Attus 13 - Uhokri Gahegbetawni Nukune akak Sawmus

¹ Ayge Antiyokiya ka aynsima Uhokri gawnevevu ayge gibetkis Jesus gihiyegavu. Hawata ka aynsima kannuhekevutnevwi amin Uhokri gihiyekemni ayge. Nah akkite yit gaytakis giwkis. Barnabe gikakkis Simawh Atiwi, Lusyu sireneyene, Sawlu, Manoweh ner ku pariye aymuhwa payak gikak Erodis.

² Pahay hawkri igkis Jesus gihiyegavu ayge kiyathenes Kiyavwiye Uhokri. Avim ini igkis maxhewnes adahan kiyene Kiyavwiye Uhokri. Ayge amun ini ig Kiyavwiye Uhokri Gitip awna gitkis. Ig awna: — Awahkisnabay nudahan kiyavwiye Barnabe gikak kiyavwiye Sawlu adahan igkis kehnes nannivwi ku pariye nah iki giwakuritkis.

³ Igkis timapni hene, igkis maxhaw akiw. Igkis piriyepkaw akiw. Ayteke igkis sarayh giwakkis givitit Barnabe gikak Sawlu adahan igkis piriyepkewnes gidahankis. Pisenwa nikwe igkis awahkiswigkis tivik.

Pol keh pahavwi ihamwi motpi

⁴ Igme Barnabe gikak Sawlu igkis awahkiswika kuwis gavit Kiyavwiye Uhokri Gitip, igkis tivik tahan avitit paytwempu Selêwsiya. Igkis danuh atere, igkis katapte amadgat pahamku nawiy igkis tivik avitit ini kewgihri kewye Xipremnaw.

⁵ Igkis danuh atere avitit paytwempu Salamina. Ayge igkis ekkenes Kiyavwiye Uhokri ginetni ariku judeyenevwi gileglisakis. Igme Joawh Markus gayavetnikis atere.

⁶ Igkis wewvite ini kewgihri pahatte. Metakwa igkis danuh avitit paytwempu Paffus. Ayge igkis patiptak gikak pahavwi ihamwi kewye Barjesus. Ig judeyene. Ig ikawvari ke wotbe ig Uhokri gawnevebe bawa ig ka giwntakma Kiyavwiye Uhokri.

⁷ Ig darihwekne gikak ner hiyaptigi ayge. Igme hiyaptigi giw Serjiyu Pawlu. Ig hiyakemniye hiyeg. Avim ini ig watihe Barnabe gikak Sawlu adahan igkis ayta gimkanit mmanawa ig timepkerevye Kiyavwiye Uhokri ginetni.

⁸ Igkis timapni hene, igkis tivik, igkis danuh atere git. Igme ner ihamwi Barjesus ig suguhpigkis. Ig iwitehevye ner hiyaptigi adahan ig ka kamaxwa givitit Jesus. Ig Barjesus ig kewye Elimas ariku gresiyenevwi giwnavrikkis.

⁹ Igme Sawlu hawata giw Pol. Ayteke nikwe ig Pol ivegkak gikak ner ihamwi. Ig gitiphewne Kiyavwiye Uhokri. Ig awna git ihamwi:

¹⁰ — Pis wavityeyan. Pis kinisnenekwa hiyeg avanenekwa. Pihiyekemni mbeyevye. Pis suguhnenekwa ku pariye kibeyne. Pis mbeyhene Uhokri gihiyekemni ku pariye inyewatnene. Mmahki pis ka ehwa akak inere?

¹¹ Ku avim inin igwa Kiyavwiye Uhokri hiyapkis pit. Ig keh pis motpi. Kuri pis ka hiyap kamuw adahan kibite hawkri. Igme ihamwi pahaye adahan ke huwegbe biwhe giwtrikut. Aynewa ig misanpibdi givegi. Ig kavusaw wew mayembe ivegvene adahan pahavwi itukig.

¹² Igme hiyaptigi hiyapni hene, ig kamaxwe givitit Kiyavwiye Jesus. Ig wakaymni ka aynsima adahan ginetni.

¹³ Ayteke ariwnteke ini ig Pol gikakkis gihaptiyevwi igkis katapte amadgat pahamku nawiy. Igkis pese avititak paytwempu Paffus. Igkis danuh avitit paytwempu Perji, aynte Panfiliyamnaw. Ayge ig Joawh Markus ikiswigkis. Ig diyuhe avitit paytwempu Jerusalém.

