Apokalípsi 3 - Uhokri Gahegbetawni Nukune akak Sawmus

Sardisyenevwi gihiyekemnikis miyaravye giw Uhokri

¹ Ayteke ig Kiyavwiye Jesus awna nutuh akiw. Giwn: — Awahkisnaba pahak kagta gimin ner inetitkekne gidahankis nuhiyegavu aynte avit paytwempu Sardis. Tamaknaba iwit ku pariye nah akki pit kuri. “Nah ikene yinetni, nah ku pariye kadahannene ntewnehkernene akebi Uhokri Gitip, ku pariye kene abukribe adahan areketni nutivuh, hawata nah ku pariye kadahannene ntewnehkernene akebi warukma. Nah hiyak ku samah yihiyekemni ayge. Nah hiyakni ku yis ikaka ku yis dehetniyevwi bawa yihiyekemni miyarevye giw Uhokri.

² Kannikasanabay yihiyekemni. Ka ba yi miniwbetaw ariw ini yihiyekemni kibeyne giwntak Uhokri ku pariye aytentene yimun in ke wotbe in me miyapbemet. Wagahkisnabay ini yihiyekemni. Mmanawa nah uti yihiyekemni ka avigkutavrikma ku samah nuwohkiga gimawkan.

³ Kiyeminanabay amin ini hiyakemniki ku pariye kamin yis kannuhwe, ku pariye kamin yis kuwisnene timap. Ka ba yi isahkiswa niw. Wagahkisnabay yihiyekemni. Ku yis ka kannikasa yihiyekemni, nah ayta pisenwanek yikak pahaye adahan, ke pahavwi amepyebe ig danuh git hiyeg ku kavim ig ka wahapnigma. Yisme kawata yis ka hiyaknek ku kabet nah danuh.

⁴ Heneme ayge yibet yis paytwempuyenevwi Sardis, yaytak ka pataha gikawihnikis. Nikwe aysawnemenek igkis wewnek nukakuh kasimsavuwave akak gikawihnikis seyne, mmanawa igkis kis wew nukakuh hene.

⁵ Ku pahavwi ka isaksawnek arit wavitye gihiyekemni, nikwe ig kawihnek ini simis seyne. Nah ka mannek giw amadgatak ini kagta adahan dehetniki. Kawa. Nah awnanek gidahan aynte givetun Niguh hawata givetunkis ahj ku ig nuhiyega.

⁶ “Yis ku pariye katayebnenevwi, ataybiswanabay arimkat ku pariye Uhokri Gitip awna gitkis nuhiyegavu.” Henewatbaki ig Kiyavwiye Jesus awna nutuh.

Iwetrit woka gidahankis filadewfiyenevwi

⁷ Ayteke ig Kiyavwiye Jesus awna nutuh akiw. Giwn: — Awahkisnaba pahak kagta gimin ner inetitkekne gidahankis nuhiyegavu aynte avit paytwempu Filadewfiya. Tamaknaba iwit ku pariye nah akki pit kuri. “Nah ikene yinetni, nah ku pariye barewvitye igyewatnene. Nah ku pariye kadahannene ay nuwaku in kiyavwiye Davi girakra, mmanawa nah kumaduka madikte iwetrit hawata ku samah minikwak ig kumaduka madikte giwetri. Ku nah woka pahayku iwetrit, yuma hiyeg hiya asabukak. Ku nah sabuk pahayku iwetrit, yuma hiyeg hiya awokak.

⁸ Nah hiyak ku samah yihiyekemni ayge. Kibeyne, yis kadahan yawaygi aynesa. Yis ihpene nuwnuh. Yis ka isahkiswa nuwhu. Inneki keh nah woke kibeyne iwetrit yidahan. Yuma hiyeg hiya asabukak yiw.

⁹ Satanas gihiyegavu ayge ikawnamah ke wotbe igkis Uhokri gihiyegavube, bawa giwasemnikis. Igkis kavetunsay. Ka sam. Aysawnemenek nah kehgikis igkis ayta paberetusawnek yitivut adahan igkis kiyathay. Nah kehgikis igkis hiyaknek ku nah batek yikak.

¹⁰ Kibeyne, yis ihpene nuwnuh yis dehewnene abetnewa mbeyne ku samah nah kuwis ayap yit. Inneki keh nah mpithaynek ariw ini mbeyevye hawkri ku pariye nehmnikuhpiye gitkis madikte hiyeg ku pariye misekwenevwi amadga wayk adahan gihikektenkis.

¹¹ Nah ka ayivwihwa adahan nah danuh. Misakwanabay akak ini yihiyekemni kibeyne he ku aysaw nah danuhnek kahadbe yuma pahavwinema hiyeg hiya asamanak adahan yimaptenten ariw yitiwni ku pariye nah ikinek yit.

