Apokalípsi 19 - Uhokri Gahegbetawni Nukune akak Sawmus

Inurikyenevwi kabayhanek Uhokri ku samah mbayka amadgaya inin in biyuke madikte

¹ Ayteke ariwnteke ini nah timap kadukmanka kewa hiyeg pahadguvunebe awnene aynte inurik. Igkis awna: — Aleluya! Kibeyne gidahan Uhokri. Kibeyne adahan gamnihra. Kibeyne adahan gikiytani. Kibeyne adahan gidatni.

² Ig ka gihiyekemnisima adahan ig hiyekne gikakkis hiyeg pakekunawa akak ku samah gikehnikis. Ig ike gitkis ku pariye kabay gidahankis. In kabay ig pisenwe akak mahayakemniki. In kabay ig hiyapkis gut nor tino powkemnivyo datyo avatra guvathawni, mmanawa eg mbeyhe madikte hawkri akak gumebyemni. In kabay ig diyuhkise gimigkis neras gibukvig.

³ Ayteke igkis awna akiw: — Aleluya! Kibeyne gidahan Uhokri. Ini mahayakemniki niwetri in wohne kuri adahan avanenekwa. Nisayan pesne kuri nivititak adahan avanenekwa.

⁴ Ayteke neras piyananene madikwa kiyavwiyegben gikakkis paxnikanene gawnakis (24) gikebikis payak gikakkis neras paxnikanene gikebikis hiyeg dehetniyevwi igkis tuguhkiswebdi mabuw givetunat Uhokri ku pariye ayge betnene amadga gevwi kiyatyo. Igkis kiyathig ayge. Igkis awna: — Ameh. Aleluya! Kibeyne gidahan Uhokri.

Muwtohyan fetya adahan maripkawka

⁵ Ayteke pahat ikuvimnat pes ayteke ahumwatak Uhokri gevwi kiyatyo. In awna: — Yis Uhokri gibukvig, uyay kabayha Uwohkigawiy. Yis ku pariye kiyenevwi Uhokri, yis kiyatyevwi payak yikak yis yumanene yikiytani, uyay kabayha Uwohkigawiy.

⁶ Ayteke nah timap kadukmanka kewa hiyeg ka aynsimabe pahadguvunenebe, kewa avetetnibe nopsadbe, kewa digidgiyebe digihwa ka ahawnasima. Nah timap igkis awna: — Aleluya! Ukivarawiy Uwohkigawiy detyewa ig. Ignewa kumadukene madikte.

⁷ Uyay batek uminwiy. Uyay kabayha giw. Mmanawa kuwis ahawkanavrik danuh adahan Muwtohyan gifetra adahan maripkawka. Kibeyne, kuwis nor gibetki ahegbetaw adahan eg misakwano pahavwiwa gikak adahan avanenekwa.

⁸ Kibeyne, ikepka gut adahan eg kawihminaw akak gusimsa bereswetet masasanisniye, barewbetye, tigigihwavwinene. Ini gukawihni innebaki arakak adahan ku samah Uhokri gihiyegavu gihiyekemnikis kibeynenenwa.

⁹ Ayteke ig ner ahj awna nutuh: — Asa tamak amadga pikagtan inakni iwit ku pariye nah ekkene pit kuri: “Ka aynsima kabaykanek gidahankis neras ku pariye awnasakavu arit Muwtohyan gifetra adahan maripkawka.” Ayteke ig awna nutuh akiw: — Inakni iwit in inyewa, in giwntakwa Uhokri.

Amawka wis ka kiyatha ahj

¹⁰ Nah timapni hene, nah paberetusew gikimpurit adahan nuvewkan nah gikithenitni. Heneme ig awna nutuh: — Ka ba kehni hene. Nah Uhokriwata gibuk hawata ke pisbe hawata ke madikte pikebyuvwibe ku pariye ekkenevwi Kiyavwiye Jesus ginetni. Ka muwaka kiyathan hene. Kawohkigahaw git Kiyavwiye Uhokrinenwa. Mmanawa inakni Kiyavwiye Jesus ginetni, ini ku pariye uguhe Uhokri gawnevevu gihiyekemnikis adahan igkisme awna iwit ku pariye pes giwntakwa Uhokri.