Pol kinetihwene gimin Jesus gitkis hiyeg judeyenevwi

¹⁴ Igme Pol gikakkis gihaptiyevwi igkis tiviknenes akiw. Igkis pese avititak Perji. Igkis danuh tahan avitit paha paytwempu kennesa arimkat Pisidiyamnaw. Hawata ini paytwempu kewye Antiyokiya. Samdi abet igkis lammesya ariku judeyenevwi gileglisakis. Ayge igkis bat timepnes.

¹⁵ Ayge hiyeg ivegboha amekene Moís gikumadukan gitkis madikte hiyeg. Hawata igkis ivegboha Uhokri gawnevevu pitatyevwi giwnkis. Pisenwa neras leglis akivara ayge igkis wasavanew giminkis Pol. Igkis awna gitkis: — Ukebyi, ku yis kadahan iwit adahan wagahkisne wawaygi, uyay akkin wotuh.

¹⁶ Igme Pol kannikaw ig awokhasaw gitkis adahan igkis tinwohaw. Ig awna gitkis: — Nukebyuvwi judeyenevwi, ataybiswanabay nutuh. Nukebyuvwi kane judeyenevwima ku pariye ay kiyene Kiyavwiye Uhokri, ataybiswanabay nutuh.

¹⁷ Minikwak uwohkigawiy ig kaniye uhawkrivwiy amekenegben judeyenevwi adahan igkis humaw gihiyegavu. Avim ini igkis aynte avit nawenyewa waxri kewye Ejitumnaw. Ayge ig Kiyavwiye Uhokri keh igkis kibihwa. Ayteke ig wiwhkiswigkis giwakutakis neras ejituyenevwi akak gannu.

¹⁸ Ayteke nikwe adahan paxnika madikwa (40) akebi kamukri igkis aynte amadga amatap. Ayge igkis tarakse ka aynsima heneme ig Kiyavwiye Uhokri kamax gidahankis.

¹⁹ Ayteke ariwnteke ini igkis danuh atan avitit inin waxri kewye Kanaahmnaw. Ayteke nikwe ig Kiyavwiye Uhokri pisenwe gikakkis ntewnehker gikebikis hiyegiviyenevwi ku pariye misekwenevwi ayge. Pisenwa ig ike madikte inin giwaxigkis giwakuritkis neras gihiyegavu.

²⁰ Madikte ini danuh gitkis abet kibite kamukri, paxkabu madikawku madikwa akebi akak pohowkubu madikwa arawna (450). Avim ini ig Kiyavwiye Uhokri kannikase hiyeg hiyakemniye, kawenyanempi akiw adahan giwewkistenkis gihiyegavu he ku aysaw Uhokri gawneve amekene Samwe humaw giwewkistenkis.

²¹ Avim ini nikwe igkis amekenegben aya git Kiyavwiye Uhokri: “Uya iki wotuh pahavwi ukivara ke nawenevwibe hiyegbe gikivarakis.” Ig Kiyavwiye Uhokri timapni hene, ig ike gitkis amekene Sauw adahan ig humaw gikivarakis. Igme amekene Sauw gig amekene Kis. Gihawkri amekene Benjamih. Ayteke nikwe ig amekene Sauw kumadukevgikis adahan paxnika madikwa akebi (40) kamukri.

²² Ayteke ariwnteke ini ig Kiyavwiye Uhokri wiwhe amekene Saruw. Ig ike giwenyan amekene Davi adahan igme humaw gikivarakis. Ig Kiyavwiye Uhokri awna kibeyne iwit gidahan amekene Davi. Ig awna: — Ner Jesse gikamkayh Davi, nah batek ku samah ig wew akak nuhiyekemni. Ig keh madikte nubetkinek.

²³ Nukebyuvwi, ku avim inin ig Kiyavwiye Uhokri kannikase pahavwi ukivarawiy akiw. Ig amekene Davi gihiwhi. Kiyavwiye Uhokri ikevgi wotwiy adahan ig wamnihtenwiy ku samah ig ikakse gitkis amekenegben minikwak. Igi wamnihtenwiy ig Kiyavwiye Jesus.

²⁴ Ig kahayak ariwnteke ini ku samah Joawh Batistamni ekkene Kiyavwiye Uhokri giwn wotwiy wixwiy hiyeg izhaewyenevwi. Ig Joawh Batistamni danuh gavitkiya Kiyavwiye Jesus. Ig awna wotwiy adahan wixwiy wages uhiyekemniwiy ariw utaraksanwiy adahan wixwiy kewvi ahakwat un.

²⁵ Ayteke ariwnteke ini kaba pisenwa ini gannivwi amadga hawkri, ig Joawh Batistamni awna gitkis hiyeg. Giwn: “Yis ikanhu ku nahnewa yamnihten bawa kawa. Ig ku pariye wamnihtenwiy ig nehmnikuhpiye nuhavuh butte. Ig ka aynsima gikiytani mpiyan. Nah yuma nukiytanisima gitivut adahan nah ayavig wiwh gikaswatni gikugkaptak.”

²⁶ Nukebyuvwi, inakni ginetni gimin ig wamnihtenwiy in awahkiska uminwiy madikte. In kawih udahanwiy wixwiy hiyeg judeyenevwi wixwiy amekene Abraawh gihiwhivwi. In hawata kawih yidahan yis hiyeg ku pariye kane judeyenevwima ku pariye kiyathenevwi Kiyavwiye Uhokri.

²⁷ Minikwak ku samah neras hiyeg jerusalémyenevwi hiyap Kiyavwiye Jesus igkis ka pukuha ku igyewa wamnihtenwiy. Ine giwewkistenkis kawnata pukuhpin. Igkis timap Uhokri gawnevevu pitatyevwi giwnkis takunipti samdi heneme igkis ka pukuhin. Hiyawa igkis ka pukuhin heneme igkis keh madikte ku pariye avigkutavrik ku samah in kinetihwa. Mmanawa igkis ikakse Kiyavwiye Jesus adahan miyaka. Innewa ku pariye Uhokri gawnevevu kinetihwa nimin minikwak.

²⁸ Hiyawa ig Kiyavwiye Jesus yumahwa gitaraksan aynesnima adahan igkis umahkisgi, heneme igkis aya git Pilatus adahan giwmasepten.

²⁹ Ayteke igkis keh madikte ini mbayka gikak ku pariye Uhokri gannasan kinetihwa nimin. Pisenwa ig wiwhpika aminatak giyakni ig sarayhpika arikut gimew.

³⁰ Henneme, kibeyne, ig Kiyavwiye Uhokri kannikasevgi ariw gimiremni.

³¹ Ayteke adahan kibite hawkri ig hiyapka gavitkis gikannuhnivwi neras ku pariye danuhpenevwi gihapti avit gimiremni, igkis danuh aytontak Galileyamnawtak avitit Jerusalém. Kuri igkis hiyeg humaw inetitkekne gidahan gitkis madikte hiyeg.

³² Ku avim inin usuh ay adahan ekkene inakni kibeyne inetit yit. Minikwak ig Kiyavwiye Uhokri ikakse pahavwi wamnihtenwiy gitkis uhawkrivwiy amekenegben.

³³ Metakwa inakni gikaksan kahayak wotwiy gihiwhivwikis mmanawa ig kannikase Kiyavwiye Jesus ariw gimiremni. Ini ku samah ig kannikasig inineki ku pariye Uhokri Gannasan kinetihwa nimin amadga aveynivye abusku amadga ini kagta kewye Salmus. Ayge ig Kiyavwiye Uhokri awna: — Pis nukamkayh. Ku avim inin nah akkin ku pis igyewa nukamkayh.

³⁴ Hawata akiw ig Kiyavwiye Uhokri kinetihwa amadgatak nawenyewa iwetrit akiw amin Kiyavwiye Jesus gikankawni ariw gimiremni adahan givit ka madivwi. Ayge ig awna: — Nah ikite yit ini kabayka nuwntak ku pariye Davi kinetihwa nimin. Ini kabayka inyewa in danuhnek.

³⁵ Igme amekene Davi kinetihwa amin ini kabayka amadga nawenyewa abusku amadga ini kagta kewye Salmus. Ayge ig awna: — Pis ka isaksan nah pikamkayh barewvitye adahan nuvituh madivwip.

³⁶ Ig amekene Davi ka awna inakni giminma. Ku samah ig aynete amadga inin ig keh madikte ku pariye Kiyavwiye Uhokri ikiswanaw adahan ig keh. Pisenwa ig miyap. Ig avuhpika gibetkis gikebyuvwi. Givit madivwip.

³⁷ Henneme ner ku pariye Kiyavwiye Uhokri kannikase ariw gimiremni, ignewa ku pariye givit ka madivwi.

³⁸ Nukebyuvwi, ku avim inin usuh ikene yinetni kahadbe yis hiyakni ku ignewa Kiyavwiye Jesus keh Kiyavwiye Uhokri bayahminawiy ariw utaraksanwiy.

³⁹ Madikte hiyeg ku pariye kamaxwa givitit Kiyavwiye Jesus ignes wiwhkanek ariw madikte gitaraksankisnek. Ig amekene Moís gikumadukan in ka hiya uwiwhkawiy hene.

⁴⁰ Ku yis ka ihpekere inakni wownuh avuriwnabay ku nawenetke in danuh yitnek ku pariye Uhokri gawnevevu pitatyevwi kinetihwa nimin minikwak.

⁴¹ Igkis awna: — Yis ku pariye mahivwihne nnetni, ataybiswanabay nutuh. Hiyawa yis wakaymni mmanawa ku avim inin yis miyarapnek. Mmanawa yis ka ihpa ku nah keh ini annut ku pariye nah keh yiwtrik amadga hawkri. Hiyawa pahavwi akkamnihni yit heneme yis ka ihpin. Henewatbaki ig Kiyavwiye Uhokri awna.

Gaytakis hiyeg iha Pol giwn

⁴² Ayge nikwe ig Pol pisenwa inakni gawnan ayge ariku ini judeyenevwi gileglisakis. Ku aysaw igkis peswiyes, ignes hiyeg ayge awna gitkis Pol gikak Barnabe. Giwnkis: — Uyay diyuh akiw inin samdi aytwenempiye adahan yis akki inakni inetit wotuh akiw. — Uyay.

⁴³ Ayteke pisenwa lammes, ka aynsima judeyenevwi ameve gihiyekemnikis. Hawata ka aynsima hiyeg ku pariye kane judeyenevwima ku pariye ihpenevwi judeyenevwi gihiyekemnikis igkis hawata amevevwata ini gihiyekemnikis. Igme Pol gikak Barnabe igkis kinetihwe gikakkis. Ayge igkis ikenes gihiyekemnikis gitkis adahan igkis tiviknenes akak Kiyavwiye Uhokri gabay.

Polkis ayguhwa giwkis hiyeg judeyenevwi

⁴⁴ Samdi danuhe akiw, kaba madikte hiyeg paytwempuyenevwi pahadguhwe atere adahan igkis timepnes Kiyavwiye Uhokri giwn.

⁴⁵ Igkisme judeyenevwi hiyapni hene ku samah ba gikebentenkis hiyeg, igkis atihe Polkis. Ayteke nikwe igkis mpithevye hiyeg timap Pol giwn. Igkis awna: — Pol ka awna wadit. Igkis mahivwihpig.

⁴⁶ Igme Pol gikak Barnabe igkis hiyapni hene, igkis kinetihwa gitkis akak madikte gawaygikis. Igkis awna: — Amawka Kiyavwiye Uhokri ginetni ekkepka yitkit yis hiyeg ku pariye judeyenevwi. Heneme yis ka amevekere inakni ginetni. Mmahki yis ka darihkere ini dehetniki adahan yis aymuhwa gimun Kiyavwiye Uhokri adahan avanenekwa? Ku samah yis ka amevekere ginetni nikwe usuh ayguhwete yiw adahan usuh akkin gitkis hiyeg ku pariye kane judeyenevwima.

⁴⁷ Ig Kiyavwiye Uhokri awna gitkis adahan igkis keh hene. Ig awna gitkis: “Nah keh yis humaw kewa paha abukribe adahan yis uguhne gihiyekemnikis neras ku pariye kane judeyenevwima kahadbe madikte hiyeg amedgenevwi wayk ik adahan uti gamnihtenkis.”

⁴⁸ Neras ku pariye kane judeyenevwima timapni hene, igkis bateke giminkis. Igkis kabayha Kiyavwiye Uhokri ginetni. Avim ini nikwe madikte igkis ku pariye Uhokri gikanyanvu adahan igkis aymuhwa gimun adahan avanenekwa igkis kamaxwe givitit Kiyavwiye Jesus.

⁴⁹ Ayteke ariwnteke ini Kiyavwiye Uhokri giwn ibekhepka muwapuw avitiw ini waxri.

⁵⁰ Heneme neras hiyeg ku pariye judeyenevwi amiyhase Pol gikak Barnabe gitkis neras paytwempuyenevwi giwewkistenkis. Igkis amiyhasevgikis gutkis tinogben kiyatyovwi ku pariye kiyathanovwi Kiyavwiye Uhokri. Ayteke nikwe egkis hiyapkis mbeyne gitkis. Egkis ivukevgikis avititak guwaxigkis.

⁵¹ Igme Pol gikak Barnabe igkis hiyapni hene, igkis sessehe gikugkukis ariw avathawni adahan areketni ku samah neras hiyeg gitaraksankis. Ayteke igkis tivik avitit paytwempu Ikôniyu.

⁵² Igkisme neras ku pariye wageswevye Jesus gihiyegavu ayge avit Antiyokiya igkis ka aynsima bateke giminkis. Igkis ayge gitiphewnes Kiyavwiye Uhokri.