Attus 18 - Uhokri Gahegbetawni Nukune akak Sawmus

Pol misakwa gimun Akwila

¹ Ariwnteke ini ig Pol pese avititak ini paytwempu Atenas. Ig danuh avitit paytwempu Korintu.

² Ayge ig patiptak gikak pahavwi judeyene kewye Akwila. Igme PolAkwila amadga wayk aynte Pontomnaw heneme ig misakwa avit Italiyamnaw. Ig misakwa ayge payak gukak gihayo. Egme guw Pirisila. Ayteke egkis tivige avititak Italiyamnaw mmanawa ner romanyenevwi gikivarakis Kilawdyu ig pekkise madikte hiyeg judeyenevwi ariw paytwempu Roma ku kiney egkis misakwa ayge Italiyamnaw. Ig Akwila gukak Pirisila egkis danuh atere avit paytwempu Korintu, egkis misekwe ayge. Igme Pol atere danuhpene gutkis.

³ Ayge ig ute ku egkis paytevutne akak puwikne amar. Ig hiyapni hene, ig misakwa gumunkis, ig kannivwiye payak gukakkis awaku gannivwi inwata.

Pol kinetihwene gimin Jesus ayge Korintu

⁴ Mpuse samdi ig Pol lammesya ariku judeyenevwi gileglisakis. Ayge ig kinetihwene gimin Kiyavwiye Jesus gitkis hiyeg, ig kinistene hiyeg judeyenevwi gikakkis hiyeg ku pariye kane judeyenevwima adahan igkis kamaxwa givitit Kiyavwiye Jesus.

⁵ Ayteke metakwa ig Sílas gikak Timotyu igkis danuh atere git avititak Masedôniyamnaw. Ariwntak ini gidawnhankis atere ig Pol ikatuswa adahanikwa ig ekkene Kiyavwiye Uhokri giwn. Ig ayge ekkene gitkis neras judeyenevwi aygnenevwi ku Kiyavwiye Jesus ignewa Cristo ig Uhokri gikanyan adahan ukumaduketniwiy.

Pol ayguhwa giwkis hiyeg judeyenevwi

⁶ Heneme igkis judeyenevwi suguhpig. Igkis mahivwihpig. Ig Pol hiyapni hene, ig sessehe gisimsa ariw avathawni adahan areketni ku samah gitaraksankis. Ig awna gitkis: — Ku yis biyuke, yihawkanavrik. Ka nuhawkanavrikma. Ka sam. Kuri nah ayguhwete yiw adahan nah ekkene Kiyavwiye Uhokri ginetni gitkis hiyeg ku pariye kane judeyenevwima.

⁷ Ayteke nikwe ig pese giwkis neras judeyenevwi. Ig tivik ig misekwe gimun pahavwi kane judeyenema giw Tisyu Justu. Ig Tisyu Justu kiyathene Kiyavwiye Uhokri. Givin misakwa ahumwate judeyenevwi gileglisakis.

⁸ Avim ini ini leglis akivara ig kamaxwe givitit Kiyavwiye Jesus. Ig giw Kirispu. Madikte gimunyavu hawata kamaxwe givitit Kiyavwiye Jesus. Hawata ka aynsima korintuyenevwi akiw timap Pol ginetni. Ayteke igkis ihe giwn igkis kewvi ahakwat un.

Uhokri ikene Pol gawaygi

⁹ Ayteke pahay tiyegem ig Pol hiyap Kiyavwiye Jesus giwtyakveynen. Igme awna git: — Ka muwaka avis. Akkanaba nuwnuh takunipti gitkis. Ka ba matiwniswa.

¹⁰ Mmanawa nah ay pikak. Igkis hiyeg ka hiya igkisma daxpi. Mmanawa ay avit inin paytwempu ka aynsima hiyeg ay ku pariye kamaxwevye nuvitit.

¹¹ Ayteke nikwe ig Pol misekwe ayge adahan pahak kamukri akiw akak abusku. Ayge ig kannuhne hiyeg amin Kiyavwiye Uhokri giwn.

Pol ay givetun Galyu

¹² Avim ini pahavwi awayg kewye Galyu ig pareke ikivarat adahan Gresiyamnaw. Ayteke nikwe neras judeyenevwi pahadguhwe igkis kamaxe Pol. Igkis waxwevgi givetunat ner ikivarat.

¹³ Igkis awna git: — Kiyavwiye, ner awayg kinistene hiyeg adahan ignes kiyatha Uhokri ka ku samah ukumadukan aya wotuh.

¹⁴ Igme Pol awnevyemet, igme Galyu awna gitkis neras judeyenevwi. Ig awna: — Yis hiyeg judeyenevwi, wake ig kakehniyebe, wake ig arewevye yitbe, nikwekam ikkam adahan nah timap yiwn.

¹⁵ Henneme, ku samah in he amin iwitnen, he amin yihiyekemninen yis hiyeg judeyenevwi, he amin yikumadukannen. Nikwe nah ka hiya nahma hiyak nikak. Yiswa hiyak nikak.

