesareyayenevwi igkis tivik uhapti. Igkis waxwe usuh tahan avitit Jerusalém givinwat Menasoh. Igme Menasoh ig xipreyene. Ig kuwis wageswa Jesus gihiyega kuwis kibite kamukri. Uvewkan usuh misakwa gimun ayge.

¹⁷ Usuh danuh atere Jerusalém, Jesus gihiyegavu aygnenevwi ameve usuh kabayntiwa.

Pol ihpa judeyenevwi gihiyekemnikis

¹⁸ Hewke usuh tivik gikak Pol adahan usuh danuhpene git Tiyagu. Ayge madikte Jesus gihiyegavu giwewkistenkis igkis kuwis pahadguvu.

¹⁹ Ig Pol danuh atere ig aytnihpigkis. Ig ekkene gitkis madikte kabayka ku pariye Kiyavwiye Uhokri keh givitimpi ku samah ig kannivwiyete ay gibetkis neras hiyeg ku pariye kane judeyenevwima.

²⁰ Igkis timapni hene, igkis kabayha Kiyavwiye Uhokri. Heneme igkis awna git Pol: — Ukebyi, pis hiyak ku ay ka aynsima mil gikebikis judeyenevwi hawata igkis kamaxwenes givitit Kiyavwiye Jesus, heneme igkis gidukweneswa ihpenevwi amekene Moís gikumadukan.

²¹ Igkis kinetni pak ku samah pis ekkene Uhokri gihiyekemni gitkis neras judeyenevwi ku pariye misekwenevwi aynte gibetkis neras ku pariye kane judeyenevwima. Igkis kinetni pak ku piskok gikannuhtenkis adahan igkis judeyenevwi ka ihpa amekene Moís gikumadukan akiw. Igkis time pak ku piskok awna ku igkis hiyeg judeyenevwi ka muwaka hiwhkis gikamayhkis givitkis. Igkis time pak ku piskok awna ku igkis ka muwaka wew akak judeyenevwi gihiyekemnikis akiw. Igkis time pak hene, igkis ka batek.

²² Kuwis igkis kinetni pak ku pis danuh atan. Mmah wixwiy keh kuri adahan igkis hiyak ku pis pidukwenewa ihpene ukumadukanwiy wixwiy hiyeg judeyenevwi?

²³ Usuh akkite pit. Pisme keh ku pariye usuh awna pit. Ku avim inin paxnika gikebikis awaykemni ay ubetuh ahegbet ginetnikis adahan igkis ikatuswevwa git Kiyavwiye Uhokrinen adahan aynesa paka.

²⁴ Uya keh hawata ke igkisbe. Wixwiy judeyenevwi ku aysaw wixwiy ikatuswevwa git Kiyavwiye Uhokri wixwiy tigah usemniwiy kahadbe wixwiy ka iki utewiy arit usemniwiy akiw. Kuri pis hawata tigah pisemni hawata ke igkisbe. Hawata akiw pis katiwnih gidahankis gitigatiwnikis. Ini keh madikte hiyeg hiyakpi ku pis pidukwenewa wewne akak uhiyekemniwiy wixwiy ku pariye judeyenevwi, pis ihpene amekene Moís gikumadukan. Ini keh igkis hiyak ku inakni inetitap igkis time pak ku in ka inyewatma.

²⁵ Ignesme hiyeg ku pariye kane judeyenevwima ku pariye kamaxwenevwi givitit Kiyavwiye Jesus neras ka muwaka wew akak judeyenevwi gihiyekemnikis. Usuh kuwis awahkis pahak kagta giminkis adahan ini. Usuh kuwis ekke uhiyekemni gitkis adahan ininewa igkis ka keh ku pariye marakri udahanwiy wixwiy hiyeg judeyenevwi. Adahan igkis ka ax im ku pariye kakanhawka arit ahehpakti batakka, ine migat, ine puwikne taregbihka gibita. Hawata akiw adahan igkis ka mahayakemnihwa.

²⁶ Ig Pol timapni inakni hene, ig ihe giwnkis neras Jesus gihiyegavu giwewkistenkis. Hewke ig tivik gikakkis neras paxniknene awaykemni. Ig barewvithe gitew payak gikakkis ku samah judeyenevwi gihiyekemnikis. Pisenwa ig pareke gikakkis arikut ini leglis kewye Uhokri Givin. Ayge ig ekkene ku muweke hawkri ntewnehker gaw adahan igkis ahegbet adahan igkis kakanhewnes git Kiyavwiye Uhokri.

