Attus 15 - Uhokri Gahegbetawni Nukune akak Sawmus

Gaytakis Jesus gihiyegavu muwaka igkis madikte iha judeyenevwi gihiyekemnikis

¹ Ayteke amun ini nawenyevwi Jesus gihiyegavu danuh atere Antiyokiya. Igkis ariwntak Judeyamnaw. Ayteke igkis kavusa kannuhne Jesus gihiyegavu ayge. Igkis awna gitkis: — Ku yis ka hiwhkama yivit ku samah amekene Moís gikumadukan awna, nikwe yis ka hiya yisma humaw Kiyavwiye Uhokri gihiyegavu.

² Igme Pol gikak Barnabe igkis timapni hene, igkis awna gitkis: — Ka yi muwaka kinetihwa hene. Inakni yihiyekemni ka wadit. Ayge igkis kavusa katiwekbet kihawnete gikakkis avatra ini. Igkisme Jesus gihiyegavu hiyapni hene, igkis awna: — Uyay awahkis hiyeg giminkis Jesus giwatnivwi gikakkis Jesus gihiyegavu giwewkistenkis ayge Jerusalém adahan igkisme akki gitkis ku pariye waditte iwit. Uyay awahkis Pol gikak Barnabe gikakkis nawenyevwi ukebyuvwiy akiw. — Uyay.

³ Ayteke nikwe igkis awahkise Polkis atere Jerusalém. Igkisme Pol tivik mpiye avitiw Fenisiyamnaw. Ayteke igkis mpiye avitiw Samariyamnaw. Igkis ekkenes muwapuw ku samah hiyeg ku pariye kane judeyenevwima igkis hawata wages gihiyekemnikis git Kiyavwiye Uhokri. Jesus gihiyegavu timapni hene, igkis batek giminkis.

⁴ Ayteke nikwe igkis Pol danuh atere Jerusalém. Ayge igkis amavaka kabayntiwa gavitkis madikte Jesus giwatnivwi gikakkis Jesus gihiyegavu giwewkistenkis. Ayteke igkis ekkenes gitkis madikte kabayka ku pariye Kiyavwiye Uhokri keh givitimpikis.

⁵ Heneme neras Jesus gihiyegavu ayge ku pariye wewnes akak farizewkis gihiyekemnikis, igkis kannikaw ayge. Igkis awna: — Kibeyne neras hiyeg ku pariye kane judeyenevwima igkis wages gihiyekemnikis. Heneme amawka kuri igkis hiwhka givitkis ku samah amekene Moís gikumadukan awna. Amawka ku igkis ihpa amekene Moís gikumadukan madikte.

⁶ Ayteke nikwe Jesus giwatnivwi pahadguhwe gikakkis Jesus gihiyegavu giwewkistenkis adahan igkis ahegbetenes ginetnikis amin inakni.

Pedru awna ku ka kabay mpiksaptih hiyeg kane judeyenevwima adahan igkis ihpa Moís gikumadukan

⁷ Ayge igkis kinetihwene pawtak ayivwite. Ig Pedru hiyapni hene, ig kannikaw ayge nikwe. Ig awna gitkis: — Nukebyuvwi, yis kuwis hiyakni ku samah minikwak Kiyavwiye Uhokri kaniyven yibetitak adahan nah ekkene Kiyavwiye Uhokri ginetni gitkis hiyeg ku pariye kane judeyenevwima kahadbe igkis timap Kiyavwiye Uhokri giwn igkis kamaxwa givitit Kiyavwiye Jesus.

⁸ Ig Kiyavwiye Uhokri hiyak ku pariye ay avit giyaknikis madikte hiyeg. Ininewa ku pariye ig amin. Nikwe ig amava hiyeg ku pariye kane judeyenevwima adahan igkis humaw gihiyegavu hawata ke wixwiybe. Ig akki hene ku samah ig kawihkise Gitip givititkis hehpekuye ukakwiy.

⁹ Wixwiy hiwhka uvitwiy. Igkisme kane hiwhkama givitkis. Heneme ig ka aminanema ariw. Ig ka ikiygikis nawenyewatma wowiy. Ig bayahminigkis ariw gitaraksankis hawata ku samah ig bayahminawiy mmanawa igkis kamaxwa givitit Kiyavwiye Jesus.

¹⁰ Kuri nukebyuvwi, ka ba yi wakaymnisa Kiyavwiye Uhokri awaku ku samah yis ka hiyak gihiyekemni. Mmanawa yis mpiksaptihkere gihiyegavu adahan igkis ihpa kumadukaki ku pariye mahikonene adahan igkis ihpin. In ke wotbe yis mpiksaptihnebe igkis adahan igkis hiyuh pahat awiyka ku pariye wixwiywa ka hiya amavak. Ine uhawkrivwiy amekenegben kawnata hiya amavak. Yisme mpiksaptihkere neras ku pariye kane judeyenevwima adahan ignes amavin adahan in keh igkis humaw Kiyavwiye Uhokri gihiyegavu.

