Apokalípsi 8 - Uhokri Gahegbetawni Nukune akak Sawmus

Madikte misakwa tinwovu aynte inurik

¹ Ayteke ku aysaw ner Muwtohyan hakuhe ini ntewnehkervye makaksaki. Aynewa madikte misekwe tinwovu aynte inurik adahan abusku ler.

² Ayteke ariwnteke ini nah hiyap neras ntewnehkernene gikebikis ahj ku pariye tabirwaknene aynte givetun Uhokri. Igkis ikepka gitkis ntewnehker akebi gagignikis tohompet adahan igkis agigenes adahan kerka. Jesus gihiyegavu gayapnikis git Uhokri in humawnek gitkis

³ Ayteke pahavwi ahj akiw danuh atere. Ig sumuh pahamku tiket atiy tas kehka karukri wahano. Ig tabirasew avetun piriyepkewket. Ikepka git ka aynsima imihgi wageska payegbitak akak madikte Jesus gihiyegavu giviryepkawnikis. In ikepka git adahan ig nibuketni givetunat Uhokri amadga ini piriyepkewket kehka karukri wahano ku pariye aynene avetun Uhokri gevwi. Ayge ig bukehpin.

⁴ Giwakutak ner ahj ini iyaygti imihnevye nisayan wagehe hanpa gimkanit Uhokri. Igkisme Jesus gihiyegavu giviryepkawnikis wagehe payak nikak.

⁵ Pisenwa gibukhan ini iyaygti, ig ahj iwe ini imihgi atiy tas. Ig kivunsepni akak tiket ariwntak ini piriyepkewket. Ayteke ig padekwin hanpa amadgat wayk. Aynewa digidgiye akak kimanka, ugugune, sagkaki kahayak amadga wayk. Ntewnehker mbayka ahawkanavrik danuhnek

⁶ Ayteke nikwe neras ntewnehkernene ahj ku pariye kagigniwokapnevye, igkis ahegbetew adahan igkis agighenes.

Pitatye mbayka: waxri wohe

⁷ Ayteke ner pitatye ahj agighe. Aynewa muwok tiphawnawa wageska payegbitak akak tiket, wageska payegbitak akak migat in padekwika temkete amadgate wayk. Ayge nikwe kaba abuskuhwa waxri wohe muwapuw amadga hawkri, hawata kaba abuskuhwa ahavwi wohe, hawata akiw madikte pamatkaviyene avan wohe.

Aveyni mbayka: parahwokwa wageswa migat

⁸ Ayteke ner giveynivye ahj agighe. Aynewa arikna ke paha waxri imuwadnebe in kadawempiye akak tiket in padekwika temkete ahakwate parahwokwa. Ayge nikwe kaba abuskuhwa parahwokwa wageswe migat.

⁹ Avim ini kaba abuskuhwa ahakwayevwi parahwokwa miyarap, hawata kaba abuskuhwa nawiy mehpika.

Amamnam mbayka: un tiviyvi

¹⁰ Ayteke ner gimamnampiye ahj agighe. Aynewa paha warukma nopsadnene kadawempiye ke abukribe in tuguhe inuriktak. In tuguhe ahakwat kaba abuskuhwa warikviyene. Hawata akiw in tuguhe ahakwat un ariwtyakviyene.

¹¹ Ini warukma kanumka “Tiviyka”. In keh kaba abuskuhwa un tiviyvi. Ayge ka aynsima hiyeg miyarap awaku igkis higap ini un tiviyviye.

Avaxnikan mbayka: ariknebdi amedgene en huwivwihpika

¹² Ayteke ner givaxnikanpiye ahj agighe. Aynewa kaba abuskuhwa kamuw huwivwihpika, kaba abuskuhwa kayg huwivwihpika, kaba abuskuhwa warukma huwivwihpika adahan gibutnikis ka kabutni kiyesradima akiw. Ayge nikwe kaba abuskuhwa puwivaka ka kabutni. Hawata kaba abuskuhwa mitipka kawnata kabutni.

¹³ Ayteke nah sarayh nuvegi, nah hiyap pahavwi avakni ig amaravari aynte inurik. Nah timap ig awna akak madikte giwakemni. Giwn: — Akayih! Akayih! Akayih! Neras misekwenevwi amadga wayk igkis ka aynsima hiyaptenek mbeyne akiw kuwewanek avim ini ku aysaw neras mpenemnene ahj agighanek.