Jerusalémyenevwi kaba umah Pol

²⁷ Ayteke ini ntewnehkernene hawkri kaba makisup kuwis, gaytakis neras judeyenevwi ariwntak Asiyamnaw igkis hiyap Pol ayge ariku Kiyavwiye Uhokri Givin. Igkis hiyapni hene, igkis gamiyhasepten gitkis neras hiyeg kabubuknene ayge. Ayteke igkis kamaxwig.

²⁸ Igkis awna akak gihawnakis. Giwnkis: — Awaykemni. Uyay amnih usuh. Ner awayg ka kabay. Ig wew muwapuw ekkene gitkis madikte hiyeg adahan igkis usuguhtenwiy wixwiy hiyeg judeyenevwi, adahan igkis suguhnes amekene Moís gikumadukan, adahan igkis suguhnes inin iwetrit Kiyavwiye Uhokri Givin. Ku avim inin ig patehene Kiyavwiye Uhokri Givin barewvitye mmanawa ig parakse hiyeg ku pariye kane judeyenema arikut.

²⁹ Igkis awna inakni iwit awaku igkis kuwis hiyap Pol avuwiw paytwempu gikak pahavwi efesuyene Trófimu. Igkis givewkankis Pol paraksevgi arikut Kiyavwiye Uhokri Givin. Bawa kawa.

³⁰ Madikte neras paytwempuyenevwi wakaymnibdikis. Pahaye adahan igkis ivukwe atere. Igkis kamaxe Pol. Igkis tariswig arikutak Kiyavwiye Uhokri Givin. Igkis sabuke alapota nikwenewa adahan ig ka bisik atere akiw.

³¹ Ayteke nikwe igkis giwmepten. Heneme pahavwi awayg suwtat gikivarakis time gakkis. Ig time gakkis ku hiyeg judeyenevwi ku igkis madikte dakuhwe.

³² Ig timapni hene, ig iwe suwtat akak gikivarakis tivige. Igkis danuh atere, igkis parakuhpigkis kibehtenwa. Igkis hiyeg hiyap ner suwtat gikivarakis gikakkis gisuwtatavu, igkis isahkise gibiwhnikis Pol.

Suwtat kamax Pol

³³ Ayteke ig suwtat gikivarakis danuh atere kennesa. Ig kamaykise Pol. Ig wanakiswig akak xen pitana akebi. Ayteke ig aya neras hiyeg: — Pariyeki ner awayg? Pariye gikehni?

³⁴ Igkisme kaytwa giwn akak arakembet iwit. Pahavwime kabiman pahat iwit, pahavwime kabiman nawenyewa iwit akiw. Ini kadukmanka keh ner suwtat gikivarakis ka hiyak ku samah igkis hiyeg dakuhwa. Nikwe ig waxwase Pol arikut suwtat givinkis.

³⁵ Ku samah igkis suwtat danuh atere ivayhti akihpuwit amawka igkis hiyuhpig inuwew avit neras hiyeg dagawnenevwi.

³⁶ Mmanawa igkis madikte haraksene Pol. Igkis kabimanehkis adahan giwmasepten.

³⁷ Ku samah igkis suwtat kaba danuh arikut givinkis gikak Pol, igme awna git ner suwtat gikivarakis. Ig awna: — Nah kinetihwekere pikak. Igme suwtat gikivarakis kaytwa giwn: — Mmah pis kannu awna gresiyenevwi giwnavrikkis?

³⁸ Mmah pis ka ejituyenema? Nah nuvewkan piskam nerkam ejituyene ku pariye kuhwekwa dakuhe hiyeg gikak ikivarat. Nah nuvewkam piskam nerkam ku pariye iwevye paxnika mil (4.000) gikebikis hiyeg umehekevutnevwi tahan amadgat amatap.

³⁹ Igme Pol kaytwa giwn: — Kawa. Nah judeyene. Nah amadga wayk aynte paytwempu Tarsu, ini nopsadnene paytwempu avit Silisiyamnaw. Nah aya pit isaksan adahan nah awna gikakkis neras hiyeg.

⁴⁰ Ig suwtat gikivarakis timapni hene, ig isaksevgi. Ayteke ig Pol tabire ayge amadga ivayhti. Ig awokhasew gitkis neras hiyeg. Igkis hiyapni hene, madikte igkis tinwohew. Ayteke nikwe ig kavusa awna gitkis judeyenevwi ariku giwnavrikkis. Ig awna: