Attus 12 - Uhokri Gahegbetawni Nukune akak Sawmus

Pedru sarayhpika arikut parakseket

¹ Avimnewa ini hawkri ner hiyaptigi Erodis kavusa hiyapkis mbeyne gitkis gaytakis Jesus gihiyegavu.

² Ig umahkise amekene Tiyagumni, ku pariye gegni Joawh, akak iwan.

³ Ku aysaw neras judeyenevwi giwewkistenkis ayge kinetni gak, igkis bateke ginaktinkis. Igme Erodis hiyapni hene, ig awna: — Neras judeyenevwi batek ku samah nah umahkise Tiyagumni. Nikwe nah umahkiste Pedru hawata. Ayteke nikwe ig kamaykise Pedru. Ig kamaykiswig abetnewa ini fet adahan axne bugut miyegbiye.

⁴ Ig kamaykiswig, ig padakkiswig arikut parakseket. Ayge ig avuriwkiswig gitkis gisuwtatavu madikawku gikebikis akak puguhkuna gawnakis (16). Pisenwa ig awna ginaktin: — Ku avim inin hiyeg judeyenevwi kehne fet adahan kiyene ku samah minikwak Kiyavwiye Uhokri wiwhkise amekenegben giwakutakis hiyeg ejituyenevwi. Kuwewanek ampiya fetnek nah iwapkis Pedru giwtrikutkis adahan nah umkiswig hawata.

⁵ Igme Pedru avuriwka ayge ariku parakseket. Igkisme Jesus gihiyegavu igkis madikte piriyepkewiye gidahan. Igkis piriyepkewnes git Kiyavwiye Uhokri takunipti.

⁶ Avim ini tiyegem, avit ig me iwepkamet giwtrikutkis neras judeyenevwi, ig Pedru ayge ariku ini parakseket. Ig himak giyegbikis piyana gikebikis suwtat. Ig wanamin akak pitana xen. Igkisme suwtat avuriwkevutnevwi igkis kiyarihe lapot adahan yuma hiyeg pesne arikutak ini parakseket.

Pedru wiwhka arikutak parakseket

⁷ Pahaye adahan pahavwi ahj Uhokri giwatni hiyapkiswe git. Ayge in parakseket kabutni. Ig ahj daxe gimuhrik Pedru. Ig wadiswig. Ayteke ig awna git: — Asa kannikaw kibehtenwa. Aynewa ini xen watekwe giwakutak.

⁸ Ayteke ig ahj awna akiw: — Kawihnaba pikabutik akak pikaswatni. Igme Pedru kawihminew. Igme ahj awna: — Kawihnaba pidagmanvit. Ba ayta wew nuhavuh butte.

⁹ Ig Pedru timapni hene, ig pese ig makeke gihavu butte. Heneme ig givewkan garisunkam. Ig ka hiyak ba igyewatma ahj danuh git.

¹⁰ Igkis wew, igkis mpiye ner pitatye avuriwkevutne. Igkis wew atakisa akiw, igkis mpiye ner giveynivye avuriwkevutne. Ayteke igkis danuh anumekut ini parakseket alapota sivari pahambatak paytwempu. Ariwnteknewa ini lapot wokhew. Ayteke nikwe igkis pese. Igkis wew aynesawa akiw avigku ahin. Aynewa ig ahj tivik giw Pedru.

¹¹ Igme Pedru hawkamnihwa. Ig awna: — Kuri nah hiyakni ku igyewa ahj Kiyavwiye Uhokri awahkise numinuh. Ig wiwhpen giwakutak kiyavwiye Erodis. Ig wiwhpen ariw madikte mbeyne ku pariye neras uwewkistenuh gikehnikis nukakuh.

¹² Kit nah bisik kuri? Nah atakte guvinwat kiyavuno Mahi. Ayteke nikwe ig tivik guvinwat kiyavuno Mahi. Eg Mahi egnewa Joawh Markus ginag. Ayge guvinwa ka aynsima hiyeg pahadguvu piriyepkewne.

¹³ Ig kiyavwiye Pedru danuh atere, ig tese anumekut payt. Pahavu himano kewyo Rodi eg timapni hene, eg ayta iwasa ku pariye hiyeg danuh.

