Attus 11 - Uhokri Gahegbetawni Nukune akak Sawmus

Pedru akki ku samah hiyeg kane judeyenevwima wages gihiyekemnikis

¹ Ariwnteke ini Kiyavwiye Jesus giwatnivwi gikakkis Jesus gihiyegavu ayge judeyamnaw, igkis time gakkis hiyeg ku pariye kane judeyenevwima ku ignes hawata ameve Kiyavwiye Uhokri ginetni gimin Kiyavwiye Jesus.

² Ayteke ig Pedru diyuhe avitit Jerusalém atere judeyamnawit. Ig danuh atere, gikebyuvwi judeyene awne gimin. Gitkis ku hiyeg ka hiwhkama givitkis ku samah amekene Moís gikumadukan awna, nikwe ignes ka hiya igkisma humaw Kiyavwiye Uhokri gihiyegavu. Nikwe igkis awna git Pedru:

³ — Mmahki pis darihwak gikakkis hiyeg ku pariye kane hiwhkavuma givitkis? Mmahki pis ax gikakkis? Ku pis keh hene, pis ka avigkuma amekene Moís gikumadukan.

⁴ Ig Pedru hiyapni hene, ig akkamnihe ku samah neras hiyeg ku pariye kane judeyenevwima wagese gihiyekemnikis. Ig akkamnihni gitkis kawetpumpi. Giwn:

⁵ — Amakohnokwa nah aynte paytwempu Jopi. Nah ayge piriyepkewne, nah hiyap nuwtyakveynen pahak arikna kewa dagamadbe in muhuke nuwtrikumpi. In muhuksaka waygborit ke wotbe in kamaxkanebe paxnika nitusi. In danuh kennesa nutuh.

⁶ Nah ivegkak nikak kabayntiwa nah hiyap puwikne madikte pahaymkute nimadga. Nah hiyap axtig. Nah hiyap ku pariye kawamnevwi. Nah hiyap kuhivra. Nah hiyap madikte ku pariye amekene Moís gikumadukan awna amin ku in ka kabay adahan wixwiy ax.

⁷ Ayteke nah timap pahat ikuvimnat awna nutuh. In awna: “Pedru, kannikaw. Asa umah neras puwikne adahan pis ax.”

⁸ Nahme kaytwa giwn: “Kawa, Kiyavwiye. Nah ka pataha nubiyuh akak akebi inin im patehwevye. Amekene Moís gikumadukan awna amin puwikne ku in ka kabay adahan usuh ax.”

⁹ Inme ikuvimnat kaytwa nuwnuh: “Ku pariye Kiyavwiye Uhokri kuwis barewvithe ka hiya pisma ikiy ku in patahwevye.”

¹⁰ Ini nah hiyap nuwtyakvey mpamavut. Pisenwa ini kene dagambe in iwepka inurikut akiw.

¹¹ Avimnewa ini mpana hiyeg danuh arit ini payt ku kiney nah misakwa. Igkis awahkiska numinuh ariwntak paytwempu Sesareya.

¹² Ayge ig Kiyavwiye Uhokri Gitip awna nutuh adahan nah ka pukuhpaw gavitkis, adahan nah atak gihaptikis. Neras ukebyuvwiy puguhkuna gikebikis ku pariye ay ukakuh ku avim inin, igkis tivik nuhapti hawata tahan avitit paytwempu Sesareya. Usuh danuh atere, usuh madikte pareke atere kiyavwiye Kornelyu givinekut.

¹³ Ayge ig ekke gitkis ku samah ig hiyap pahavwi ahj tabir ay givineku. Igme ahj awna git: “Awahkisnaba hiyeg tahan avitit paytwempu Jopi adahan igkis giwepten pahavwi hiyeg kewye Simawh Pedru.

¹⁴ Igi akki pitnek adahan ku samah pis danuh git Kiyavwiye Uhokri payak gikakkis madikte pikebyuvwi.”

¹⁵ Nah timapni inakni kiyavwiye Kornelyu giwn hene, nah kavusa kinetihwa gitkis. Ku samah nah awnempiye, pahaye adahan Kiyavwiye Uhokri Gitip kawihe neras hiyeg ku pariye kane judeyenevwima hehpekuye ukakwiy minikwak.

¹⁶ Nah hiyapni hene, nah kiye Kiyavwiye Jesus giwn ku samah ig kinetihwa minikwak. Ig awna: “Ku aysaw ig Joawh Batistamni kaywe hiyeg, ig kawihkis un givititkis. Heneme hawkavanek igyewa Kiyavwiye Uhokri Gitip kawihkiska yivititnek. Henewatbaki ig kaywevyinek.”

