Attus 19 - Uhokri Gahegbetawni Nukune akak Sawmus

Uhokri Gitip kawih efesuyenevwi

¹ Ku samah ig Apolu aynete avit paytwempu Korintu igme Pol danuh waxriw avitit paytwempu Efesu. Ayge ig ute aynesa hiyeg ku pariye kannuhwene gimin Kiyavwiye Uhokri.

² Ig ayavgikis: — Yis kuwis kamaxwa givitit Kiyavwiye Uhokri. Ba kuwisma ig Kiyavwiye Uhokri kawihkis Gitip yivitit? Igkisme kaytwa giwn: — Usuh kote timapte inakni inetit ku Kiyavwiye Uhokri kuwis kawihkisne Gitip givititkis hiyeg.

³ Igme Pol timapni hene, ig ayavgikis: — Mmah yikewven nikwe? Igkisme kaytwa giwn: — Usuh kewvi ku samah Joawh Batistamni akki wotuh.

⁴ Igme Pol awna gitkis: — Joawh Batistamni kaywe hiyeg adahan ekkene ku samah igkis wageskere gihiyekemnikis ariw gitaraksankis. Ig awna gitkis hiyeg ku amawka igkis kamaxwa givitit pahavwi ku pariye nehmnikuhpiye gihavu butte. Ner pahavwi ig Kiyavwiye Jesus ig.

⁵ Igkis timapni hene, igkis kewvi ahakwat un giwavrik Kiyavwiye Jesus.

⁶ Pisenwa ig Pol sarayh giwak givititkis adahan ig piriyepkewne gidahankis. Aynewa ig Uhokri Gitip kawihpigkis. Igkisme kavusa awna ariku nawenyewa iwit. Hawata igkis awna iwit ku pariye pes giwntak Kiyavwiye Uhokri.

⁷ Igkis awaykemni madikawku gikebikis gikakkis piyana gawnakis (12).

Pol kinetihwa gimin Jesus ayge Efesu

⁸ Ayteke ariwnteke ini ig Pol kinetihwene akak madikte gawaygi ariku judeyenevwi gileglisakis. Ig kinetihwene ayge adahan mpana kayg. Ig ekkene gitkis ku samah Uhokri gikumadukan. Ig kinistigkis adahan igkis kawih ini gikumadukan.

⁹ Gaytakisme neras judeyenevwi ka ihpa giwn. Igkis dehe giyaknikis. Ayteke nikwe igkis mbeyhe Kiyavwiye Jesus gihiyekemni giwtrikkis madikte hiyeg. Ig Pol hiyapni hene, ig pese giwkis. Igkisme ku pariye ihpenevwi giwn igkis tivik gihapti. Ariwnteke ini ig kinetihwene gitkis mpuse hawkri aynte avineku ini lekkol gidahan Tiranu.

¹⁰ Ayge ig kinetihwene hene adahan pikana akebi kamukri. Awaku ini madikte hiyeg ku pariye misekwenevwi ayge Asiyamnaw igkis madikte timepnekuye Kiyavwiye Uhokri ginetni. Hiyeg ku pariye judeyenevwi hiyeg ku pariye kane judeyenevwima igkis timepnekuye.

¹¹ Avim ini ig Kiyavwiye Uhokri ike Pol gannu adahan ig kehne annut ku pariye hiyeg amadgaya inin ka hiya nikehka.

¹² He hiyeg iwe Pol gikamisbeta. Igkis ewkni gitkis kakahribdavye. Ignesme hiyapni hene, aynewa gikahrikis mpiye. Hawata wavitye pes givititakis hiyeg.

Seva gikamkayh pekkiswiye wavitye

¹³ Avim ini hawkri gaytakis judeyenevwi ayge kewa ihamwibe. Igkis wewnes muwapuw adahan igkis pekkisnes wavitye. Igkis givewkankis battukaw pekkis wavitye giwavrik Kiyavwiye Jesus bawa igkis ka gihiyegavuma Kiyavwiye Jesus. Ayge nikwe igkis awna: — Uyay awna arit wavitye han: “Usuh awna pit giwavrik ner Kiyavwiye Jesus ku pariye Pol kinetihwa gimin. Giwavrik igi usuh awna pit, asa pes ayteke.”

¹⁴ Neras hiyeg ku pariye ahegbete ginetnikis hene igkis ntewnehker gikebikis. Igkis gikamkayuvwi pahavwi judeyene kewye Seva. Igme Seva ig pahavwi gaytakis neras muwveg kiyatyevwi.

