Attus 17 - Uhokri Gahegbetawni Nukune akak Sawmus

Polkis kinetihwene gimin Jesus ayge Tesalônika

¹ Igkis mpiye avuwiw paytwempu Anfipolis. Ayteke igkis mpiye avuwiw paytwempu Apolôniya. Ayteke igkis danuh avitit paytwempu Tesalônika. Ayge igkis ute paha judeyenevwi gileglisakis.

² Ig Pol gihumpawni kinetihwa gimin Kiyavwiye Jesus gitkiskit hiyeg judeyenevwi. Nikwe ig atere lammesya ariku ini gileglisakis. Ig lammesya atere mpamavut samdi. Ayge ig kinetihwene gitkis hiyeg amadgatak Uhokri gannasan.

³ Ig akkamnihne inakni Uhokri gannasan gitkis. Ig ekkene gitkis huwewe ku in awna ku amawka Cristo hiyap mbeyne ig miya ig kannikaw akiw. Pisenwa ig awna gitkis: — Ner Kiyavwiye Jesus ku kamin nah kinetihwene yit igyewa Cristo. Ig Uhokri gikanyan adahan ukumaduketniwiy.

⁴ Neras hiyeg timapni hene, gaytakis ihe inakni giwn. Igkis wagese gihiyekemnikis hehpekuye gikakkis Pol gikak Sílas. Hawata ka aynsima awaykemni ku pariye kane judeyenevwima ku pariye kiyathennevwi Kiyavwiye Uhokri igkis wagese gihiyekemnikis gidahan Kiyavwiye Jesus. Hawata ka aynsima tinogben kiyatyovwi egkis wagese guhiyekemnikis.

Hiyeg dakuhwa gitivutkis Polkis

⁵ Heneme ka aynsima judeyenevwi aygnenevwi, igkis hiyapni hene, igkis atihe Polkis. Ayteke nikwe igkis pahadguhe kibite hiyeg kakehniyevwi. Igkisme dakuhwe gitivutkis Polkis. Igkis kehe ka aynsima paytwempuyenevwi kadukman. Ayteke igkis awna: — Pol gikak Sílas misakwa gimun Jasoh. Uyay atere kamaxwigkis. Igkis tivik, igkis danuh atere givinwat akak madikte gihawnakis adahan igkis giweptenkis paytrikutak adahan tahan gibetitkis hiyeg.

⁶ Heneme igkis ka utivgikis. Igkis hiyapni hene, igkis pekkise PolJasoh. Igkis kamaxwig gikakkis nawenyevwi Jesus gihiyegavu ayge. Ayteke igkis kehpigkis tahan givetunatkis paytwempuyenevwi gikivarakis. Igkis danuh atere, igkis wasaymew gidahankis gitkis hiyaptigiviyene. Igkis awna: — Neras hiyeg ku pariye wagesave hiyeg gihiyekemnikis muwapuw ku avim inin igkis danuh atan adahan usigmehpitni.

⁷ Ner awayg Jasoh amevevgikis adahan igkis misakwa ay gimun. Igkis madikte igkis ka ihpa ukivarawiy kiyavwiye Sezar gikumadukan. Igkis awna ku ig Jesus igi gikivarakis giwenyan kiyavwiye Sezar.

⁸ Igkis paytwempuyenevwi gikakkis neras hiyaptigivyene igkis timapni hene, igkis kiyimwipta.

⁹ Ayteke nikwe igkis hiyaptigiviyene katiwnise karukri gitkis PolJasoh gikakkis neras nawenyevwi Jesus gihiyegavu akiw. Ayteke pisenwa gikatiwnihnikis, igkis isaksevgikis adahan igkis tivik.

Pol kinetihwene gimin Jesus ayge Bereya

¹⁰ Igkis Jesus gihiyegavu hiyapni hene, igkis avise gikak Pol gikak PolSílas. Ayteke nikwe igkis awahkiswigkis kibehtenwa avitit paytwempu Bereya. Igkisme danuh atere, igkis lammesya ayge ariku judeyenevwi gileglisakis. Ayge igkis kinetihwenes akiw gimin Kiyavwiye Jesus.

¹¹ Neras hiyeg bereyenevwi ayge igkis kabayte giwkis neras hiyeg tesalôniyenevwi mmanawa giyaknikis ka devyema, igkis amava Kiyavwiye Uhokri ginetni kabayntiwa. Takunipti igkis ivegbohenes Uhokri gannasan igkis iwasenes ba inakni inetit inyewatma.

