Apokalípsi 22 - Uhokri Gahegbetawni Nukune akak Sawmus

Warik arakak gidahan Uhokri Gitip

¹ Ayteke ig ahj hawata ekke nutuh pahatra warik ku pariye un dehetniki ahawkri. In un tigigihwavwi ahakwa, huwiye ke buteybe. In pes ariwntak Uhokri gevwi akak giwntak ner Muwtohyan.

² Egu warik mpiya pakwa ayaknisep paytwempu ahina. Hawata nah hiyap ayge pahakti ah akat ku pariye keh wis aymuhwa kabayntiwa adahan avanenekwa. Guhinyanyo tabirbet mpuse avebkak warik. Madikte kayg egkis ah kew. Madikawkuvut akak pimavut arawna (12) egkis kew abet pahaknene kamukri. Hawata akiw guvankis kawih adahan gimakniwtenkis madikte hiyegviyenevwi.

Wixwiy hiyavaknek gikak Uhokri pahepkatak

³ Ayge yuma ariknawnema mbeyevye. Ayge ig Uhokri gikak ner Muwtohyan igkis kumadukenes ay amadgatak gevwikis kiyatyo. Ayge madikte gibukvig kehnenekwa gibetki.

⁴ Igkis gibukvig hiyavaknek gikak pahepkatak. Giw tamak ay gidevakis adahan areketni ku igkisnewa gihiyegavu.

⁵ Ayge yuma tiyegemka akiw. Igkis gihiyegavu ka muwakanek abukri ine kamuw abutni. Mmanawa Ukivarawiy Uhokri gamuwyinek uguhgikis. Ayge igkis kumadukanek adahan avanenekwa. Inakni nuwnuh inyewatbaki

⁶ Ayteke ig ahj awna nutuh: — Madikte inaknivyene iwitviyene ku pariye ekkepka pit ku avim inin in inyewatbaki. Ik adahan hiyeg kamaxwa nivitit, mmanawa in kane waditnevyenenma. Igwa Ukivarawiy Uhokri ku pariye kawihkis Gitip givititkis gawnevevu, ig awahkise giwatni ahj pimin adahan pisme akka gitkis Uhokri gibukvig madikte arikna ku pariye me danuhmet.

⁷ Igwa Kiyavwiye Jesus kuwis awna pit: — Avuriwnabay. Nah ayta kibehtenwa. Ku pariye hiyeg ihevye inakni iwit ku pariye tameknene ay amadga inin kagta, ku pariye panhan amin ku pariye nehmnikuhpiye, ig utinek ka aynsima kabayka. Henewatbaki ner ahj awna nutuh.

⁸ Nukebyuvwi, nah Joawh, nahwa timap hawata nahwa hiyap madikte ini ku pariye nah ekkene yit amadgatak inin kagta. Pisenwa nutimpan inakni, pisenwa nuhiyvan madikte, nah paberetusew gikimpurit ner ahj ku pariye ekke nutuh inakni. Nah nuvewkan adahan nah gikiytenitni.

Amawka wis ka kiyatha ahj

⁹ Heneme ig awna nutuh: — Ka ba kehni hene. Nah Uhokriwata gibuk hawata ke pisbe hawata ke madikte pikebyuvwibe Uhokri gawnevevube. Nah gikebikis madikte neras ku pariye ihpenevwi inakni iwit tameknene kuri amadga inin kagta. Ka ba kiyathan hene. Kawohkigahaw git Kiyavwiye Uhokrinenwa.

Avuriwnabay yihiyekemni ba in kibeynewatma

¹⁰ Ariwnteke ini ig awna nutuh: Ka ba ayam inakni iwit ku pariye pis tamak amadga inin kagta, amin ku pariye nehmnikuhpiye, mmanawa in me danuhmet.

¹¹ Ku pahavwi gihiyekemni taraksevye, pugamawka ku ig tiviknenekwa taraksenenekwa. Ku pahavwi gihiyekemni patehwevye, pugamawka ku ig kehnenekwa patahwakinenwa. Heneme ku pahavwi kuwis kibeyne, pugamawka ku ig kehnenekwa kabaykanenwa. Ku pahavwi kuwis gihiyekemni barewbetye, pugamawka ku ig wewnenekwa akak ini gihiyekemni barewbetye.

