Apokalípsi 2 - Uhokri Gahegbetawni Nukune akak Sawmus

Efesuyenevwi ka batek gikak Uhokri kema pitatyema

¹ Ayteke ig Kiyavwiye Jesus awna nutuh akiw. Giwn: — Awahkisnaba pahak kagta gimin ner inetitkekne gidahankis nuhiyegavu aynte avit paytwempu Éfesu. Tamaknaba iwit ku pariye nah akki pit kuri. “Nah ikene yinetni, nah ku pariye hiyuhnene ntewnehkernene warukma ay nuwaku kihehavriktak, nah wewvarinene ayegbiw ntewnehkernene abukri akekri kehka karukri wahano.

² Nah hiyak ku samah yihiyekemni ayge. Kibeyne, nah hiyak ku samah yis mpiksaw kannivwi nudahan. Nah hiyak ku samah yis dehewnene abetnewa mbeyne. Nah hiyak ku samah yis ka amava hiyeg taraksavye giwnkis. Nah hiyak ku samah yis hikek neras hiyeg ku pariye ikewnevwi ke wotbe ignes Uhokri giwatnivwibe baki igkis giwntakwatma Uhokri ba kawk. Yis avuriw ku samah gihiyekemnikis. Ayge nikwe yis hiyekevgikis ku igkis he wasaymavyenen.

³ Hawata yis dehewnene abet mbeyne. Yis amava madikte ini mbeyne kabayntiwa nudahan. Yis ka ehwa nikak.

⁴ Heneme nah akkite yit pahat yihiyekemni ku pariye nah suguh. Yis ka batek nukakuh kema pitatyema.

⁵ Kiyeminanabay amin ku samah minikwak yis batek nukakuh kiyesrad yis hawata batekak pawtak kiyesrad. Hiyakse yis kuri, yis tuguhkise yibetki nuvititak yis hawata tuguhkise yibetki pawtak. Wakaymninabay adahan ku samah yihiyekemni ka kabay. Wagesnabay yihiyekemni akiw. Kehnabay hawata ku samah pitatye nah utivyi. Ku yis ka wages yihiyekemni, nikwe yis ka ayivwinek. In ke wotbe nah aytanek nah wiwhpiyebe pohow abukri akekri ariwntak guwetri.

⁶ Heneme pahat yihiyekemni ayge ku pariye tuguhak akak nudahan. Yis ka batek akak neras “nikolayenevwi” gihiyekemnikis ku pariye nah kawnata batek nikak.

⁷ “Yis ku pariye katayebnenevwi, ataybiswanabay arimkat ku pariye Uhokri Gitip awna gitkis nuhiyegavu. Ku pahavwi ka isaksawnek arit wavitye gihiyekemni, nikwe nah ikinek gawaygi adahan ig ax guwntak nor ah ku pariye keh hiyeg aymuhwa adahan avanenekwa, nor ku pariye tabirnano amadga Uhokri giwasra.” Henewatbaki ig Kiyavwiye Jesus awna nutuh.

Esmirnayenevwi hiyepne mbeyne heneme ka sam

⁸ Ayteke ig Kiyavwiye Jesus awna nutuh akiw. Giwn: — Awahkisnaba pahak kagta hawata gimin ner inetitkekne gidahankis nuhiyegavu aynte avit paytwempu Esmirna. Tamaknaba iwit ku pariye nah akki pit kuri. “Nah ikene yinetni, nah ku pariye akavuska nahwata amaksemni, nah ku pariye miyatinene, heneme kuri nah aymuhwa akiw.

⁹ Nah hiyak ku samah yis hiyepne mbeyne. Nah hiyak ku samah yis madiptavye, heneme nutuh yis igisavyenen. Nah hiyak ku samah hiyeg pataha yiw. Neras hiyeg ikawnamahkis ke wotbe igkis Uhokri gihiyegavube bawa kawa. Bawa igkis wavitye gihiyegavu.

¹⁰ Ka yi muwaka avis abohri ini mbeyne ku pariye me danuhmet yit. Yaytak sarayhkiskanek arikut parakseket gavit wavitye gikivarakis adahan yihikekten. Henewatbaki ig keh. Ka aynsima hawkri yis hiyap mbeynenek. Hiyawa yis miyarap, heneme ka sam. Kamaxwanabay nuvitit kabayntiwa. Ku yis keh hene, nikwe nah katiwnihyinek akak ini iyuwti ku pariye keh yis aymuhwa adahan avanenekwa.

¹¹ “Yis ku pariye katayebnenevwi, atabiswanabay arimkat ku pariye Uhokri Gitip awna gitkis nuhiyegavu. Ku pahavwi ka isaksawnek arit wavitye gihiyekemni, nikwe ig ka miyanek akak miyaka aveynivye akiw.” Henewatbaki ig Kiyavwiye Jesus awna nutuh.

Gitkis pergamuyenevwi ka sam wis mahayakemnihwa

¹² Ayteke ig Kiyavwiye Jesus awna nutuh akiw. Giwn: — Awahkisnaba pahak kagta hawata gimin ner inetitkekne gidahankis nuhiyegavu aynte avit paytwempu Pergamu. Tamaknaba iwit ku pariye nah akki pit kuri. “Nah ikene yinetni, nah ku pariye kadahannene nuwana pebkaknano guyaw.

¹³ Nah hiyakni ku yis misakwa ayge ku kiney Satanas kumadukene. Kibeyne, nah hiyakni ku yis kamaxwa nuvitit kabayntiwa. Yis ka isahkis yikamaxwan nuvititak. Hiyawa kiyavwiye Antipas, ner ku pariye kabivwiye kinetihwa numinuh, hiyawa ig umehpika ayge yibet ku kiney Satanas misakwa, heneme yis ka isahkis yikamaxwan nuvititak.

