Apokalípsi 18 - Uhokri Gahegbetawni Nukune akak Sawmus

Mahayakemniki pisenwepka akaknek

¹ Ariwnteke ini nah hiyap pahavwiwa ahj akiw. Ig muhuk inuriktak. Ig ka gidatnisima. Gamuwyi uguhe madikte waxri.

² Nah timap ig kabiman akak madikte giwakemni. Giwn: — In paytwempu nopsadnene Babiloniya in biyuk! In biyuk! Kuri han pitatit he wavityenen misakwa ayge. Anmapti mbeyevye kavinwene ayge payak akak madikte kuhivraviyene asanawkavye patahwavye.

³ Mmanawa ini paytwempu in kewa pahavu tino powkemnivyobe, eg higapkise guwinna kane ahawnasima gitkis madikte hiyeg. Ini win innebaki gumahyakemni. Madikte ikivaratviyenevwi amedgenevwi inin igkis ke wotbe powkemnihwenekuye gukakbe. Hawata madikte piyuknevwi amedgenevwi inin igkis ke wotbe daxnekuyes karukri ka aynsima akak gumahyakemnibe. Henewatbaki ig ahj awna.

⁴ Ayteke nah timap pahat ikuvimnat awna ayta inuriktak akiw. In awna: — Nuhiyegavu, ka yi muwaka daxtasaw gukak nor tino akak gumahyakemni. Amawka yis ka patahwa gukak kahadbe yis ka hiyepma mbeyne payak gukak.

⁵ Mmanawa gukehni patahwaki kiyesihwe in imuhew danuhte amadgat en. Kuri Uhokri hiyekne akak ini guhiyekemni mbeyevyenen.

⁶ Ayteke in ikuvimnat awna gitkis ahj. In awna: — Kuri hiyawa yis diyuhkis guwak. Katiwnisanay gutaraksan gut mpiy pimavut akiw, avitmin ku samah gumebyemni. Kivunsanay guhigvetni akak higapka mpiy pimavut akiw, avitmin ahawna ini higapka ku pariye eg higapkise gitkis hiyeg.

⁷ Eg kuwis kawih ka aynsima gukiytani guvitit. Eg wew akak ka aynsima batekka amadgaya inin. Kuri yisme kawihkisnay guvitit ka aynsima kayahwaki akak ka aynsima kadniki. Mmanawa eg awna gunaktin: “Nah bat ay nuwetrimadga yikivara nah. Nah ka madankunoma, mmanawa madikte hiyeg wew nukakuh. Awetuvye nah hiyap kadniki.”

⁸ Avatra inakni guwn, ka aynsima mbeyne danuhnek gut pahatya amin abet pahaynene hawkrinek. Miyaka akak kadniki, mihetniki, danuhnek gut. Eg bukehpikanek akak tiket. Mmanawa ig Ukivarawiy Uhokri ig ka gidatnisima adahan ig hiyapkisne gut avatra guvathawni. Henewatbaki ini ikuvimnat awna.

Hiyeg amedgenevwi inin wakaymninek ku samah madikte igiska amadgaya inin in biyukenek

⁹ Neras ikivaratviyenevwi amedgenevwi inin ku pariye ke wotbe powkemnihwevyebe gukak nor tinobe, ku pariye aharitnevwi batekka amadgaya inin, igkis hiyapni hene, igkis tihebdinek igkis kadnibdinek mpiynevevye. Gitkis in ke wotbe igkis hiyap paha paytwempu in wohe pahatte, igkis hiyap nisayan pes nivititak.

¹⁰ Ayge nikwe in ke wotbe igkis misakwa tabirbet piyawakad ariw ini paytwempu akak madikte gavisnikis. Mmanawa igkis avis abohri ini mbeyne ku pariye danuhe gut. Avim ini in ke wotbe igkis awnanek gitkis neras paytwempuyenevwi ayge. Giwnkis: — Akayih. Yis paytwempuyenevwi avitya Babiloniya yis kuwis ute ka aynsima mbeyne. Kuhwekwa yivin nopsadnene avitminene in ay. Hiyaksa kuri pahatya amin ka aynsima mbeyne hiyapkiska yit.

¹¹ Hawata akiw madikte piyuknevwi amedgenevwi inin igkis hiyapni hene, igkis hawata tihebdinek. Igkis kadnibdinek giharitkis neras paytwempuyenevwi. Igkis ka kadni giharitkis awakuma igkis batek gikakkis, heneme awaku yuma hiyeg ay akiw adahan isimwiyi gewkanbetkis gitkis akiw.

¹² Yuma hiyeg isimwiyi karukri wahano kuwikwiye gitkis akiw, ine karukri wahano seyno, ine tip ku pariye bukabkahwavunano, ine akabdat kane atiwnisima, ine kamis kibeyne masasanisniye, ine kamis bereswetet, ine kamis linoboye mitibdibonene, ine kamis mawruboye duwbonevye, ine ah imihne madikte, ine arikna madikte kehka akak lefah giwahra, ine arikna madikte kehka ah ka atiwnisima, ine arikna madikte kehka kuwiwra, ine arikna madikte kehka sivari, ine arikna madikte kehka tip.

