Apokalípsi 5 - Uhokri Gahegbetawni Nukune akak Sawmus

Kagta tagebwihmnihka makaksaki

¹ Ayteke nah sarayh nuvegi nah hiyap pahak kagta tagebwihmnihka ay giwaku kihehavriktak ner ku pariye betnene amadga gevwi. In kagta annaka pebkak. In sabutip akak ntewnehker makaksaki.

² Hawata nah hiyap ayge pahavwi ahj detye. Ig awna akak madikte gawaygi. Giwn: — Pariye hiyeg kis adahan hakuh ini makaksaki ayteke? Pariye hiyeg kis adahan woka ini kagta?

³ Heneme yuma pahavwinema hiyeg utipka, ine aynte inurik, ine ay amadga inin, ine abet hiyeg miyaravye aynte anavi wayk. Yuma pahavwinema utipka ku pariye kis adahan woka ini kagta adahan ig ivegbohin.

⁴ Nah hiyapni hene, nah biyuk nukan nah suka nukantak ka aynsima, mmanawa yuma pahavwinema hiyeg utipka ku pariye kis adahan woka ini kagta adahan ig ivegbohin.

⁵ Ayteke pahavwi gaytakkis neras kiyavwiyegben awna nutuh. Giwn: — Ka muwaka tih. Sarayh pivegi tahan gimkat ner judeyenevwi gikivarakis ku pariye kumaduka hawata ke amekene Davibe. Ig ka gidatnisima kewa pahavwi kawokwinebe. Kibeyne, ig kuwis matekbete gihawkan wavitye, igi kis adahan ig woka ini kagta. Jesus kewa pahavwi muwtohyanbe ku pariye kuwis umehpikanbe gidukwenavrikkis hiyeg

⁶ Nah timapni hene, nah sarayh nuvegi, nah hiyap pahavwi Muwtohyan tabir ay avetun Uhokri gevwi. Neras paxniknene hiyeg dehetniyevwi gikakkis neras kiyavwiyegben igkis kiyaran ganwa. Ig ner pahavwi kene Muwtohyanbe ke wotbe ig kuwis umehpikanbe, heneme kuwis ig iveg akiw. Ig kadahan ntewnehker akebi gituw. Innebaki arakak adahan ku samah Gitip ka aynsima gidatni. Hawata ig kadahan ntewnehker akebi giwtyak. Innebaki arakak adahan ku samah Gitip muwapuw paheke hawkri yuma ariknawnema ayemwene gavit.

⁷ Ig ner Muwtohyan danukwe kennesa atere git ner ku pariye betnene amadga gevwi. Ig iwe ini kagta giwakutak kihehaptak.

⁸ Ig iwepni, neras paxniknene hiyeg dehetniyevwi gikakkis neras kiyavwiyegben piyananene madikwa akak paxnikanene gawnakis (24) igkis tuguhkiswe mabuw givetunat ner Muwtohyan. Igkis kadahanyekuye garignikis hebbek akak pahamku tas kehka karukri wahano in kivun akak imihgi. Ini imihgi innebaki arakak adahan Uhokri gihiyegavu giviryepkawnikis. Jesus kis adahan kahayaksa ku pariye nehmnikuhpiye

⁹ Ayge igkis peknes nukune avat git ner Muwtohyan. Giwnkis: — Kibeyne Kiyavwiye, pisnewa kis adahan iwi ini kagta. Pisnewa kis adahan hakuh ini makaksaki. Mmanawa pis umahkiswe gidukwenavrikkis madikte hiyeg. Abetimpi ini pimiremni pis katiwnihe akak pimig adahan hiyeg humaw gidahan Uhokri. Pis katiwnihe gidahankis madikte hiyeg pakebyeknevwi akak madikte nawenyekuye giwnkis. Pis katiwnihe gidahankis madikte hiyegviyenevwi avit waxri.

¹⁰ Kibeyne, pis kehe igkis kawihe pikumadukan. Pis wageswigkis Uhokri gimuwvegavu adahan igkis danukwene kennesa git Uhokri takunipti adahan kehne gibetki. Pis keh igkis kumadukanek amadga wayk. Henewatbaki igkis pak.

Jesus kabayhaka gavitkis madikte inurikyenevwi gavitkis madikte amedgenevwi inin

¹¹ Ayteke nah sarayh nuvegi akiw. Amun ini nah timap ka aynsima ahj. Igkis tabirbet ganwa Uhokri ku pariye betnene amadga gevwi kiyatyo, ganwakis neras paxniknene hiyeg dehetniyevwi, ganwakis neras kiyavwiyegben. Igkis ka aynsima mil gikebikis. Ka ik adahan pukuhgikis.

¹² Igkis peknes akak madikte giwakemnikis. Giwnkis: — Kibeyne gidahan ig Muwtohyan. Ig umahkiswe gidukwenavrikkis madikte hiyeg. Ignewa ka gidatnisima, ignewa igisye, ignewa ka gihiyekemnisima, ignewa ka gannusima, ignewa ka gikiytanisima, ignewa ka gamuwyisima, ignewa ka gabayisima.

¹³ Ayteke nah timap madikte hiyeg aynte inurik, madikte hiyeg ay amadga inin, madikte hiyeg aynte anavi wayk, madikte hiyeg aynte parahwokwa, madikte hiyeg muwapuw amadga hawkri, igkis peknes avat. Giwnkis: — Kibeyne gidahan Uhokri ku pariye betnene amadga gevwi kiyatyo. Kibeyne hawata gidahan ig Muwtohyan. Kibeyne gidahankis adahan avanenekwa. Igkis ka gabaykisima, ka gikiytanikisima, ka gawaygikisima, ka gidatnikisima adahan avanenekwa.

¹⁴ Nerasme paxniknene hiyeg dehetniyevwi igkisme kaytwin, igkis awna: — Ameh. Ameh. Henewa igkis. Nerasme kiyavwiyegben igkis tuguhkiswe mabuw igkis kabeyhevgikis hawata akiw.