Attus 2 - Uhokri Gahegbetawni Nukune akak Sawmus

Uhokri Gitip kawih gikannuhnivwi

¹ Ayteke ariwnteke ini, ahawkanavrik danuh adahan hiyeg judeyenevwi kehne ini fet arimketwiye ntewnehkerviye paka kewye “Pentekostis”. Ini fet adahan kiyene ku samah minikwak gihawkrivwikis wageswe igkis humaw Uhokri gihiyegavu igyewatnene amadga inin. Ayge Kiyavwiye Jesus gikannuhnivwi igkis pahadguhwe arimkat pahayruknene iwetrit.

² Pahaye adahan kimanka muhuk ayta inuriktak kewa maygbe akak madikte ahawna. In pareke paytrikut ku kiney igkis batebdebdihpiye.

³ Ayge igkis hiyap akadwey kewa tiketbe. In bat mpuse givuhekutkis.

⁴ Ayge amun ini ig Kiyavwiye Uhokri Gitip kawihavevgikis madikte. Igkis kavusa awna ariku ka aynsima nawenyewa iwit ku samah ig Kiyavwiye Uhokri Gitip iki giwnkis mpuse gaytakis pahavwit.

Jesus gikannuhnivwi awna ariku nawenyewa iwit

⁵ Avim ini ayge Jerusalém ka aynsima hiyeg judeyenevwi ku pariye kiyathenevwi Kiyavwiye Uhokri heneme igkis kote timapte gak Kiyavwiye Jesus. Igkis danuhpenes atere adahan igkis fetya. Igkis ayta avititak paytwempu muwapuw amadga inin, aytontak ku kitak igkis misakwa.

⁶ Igkis timapni inakni kimanka hene, igkis atere pahadguhwa kabubuk ganwakis Kiyavwiye Jesus gikannuhnivwi. Igkis ka pukuhin ku samah igkis madikte timepnekuye gikannuhnivwi awna mpuse giwnavrikkis.

⁷ Ayge nikwe igkis wakaymnibdi ka aynsima. Igkis barukiswa. Igkis awna: — Mmahki? Neras hiyeg ku pariye awnenes madikte igkis galileyenevwi. Igkis ka kannuh awna wownavrikwiy.

⁸ Mmah nikwe wixwiy madikte timepnekuye igkis awna wownavrikwiy?

⁹ Wixwiy ay aytontihan avititak nawenyevwi paytwempu. Waytakwiy Partiyatekne, Mediyatekne, Elohtekne. Waytakwiyme hiyeg aytontak Mesopotâmiyamnaw, hiyeg aytontak judeyamnaw, hiyeg aytontak Kapadósiyamnaw, hiyeg aytontak Pontomnaw, hiyeg aytontak Asiyamnaw,

¹⁰ hiyeg aytontak Firijiyamnaw, hiyeg aytontak Panfiliyamnaw, hiyeg aytontak Ejitumnaw, hiyeg aytontak Libyamnaw kennesa Sirenemnawit. Hawata hiyeg ku pariye romanyenevwi ay ku pariye danuhpenevwi atan.

¹¹ Wixwiyme waytakwiy hiyeg ku pariye wayvuka judeyenevwi gikakkis hiyeg ku pariye wageswe judeyenevwi. Waytakwiyme hiyeg kireteyenevwi akak hiyeg arabyenevwi. Mmah nikwe wixwiy timepnekuye neras hiyeg awnenes mpuse wownavrikwiy igkis kibeyhennes Kiyavwiye Uhokri gannu?

¹² Igkis madikte wakaymnibdi. Igkis ka pukuhin ku samah in. Igkis awnebdi pawtak. Giwnkis: — Pariyeki inin?

¹³ Ignesme gaytakis hiyeg ayge igkis hiyapni hene, igkis hiyaraptihe Kiyavwiye Jesus gikannuhnivwi. Igkis awna: — Igkis uwkiya awaku win.

Pedru ekkene Uhokri ginetni gitkis hiyeg

¹⁴ Ayteke ig Pedru tabire gavitkigawkis payak gikakkis neras Jesus giwatnivwi madikawkunene gikebikis gikak pahavwi gawnakis (11). Ig kavusa awna gitkis madikte hiyeg ayge akak madikte gawaygi. Giwn: — Nukebyuvwi judeyenevwi, yis ku pariye danuhpenevwi atan Jerusalém. Atabiswanay nutuh. Nah arakamnihten akkamnihte yit ku pariye danuh ku avim inin.

¹⁵ Yaytak yis ikiy ku usuh uwkiya. Kawa. Usuh ka uwkiyama. Kote danuhte ahawkanavrik adahan wis higap win. Kamuw kote inute.