¹⁶ Ayge nikwe ig pekkiswigkis madikte givetunatak.

¹⁷ Neras paytwempuyenevwi ayge ku pariye kane batek gikakkis hiyeg judeyenevwi, ignes hiyapni hene ku samah gikivarakis pekkise neras judeyenevwi igkis kibokahwe igkis kamaxe pahavwi ku pariye judeyenevwi gileglisakis akivara kewye Sóstenes. Igkis biptevgi ayge giwtriknewa Galyu. Igme ka aminama giwkis.

Pol gidiyhemni avitit Antiyokiya

¹⁸ Ariwnteke ini ig Pol misekwe kibite hawkri akiw ayge paytwempu Korintu. Ayteke ig awna: — Nah diyuhpite avitit Antiyokiya. Ig ekkewviye gitkis Jesus gihiyegavu aygnenevwi. Ig tivik payak gikak Akwila, kiyavuno Pirisila. Egkis danuh atere avitit paytwempu Senkreya. Ayge ig Pol ahegbete ginetni ku ig ikatuswevwa git Kiyavwiye Uhokrinen adahan aynesa hawkri. Ayteke nikwe ig tigehe gisemni ku samah judeyenevwi gihiyekemnikis kahadbe ig ka iki gitew arit gisemni akiw. Pisenwa nikwe egkis kawerihwe Siriyamnawte.

¹⁹ Ayteke egkis danuh avitit paytwempu Efesu. Ayge ig Akwila eg kiyavuno Pirisila ahegbete gunetnikis adahan egkis misakwa ayge. Igme Pol tivik lammesya ariku judeyenevwi gileglisakis adahan ig kinetihwene gimin Kiyavwiye Jesus gitkis neras judeyenevwi aygnenevwi.

²⁰ Neras judeyenevwi timapni giwn hene, igkis awnesevgi adahan ig misakwa ayge gikakkis adahan kibite hawkri.

²¹ Igme awna gitkis: — Kote ikte. Amawka nah danuh avitit paytwempu Jerusalém kahadbe nah mpiyasene fet ayge. Heneme gikak Kiyavwiye Uhokrinek nah diyuh atan akiwnek. Nikwe ig ekkewviye gitkis ig tivik katapte amadgat nawiy. Ig tarekwe ariwntak Efesu.

²² Ayteke ig danuhe avitit paytwempu Sesareya. Ayge ig misekwe ariw nawiy. Ig tivik avitit Jerusalém. Ig danuh atere, ig aytnihe Jesus gihiyegavu aygnenevwi. Pisenwa ig tivik avitit Antiyokiya.

²³ Ig danuh atere, ig misekwe ayge adahan kibite hawkri. Ayteke ig tivik akiw. Ig danuhpene muwapuw avitiw Galasiyamnaw avitiw Firijiyamnaw. Ayge ig ikene Jesus gihiyegavu gawaygikis.

Apolu

²⁴ Avimnewa ini ayge paytwempu Efesu pahavwi judeyene danuh atere. Giw Apolu. Ig amadga wayk aynte avit paytwempu Alexandriya. Ig kannuhye kinetihwa amin Kiyavwiye Uhokri giwn. Ig hiyak Uhokri gannasan kabayntiwa.

²⁵ Ig kuwis pukuhpa ku samah ig Uhokri gihiyekemni. Ig kinetihwa nimin akak madikte gidatni avititak giyakni. Ig ekkene wadit gidahan Kiyavwiye Uhokri. Ig ka taraksa. Heneme ig kote kewte giwavrik Kiyavwiye Jesus. Ig he kaywepka ininewa gavit Joawh Batista.

²⁶ Ig danuh atere, ig kavusa kinetihwa akak madikte gawaygi ariku judeyenevwi gileglisakis. Eg kiyavuno Pirisila gikak Akwila ayge. Egkis timapni Apolu giwn hene, egkis iwavgi guvinwatkis. Ayge egkis akkamnih Uhokri gihiyekemni git adahan ig pukuhapni kabayte akiw. Igme ihe giwnkis.

²⁷ Ayteke ariwnteke ini ig Apolu atekere avitit Gresiyamnaw. Igkis Jesus gihiyegavu aygnenevwi avit Efesu, igkis hiyapni hene, igkis ike gawaygi adahan ig atak. Igkis awahkise kagta giminkis Jesus gihiyegavu aynte Gresiyamnaw adahan igkis amavig kabayntiwa. Ig hiyapni hene, ig tivik. Ig danuh atere, ig ayava ka aynsima neras ku pariye kamaxwenevwi givitit Kiyavwiye Jesus akak Kiyavwiye Uhokri gabay.

²⁸ Ku kiney hiyeg pahadguvu adahan ignes timepnes inetit, ig atak atere, ig ekkene Kiyavwiye Uhokri giwn gitkis neras judeyenevwi ayge akak madikte gawaygi. Igkisme ka hiya akaytwak. Ig akki gitkis huwewe amadgatak Uhokri gannasan ku ig Kiyavwiye Jesus igyewa Cristo ig Uhokri gikanyan adahan ukumaduketniwiy.