¹⁴ Heneme aynesa yihiyekemni ayge ku pariye nah suguh. Yaytak ayge wewne akak Balawh gihiyekemni. Igkis kehnes hiyeg patahwa ku samah minikwak ig Balawh kannuh Balaki adahan igme patahpasa nuhiyegavu judeyenevwi. Ignes patahwa ku samah ka sam adahan igkis ax im kakanhawka arit ahehpakti batakkarad hawata adahan igkis mahayakemnihwa.

¹⁵ Hawata akiw yaytak amava giwnkis neras hiyeg ku pariye wewnes akak “nikolayenevwi” gihiyekemnikis.

¹⁶ Wagesnabay yihiyekemni. Miniwvinabay ariw inere hiyakemniki. Ku yis ka wages yihiyekemni, nah aytanek yit kibehtenwa. Nah pisenwanek gihawkankis neras hiyeg akak nuwana ku pariye pes nubiyaptak.

¹⁷ “Yis ku pariye katayebnenevwi, ataybiswanabay arimkat ku pariye Uhokri Gitip awna gitkis nuhiyegavu. Ku pahavwi ka isaksawnek arit wavitye gihiyekemni, nikwe nah ikinek git ariwntak ini axka kewye “maná” ku pariye hiyeg amadgayavu inin kane hiyap. Hawata akiw nah ikinek git pohow tip seyno adahan areketni ku nah batek gikak. Ayge guvit nor tip tamaknek giw nukune ku pariye yuma pahavwinema hiyeg ahiyekten. Ignewa ner ku pariye gudarihpitninek ignewa hiyaknek.” Henewatbaki ig Kiyavwiye Jesus awna nutuh.

Tiyatirayenevwi kinikiswa gut ihamru

¹⁸ Ayteke ig Kiyavwiye Jesus awna nutuh akiw. Giwn: — Awahkisnaba pahak kagta gimin ner inetitkekne gidahankis nuhiyegavu aynte avit paytwempu Tiyatira. Tamaknaba iwit ku pariye nah akki pit kuri. “Nah ikene yinetni, nah Uhokri gikamkayh, nah ku pariye nuwtyak kewa tiket akadweybe, nukugku huwiye ke kuwiwrabe dewhaki.

¹⁹ Nah hiyak ku samah yihiyekemni ayge. Kibeyne, yis amnihekne pawtak. Yis kamaxwene nuvitit kabayntiwa. Yis kabivwiye kannivwi nudahan. Yis dehewnene abetnewa mbeyne. Yis kannivwite nudahan mpiy ariw pitatye.

²⁰ Heneme nah akkite yit pahat yihiyekemni ayge ku pariye nah suguh. Yaytak amava guhiyekemni nor tino Jezabew ku pariye ikawvaru ke wotbe eg Uhokri gawnevebe. Eg kinis nuhiyegavu ka aynsima. Eg awna: ‘Ka sam yis mahayakemnihwa. Ka sam yis ax im kakanhawka arit ahehpakti batakkarad.’

²¹ Nah kuwis kiyabuke hawkri gudahan adahan eg miniw ariw ini gumahyakemni, heneme eg ka miniwkere niw.

²² Kuri nikwe nah gusarayhpitni amadgat guwetri akak karayt. Nikwe eg ka mahayakemnihwa ayge akiw, heneme eg hiyapnek ka aynsima mbeyne. Nerasme ku pariye patehwenevwi gukak nah kehnek hawata gikakkis. Ku igkis ka miniw ariw ini givathawnikis gukak, nah hiyapkisnek mbeyne gitkis ka aynsima nivatra.

²³ Hawata akiw nah umahavenek neras ku pariye kene gukamkayuvwibe ku pariye amevenevwi hiyeg gikankis guhiyekemni. Ayge nikwe madikte Jesus gihiyegavu hiyaknek ku nahnewa hiyak ku pariye ay avit hiyeg giyaknikis ku pariye abet gihiyekemnikis. Ku pariye hiyeg keh mbayka, mbaykanewa nah ikinek gitkis.

²⁴ Yisme yaytak ayge avit paytwempu Tiyatira yis ka amava ini guhiyekemni ku pariye mbeyevyenen. Yis ka timepkere inakni iwit ku pariye igkis kanum “hiyakemniyevwi ginetnikis” bawa in Satanas ginetni. Kibeyne. Ininewa nayapni yit

²⁵ adahan yis misakwa akak ini yihiyekemni ku pariye kibeyne he ku aysaw nah diyuhnek.

²⁶ Ku pahavwi ka isaksawnek arit wavitye gihiyekemni, ku ig gidukwenewa kehnene nubetki he danuhe amaksemni giwewni nukakuh, nikwe nah ikinek kumadukaki git adahan igme kumadukene madikte hiyegviyenevwi.

²⁷ Ig kumadukigkisnek akak gisuga sivari hawata ku samah muwtohvutne kumaduka givigvu akak gahra. Ig kadahan gidatninek adahan ig pisenwa gikakkis hiyeg hawata ku samah pahavwi batekerevutne bekbeta gibatkan ku pariye mbeyevyenen.

²⁸ Henewa, nah ikinek givitit inwata nudatni ku pariye Niguh ike nuvitit. Hawata akiw nah ikinek git gikiytani hawata ke warukma kibeywekempiyebe.

²⁹ “Yis ku pariye katayebnenevwi, ataybiswanabay arimkat ku pariye Uhokri Gitip awna gitkis nuhiyegavu.” Henewatbaki ig Kiyavwiye Jesus awna nutuh.