¹¹ Ka ba yi kehni hene. Ininewa Kiyavwiye Jesus gamnihra keh wixwiy humaw gihiyegavu ku samah wixwiy kamaxwene givitit. Igkis hiyeg ku pariye kane judeyenevwima hawata akiw.

¹² Madikte hiyeg timapni hene, igkis misekwe tinwovu. Ayteke igkis timepnes giwnkis Barnabe gikak Pol. Igkisme ekkenes madikte annut ku pariye Kiyavwiye Uhokri keh givitimpikis aynte gibetkis neras ku pariye kane judeyenevwima.

Tiyagu awahkisase kagta giminkis hiyeg kane judeyenevwima

¹³ Pisenwa gawnankis igme Tiyagu kavusa kinetihwa. Ig awna: — Nukebyuvwi, ataybiswanabay nutuh.

¹⁴ Kiyavwiye Simawh Pedru kuwis akki yit ku samah Kiyavwiye Uhokri pitatye pareke abet gihawkankis hiyeg ku pariye kane judeyenevwima. Ig akki yit ku samah ig kuwis kaniy gaytakis adahan igkis humaw gihiyegavu.

¹⁵ Minikwak Uhokri gawnevevu pitatyevwi hawata kinetihwa amin ku samah igkis hiyeg ku pariye kane judeyenevwima wageswanek gihiyegavu. Mmanawa Uhokri gannasan gitkis awna:

¹⁶ — Kiyavwiye Uhokri awna: ‘Yis Davi gihiyegavu yis kewa nuvinhube. Kuri in ke wotbe nuvinuh kuwis hakuhebe mmanawa yis ibekhewbet muwapuw amadga wayk. Ka sam. Aysawnemenek nah diyuh akiw nah wadithebdih yihawkanek. In ke wotbe nah wagahkisbetenebe ini nuvinuh akiw.

¹⁷ Ayteke nikwe madikte nawenyevwi hiyeg ku pariye kane judeyenevwima ku pariye nukanyanvu adahan ignes wageswa nuhiyegavu igkis mpiksaw nuharitnek.’

¹⁸ Henewatbaki ig Kiyavwiye Uhokri awna. Henewatbaki ig keh in humaw. Mmanawa ig hiyak ku samah ig keh ku samah akavuska hawkri.

¹⁹ Nikwe nukebyuvwi, ke nuthube ka ik adahan wixwiy matekbeta gihawkankis neras ku pariye kane judeyenevwima ku pariye wageswiye gihiyekemnikis git Kiyavwiye Uhokri. Ka hiya wixwiyma mpiksaptihgikis arimkat amekene Moís gikumadukan.

²⁰ Henneme uyay awahkis pahak kagta giminkis adahan igkis ka marakwa wixwiy hiyeg ku pariye judeyenevwi. Uyay aya gitkis ininewa adahan igkis ka ax im ku pariye kakanhawka arit ahehpakti batakka mmanawa ini patahwaki wowtrikwiy. Hawata uyay aya gitkis adahan igkis ka mahayakemnihwa. Adahan igkis ka ax puwikne taregbihka gibita. Adahan igkis ka ax migat. Hiyeg ku pariye judeyenevwi marenpi abohri inakni.

²¹ Mmanawa ku samah minikwak akavuska hawkri amekene Moís giwn amin inakni hiyakemniki in akkaka ariku madikte judeyenevwi gileglisakis. Mpuse samdi inakni giwn ekkaka ay avit madikte paytwempu.

Kagta awahkiska giminkis hiyeg kane judeyenevwima

²² Ig Tiyagu pisenwa inakni gawnan, igkis Jesus giwatnivwi gikakkis Jesus gihiyegavu giwewkistenkis igkis timapni hene, igkis ahegbete ginetnikis gikakkis madikte Jesus gihiyegavu. Ayge igkis awna: — Uyay ihpa inakni giwn kiyavwiye Tiyagu. Uyay awahkis hiyeg ubetitakwiy avitit paytwempu Antiyokiya payak gikak Pol gikak kiyavwiye Barnabe adahan igkis ekkenes inakni giwn gitkis hiyeg ayge. Ayteke nikwe igkis kaniye piyana hiyeg ku pariye kiyathaka gavitkis madikte Jesus gihiyegavu. Pahavwi giw Judas Barsabas. Pahavwime giw Sílas.

²³ Ayteke igkis anniri amadga pahak kagta adahan gawahkisnikis gikakkis neras gikanyanvu. Amadga kagta in awna: Usuh Kiyavwiye Jesus giwatnivwi, usuh gihiyegavu giwewkistenkis, usuh yikebyuvwi, usuh awahkis kabayka yimin madikte yis ukebyuvwi ku pariye kane judeyenevwima ku pariye misekwenevwi ayge avit paytwempu Antiyokiya, avit Siriyamnaw, avit Silisiyamnaw.