Jesus aytanek adahan pisenwevye gihawkankis givetunyavu

¹¹ Ayteke nah hiyap en woke. Ayge nah hiyap pahavwi kaway seyne. Nah hiyap pahavwi giduhyamadga kaway ig igyewa waditye ig kis adahan wixwiy iveg givitit. Ig keh wadit ku samah ig katiwnise hiyeg gitaraksankis gitkis. Ig keh wadit ku samah ig kavetunsa hiyeg patahwavye.

¹² Giwtyak kewa tiket akadweybe. Nah hiyap ka aynsima gisuwvren kehka akak karukri wahano ay gitewha adahan areketni ku samah ig kumadukene madikte. Giw tamak ay givit, heneme yuma hiyeg ahiyekten. Ignewa nihiyekten.

¹³ Ig kasimsavu akak simis migatbetye. Ig kanumka giw “Uhokri Giwn” mmanawa ignewa ekkene gitkis hiyeg ku samah Uhokri gihiyekemni.

¹⁴ Nah hiyap gisuwtatavu inurikyenevwi igkis kuruw gihavu butte. Igkis hawata aduhyamadga gikawyokis seynevwi. Igkis kasimsavuwave akak kamis seyne barewbetye.

¹⁵ Ayteke nah hiyap pahamku iwan kane ayawisima pes gibiyaptak. Akak egu giwana ig pisenwanek gihawkankis madikte hiyegviyenevwi. Ig kumadukigkisnek akak gisuga sivari hawata ku samah pahavwi muwtohvutne kumaduka givigvu akak ah. Ig hiyapkisnek mbeyne gitkis hiyeg avatra givathawnikis ke wotbe ig kumukwigkisbenek amadgat kumuktet. Mmanawa ig Uhokri detye, ig ka batek akak patahwaki aynesnima.

¹⁶ Hawata nah hiyap pahat giw akiw in tamak abet gisimsa ay gihuwmin. Inakni giw “Ikivarat Gikivarakis. Ig Kumaduka Madikte Ku pariye Kumadukenevwi.”

Kuhivra asanawkavye fetya adahan miyaka

¹⁷ Ayteke nah hiyap pahavwi ahj tabir ariwtrik kamuw. Ig kabiman akak madikte gawaygi gutkis madikte kuhivravyonovwi ku pariye amarave ariku hawkri. Ig awna gutkis: — Ba yi ayta fetya. Ba yi ayta pahadguhwa adahan yis axne ini axka kane aynsima ku pariye Uhokri ahegbete yidahan.

¹⁸ Axnay ikivaratviyene gihkis, akak suwtat gikivarakis gihkis, akak gisuwtatavu gihkis. Axnay kaway gihkis akak gihkis neras ku pariye wewnevwi giduhyamadgakis kaway. Axnay hiyeg gihkis madikte, hiyeg ibuktivyene akak hiyeg kane ibuktivyenema, hiyeg kiyatyevwi akak hiyeg yumanene gikiytanikis. Axnay gihkis madikte.

Jesus matekenek ner pahavwi kene axtigibe

¹⁹ Ayteke nah hiyap ner pahavwi kene axtigibe payak gikakkis madikte ikivaratviyene amedgenevwi inin gikakkis gisuwtatavukis. Igkis pahadguvu adahan igkis keryes gikak ner pahavwi ku pariye waywempiye aduhyamadga givig kaway seyne gikakkis gisuwtatavu inurikyenevwi.

²⁰ Pisenwa gikeryikis, ig ner kene axtigibe ig kamaxwika payak gikak ner ku pariye ikewne ke wotbe ig Uhokri gawnevebe bawa ig ner kene axtigibe gawneve. Igi ner ku pariye kehne annut ku aysaw ig ay kennesa gimun ner kene axtigibe. Akak ini gannu ig kinise neras ku pariye amevenevwi hiyeg gikankis ner kene axtigibe gitamka, neras ku pariye kawohkigahew arit ner kene axtigibe gahehpak batakkarad. Ayteke nikwe ig ner kene axtigibe gikak ner ku pariye ikewne ke wotbe ig Uhokri gawnevebe, igkis padakavepka piyamate ivegi abetit tiket ahawkri ku pariye wohnenekwa adahan avanenekwa wageska payegbitaknene akak ini pisukempiye ku pariye bixiwahnene arihri.

²¹ Ignesme gisuwtatavukis umahavepka akak egu iwan ku pariye pes gibiyaptak ner ku pariye waywempiye aduhyamadga gikawyo seyne. Ayge nikwe madikte kuhivravyene axnekuyes gihkis he igkis kabihribdave awaku.