¹⁵ Ayteke nikwe igkis danuh git pahavwi awayg wavityewnivye, igkis awna git ner wavitye inakni iwit. Igme wavitye kaytwa giwnkis: — Nah hiyak Jesus. Nah timap gak Pol. Heneme yis, pariyenekay?

¹⁶ Ig awna inakni, ig padakawnawa adahan gibiwhpitnikis. Akak gidatni ig matekevgikis. Igkisme bisike givinwatak makawihani, igkis huwivwihvite.

¹⁷ Ayteke madikte hiyeg ayge Efesu ignes time gakkis, hiyeg ku pariye judeyenevwi hiyeg ku pariye kane judeyenevwima madehkis. Igkis timapni hene, igkis madikte avisasew. Nikwe Kiyavwiye Jesus giw ka aynsima kiyathakante akiw.

Ihamwigben bukah gikagtankis

¹⁸ Ayteke nikwe ka aynsima hiyeg ku pariye kamaxwenevwi givitit Kiyavwiye Jesus igkis tabirebdi givetunkis madikte hiyeg, igkis ekkenes gikehnikis mbay gitkis. Igkis kinetihwenes amin ku samah igkis mpiya minikwak.

¹⁹ Igkis ku pariye minikwak kehne ihamwi gannivwi igkis sarayhe giyahmarakis. Igkis ahiwave gikagtankis adahan ihamwihwaki igkiswa bukehpin giwtrikneswa madikte hiyeg. Igkis kibite hiyeg. Igkis pukuhbete ihamwihwaki nutiwni ku samah igkis katiwnih adahan gikagtankis. Madikte atiwni danuh adahan ka aynsima karukri pohowkumku madikwa mil (50.000) karukri.

²⁰ Avim ini Kiyavwiye Uhokri ginetni ibekhew ka aynsima akiw akak nudatni. In detyewa in.

Pol tivikwiye avititak Efesu

²¹ Ayteke ariwnteke ini ig Kiyavwiye Uhokri Gitip awahkise Pol tivik akiw. Ig hiyapni hene, ig awna: — Nah ateknete avitit Jerusalém. Nuvewkan nah mpiya awvre avitiw Masedôniyamnaw, avitiw Gresiyamnaw adahan ku samah natakni atere Jerusalém. Ayteke ariwntak nudawnhanek atere, nah atak avitit paytwempu Roma.

²² Ayteke nikwe ig awahkise piyana gayavetni avitit Masedôniyamnaw. Giwkis Timotyu, Erastu. Kameki ig tivikme avititak ini waxri Asiyamnaw. Ig misekwe kibite hawkri akiw ayge avit ini paytwempu Efesu.

Efesuyenevwi dakuhwa

²³ Avimnewa ini hawkri ka aynsima hiyeg aygnenevwi Efesu igkis dakuhwe avatra ku samah Pol ekkene Uhokri gihiyekemni. Nah akkite pit ku samah.

²⁴ Ayge pahavwi awayg kewye Demetriw. Ig batakevutne ahehpakti akak karukri wahano seyno. Ig batak ka aynsima ahehpakti gudahan giwohkigakis guleglisa guvin. Eg giwohkigakis guw Diyana. Ig gaviykan ini ahehpakti batakka. Ig dax ka aynsima karukri gidahankis gihiyegavu ku pariye batak gidahan.

²⁵ Ayge nikwe ig Demetriw pahadguhe madikte gihiyegavu payak gikakkis nawenyevwi ku pariye gannivwikis inwata. Ayteke ig awna gitkis: — Kiyavwiyegben, yis hiyakni ku samah wixwiy igisavye akak inin ubatkanwiy.

²⁶ Hawata akiw yis hiyap ku samah Pol gikehni, yis timap ku samah ginetni. Ig awna ku uwohkigawiy ubatkanwiy in ka inyewatma Uhokrima. Ka aynewatma Efesu ig awna hene heneme muwapuw avitiw Asiyamnaw. Ig kuwis wagese ka aynsima hiyeg gihiyekemnikis adahan ignes ihpa inakni giwn.

²⁷ Inin ka kabay. Nawenetke madikte hiyeg ka isimkere batakka akiw. Ku hene nikwe wixwiy yuma wannivwiy nikwe. Ka ininewatma wixwiy biyukse wannivwiy, heneme nawenetke uwohkigawiy Diyana biyukse gukiytani akiw. Nawenetke hiyeg ka kiyatha guleglisa guvin akiw. Eg kabayno uwohkigawiy. Ku avim inin madikte hiyeg kiyathig ay Asiyamnaw, muwapuw amadga wayk. Heneme ik adahan aysawnemenek igkis ka kiyathig akiw.