¹² Ayteke nikwe ka aynsima hiyeg aygnenevwi ihe inakni giwn. Ka aynsima gresiyanovwi kiyatyovwi egkis ihe giwn payegbitak gikakkis ka aynsima awaykemni.

¹³ Heneme neras judeyenevwi aynte Tesalônika igkis time Pol gak ku ig ekkene Kiyavwiye Uhokri ginetni gimin Kiyavwiye Jesus ayge avit paytwempu Bereya. Igkis timapni hene, igkis haraksevgikis atere. Igkis danuh atere, igkis iwitehe neras bereyenevwi igkis amiyhase Polkis gitkis.

¹⁴ Neras ukebyuvwiy ayge hiyapni hene, aynewa igkis awahkise Pol tivik parawkigbit. Igkisme PolSílas gikak PolTimotyu igkis misekwe ayge avit paytwempu Bereya.

Pol kinetihwene gimin Jesus ayge Atenas

¹⁵ Igkisme gaytakis ukebyuvwiy tivik gihapti Pol adahan gimaptenten ariw mbeyne. Igkis tivik gihapti danuhte avitit paytwempu Atenas. Ayteke igkis diyuhe avitit paytwempu Bereya. Igme Pol hiyapni hene, ig wasavanew gimin PolSílas gikak PolTimotyu adahan igkis ayta gimkat kibehtenwa. Ayteke igkis tivik.

¹⁶ Igme Pol misekwe ayge Atenas adahan giwhpetnikis. Ku samah ig wahepnete, ig wakaymni mpinevevye gidahankis neras hiyeg aygnenevwi ku samah ka aynsima giwohkigakis gahehpakkis batakka ayge.

¹⁷ Ini giwakemni keh ig kinetihwa gimin Kiyavwiye Jesus gitkis. Ig kinetihwene ariku leglis gitkis hiyeg judeyenevwi gitkis hiyeg ku pariye kane judeyenevwima ku pariye kiyathenevwi Kiyavwiye Uhokri. Hawata akiw ig kinetihwene gimin Kiyavwiye Jesus mpuse hewkevye ayge paytwempu ahigiwmadga gitkis hiyeg ku pariye ig uti ayge.

¹⁸ Pahay hawkri ig ute hiyeg ayge ku pariye kannuhekevutnevwi amin “Epikurews” gihiyekemni. Hawata ig ute hiyeg ku pariye kannuhekevutnevwi amin neras “estóykus” gihiyekemnikis. Ig hiyapni hene, ig kinetihwa gikakkis. Pisenwa gawnan, igkis neras hiyeg kinetihwa pawtak ayge, igkis awna: — Pariye kamin ner awayg kinetihwa mpinevevye hene? Igme pahavwi hiyeg ayge kaytwa: — Ke nuthube ig kinetihwene amin nawenyevwi Uhokri ariw udahanwiy. Nawotunyevwi giwohkigakis. Igkis awna inakni awaku ig Pol kinetihwene gimin Kiyavwiye Jesus hawata amin gikankawni.

¹⁹ Ayteke nikwe igkis awnase Pol arimkat paha iwetrit ku kiney hiyeg gibetkikis pahadguhwa adahan ignes timepnes inetit. Ini iwetrit kewye Areópagu. Igme tivik gihaptikis. Igkis danuh atere, igkis awna git: — Pariyeki pinetni pis ekkene gitkis hiyeg? Uya akki wotuh.

²⁰ Mmah usuh timap pis awna nawenyewa inetit ku pariye usuh ka timapti? Usuh muwaka hiyak ini pinetni.

²¹ Igkis awna inakni hene mmanawa madikte hiyeg atenasyenevwi ku pariye misekwenevwi ayge gikakkis neras ku pariye danuhpenevwi atere, igkis bateke timap nukune inetit. Ininen ginetnikis mataytak.

²² Igme Pol kannikaw givetunkis madikte neras hiyeg ayge Areópagu. Ig awna gitkis: — Kiyavwiyegben atenasyenevwi, nah hiyak ku yis kawohkigahaw gitkis ka aynsima yiwohkigavu.