¹² Ku pahavwi ka isaksawnek arit wavitye gihiyekemni, nikwe nah kehnek ig humaw kewa wakapbe adahan nuwohkiga givin. Ku samah wakap ka pesti paytrikutak hawata ig ka pestinek ayteke gihumwatak Uhokri. Nah tamaknek gibektey giwavrik nuwohkiga kahadbe ig hiyakan ku ig gidahanwa Uhokri. Hawata nah tamaknek gibektey niwavrik ini Uhokri givin kahadbe ig hiyakan ku ig Uhokri gimunya. Ini paytwempu in nukune Jerusalém ku pariye muhuknek ayta inuriktak giwntak nuwohkiga. Hawata akiw nah tamaknek gibektey nuwavrik nukunewa.

¹³ “Yis ku pariye katayebnenevwi, ataybiswanabay arimkat ku pariye Uhokri Gitip awna gitkis nuhiyegavu.” Henewatbaki ig Kiyavwiye Jesus awna nutuh.

Lawdiseyenevwi awna ku igkis Uhokriyanvu bawa igkis ka wew gikak

¹⁴ Ayteke ig Kiyavwiye Jesus awna nutuh akiw. Giwn: — Awahkisnaba pahak kagta gimin ner inetitkekne gidahankis nuhiyegavu aynte avit paytwempu Lawdiseya. Tamaknaba iwit ku pariye nah akki pit kuri. “Nah ikene yinetni, nah ku pariye kanumka “Ameh”, mmanawa nahnewa igyewa inetitkekne gidahan Uhokri. Nah ku pariye awna iwit inyewatnene. Nah ku pariye atiwkekne madikte humewne giwntak Uhokri.

¹⁵ Nah hiyak ku samah yihiyekemni ayge. Yis awna ku yis nuhiyegavu bawa yis ka wew nukakuh inyewatma. Inneki keh yis kewa higapkabe ku pariye awehwenpiyebe ka maguw nutuh. Yihiyekemni ke wotbe in ka awahadima ine in ka kisepehnema. Wake yis ka kisevibe nuwhu, wake yis wewnene nukakuhbe, in kabaykam. Hawata akiw wake yis kisevibe nuwhu, wake yis ka awnabe ku yis nuhiyegavu, in hawata kabaykam nutuh. Kiskama yis ka awna ku yis nuhiyegavu, mmanawa yis ka wew nukakuh.

¹⁶ Nikwe yis kewa higapkabe ku pariye awehwenpiyebe henen nutuh. Yis awna ku yis nuhiyegavu bawa yis ka wew nukakuh. Inneki keh nah tukuhpeynek ke pahavwibe ku pariye ba gibetki higa un kiseviye, ig sabuh un gibiyrikut, in awehwe henen git, ig asenpin ig tuveswin gibiyriktak.

¹⁷ Mmanawa yis awna: ‘Wixwiy igisavye akak hiyakemniki. Wixwiy ka muwaka ariknawnema akiw. Yuma muwekne wotwiy.’ Ka ba yis hiyapk ku ka aynsima muwekne yit akiw? Ay abet yihiyekemni yis madiptavye, yis makawihanave, yis motavye abet yihiyekemni.

¹⁸ Kuri nah ikite hiyakemniki yit. Mpiksawnabay aharit nuhiyekemni ke wotbe yis isimnebe karukri wahanobe nutuh. Mmanawa nuhiyekemni in inyewa ke karukri wahanobe ku pariye kuwisnen mpiyasepka ariwtrik tiket. Ku yis keh hene, nikwe yis humawnek igisavye abet yihiyekemni. Nuhiyekemni yuma patahwaki nibet. Ku yis kawihminaw akak ini nuhiyekemni, in ke wotbe yis isimnebe yisimsa seyne nutuh adahan yikawihni kahadbe yis ka hiyapka makawihanema kahadbe yis ka maraka yivit. Nikwe mpiksawnabay aharit nuhiyekemni ke wotbe yis isimnebe yiwtyak avey nutuh adahan yis tigiswotaw kahadbe yihiyekemni ka mananema akiw.

¹⁹ Nuhiyegavu, wake nah ka batek yikakbe, nah ka himahyikam hene, nah ka bukihkam yitaraksan yiw. Numawkan yis mpiksaw wages yihiyekemni.

²⁰ Kuri nah ke tabirnebe anumeku pareket abet yihiyekemni, nah ke pahavwibe hiyeg tesnenebe parekerevye. Ku pahavwi timap nuwnuh, ku ig woka pareket nudahan, nikwe nah paraknek atere git. Nah darihwaknek gikak atere, nah axnek gikak igme ax nukakuh. Henewatbaki nah kehnek.

²¹ Ku ig ka isaksawnek arit wavitye gihiyekemni, nah ikinek giwetri adahan igme batnek ay nuhumwa amadga nevwi kiyatyo adahan ig kumadukene payak nukakuh. Mmanawa nah hawata nah ka isaksawti arit wavitye gihiyekemni, nikwe nah bat kuri ay gihumwa Niguh amadga gevwi kiyatyo nah kumadukene payak gikak.

²² “Yis ku pariye katayebnenevwi, ataybiswanabay arimkat ku pariye Uhokri Gitip awna gitkis nuhiyegavu.” Henewatbaki ig Kiyavwiye Jesus awna nutuh.