²⁸ Neras hiyeg timapni inakni giwn hene, igkis dagawnhebdi. Igkis kavusa awna akak gihawnakis. Giwnkis: — Eg kiyavuno Diyana, efesuyenevwi giwohkigakis, eg kabayno. Eg kabayno. Eg kabayno.

²⁹ Ayteke nikwe madikte paytwempuyenevwi timapni hene, igkis dakuhwe. Avim ini igkis kamaxe piyana gikebikis masedôniyenevwi kewye Gayu, Aristarku ku pariye Pol gidahewekten. Igkis waxwevgikis kibehtenwa arimkat paha iwetrit adahan ku kiney madikte hiyeg pahadguhwa. Ini iwetrit kewye “teatru”.

³⁰ Ig Pol hiyapni hene, ig atekkerevye atere givetunatkis neras hiyeg adahan ig kinetihwene gikakkis. Heneme Jesus gihiyegavu ayge igkis avise gikak igkis ka isagkig atere.

³¹ Hawata gaytakis hiyaptigiviyene ayge Asiyamnaw igkis Pol gikagmadavu, igkis wasavanew gimin adahan ig ka atak gibetitkis neras hiyeg aynte “teatru” adahan ig umahkiswa atere.

³² Avimwata ini ayge “teatru” madikte neras hiyeg efesuyenevwi pahadguhwa igkisweke. Gihiyekemnikis matekbet, gihiyekemnikis. Igkis kabiman arakembet iwit. Mmanawa gaytakis kibitenene igkis ka hiyak ku samah igkis pahadguhka.

³³ Ayge pahavwi awayg gibetkis giw Alexandre. Ayteke nikwe gaytakis judeyenevwi ayge igkis tabirasevgi givetunatkis. Neras hiyeg hiyapni hene, igkis awna: — Mmah ka nerma gannip? Igme awokhasaw gitkis adahan igkis tinwohaw adahan ig ekkevye gitkis ku ka ignema.

³⁴ Heneme igkis hiyeg awna: — Ig ner judeyene. Hiyeg judeyenevwi asene batakka. Igkis hiyapni hene, igkis madikte kavusa kabiman akiw. Igkis awna: — Eg kiyavuno Diyana, efesuyenevwi giwohkigakis, eg kabayno. Igkis kabimanenes payak hene adahan pisaya ler.

³⁵ Ayteke pahavwi hiyaptigi metakwa ig tinwohasigkis. Ig awna gitkis: — Kiyavwiyegben efesuyenevwi, madikte hiyeg hiyak ku samah inin paytwempu Efesu in kadahan kiyavuno Diyana guleglisa guvin ay umunwiy. Madikte hiyeg timap arak ku samah guhehpak tip tuguhe inuriktak atan.

³⁶ Inyewa in. Ka ik adahan hiyeg awna ku in ka inyewatma. Nikwe hiyawa yis karisehwe. Ka yi muwaka keh arikna mbeyevyema pahayenema avit yis ivegmina yihiyekemni.

³⁷ Yis waxwe neras awaykemni atan yuma arik kavatrene. Igkis ka amevwi uleglisawiy arikuya. Igkis kawnata mahivwih uwohkigawiy. Mmeneki yis hene?

³⁸ Ku ig Demetriw gikakkis gihiyegavu ku igkis kamiyekere pahavwi, hiyawa igkis kamiyevgi gimunitneswa ukivarawiy amun ini ku aysaw ignes keh givahdukawnikis. Hiyawa igkis kamiyevgi gitwa hiyaptigi. Ayge iwetrit adahan hiyeg kamiyavak.

³⁹ Henneme ku yis kehkere nawenyewa arikna akiw, amawka yis ahegbeta madikte avim ini ku aysaw paytwempuyenevwi gibetkikis pahadguhwa. Henneki ukumadukanwiy awna.

⁴⁰ Ku avim inin wixwiy abet kibohriki. Nawenetke hiyaptigi kamiyevwiynek awaku ig ikiy ku wixwiy ayta dakuhwene gikak ikivarat ku avim inin. Wixwiy ay dakuhwene waditnevyenen. Wixwiy ka hiya arakkamnihkanek git ikivarat.

⁴¹ Ayteke pisenwa inakni gawnan ig awahkise madikte hiyeg tivik givinwatkis.