²³ Ku samah nah waywempiye avuwiw inin paytwempu nah hiyap ka aynsima piriyepkewket adahan yis kiyathene yiwohkigavu. Ayge nah ute pahayku piriyepkewket annaka han: “Gidahan Uwohkigawiy ku pariye wixwiy kane hiyak”. Ku avim inin nah ayta kinetihwene yit gimin ner ku pariye yis kiyatha yis kane hiyakgiwatnene.

²⁴ Ig ner Kiyavwiye Uhokri ignewa ku pariye keh inin hawkri. Ig keh madikte amedgene inin. Ig kumadukene madikte hiyeg aynte inurik. Ig kumadukene madikte hiyeg ay amadga inin. Ig ka misakwa ariku piriyepkewket kehka gavitkis hiyeg amadgayavu ininma.

²⁵ Ig ka muwaka wixwiy keh ariknawnema gidahan mmanawa ignewa ku pariye ikene udehetniwiy, uyakakwiy, madikte.

²⁶ Giwntak pahavwiwa awayg ig keh madikte hiyegiviyenevwi humaw. Ig keh ignes misakwa muwapuw amadga inin. Avit inin hawkri humaw ig ayipa ig kaniy ku kavim igkis misakwa ay amadga inin. Hawata ig kaniy ku kiney igkis misakwa.

²⁷ Ig keh inin hene kahadbe igkis mpiksaw giharit kahadbe igkis ivegvig kahadbe igkis hiya giwitwak. Kameki in mahikome adahan utivgi mmanawa ig Kiyavwiye Uhokri ka piyawakadima wowiy.

²⁸ Igwa Kiyavwiye Uhokri waymuhtenwiy. Ig uwewkistenwiy. Ig uhumtenwiy. Pahavwi awayg avatkekne yibetya kuwis awna: “Wixwiy hawata Kiyavwiye Uhokri gikamkayuvwi.”

²⁹ Ku wixwiy Kiyavwiye Uhokri gikamkayuvwi, nikwe wixwiy ka hiya wixwiyma ikiy Kiyavwiye Uhokri ku ig he batakkanen. Ka hiya wixwiyma ikiygi ku ig kehka akak karukri wahano. Kawnata hiya wixwiyma ikiygi ku ig kehka akak karukri wahano seyno. Kawnata hiya wixwiyma ikiygi ku ig kehka akak tip. Ig ka hiyegma gibatkan. Ig ka hiyegma gikehni.

³⁰ Minikwak hiyeg ikiygi hene mmanawa igkis ka hiyak hawkri. Avim ini ig Kiyavwiye Uhokri kiyakan gikakkis. Heneme ku avim inin ig kinetihwa gitkis madikte hiyeg muwapuw. Ig awna: “Yis ka hiya yisma misakwa henenwatma akiw. Wagesnabay yihiyekemni ariw yitaraksan.”

³¹ Amawka ku wixwiy wages uhiyekemniwiy adahan wixwiy keh ku pariye kabay giwtrik Kiyavwiye Uhokri mmanawa ig kuwis ahegbete pahay hawkri ku pariye me danuhmet adahan ig ukatiwnihpitniwiy adahan ku pariye ukehniwiy ay amadga inin. Ku wis keh mbayka, mbaykanewa ig iki wot. Ku wis keh kabayka, kabaykanewa wis uti. Ig ka taraksa ku aysaw ig hiyak ukak. Avim ini ig katiwnihkiswiy git pahavwi gikanyan. Ig Kiyavwiye Uhokri kuwis akki wotwiy ku pariye ner gikanyan adahan ini mmanawa ig kuwis kannikasevgi ariw gimiremni.

³² Neras hiyeg ku pariye timepnevwi Pol giwn ayge igkis timapni hene ku samah ig kinetihwa gimin pahavwi ku pariye kannikaw ariw gimiremni, gaytakis hiyaraptihpig. Gaytakisme batek akak inakni giwn. Igkis awna git: — Usuh timepkere inakni piwn kuwewa akiwnek.

³³ Ayteke nikwe ig Pol pese gibetitakis.

³⁴ Heneme gaytakis neras hiyeg atak gihapti. Ayge igkis wagese gihiyekemnikis hehpekuye gikak Pol. Igkis ihe giwn. Pahavwi awayg gaytakis kewye Diyonisyu. Ig pahavwi gaytakis neras ku pariye kumadukene ini iwetrit kewye Areópagu. Hawata akiw pahavu tino kewyo Damaris ihe Pol giwn. Hawata nawenyevwi hiyeg akiw.