Attus 10 - Uhokri Gahegbetawni Nukune akak Sawmus

Ahj kinetihwa git Kornelyu

¹ Avim ini hawkri pahavwi awayg romanyene misakwa aynte avit paytwempu Sesareya. Giw Kornelyu. Ig ikivarat gidahankis madikawku madikwa (100) suwtat kewye “italyenevwi”.

² Ig batekye gikak Kiyavwiye Uhokri. Ig kiyathig payak gikakkis madikte givinekuya. Ig amnihne ka aynsima judeyenevwi madiptavye. Takunipti ig piriyepkewne.

³ Pahay hawkri daraka kamuw, pahavwi ahj Uhokri giwatni hiyapkiswe git giwtyakveynen. Ig Kornelyu hiyavgi huwewe. Igme ahj danuh git, ig awna:

⁴ — Kiyavwiye Kornelyu. Igme Kornelyu wadisasew. Ig iveg gimkat. Ig kaytwa giwn: — Kiyavwiye, pariye pimawkan nutuh? Igme ahj awna git: — Kiyavwiye Uhokri timap piviryepkawni. Ig hiyap ku samah pis amnih madiptavye. Inneki keh ig kiyepi.

⁵ Kuri, awahkisnaba hiyeg avitit paytwempu Jopi adahan giwepten pahavwi awayg kewye Simawh Pedru.

⁶ Ig misakwa ayge gimun Simawh, ku pariye gannivwi mitibdihne puwikne amar. Ig Simawh givin misakwa kennesa akigbimna mahakwa.

⁷ Pisenwa gawnan inakni iwit, ig ahj tivik. Igme Kornelyu watihe piyana gihiyegavu ayta git gikak pahavwi suwtat ku pariye gikavriwten. Igme suwtat ig hawata kiyatha Kiyavwiye Uhokri.

⁸ Igkis danuh atere, ig Kornelyu ekke gitkis madikte ku pariye danuh git. Ayteke ig awna gitkis: — Ataknabay kuri tahan avitit paytwempu Jopi. Igkisme tivik.

Pedru hiyap dagam giwtyakveynen

⁹ Hewke akiw igkis kennesmin gidawnhankis avitit paytwempu Jopi, igme Pedru ayge Jopi. Kaba puwip kamuw ig wagehe tahan inut amadgat payt ahigwi adahan ig piriyepkewne.

¹⁰ Ayge ig mativwe. Ku samah ig wahepnete hiyeg arikune payt ahegbetenete im, ig Kiyavwiye Uhokri hiyapkise git giwtyakveynen.

¹¹ Pahaye adahan ig hiyap en woke. Ayteke ig hiyap pahak arikna kewa pahak dagambe in muhuke inutak tahan waygborit ay giwtrikumpi. In muhuksaka git ke wotbe in kamaxkenebe paxnika nitusi.

¹² Puwikne madikte pahaymkute nimadga. Hawata kawamnevwi akak kuhivra egnes aygwata.

¹³ Ayteke ig timap pahat ikuvimnat awna git. In awna: — Pedru. Kannikawnaba kuri. Asa umah neras puwiknebdi adahan pis ax.

¹⁴ Igme Pedru kaytwa giwn: — Kawa, Kiyavwiye. Nah ka axti akebi inin im. amekene Moís gikumadukan awna amin puwikne ku ka kabay adahan usuh ax. Ka hiya nahma pataha nubiyuh akak ini patahwaki.

¹⁵ Inme ikuvimnat awna git akiw. In awna: — Ku pariye Kiyavwiye Uhokri kuwis barewvithe ka hiya pisma ikiy ku in patahwevye.

¹⁶ Ayteke ig Pedru hiyap in danuh git pimavut akiw. Pisenwa ini kene dagambe in iwepka inurikut akiw.

Kornelyu giwatnivwi danuh git Pedru

¹⁷ Ayteke ig Pedru ivegminene gihiyekemni adahan inere ku samah Kiyavwiye Uhokri gakkan git. Nikwenewa avim ini ig Kornelyu giwatnivwi danuh atere. Igkis aye arak Simawh givin igkis utepni. Igkis danuh anumekut alapota.

¹⁸ Ayteke nikwe igkis kabiman gitkis hiyeg arikune payt. Igkis awna: — Ba Simawh Pedru misakwa ay?

¹⁹ Igme Pedru gidukwenewa aynte inut ig ivegminene gihiyekemni amin Kiyavwiye Uhokri gakkan git. Amun ini ig Kiyavwiye Uhokri Gitip awna git: — Mpana awaykemni danuh atan piyawesetni.

