Apokalípsi 4 - Uhokri Gahegbetawni Nukune akak Sawmus

Uhokri ka gikiytanisima aynte inurik

¹ Ayteke ariwnteke ini nah sarayh nuvegi, nah hiyap pahayku ahin wok aynte inurik. Nah timap pahat ikuvimnat akiw ini ku pariye pitatye awna nukakuh akak nihawna ke agigbe tohompetbe. Ig awna nutuh: — Ba ayta wagah atan inut adahan nah akki pit ku pariye danuhnek aysawnemenek.

² Aynewa nah kawihpika gavit Uhokri Gitip. Ayge inurik nah hiyap pohow epti kiyatyo. Pahavwi hiyeg bat ayge gumadga.

³ Gihivak ke tipbe bukabkahwavunano tigigihwavunano, ke nor tipbe huwiynevyo kewyo “diyamanti”, hawata in ke nor tipbe duwnevyo kewyo “sardônyu”. Ayge aranwa gevwi nah hiyap paha tuwesgu kawetuwe, ayewehe ganwew, in ayewehe ke buteybe ke nor tipbe kewyo “esmerawda”.

⁴ Nah hiyap nawenyovwi epti kiyatyovwi ayge aranwa gevwi, pina madikwa akak paxnika arawna (24) gukebikis. Ayge pina madikwa kiyavwiyegben akak paxnika gawnakis (24) gikebikis igkis batebdebdih ayge amadga noras eptiviyano. Igkis kasimsavuwave akak simis seyne. Hawata iyuwti kehka akak karukri wahano ay gitewhakis.

⁵ Ayge ka aynsima ugugune, digidgiye, kimanka pes ariwntak egu Uhokri gevwi. Ayge ntewnehker abukri hamawave ayge avetun gevwi. Innebaki arakak gidahan Uhokri Gitip.

⁶ Ayge avetun Uhokri gevwi kadahan paha arikna ahivak ke parahwokwabe huwewehnevye ke buteybe. Ayge kennesa aranwa gevwi paxnika gikebikis hiyeg dehetniyevwi. Gihepkakkis kowtyakborave. Giduhyakis hawata kowtyakborave.

⁷ Ig ner pitatye hiyeg dehetniye gihivak kewa pahavwi kawokwinebe. Giveynivye hiyeg dehetniye gihivak kewa pahavwi pak akamkayhbe. Gimamnamkis gihepka kewa pahavwi awaygbe gihepka. Givaxnikankisme gihivak kewa pahavwi avaknibe amerempiyebe gihivak.

⁸ Mpuse hiyeg dehetniyevwi igkis kahanpiyekuye puguhkuna akebi gihanpikis. Gihanpikis kowtyakborave pebkakte. Igkis ka matiswati pak avat takunipti. Igkis pekne git ner ku pariye betnene amadga gevwi. Igkis awninekwa: — Kiyavwiye Uhokri detye. Pis barewvitye, barewvitye, barewvitye. Pis ay minikwak. Piswata ay kuri. Piswata nehmnikuhpiye.

Uhokri kabayhaka aynte inurik

⁹ Henewatbaki in ku samah igkis hiyeg dehetniyevwi aygnenevwi igkis kiyatha Uhokri ku pariye betnene amadga gevwi ku pariye dehetniye adahan avanenekwa. Igkis pak avat adahan kabayhig. Igkis awna: — Kibeyne, Kiyavwiye. Pis ka pikiytanisima. Pis ka pabayisima. Usuh kabayhap adahan avanenekwa. Ku aysaw igkis kabayhig hene,

¹⁰ neras kiyavwiyegben pinanene madikwa akak paxnikanene gawnakis (24) igkis paberetusaw givetunat ner ku pariye betnene amadga gevwi, ner ku pariye dehetniye adahan avanenekwa, igkis kabayhig atere. Igkis wiwhnekuyes giyuwkis gitewhatakkis, igkis akkin givetunat. Igkis awna:

¹¹ — Pis Ukivara Uwohkiga, pisnewa ka pikiytanisima. Pisnewa ka pabayisima. Pisnewa ka pidatnisima. Mmanawa pis keh madikte humaw, madikte arikna, madikte hiyeg. Igkis humaw, mmanawa henewa pibetki. Hawata igkis aynenekwa, mmanawa henewa pibetki.