¹⁶ Ku pariye danuh ku avim inin ig Uhokri gawneve amekene Joel, ig kinetihwa nimin minikwak. Giwn:

¹⁷ — Kiyavwiye Uhokri awna: ‘Amaksemni hawkrinek nah kawihkis nutivuh yivititnek. Ig kawih hiyeg madikte. Avim ini yikamkayuvwi awnanek iwit ku pariye pes nuwntak. Yikamkayuvwi awaykemni payegbitak gukakkis yikamkayuvwi tinogben. Ku pariye takwaviye ignes hiyap giwtyakkisveynen. Ku pariye kiyavwiyegben ignes hawata igkis karisun.

¹⁸ Avim ini nah kawihkis nutivuhnek givititkis nuhiyegavu awaykemni payegbitak gukakkis nuhiyegavu tinogben. Egkis madiktehkis awnanokwiyosnek iwit ku pariye pes nuwntak.

¹⁹ Avim ini nah akki yit annutnek aynte inurik, aynte amadga wayk, adahan areketni yit ku amaksemni hawkri kuwis danuh. Avim ini yis hiyapnek migat. Yis hiyapnek tiket. Yis hiyapnek sariyan mitibnene.

²⁰ Avim ini kamuw tigehe. Kayg wageswe duwweh ke migatbe. Ayteke ini hawkri ku pariye avitmin madikte hawkri amadga inin in danuh. Abet ini hawkri Kiyavwiye ayta adahan pisenwevye akak inin hawkri.

²¹ Avim ini amaksemni hawkri madikte hiyeg ku pariye amnihswene git Kiyavwiye Uhokri ignes amnihkanek.’ Inakni Kiyavwiye Uhokri giwn ku pariye gannasan git amekene Joel.

²² Nukebyuvwi judeyenevwi, ataybiswanabay numkat. Metakwa inakni giwn kavusa kahayak. Kuwis ig Kiyavwiye Uhokri keh ka aynsima annut ay yiwtrik givitimpi Kiyavwiye Jesus Nazaréyene. Ig keh kibeyne annut ku pariye hiyeg amadgaya inin ka hiya nikehka. Ig keh annut ku pariye keh hiyeg wakaymni ku pariye areketni gidatni. Akak ini annut ig Kiyavwiye Uhokri ekke wotwiy huwewe ku ig ay gikak Kiyavwiye Jesus. Yis hiyakni kabayntiwa.

²³ Henneme yis ka aminama niw. Minikwak ig Kiyavwiye Uhokri ayipa hiyak ku pariye yis keh gikaknek. Ayge nikwe ig ikevgi yiwakuwit ku samah ayipa ig ikiswanaw gidahan. Yisme umahkiswig. Yis daddahkiswinig gitkis hiyeg ku pariye kane hiyak Uhokri gikumadukan.

²⁴ Henneme kibeyne, ig Kiyavwiye Uhokri kannikasevgi akiw ariw gimiremni. Mmanawa ig ka hiya igma misakwa akak miyaka.

²⁵ Minikwak amekene Davi awna inakni hene gimin Kiyavwiye Jesus. Ig awna: — Kiyavwiye ay nukakuh avanenekwa. Ig kennesa ay numunuh niyewka.

²⁶ Inneki keh nuyakni bateke. Mataytak nah awna batekkanenwa. Ku nah miyap, ka sam. Nah iveg givitit Kiyavwiye Uhokri ku ig kannikasan akiwnek. Nah awna:

²⁷ ‘Pis ka ikis nanmavuh aynte miyaravye giwetrikis. Pis ka isaksan nah pikamkayh barewvitye adahan nuvituh madivwip.

²⁸ Mmanawa pis keh nah aymuhwa adahan avanenekwa. Kuwewanek pis keh nah batek nnaktin awaku ku samah nah ay pimun akiw.’ Henewatbaki ig amekene Davi awna.

²⁹ Nukebyuvwi, in kahayak huwewe wotwiy ku ig ukivarawiy amekene Davi ka awna inakni giminma. Ayipa ig miyap. Ig avuhpika. Givit madivwip. Ku avim inin gimew adukwenewa ay umunwiy.

³⁰ Gimin gihiwhi Kiyavwiye Jesus ig awna inakni giwn mmanawa ig amekene Davi igi Uhokri gawneve adahan ekkene ku pariye nehmnikuhpiye. Minikwak ku samah ig aynete amadga inin ig Kiyavwiye Uhokri awna git: — Davi, pahavwi gaytakis pihiwhivwi kannikawnek adahan ig kumadukene hiyeg piwenyan. Nah ikaksa pit inakni ku avim inin. Nah ka uniyehti ini nuhiyekemni.

³¹ Ner amekene Davi gihiwhi igi Cristo ig Uhokri gikanyan adahan ukumaduketniwiy. Ig amekene Davi hiyapni hene ku pariye nehmnikuhpiye, ig awne inakni iwit amin Cristo gikankawni. Inneki keh ig awna ku Kiyavwiye Uhokri ka ikis Cristo ganmap aynte miyaravye giwetrikis. Inneki keh ig awna ku givit ka madivwip.