²⁴ Usuh time gakkis gaytakis ukebyuvwi ku pariye kuhwekwa pes uyegbitak igkis danuhpenes atere yit. Igkis danuh atere, igkis matekbete yihiyekemni akak giwnkis. Igkis tuguhkise yawaygi. Heneme usuh ka awahkisgikis atere yimin adahan igkis kinetihwenesma hene yit.

²⁵ Usuh time gakkis hene, usuh pahadguhwe adahan usuh ahegbetene unetni. Ayteke nikwe usuh kaniye piyana hiyeg uyegbitak adahan usuh awahkisgikis yimin adahan igkis ekkenes yit inakni unetni. Igkis atak atere payak gikakkis ukebyuvwiy kibeynevwi Pol gikak kiyavwiye Barnabe

²⁶ ku pariye ka kavigsa givitkis adahan igkis kinetihwenes gimin Ukivarawiy Jesus Cristo muwapuw.

²⁷ Kuri nikwe usuh awahkis yimin kiyavwiye Judas gikak kiyavwiye Sílas. Igkisme akakwa gibiykis igkis akki yit ku inakni iwit ku pariye usuh tamak amadga inin kagta, ku in inyewa iwit.

²⁸ Kiyavwiye Uhokri Gitip kuwis akki wotuh ku ka hiya usuhma mpiksaptihyi adahan yis ihpa kumadukaki ku pariye mahikonene adahan yis ihpin. Inakni gakkan kabay wotuh. Ininewa umawkan yis ka keh ini ku pariye marakwa usuh hiyeg judeyenevwi.

²⁹ Ka yi muwaka ax im ku pariye kakanhawka arit ahehpakti batakka, ine migat, ine puwikne taregbihka gibita. Hawata akiw ka yi muwaka mahayakemnihwa. Ku yis ihpa inaknivyene iwit yis keh waditnek. Kiyavwiye Uhokri gabay yikaknek.

³⁰ Pisenwa gannirinkis inakni igkis awahkise giwatnivwikis avitit paytwempu Antiyokiya gihaptikis Polkis. Igkisme danuh atere, igkis pahadguhe madikte Jesus gihiyegavu. Ayteke igkis ekke ini kagta gitkis.

³¹ Ku aysaw igkis hiyeg ivegbohe ini kagta igkis bateke giminkis awaku ay nimadga kadahan kibeyne hiyakemniki ku pariye ikene gawaygikis.

³² Igkisme Judas gikak Sílas igkis Uhokri gawnevevu. Igkis kabunuga akak Kiyavwiye Uhokri gannu adahan awnenes iwit ku pariye pes giwntak Kiyavwiye Uhokri. Nikwe igkis kinetihwe gikakkis Jesus gihiyegavu ayge ayivwite. Igkis ikenes gawaygikis adahan igkis tiviknenes gikak Kiyavwiye Uhokri.

³³ Igkis misekwe ayge adahan kibite hawkri. Pisenwa igkis Jesus gihiyegavu awahkiswigkis diyuhe akak kabayka gitkis gawahkistenkis.

³⁴ Heneme ig Sílas kaniye adahan ig misakwa ayge Antiyokiya.

Pol gikak Barnabe ibekhewbet

³⁵ Igme Pol gikak Barnabe igkis hawata misekwe ayge Antiyokiya. Ayge igkis kannuheknes, igkis ekkenes Kiyavwiye Uhokri giwn payak gikakkis ka aynsima nawenyevwi hiyeg.

³⁶ Ayteke ariwnteke ini aynesa hawkri, ig Pol awna git Barnabe: — Uya atak avitit madikte paytwempu ku kiney wis kuwis ekke Kiyavwiye Uhokri giwn. Uya atak atere iwasa Jesus gihiyegavu mmahpaki igkis ayge.

³⁷ Igme Barnabe kaytwa giwn: — Uya atak. Uya wiyha Joawh Markus atak uhapti.

³⁸ Igme Pol ka muwaka Joawh Markus atak gihaptikis akiw. Git ka wadit awaku ku samah minikwak ig ikiswigkis ayge Panfiliyamnaw. Ig ka misakwa adahan gayavetnikis adahan ekkene Kiyavwiye Uhokri giwn.

³⁹ Ayteke nikwe ig Pol gikak Barnabe gihiyekemnikis ka tuguh hehpekuyema. Inneki keh igkis ikisekbet. Igme Barnabe gikak Joawh Markus igkis tarekwe amadga pahamku nawiy. Igkis atere avitit ini kewgihri kewye Xipremnaw.

Sílas atak gihapti Pol

⁴⁰ Igme Pol kaniye Sílas adahan ig atak gihapti. Ayteke nikwe igkis Jesus gihiyegavu ayge piriyepkaw gidahankis adahan igkis tivik akak Kiyavwiye Uhokri gabay. Pisenwa igkisme tivik.

⁴¹ Igkis wewvite muwapuw Siriyamnaw akak Silisiyamnaw. Igkis ikenes gawaygikis gitkis Jesus gihiyegavu aygnenevwi.