Apokalípsi 20 - Uhokri Gahegbetawni Nukune akak Sawmus

Satanas wanekwikanek adahan madikawkuvut madikawku madikwa kamukri (1000)

¹ Ayteke nah hiyap pahavwi ahj muhuk inuriktak. Ig sumuh pahamku irakri ay giwaku adahan wagestivevye asabwat ini miyokwiye ku pariye yumanene amaksemni. Hawata ig kaxenawok pahat xen kane awinisima.

² Ig atere, ig kamaxe ner kene waramwibe, ner Kaybune ku pariye humaw minikwak. Ner wavitye gikivarakis, Uhokri givetunya Satanas. Ig ahj kamaxwig ig wanekwig adahan madikawkuvut madikawku madikwa (1.000) akebi kamukri.

³ Ayteke ig padekwig arikut ini miyokwiye ku pariye yumanene amaksemni. Pisenwa ig sabukwin. Ig wagestivepni akak irakri kahadbe ig Satanas ka kinis hiyeg amedgenevwi inin akiw he ku aysaw ini madikawkuvutnene madikawku madikwa (1.000) akebi kamukri mpiyanek. Ayteke ariwnteke ini madikawkuvutnene madikawku madikwa (1.000) akebi kamukri, amawka ig isahkiska akiw adahan aynesa hawkri.

Cristo kumadukanek hiyeg amedgenevwi inin adahan mil kamukri

⁴ Ayteke nah hiyap ka aynsima eptivyano kiyatyovwi adahan ku kiney hiyeg kumaduka. Nah hiyap ka aynsima hiyeg igkis batebdebdi ayge gumadgakis. Igkis hiyeg ikepka gidatnikis adahan igkis hiyekne gikakkis hiyeg. Gaytakkis neras hiyeg igkis neras ku pariye bukihkavu gibitakis avatra ku samah igkis kinetihwenes amin Kiyavwiye Jesus ginetni, avatra ku samah igkis ekkenes Uhokri giwn. Igkis ku pariye kane kumadukasaw git ner pahavwi kene axtigibe. Kawnata igkis kawohkigahaw arit ner kene axtigibe gahehpak. Ine igkis kawnata amava tamaka gidevatkis ine giwakuritkis akak ner kene axtigibe gitamka. Igkis ku pariye kannikewbet ariw gimiremnikis adahan igkis kumadukenes payak gikak Cristo abet ini madikawkuvutnene madikawku madikwa (1.000) akebi kamukri.

⁵ Ignesme neras kane Uhokriyanvuma miyaravye igkis kote kannikawte ariw gimiremnikis. Igkis ka kannikawnek he ku aysaw ini madikawkuvutnene madikawku madikwa (1.000) akebi kamukri mpiyanek. Nerasme ku pariye kumadukenevwi ayge gikak Cristo igkis neras ku pariyekit kannikew abet ini pitatye kannikawka.

⁶ Ku pariye hiyeg kannikewviye abet ini pitatye kannikawka ignes barewvityevwi. Igkis utinek ka aynsima kabayka, mmanawa ini aveynivye miyaka ka hiyanek gisamanakkis. Igkis humawnek Uhokri gimuwvegavu, Cristo gimuwvegavu adahan igkis danukwa kennesa gitkis takunipti adahan kehne gibetkikis. Hawata akiw igkis kumadukanek payak gikak Cristo abet ini madikawkuvutnene madikawku madikwa (1.000) akebi kamukri.

Satanas isahkiskanek adahan aynesa hawkri

⁷ Ariwnteke ini madikawkuvutnene madikawku madikwa (1.000) akebi kamukri, nikwe ig Satanas isahkiskanek ariwntak ini parakseket.

⁸ Ayteke nikwe ig pes adahan kinisne madikte hiyeg muwapuw amadga inin. Avim ini ig kinisnek hiyegviyenevwi kewye Gogi akak Magogi aynte avit waxri Rusu. Ig pahadguhgikisnek adahan igkis keryekisnek gikakkis Uhokri gihiyegavu. Ig utinek ka aynsima hiyeg adahan kerye gikakkis. Igkis ka aynsimanek ke kayhbe akigbimna parahwokwa.

⁹ Ayge nikwe igkis ibekhewbet muwapuw amadga inin. Ayge igkis kiyaranwehe Uhokri gihiyegavu giwetrikis. Igkis kiyaranwehe ini paytwempu Jerusalém ku pariye Uhokri batek nikak. Heneme pahaye adahan tiket muhuke inuriktak in bukahavevgikisnek madikte.

Satanas sarayhpikanek abetit tiket

¹⁰ Ayteke ig ner wavitye gikivarakis ku pariye gikinseptenkis neras hiyeg ig padekwikanek abetit tiket ahawkri ku pariye wohnenekwa adahan avanenekwa wageska payegbitaknen akak ini pisukempiye ku pariye bixiwahnene arihri. Egwata tiket ku kit ner pahavwi kene axtigibe kuwis padekwika payak gikak ner pahavwi ku pariye ikewne ke wotbe ig Uhokri gawnevebe bawa ig ner kene axtigibe gawneve. Ayge igkis madikte kayahnek takunipti adahan avanenekwa akiwka akiwkanek.

Uhokri gihiyvetnikis hiyeg ba ignes kibeynewatma

¹¹ Ayteke nah hiyap pohow epti kiyatyo seyno nopsadnano. Nah hiyap pahavwi betnene ayge gumadga. Pahaye adahan waxri akak en higihwe givetunatak. In ka hiyapka akiw.

¹² Ayge nikwe nah hiyap madikte miyaravyempu, neras ku pariye kiyatyevwi gikakkis neras ku pariye ikaka yumanene gikiytanikis. Igkis madikte tabirbet ayge avetun Uhokri gevwi. Ayge ka aynsima kagta wokepka. Ayteke nah hiyap pahakwa kagta wokepka akiw, ini kagta adahan dehetniki adahan avanenekwa. Ayteke nikwe ariwnteke ini ig Uhokri gihiyvetnikis madikte neras miyaravyempu ba igkis kibeynewatma. Ig ivegbohe madikte ini kagta amin ku pariye gikehnikis ay amadga inin, mmanawa gikehnikis tamakave amadga ini kagta.

¹³ Madikte miyaravyempu ayge. Ku pariye miyap parahwokwa igkis pes ahakwatak. Ku pariye avuhpika waykeku igkis hawata pes waykekutak. Madikte ku pariye aynte miyaravyempu giwetrikis igkis hawata pese ayteke. Ayge nikwe igkis madikte hiyapka pahavwimpi ba igkis kibeynewatma akak ku pariye gikehnikis ay amadga inin.

Kane kibeynevwima padakavepka abetit tiket ahawkri

¹⁴ Ayteke ariwnteke ini, miyaka akak miyaravyempu giwetrikis in padakavepka abetit tiket ahawkri. In yuma ay akiw, mmanawa egu tiket ahawkri innebaki aveynivye miyaka. In amaksemni miyaka.

¹⁵ Hawata akiw madikte hiyeg ku pariye giwkis kane tamaknema amadga ini kagta, ku pariye keh wis aymuhwa gimun Uhokri adahan avanenekwa, igkis hawata padakavepka abetit egu tiket ahawkri.