³² Kibeyne, metakwa inakni giwn humaw wotwiy. Ig Kiyavwiye Uhokri kannikase Kiyavwiye Jesus ariw gimiremni. Akakwa wowtyak usuh hiyavgi ig wewvarihte ariwntak gikankawni. Kuri usuh ekkene ini gikankawni yit.

³³ Kuwis ig iwepka tahan inurikut adahan ig misakwa ayge gihumwa Kiyavwiye Uhokri amun ini iwetrit ku pariye kane nikiytanisima kihehaptak. Ayge ig Wigwiy ike Gitip giwakuwit Kiyavwiye Jesus ku samah gikaksan git minikwak. Igme kawihkise Gitip uvitituh ku avim inin. Inineki ku pariye yihiyvan. Inineki ku pariye yitimpan.

³⁴ Ig amekene Davi givit kote iwapkate inurikut heneme minikwak ig awna: — Ukivarawiy Kiyavwiye Uhokri awna git nukivara Cristo. Giwn: ‘Batnaba ay nuhumwa kihehaptak amun inin iwetrit ku pariye kiyatye

³⁵ ku samah nah sibuhkisnete pivetunyavu pit.’

³⁶ Nukebyuvwi judeyenevwi, ku avim inin nah ikene yinetni marihwa yis hiyakni kabayntiwa ku ig Kiyavwiye Jesus, ner Kiyavwiye Jesus ku pariye yidaddahkisni, ignewa Ukivarawiy. Ignewa Uhokri gikanyan adahan ukumaduketniwiy. Henewatbaki ig Pedru awna.

Mpana mil gikebikis ihevye Pedru giwn

³⁷ Igkis hiyeg timapni hene, igkis kayahe gitaraksankis, igkis awna gitkis Pedru. Giwnkis: — Nukebyuvwi, mmah usuh keh kuri?

³⁸ Igme Pedru kaytwa giwnkis: — Wagesnabay yihiyekemni ariw yitaraksan. Kewvinabay ahakwat un mpuse yaytak giwavrik Kiyavwiye Jesus Cristo adahan yis amevene inin ku Kiyavwiye Uhokri bayahminay ariw yitaraksan. Ayge nikwe ig iki Gitip yivititnek.

³⁹ Mmanawa kuwis ig ikakse Gitip wotwiy. Inakni gikaksan kawih yidahan. In kawih gidahankis yikamkayuvwi. He in kawih gidahankis hiyeg optirewnevwi. Mmanawa ig ikakse Gitip gitkis madikte ku pariye ihevye gihumketni gimkanit.

⁴⁰ Ayteke ig Pedru awna ka aynsima iwit akiw. Ig ikene neras hiyeg gihiyekemnikis. Giwn: — Ka ba yi misakwa kema gaytakisma neras ku pariye gitukepten Kiyavwiye Jesus. Wiwhwepnabay giwkis adahan yis isahptaw.

⁴¹ Igkis timapni hene, ka aynsima gaytakis ihe giwn. Ayteke nikwe igkis kewvi. Avim ini hawkri mpana mil (3.000) gikebikis hiyeg wageswevyes Kiyavwiye Jesus gihiyegavu.

Jesus gihiyegavu amnihak pawtak

⁴² Ayteke mpuse hawkri igkis tiviknenes kannuhwene gitkis Kiyavwiye Jesus giwatnivwi. Igkis darihweknes pawtak takunipti. Igkis axnes payegbitak adahan igkis amniheknes pawtak, adahan igkis kiyenes ku samah Kiyavwiye Jesus umahkiswe udahanwiy. Igkis piriyepkewnes payegbitak.

⁴³ Igkis madikte wakaymnibdi ayge. Ig Kiyavwiye Jesus giwatnivwi igkis keh ka aynsima annut ku pariye keh hiyeg wakaymni, ku pariye areketni Kiyavwiye Uhokri gidatni.

⁴⁴ Madikte neras kamaxwenevwi givitit Kiyavwiye Jesus igkis pahatwowa gihiyekemnikis. Gewkanbetkis gidahanyekuyes.

⁴⁵ Igkis piyuke gewkanbetkis. Igkis piyuke giwasrakis. Pisenwa igkis ibekhe akakuravig ku pariye gaviykankis givuwiwkis madikte hiyeg. Igkis ikepni ku samah igkis gimawkankis.

⁴⁶ Mpuse hawkri igkis lammesya ay ariku ini leglis kewye Uhokri Givin. Igkis ax payegbitak givinekukis adahan igkis kiyenes ku samah Kiyavwiye Jesus umahkiswe udahanwiy. Igkis ax kabubuk akak madikte batekka akak madikte tuwatka.

⁴⁷ Igkis kibeyhenes Kiyavwiye Uhokri takunipti. Ignesme madikte hiyeg ku pariye misekwenevwi ayge igkis kiyatigkis. Mpuse hawkri Kiyavwiye Uhokri kibihevye gihiyegavu gikakkis nawenyevwi akiw ku pariye wageswiye gihiyekemnikis.