Apokalípsi 21 - Uhokri Gahegbetawni Nukune akak Sawmus

Nukune en akak nukune waxri kabaykanen ayge

¹ Ayteke ariwnteke ini nah hiyap nukune en akak nukune waxri, mmanawa ini pitatye en akak ini pitatye waxri in kuwis mehwe payak akak parahwokwa.

² Ayteke nah hiyap nawenyewa paytwempu akiw. In barewye paytwempu. Ini nukune Jerusalém, Uhokri gihiyegavu giwetrikis. In muhukempi inuriktak giwntak Uhokri. In bereswavu ke pahavu tinobe akak gubereswan ahegbet adahan patiptakano gubetki.

³ Ayteke nah timap pahat ikuvimnat ka ahawnasima pes ayteke ahumwatak Uhokri gevwi. In awna: — Kuri han pitatit Uhokri kavinwene ay gibetkis hiyeg amadgayavu inin. Ig misekwene gikakkis. Igkisme gihiyegavu. Igme giwohkigakis. Kibeyne, Uhokriwa ay gimunkis kuri.

⁴ Ig manwotigkisnek ariw gikantakkis madikte. Ayge gimun yuma miyaka akiw. Yuma kadniki akiw. Yuma tihaki akiw. Yuma kayahwaki akiw. Mmanawa madikte arikna minikweknene in kuwis mpiye.

⁵ Ayteke ig Uhokri ku pariye betnene amadga gevwi kiyatyo, ig awna: — Avim inin nah keh madikte arikna nukunekuye. Pisenwa nikwe ig awna nutuh. Giwn: — Tamaknaba inakni nuwnuh amadga kagta. Mmanawa inakni iwit in inyewatbaki. Ik adahan hiyeg kamaxwa nivitit, mmanawa in ka waditnevyenenma.

⁶ Ayteke ig awna akiw: — Kuwis madikte pisenwa. Nahnewa akavuska. Nahwata amaksemni. Yuma pahavwinema navitkignema. Yumahwata ewka nuwenuh akiw. Ku pahavwi nuharitwiye kiyesrad ke pahavwi hiyeg arabuvyebe un, nikwe nah ikinek git un ariwntak ini un dehetniki ahawkri ku pariye keh ig aymuhwa numun adahan avanenekwa. He nukannunen nah ikinek git.

⁷ Ku ig ka isaksaw arit wavitye gihiyekemni, nikwe ig utinek madikte kabayka. Avim ini nahme giwohkiga, igme nukamkayh.

⁸ Heneme hiyeg avisatruvye gikakkis hiyeg kinisekevutnevwi, hiyeg patahwavye, hiyeg umehekevutnevwi, hiyeg mahayakemnavye, hiyeg ihamwigben, hiyeg kiyathenevwi ahehpakti batakkarad, madikte hiyeg wasaymavye, igkis madikte utinek giwetrikis abet egu tiket ahawkri ku pariye wohnenekwa adahan avanenekwa wageska payegbitaknen akak ini pisukumpiye ku pariye bixiwahnene arihri. Innebaki aveynivye miyaka.

Nukune Jerusalém arakak adahan ku samah Jesus gihiyegavu barewye git Uhokri

⁹ Ayteke pahavwi gaytakkis neras ntewnehkernene gikebikis ahj ku pariye hiyuhnene ntewnehkernene tas kivun akak ini ntewnehkernene amaksemni mbayka, ig danuh nutuh, ig awna: — Ba ayta. Nah akkite pit ig Muwtohyan gibetki, eg ku pariye wageswevyo gihayo.

¹⁰ Aynewa ig Uhokri Gitip parekwen, igme ner ahj waxwe nutivuh ta avitit paha waxri nopsadnene imuwadnene. Ayteke ig akka nutuh ini paytwempu barewye Jerusalém in muhukempi inuriktak giwntak Uhokri.

¹¹ In amuwe akak Uhokri gamuwyi. In tigigihwe ke tip huwiynavyobe kewyo “diyamanti”, in huwewehe ke buteybe.

¹² In kiyaraniw akak nopsad ayaranwa kane nimunisima. Ini ayaranwa kadahan madikawku pareket akak pigikna arawna (12) akebi. Madikawku gikebikis ahj gikakkis piyana gawnakis (12) igkis tabirbet anumpu mpuse pareket. Mpuse pareket tamakave akak giwkis amekene Izhaew gikamkayuvwi madikawkunene gikebikis akak piyananene gawnakis (12).

¹³ Mpaymeku pareket mpuse niyaranwa. Mpaymeku wahamatak, mpaymeku tiwriktak, mpaymeku mekaptak hawata mpaymeku uvitkitak.

¹⁴ Ini paytwempu niyaranwa bat avitmin madikawku tip akak pikana arawna (12) akebi. In iyar akamaxten. Mpuse tip iyar akamaxten tamak akak pahavwi giw gaytakkis ner Muwtohyan giwatnivwi madikawkunene gikebikis gikakkis piyananene gawnakis (12).

