Attus 1 - Uhokri Gahegbetawni Nukune akak Sawmus

Jesus hiyapkiswa gitkis giwatnivwi

¹ Kiyavwiye Teófilu, nah Luwkas awahkis kabayka pimin. Amakohnokwa nah awahkise pahak kagta pimin. Amadga inere pitatye kagta nah ekke pit madikte ku pariye Kiyavwiye Jesus gikehnitnene, madikte ginetni ku samah ig aynete amadga inin

² he ku aysaw ig iwepka inurikut. Nah kuwis ekke pit ku samah avit giwegepni ig ike gannivwi giwakuritkis giwatnivwi gikanyanvu. Ig ayge ikene gihiyekemnikis akak Kiyavwiye Uhokri Gitip gannu ay givit. Pisenwa ig iwepka inurikut.

³ Kuwis nah ekke pit inakni madikte. Minikwak ku aysaw ig Kiyavwiye Jesus ay amadga inin, ig miyap, ig kannikew akiw. Ayteke ig hiyapkiswa gitkis giwatnivwi kiberevut. Avim ini ig ekkene ka aynsima gannu gitkis kahadbe igkis hiyak kabayntiwa ku ig inyewa iveg akiw. Ig hiyapkiswene gitkis adahan pahavwi kayg akak abusku. Akakwa giwtyakkis igkis hiyavgi. Avim ini ig kinetihwene gitkis amin Uhokri gikumadukan.

⁴ Igkis pahadguvu ayge, ig Kiyavwiye Jesus awna gitkis: — Ka ba yis pes kurinewatma avititak paytwempu Jerusalém. Kuwis nah ekke yit ku pariye Wigwiy gikaksan yit. Wahapnay ku aysaw in kahayak yit.

⁵ Minikwak ku aysaw Joawh Batista kayway, ig kawihkis un yivitit adahan ekkene ku yis wewkere akak Uhokri gihiyekemni. Heneme hawkavanek igyewa Kiyavwiye Uhokri Gitip kawihkiska yivititnek kahadbe gihiyekemniyewa misakwa ay abet yihiyekemni. Hennebaki ig kaywevyinek.

Jesus iwepka inurikut

⁶ Ariwnteke ini ig Kiyavwiye Jesus pahadguhwe gikakkis gikannuhnivwi akiw. Ayge avim ini igkis ayavgi: — Kiyavwiye, kuri neras hiyeg ku pariye romanyenevwi kumaduka uhiyegavuwiy awaku ku samah igkis matekevwiy. Mmah kurinewa pis keh wixwiywa wixwiy judeyenevwi kumaduka uhiyegavuwiy ku avim inin akiw?

⁷ Igme kaytwa giwnkis: — Ka ik adahan yis hiyak akak ini. Wigwiy kuwis ahegbete madikte hawkri akak gidatni. Heneme ka ik adahan yis hiyak nikak.

⁸ Ka sam. Wahapnay ini nukaksan yit. Aysawnemenek yis darih Kiyavwiye Uhokri gannu yivititnek avim ini ku aysaw ig Gitip kawihyi. Ayge nikwe yis humaw inetitkekne nudahanek gitkis hiyeg muwapuw. Yis humaw inetitkekne nudahan ay avit inere paytwempu Jerusalém, ay avitiw inin waxri judeyamnaw, aynte avitiw ini waxri piyawekbetave Samariyamnaw, pisenwa muwapuw amadga wayk he danuhe amaksemni paytwempu.

⁹ Ayteke pisenwa inakni gawnan, ig Kiyavwiye Jesus iwepka inurikute giwtrikneswa gikannuhnivwi. Ayteke ig uguhe abet paha ukuhne.

¹⁰ Igkisme gikannuhnivwi ivegbet gimkat ku samah giwgepni. Pahaye adahan piyana hiyeg ahj kahayak tabirwak giharaptakis. Igkis kasimsavu akak simis seyne.

¹¹ Igkis awna gitkis gikannuhnivwi: — Kiyavwiyegben, mmahki yis misakwa ivegbet han inut? Ig Kiyavwiye Jesus iwepka yibetitak tahan inurikut heneme ig diyuh akiwnek. Ku samah yis hiyap gitepkemni hawata yis hiyap gaytni akiwnek. Henewatbaki igkis awna.

Jesus gikannuhnivwi waha Uhokri Gitip gaytni

¹² Igkis gikannuhnivwi ayge avit ini waxri imuhgivitnene kewye Olivegvit. In Jerusalém awetu. Ayabwi ahin ik adahan pohowku madikawku madikwa (500) iwanti. Igkis hiyapni hene ku samah Kiyavwiye Jesus iwepka kuwis, igkis tivik diyuhe avitit paytwempu Jerusalém.

¹³ Igkis danuh atere, igkis wagehe arikut paha payt avahnap inuteknene. Ini giwskekikis Pedru gikakkis Joawh, Tiyagumni, Andre, Filip, Tome, Bartolomew, Matews, Tiyagu ku pariye amekene Alfew gikamkayh, Simawh Zeloti, Judas ku pariye Tiyagu gisamwi.