²⁰ Ahekbetaw kuri. Muhuk gimkatkis. Ataknaba gihaptikis. Ka muwaka pukuhpaw gavitkis mmanawa nahwa awahkisgikis pimin.

²¹ Ig Pedru timapni hene, ig muhuke. Ig awna gitkis neras hiyeg: — Nahnewa Pedru. Pariye yimawkan nutuh?

²² Igkisme kaytwa giwn: — Pahavwi romanyene suwtat gikivarakis kewye kiyavwiye Kornelyu ig awahkise usuh pimin. Ig kibeyne awayg. Ig kiyatha Kiyavwiye Uhokri. Madikte judeyenevwi kabayhig. Amakohnokwa ig Kiyavwiye Uhokri awahkise pahavwi ahj gimin. Igme ahj awna git adahan ig awnasap givinwat adahan ig timepne piwn.

²³ Ig Pedru timapni inakni hene, ig awnase neras awaykemni adahan igkis mpiyasa mitipka ayge gimun. Igkis misekwe. Hewke ig tivik gihaptikis. Igkisme gaytakis Jesus gihiyegavu ayge Jopi igkis hawata tivik gihaptikis.

Pedru kinetihwa gikak Kornelyu

²⁴ Hewke akiw ig danuh avitit paytwempu Sesareya. Igme Kornelyu ayipa wahavgi ayge givinwa. Ig pahadguvu gikakkis gikebyuvwi gikakkis gidahewektenvu ku pariye gawnasanvu atere.

²⁵ Ayteke nikwe ig Pedru danuh atere. Ig Kornelyu hiyapni hene, ig atere patiptakig. Ig paberetusew gitivut adahan gikiytenitni.

²⁶ Igme Pedru hiyapni hene, ig kannikasig. Ig awna git: — Kannikawnaba. Nah he awaygnenwa amadgaya inin ke pisbe.

²⁷ Igme Kornelyu kannikaw. Ayteke nikwe igkis kinetihwenes pawtak, igkis pareke paytrikute. Ayge ig Pedru hiyap ka aynsima hiyeg pahadguvu.

²⁸ Ig hiyapni hene, ig awna gitkis: — Yis hiyakni ku samah usuh hiyeg judeyenevwi ka hiya usuhma darihwak gikakkis hiyeg ku pariye kane judeyenevwima kema yisma. Ka hiya usuhma danuhpa gitkis. Amekene Moís gikumadukan awna ku in ka kabay adahan usuh keh hene mmanawa wotuh ignes patahwavye hiyeg. Heneme amaka ig Kiyavwiye Uhokri ekke nutuh ku nah ka hiya nahma ikiy nawenyevwi hiyeg ku ignes ka kibeynevwima ku ignes patahwavye.

²⁹ Nikwe ku aysaw yis wasavanew numinuh nah ka pukuphaw yavit. Nah ayta kibehtenwa yit. Kuri, uyay akki nutuh mmahki yis wasavanew numinuh.

³⁰ Igme Kornelyu kaytwa giwn: — Amakohnokwa nah piriyepkewne ay nuvinwa daraka kamuw ke avimbe inin. Pahaye adahan nah hiyap pahavwi ahj tabir nuvetun. Gisimsa tigigihwe.

³¹ Ig awna nutuh: “Kiyavwiye Kornelyu. Kiyavwiye Uhokri kuwis timap piviryepkawni. Ig kiye ku samah pis amnih madiptavye.

³² Kuri, awahkisnaba hiyeg tahan avitit paytwempu Jopi adahan igkis giwepten pahavwi awayg kewye Simawh Pedru. Ig misakwa ayge gimun kiyavwiye Simawh ku pariye gannivwi mitibdihne puwikne amar. Ig kiyavwiye Simawh misakwa kennesa akigbimna mahakwa.”

³³ Nah timapni hene, nah awahkise nuwatnivwi piwepten kibehtenwa. Kibeyne pis ayta atan. Kuri usuh pahadguvu ay givetun Kiyavwiye Uhokri adahan usuh timepne piwn ku pariye ig ekke pit.

Pedru akki Jesus gitkis hiyeg kane judeyenevwima

³⁴ Igme Pedru timapni hene, ig awna gitkis neras hiyeg ayge. Giwn: — Kuri nah ihpa ku Kiyavwiye Uhokri hiyap madikte hiyegiviyenevwi hehpekuye giwtrik. Ig batek gikakkis hiyeg ku pariye kane judeyenevwima hehpekuye gikakkis hiyeg ku pariye judeyenevwi.