¹⁷ Henewa nukebyuvwi. Ig Kiyavwiye Uhokri kawihkise Gitip givititkis neras hiyeg ku pariye kane judeyenevwima hawata ku samah ig kawihkis Gitip uvititwiy minikwak avim ini ku aysaw wixwiy kamaxwe givitit Kiyavwiye Jesus. Ini Kiyavwiye Uhokri gannip. Nah ka ariknawnema adahan nah mpitha Kiyavwiye Uhokri gannivwi. Henewatbaki ig kiyavwiye Pedru awna.

¹⁸ Igkis gikebyuvwi judeyenevwi timapni hene, igkis ka awna gimin akiw. Igkis kabayha Kiyavwiye Uhokri. Igkis awna: — Henewa nikwe Kiyavwiye Uhokri isakse hiyeg ku pariye kane judeyenevwima adahan ignes wages gihiyekemnikis hawata ke wixwiybe adahan igkis hawata aymuhwa gimun Kiyavwiye Uhokri adahan avanenekwa. Kibeyne.

Hiyeg kane judeyenevwima wages gihiyekemnikis ayge Antiyokiya

¹⁹ Awenketeke ku samah ig amekene Estevawh umehpika, Jesus gihiyegavu kavusa hiyap mbeyne giwakukis hiyeg ku pariye kane Uhokriyanvuma. Igkis bisiksepka muwapuw. Ka aynsima gihiyegavu igkis tivik piyawakad tahan avitit Fenisyamnaw, avitit Xipremnaw, avitit paytwempu Antiyokiya. Igkis danuh atere, igkis ekkenes Kiyavwiye Uhokri giwn gitkis hiyeg aygnenevwi. Heneme igkis akkin gitkisnen hiyeg ku pariye judeyenevwi. Igkis ka kinetihwa gitkis hiyeg ku pariye kane judeyenevwima.

²⁰ Igkisme gaytakis gihiyegavu ku pariye ariwntak Xipremnaw, ariwntak Sirenemnaw, igkis tivik tahan avitit ini paytwempu Antiyokiya. Igkis danuh atere, igkis kinetihwa gimin Kiyavwiye Jesus gitkis hiyeg ku pariye kane judeyenevwima hawata.

²¹ Ig Kiyavwiye Uhokri ayge gikakkis akak madikte gidatni. Ayge nikwe ka aynsima hiyeg ihe giwnkis. Igkis wagese gihiyekemnikis git Kiyavwiye Jesus.

²² Igkisme Jesus gihiyegavu aynte Jerusalém igkis time gakkis. Ayteke nikwe igkis awahkise Barnabe tahan avitit ini paytwempu Antiyokiya.

²³ Ig danuh atere, ig hiyap ku samah igkis kuwis ameve Kiyavwiye Uhokri gabay. Ayge nikwe ig bateke gimin. Ig ikene gihiyekemnikis gitkis madikte adahan igkis tiviknenes kamaxwenene givitit Kiyavwiye Jesus avititakwa giyaknikis.

²⁴ Ig Barnabe ig kibeyne hiyeg. Ig gitiphewne Kiyavwiye Uhokri. Ig ka aynsima gikamaxwan givitit Kiyavwiye Jesus. Ayge nikwe ka aynsima hiyeg akiw wageswe Jesus gihiyegavu.

²⁵ Ig Barnabe hiyapni hene, ig awna: — Nah iwapte Sawlu atan. Ayteke nikwe ig tivik tahan avitit paytwempu Tarsu adahan ig givegvepten Sawlu.

²⁶ Ig danuh atere, ig ute Sawlu, ig waxwevgi avitit Antiyokiya. Igkis danuh atere, igkis lammesya gikakkis Jesus gihiyegavu ayge adahan pahak kamukri. Igkis kannuhnes ka aynsima hiyeg. Ayge Antiyokiya pitatye akavuska Jesus gihiyegavu kanumka “Cristoyan”.

Uhokri gawneve akki ku mihetniki danuhnek

²⁷ Avim ini hawkri gaytakis Uhokri gawnevevu pese avititak paytwempu Jerusalém. Igkis danuh tahan avitit paytwempu Antiyokiya.

²⁸ Pahavwi gaytakis kewye Agabu. Pahay hawkri ig Agabu kannikew ig awna gitkis hiyeg. Giwn: — Kuwewanek mihetniki danuhnek muwapuw amadga wayk. Henewatbaki in. Avim ini ku aysaw Kilawdyu kumadukene madikte hiyeg, ini mihetniki danuh.

²⁹ Igkis Jesus gihiyegavu hiyapni hene, igkis awna: — Uyay amnih ukebyuvwiy ku pariye misekwenevwi ayge judeyamnaw. Ayteke nikwe igkis pahadguhe gikakurakis ku pariye igkis hiya avadguhka.

³⁰ Igkis awahkiswin giminkis Jesus gihiyegavu giwewkistenkis tahan Jerusalém. Igkis awahkiswin giwakukis Barnabe gikak Sawlu.