¹⁴ Ayge eg murotvi arit Pedru gikuvimna. Eg hiyapni hene, eg ba gubetki keh eg miyehe woka lapot. Eg sigise diyuhe arikut xam. Eg danuh atere, eg awna gitkis neras hiyeg ayge. Guwn: — Kiyavwiye Pedru ay anumeku lapot.

¹⁵ Igkisme hiyeg kaytwa guwn: — Pis kuwis puwvup. Egme awninano: — Igyewa kiyavwiye Pedru ay. Igkisme kaytwa guwn: — Nikwe kiyavwiye Pedru ganmap.

¹⁶ Igme Pedru ayge tesnene aneku payt. Igkis timapni hene, igkis atere woka lapot. Ayge nikwe igkis hiyap Pedru. Igkis wakaymnibdi ka aynsima.

¹⁷ Igme awokhasew gitkis adahan igkis tinwohaw. Ayteke ig akkamnihe gitkis ku samah Kiyavwiye Uhokri wiwhkiswig arikutak parakseket. Pisenwa ig awna gitkis: — Ataknabay git kiyavwiye Tiyagu gikakkis ukebyuvwiy. Akkanay gitkis ku pariye danuh nutuh. Nah me tivik. Ayteke nikwe ig tivik tahan avawyewa iwetrit.

¹⁸ Hewke ka aynsima kadukmanka ayge gibetkis neras suwtat. Igkis ka hiyak ku samah Pedru giveswen.

¹⁹ Avim ini ig Erodis awahkise hiyeg atere givegvepten Pedru heneme igkis ka utivgi. Ig hiyapni hene, ig aya gisuwtatavu ku samah giveswen Pedru. Igkisme ka hiyak. Ayteke nikwe ig umahkiswigkis. Ayteke ariwnteke ini ig pese ayteke avititak judeyamnaw. Ig tivik avitit paytwempu Sesareya. Ayge ig misekwe.

Erodis miyap

²⁰ Ig Erodis ayge Sesareya, hiyeg ku pariye tiroyenevwi gikakkis hiyeg ku pariye sidonyenevwi igkis danuh atere git. Igkis ayta kibeyhevye gihawkankis gikak Erodis mmanawa ig ka aynsima dagawne gitkis. Pitatye igkis darihwak gikak Bilastu ku pariye avuriwkevutne Erodis givin. Igkis darihwak gikak adahan igme gawnamnihtenkis. Ayteke nikwe igkis madikte atak git Erodis adahan kibeyhene gihawkankis gikak kahadbe igkis ik adahan isim gimanakis gitkis gihiyegavu.

²¹ Igme Erodis hiyapni hene, ig kaniye pahay hawkri adahan ig kinetihwene gikakkis neras hiyeg. Ahawkanavrik danuh, ig kawihe gisimsa gibereswetni. Ig bat amadga gevwi adahan ku kiney ig hiyekne gikakkis hiyeg. Ayge nikwe ig kinetihwene gikakkis.

²² Pisenwa gawnan neras hiyeg kabiman. Giwnkis: — Ka hiyegma amadgaya inin awnene ukakuh. Ig kiyavwiye Erodis ig awna kewa Kiyavwiye Uhokribe.

²³ Pahaye adahan pahavwi ahj Uhokri giwatni keh ig Erodis hiyap karayt mbeyevye awaku ig ikawvari ke wotbe igwatbe Kiyavwiye Uhokribe, ig ka kiyatha Kiyavwiye Uhokri. Ayteke nikwe gikawankati axwig. Ig miyap.

²⁴ Inme Kiyavwiye Uhokri giwn in ibekhewvi muwapuw. Avim ini Jesus gihiyegavu kibihwa akiw.

Pol giwewvan pitatye

²⁵ Ayteke nikwe ig Barnabe gikak Sawlu igkis pisenwe gikankis karukri gitkis Jesus gihiyegavu ayge Jerusalém, igkis tivik. Igkis iwe Joawh Markus tivik gihaptikis. Igkis diyuhe avitit ini paytwempu Antiyokiya.