Nukune Jerusalém kawih adahan ka aynsima hiyeg

¹⁵ Ig ner ahj ku pariye awne nukakuh ig hiyuh pahat ahehtet kehka karukri wahano. In ahehtet adahan ahehminane ini paytwempu, ahehminane pareket payak akak niyaranwa.

¹⁶ Ini paytwempu nihumwan ke bakmunsakibe. Nivugban tuguh hehpekuye ku samah niyabwi. Ig ahj ahehe ini paytwempu akak gahehten. Nah hiyap ku in paytwempu ka nopsimahad. Niyabwi pitana mil kilomet akak pitana madikawku madikwa arawna (2.200). Nivugban hehpekuye. Nimuni hehpekuye. In kawih adahan ka aynsima hiyeg.

¹⁷ Ig ahj hawata ahehe niyaranwa akiw. Nivugban mpana madikwa iwanti akak pitana arawna (32). Ini ahehtet ku kakak wixwiy aheh ay amadga inin, ig ahj aheh akakwata akebi ini.

Nukune Jerusalém kane abewisima

¹⁸ Ini paytwempu niyaranwa in kehka akak tip tigigihwavunano kewyo “diyamanti”. Madikte ini paytwempu kehka akak karukri wahano egyekata, heneme in huwewehe ke buteybe.

¹⁹ Niyaranwa akamaxten bereswavu akak arakembet tip tigigihwavunano. In pitatye iyar akamaxten bereswavu akak tip huwiynevyo kewyo “diyamanti”. Avek bereswavu akak tip inamyanpityo kewyo “safira”. Amamnabun bereswavu akak tip bukabkavityo akak kuwikwiye akak duwweh eg kewyo “kalsedonya”. Avaxkabun bereswavu akak tip ayeweyo ke buteybe kewyo “esmerawda”.

²⁰ Avahwokbun bereswavu akak tip duwnevyo kewyo “sardônyu”. Avuguhkubun bereswavu akak tip duwweh kewyo “sardyu”. Pahakme kehpiye ntewnehkerbo in bereswavu akak tip bukabkavityo akak kuwikwiye akak ayeweye eg kewyo “kirisólitu”. Pahakme kehpiye ntewnehkerbo akak pahak arawna in bereswavu akak tip ayeweptiyo kewyo “berilu”. Pahakme kehpiye ntewnehkerbo akak pikana arawna in bereswavu akak tip kuwikwivityo kewyo “topazyu”. Pahakme kehpiye madikawkubu in bereswavu akak tip inamyanpityo kewyo “kirisóprasu”. Pahakme kehpiye madikawkubu akak pahak arawna (11) in bereswavu akak tip ayeweptiyo kewyo “jasintu”. Pahakme kehpiye madikawkubu akak pikana arawna (12) in bereswavu akak tip wagagevityo kewyo “ametista”.

²¹ Mpuse ini pareketviyene madikawkunene akebi akak pigikna arawna (12) in pohowit akabdat bukabkahwavunano nopsad. Ayge pahatra ahin ayegbiw ini paytwempu. In kehka akak karukri wahano egyekata, heneme in hawata huwiye ke buteybe.

²² Nah ka hiyap pahanema payt ayge kewye Uhokri Givin avit ini paytwempu. Mmanawa Ukivarawiy Uhokri detye gikak ner Muwtohyan igkis muwapuw ayge, igkis kiyathaka muwapuw. Nikwe ini paytwempu in pahatte Uhokri Givin.

Nukune Jerusalém kabutenne akak Uhokri gamuwyi

²³ Hawata akiw ini paytwempu ka muwaka kamuw ine kawnata muwaka kayg adahan kabutnihne ayge, mmanawa inwa Uhokri gamuwyi uguh ini paytwempu. Hawata ig ner Muwtohyan ig abukri adahan ini paytwempu.

²⁴ Nah hiyap gaytakkis madikte hiyegviyenevwi igkis wewnekuye abet nibutni. Nah hiyap madikte ikivaratviyene amadgayavu inin igkis ewknes igiska nivitit. Ku pahavwi parekere atere, hiyawa ig parak

²⁵ Ini paytwempu nivereketni woknenekwa mataytak. Nikwe in ka sabukti, mmanawa yuma tiyegemka ayge. Ku pahavwi parekere atere, hiyawa ig parak.

²⁶ Madikte hiyegviyenevwi ewknek igiska akak kabayka atere.

Patahwavye ka parak atere

²⁷ Heneme yuma ariknawnema patehwevye ik adahan parak atere. Yuma pahavwinema ku pariye keh mbayka ik adahan parak atere. Ine yuma pahavwinema wasaympiye kawnata ik adahan parak atere. Ignekisnewa ku pariye kadahanyevwi giwkis tamakave amadga ner Muwtohyan gikagtan adahan dehetniki, ignesnewa ik adahan igkis parak atere.