¹⁴ Ayge ariku ini xam igkis misakwa piriyepkewnenekwa takunipti. Kiyavwiye Jesus ginag kiyavuno Mahi hawata eg piriyepkawno ayge payak gikakkis gisamwivwi gukakkis gikannuhnivwi tinogben. Egkis madikte ayge pahatwowa guhiyekemnikis.

Gikannuhnivwi kaniy pahavwi giwenyan Judas

¹⁵ Mpiyasa aynesa hawkri, egkis gikannuhnivwi pahadguhwe atere ku samah guhumpawnikis. Egkis pukuhka danuh adahan madikawku madikwa gukebikis akak piyana madikwa gawnakis (120). Ayge nikwe ig Pedru kannikaw gubetkis adahan ikene guhiyekemnikis. Ig awna:

¹⁶ — Nukebyuvwi, minikwak Kiyavwiye Uhokri Gitip kawihe amekene Davi adahan ig kinetihwa amin ku pariye nehmnikuhpiye. Inakni ginetni tamak ay amadga Gannasan. Ku pariye Kiyavwiye Uhokri gakkan amawka ku henewa in humaw. Ig amekene Davi kinetihwa gimin Judas Iskariyotismin. Metakwa inakni ginetni kahayak mmanawa ig Judas Iskariyotismin waxwe igkis hiyeg ku pariye kamaxwiyes Kiyavwiye Jesus.

¹⁷ Ig Judas Iskariyotismin ig pahavwi gaytakis giwatnivwi mmanawa ig kaniyka gavit Kiyavwiye Jesus adahan ig kehne gannivwi payak ukakuh.

¹⁸ Ig isime paha waxri akak gitiwnivye ku samah ig kamaykise Kiyavwiye Jesus. Ayteke ig umehwe ayge avit ini waxri. Avim ini ig tuguhe mabuwe. Bewvi gitun. Madikte gayh pese givititak.

¹⁹ Ayteke madikte hiyeg jerusalémyenevwi time gak ku samah ig keh hene. Igkis avisemun. Inneki keh igkis kaywe ini waxri “Aseldama”, inakni wownavrikwiy “Waxri Migatapta”.

²⁰ Henewa in danuh ku samah Kiyavwiye Uhokri ekke git amekene Davi minikwak. Mmanawa minikwak ig amekene Davi tameke inakni amadga ini kagta kewye Sawmus. Inakni iwit awna: Amawka givin misakwa barewarik. Amawka yuma hiyeg misakwa ayge. Heneme in gikagtan hawata awna: “Amawka ku pahavwiwa akiw kannikaw giwenyan adahan kannivwiye gidukwenavrik.”

²¹ Inneki keh nah ikene yihiyekemni ku avim inin adahan wixwiy kaniy pahavwiwa akiw gidukwenavrik Judas Iskariyotismin adahan ig kehne Kiyavwiye Uhokri gannivwi payak ukakuh. Uyay kaniy pahavwi waytakwiy ku pariye kuwis wew ukakwiy avanenekwa ku samah Kiyavwiye Jesus aynete ukakwiy.

²² Uyay kaniy pahavwi ku pariye ay ukakwiy awenketeke ku aysaw ig Kiyavwiye Jesus kaywepka gavit Joawh Batista, he ku aysaw ig iwepka inurikut. Uyay kaniyvig adahan ig ekkene amin Kiyavwiye Jesus gikankewni payak ukakwiy.

²³ Ig Kiyavwiye Jesus gikannuhnivwi igkis timapni inakni Pedru giwn hene, igkis ihe giwn. Igkis kaniye piyana gikebikis awaykemni gibetitakiswa. Pahavwi giw José Barsabas, ig giw hawata Justu. Pahavwime giw Matiyas.

²⁴ Ayteke pisenwa igkis piriyepkew adahan ivegvevye ku pariye Uhokri gikanyan adahan Judas Iskariyotismin giwenyan. Igkis awna: — Kiyavwiye, pis ku pariye hiyekne hiyeg gihiyekemnikis. Uya akki wotuh ku pariye pis kaniye gaytakis neras piyananene gikebikis.

²⁵ Uya akki wotuh ku pariye pis kaniye adahan ig kehne pannivwi. Uya akki wotuh ku pariye pis muwaka kannikaw giwenyan piwatni Judas Iskariyotismin. Mmanawa ig Judas Iskariyotismin kuwis pese ariw giwetri ku samah ig piwatni kahadbe ig tivik arimkat ku pariye iwetrit kawihnene gidahan.

²⁶ Pisenwa giviryepkawnikis igkis arehwe nikwe akak tip adahan igkis hiyap ku pariye kabunuganen ig darihpiye Judas Iskariyotismin giwetri. Nikwe ig Matiyas kabunuge. Ig darihe ini iwetrit adahan ig kehne Kiyavwiye Uhokri gannivwi payak gikakkis Kiyavwiye Jesus giwatnivwi.