¹² Giwnapnawa, nukebyuvwi. Igwa Kiyavwiye Jesus awna wotwiy: Avuriwnabay. Nah ayta kibehtenwa. Nah ikinek hiyeg gitiwnikis pakekunawa akak gikehnikis ay amadga inin. Ku pahavwi keh mbayka, mbaykanewa nah ikinek git. Ku pahavwi keh kabayka, kabaykanewa ig utinek.

¹³ Nahnewa akavuska. Nahwata amaksemni. Yuma pahavwinema navitkignema. Yumahwata ewka nuwenuh akiw. Nahnewa pitatye. Nahwata butte. Henewatbaki ig Kiyavwiye Jesus awna.

¹⁴ Ku pariye hiyeg ka batek akak givathawnikis, ku pariye hiyeg ke wotbe igkis sukuhbetenenekwa gisimsakis barewbet abet Kiyavwiye Jesus gimig, ignes utinek ka aynsima kabayka. Igkis kis adahan igkis axnek guwntak nor ah guw ku pariye keh wis aymuhwa adahan avanenekwa. Igkis kis mpiyanek anumekuw pareket adahan igkis parak avitit ini Uhokri givin.

¹⁵ Ignesme hiyeg patahwavye igkis misakwa avawyewa ariw ini paytwempu payak gikakkis hiyeg ihamwigben, gikakkis hiyeg mahayakemnavye, gikakkis hiyeg umehekevutnevwi, gikakkis hiyeg ku pariye kiyathenevwi ahehpakti batakkarad, gikakkis hiyeg wasaymavye kinisekevutnevwi. Madikte igkis misakwa avawyewa ariw ini paytwempu.

¹⁶ Ig Kiyavwiye Jesus awna nutuh: — Nah Jesus awahkise nuwatni ahj pimin adahan pisme ekkene gitkis nuhiyegavu madikte inin ku pariye ig hiyapkise pit. Nah humaw giwntak amekene Davi. Igme amekene Davi humaw nuwntak. Nah ke warukmabe kabutniye kibeywekempiye adahan kavusene nukune hawkri gidahankis hiyeg. Henewatbaki ig Kiyavwiye Jesus awna.

¹⁷ Uhokri Gitip akak Cristo gibetki egkis awna gitkis madikte hiyeg: “Ba ayta.” Igme ku pariye timepne inakni guwnkis awnanaba hawata git Cristo: “Ba ayta.” Ku pahavwi giharitviye Uhokri kiyesrad ke pahavwi hiyeg arabyuvyebe un, hiyawa ig ayta. Ku pahavwi higepkerevye ini un dehetniki, hiyawa ig higap yuma atiwni.

Ka yi muwaka katawnaha inakni hiyakemniki

¹⁸ Nah Joawh ikene yihiyekemni yit madikte ku pariye timepnevwi inakni hiyakemniki amadgatak inin kagta amin ku pariye nehmnikuhpiye. Ku pahavwi katawnaha inakni, igme Uhokri hawata kiyesrihenek gihiyvan mbeyne. Ig ner pahavwi hiyapnek madikte ini mbeyne ku pariye ekkepka ay amadga inin kagta.

¹⁹ Hawata akiw ku pahavwi ayam abusku inakni hiyakemniki amadgatak inin kagta, igme Uhokri hawata ayemenek giw nor ah guw ku pariye keh wis aymuhwa adahan avanenekwa. Ig kawnata iki iwetrit git arikut ini Uhokri givin. Ig kawnata iki git pahatnema kabayka ku pariye tameknene amadga inin kagta.

²⁰ Ig ner ku pariye akkase inakni ginetni madikte wotwiy ig awna: — Nah ayta kibehtenwa. Henewatbaki in. Nahme kaytwa: — Ameh. Kiyavwiye Jesus, ba ayta.

²¹ Nukebyuvwi, Ukivarawiy Jesus gabay yikaknek madikte. Ameh.