³⁵ Ka samwa git ku pariye uwayvuktenwiy. Ig Kiyavwiye Uhokri batek gikakkis madikte hiyeg ku pariye gikiyetnivwi, madikte ku pariye wewnevwi wadit.

³⁶ Kuwis ig Kiyavwiye Uhokri akki kibeyne inetit wotuh usuh hiyeg izhaewyenevwi. Inakni inetit gidahan Jesus Cristo ku samah ig keh hiyeg kabeywotvi gikak Kiyavwiye Uhokri. Ig Jesus Cristo ig madikte hiyeg gikivarakis.

³⁷ Yis kuwis timap arak madikte ini ku pariye danuh muwapuw judeyamnaw. In kavuse minikwak aynte Galileyamnaw avim ini ku samah Joawh Batista kinetihwene gitkis hiyeg adahan igkis kaywasaw git.

³⁸ Yis kuwis time gak Kiyavwiye Jesus Nazaréyene. Yis time gak ku samah Kiyavwiye Uhokri kawihkise Gitip givitit, ig ike gannu givitit. Ayteke nikwe ig Kiyavwiye Jesus tivik muwapuw kehne kabayka. Ig makniwe madikte ku pariye hiyepnevwi mbeyne giwntak wavitye gikivarakis. Ig makniwa madikte mmanawa ig Kiyavwiye Uhokri ay gikak.

³⁹ Akakwa wowtyak usuh hiyap madikte annut ku pariye ig Kiyavwiye Jesus keh aynte judeyamnaw. Usuh hiyap madikte annut ku pariye ig keh aynte Jerusalém. Heneme ayge Jerusalém hiyeg umehpig. Igkis deddehpig aminat giyakni.

⁴⁰ Henneme, kibeyne, abet amamnampiye hawkri ariwntak gimiremni ig Kiyavwiye Uhokri kannikasevgi akiw. Ayteke ig hiyapkiswig gitkis.

⁴¹ Ka madiktema hiyeg hiyavgi. Heneme usuhnenwa, **ku pariye Kiyavwiye Uhokri kaniy adahan usuh humaw inetitkekne gidahan, usuh hiyavgi. Ayteke ku samah ig wewvarihte ariwntak gikankawni, usuh axne gikak usuh higepne gikak.

⁴² Ayteke ig Kiyavwiye Jesus awahkise usuh adahan kinetihwene gimin gitkis hiyeg. Ig muwaka usuh akka gitkis hiyeg ku samah Kiyavwiye Uhokri kaniy Kiyavwiye Jesus adahan ig hiyekne gikakkis madikte hiyeg, miyaravyempu gikakkis neras ku pariye kotene miyate.

⁴³ Madikte Uhokri gawnevevu pitatyevwi kinetihwa gimin Kiyavwiye Jesus. Igkis kinetihwa amin ku samah ig keh Kiyavwiye Uhokri bayahmina ariw gitaraksankis madikte hiyeg ku pariye kamaxwanevwi givitit.

Uhokri Gitip kawih hiyeg kane judeyenevwima

⁴⁴ Pahaye adahan ku samah ig Pedru awnempiye inakni iwit hene, ig Kiyavwiye Uhokri Gitip kawihe neras ku pariye timepnevwi giwn.

⁴⁵ Neras Jesus gihiyegavu ku pariye judeyenevwi, ku pariye gihaptiyevwi Pedru, igkis hiyapni hene, igkis wakaymnibdi gidahankis ku samah Kiyavwiye Uhokri Gitip kawihe hiyeg ku pariye kane judeyenevwima hehpekuye gikakkis.

⁴⁶ Igkis hiyakni ku Kiyavwiye Uhokri Gitip kuwis kawihpigkis mmanawa igkis timap igkis awna ariku nawenyewa iwit, igkis kibeyhenes Kiyavwiye Uhokri. Ig Pedru hiyapni hene, ig awna gitkis gihaptiyevwi. Giwn:

⁴⁷ — Kiyavwiye Uhokri Gitip kawihkiska givititkis neras hiyeg ku pariye kane judeyenewima hehpekuye ukakwiy. Nikwe igkis hawata Kiyavwiye Jesus gihiyegavu. Wixwiy ka hiya wixwiyma ikiygikis ku igkis ka kis adahan igkis kew ahakwat un.

⁴⁸ Ayteke nikwe ig awna gitkis Kornelyu: — Kewvinabay ahakwat un giwavrik Kiyavwiye Jesus. Igkis timapni hene, igkis ihe giwn. Pisenwa igkis miseke Pedru gimunkis adahan aynesa hawkri.