¹³ Yuma hiyeg isimwiyi gitkis akiw ini “kanela” ku pariye adahan maguhene axka, ine igkis ka isim iyaygti imihnevye, ine pommad, ine ini imihgi kewye “mirra”, ine win, ine diluy, ine fahin akak kuwak, ine pak, ine muwtoh, ine kaway, ine giwewtenkis, ine ibukti. Yuma hiyeg isimwiyi ariknawnema akiw. Ine igkis kawnata isim hiyeg gihiyekemnikis akiw.

¹⁴ Henewa, yis mahayakamnavye, madikte ini maguwka amadgaya inin ku pariye yis miyarhaw aharit, madikte biyuke. Madikte igkiska amadgaya inin biyuke. Madikte barewka amadgaya inin biyuke. Yis ka takunima hiyapni akiw.

¹⁵ Avim ini neras piyuknevwi ku pariye humaw igisavye awaku ku samah neras paytwempuyenevwi isimwiyi ini arikna gitkis, in ke wotbe igkis misakwanek tabirbet piyawakad ariw ini paytwempu akak madikte gavisnikis. Mmanawa igkis avise abohri ini mbeyne ku pariye danuhe gitkis neras paytwempuyenevwi. Ayge igkis tihenesnek, igkis kadniyesnek mpiynevevye.

¹⁶ Igkis awnanek: “Akayih. Ka aynsima mbeyne danuhe arit ini paytwempu nopsadnene. Kuhwekwa in ay kewa pahavu tinobe bereswavu akak kamis kane atiwnisima, kamis masasanisniye wagageboye, kamis mawruboye duwbonevye, eg bereswavu akak karukri wahano, akak tip bukabkahwavunano akak akabdat kane atiwnisima.

¹⁷ Hiyaksa kuri pahatya amin eg biyukse madikte.” Henewatbaki igkis piyuknevwi awnanek. Hawata akiw madikte nawiy akivaravu gikakkis madikte gihiyegavukis, madikte gumadgayavu, madikte neras ku pariye kannivwiye parahwokwa, in ke wotbe igkis madikte misekwebdi tabirbet piyawakad ariw ini paytwempu.

¹⁸ Igkis hiyapni ku samah in wohe, ku samah nisayan pes nivititak, igkis kabiman. Igkis awna: “Yuma paytwempu akiw kema ininma nopsad paytwempu.”

¹⁹ Avim ini igkis padaknek wayk gitewharitkis. Igkis tihebdinek, igkis kadnibdinek. Ayge igkis awnanek: “Akayih! Inin paytwempu nopsadnene! Inin iwetrit ku kiney madikte hiyeg nawiyvukewnevwi parahwokwa igkis igishew niwntak awaku ka aynsima igiska ayge. Hiyaksa kuri pahatya amin madikte biyuke.” Henewatbaki igkis hiyeg awnanek.

Mahayakemnihwenevwi muwaka adahan igkis biyuk

²⁰ Yisme yis inurikyenevwi, yis ka muwaka kadni. Hiyawa yis batek awaku ku samah ini paytwempu biyuke. Yis Uhokri gihiyegavu, hiyawa yis batek. Yis Uhokri giwatnivwi, yis Uhokri gawnevevu, hiyawa yis batek. Mmanawa ig Uhokri hiyapkise gitkis neras paytwempuyenevwi avatra ku pariye gitaraksankis yikak.

²¹ Ayteke nah hiyap pahavwi ahj detye ig kidise pohow tip nopsadnano kewa pohow sepbe. Ig padekwig parahwokwat. Ig awna: — Inin areketni adahan ku samah ini paytwempu nopsadnene Babiloniya in biyukenek kibehtenwa. Akak nihawna in mpiye. Ka takunima in hiyapka akiw.

²² Ayteke ig ahj awna gitkis neras paytwempuyenevwi. Giwn: — Ka takunima timapka agigman ayge yibet akiw ine hebbek aman, ine aramtem guman, ine tohompet aman. In ka timapka akiw ayge yibet. Yuma hiyeg kannuhyevwi utipka ayge yibet akiw. Ka takunima timapka maripkaman ayge yibet akiw.

²³ Yuma abukri abutni hiyapka ayge yibet akiw. Ka takunima timapka ayge yibet akiw awayg ahegbetene ginetni gukak gibetki. Kuri yis hiyepne mbeyne ka aynsima, mmanawa neras kinistekevutnevwi ayge yibet ignes mpiynevevye wagese hiyeg adahan igkis keh ku pariye gihiyekemnikis tuguh. Yis hiyepne mbeyne ka aynsima avatra ku samah yis kinisne madikte hiyeg amadgayavu inin akak yiyahmara. Henewatbaki ig ahj awna.

²⁴ Igkis paytwempuyenevwi avitnenevwi Babiloniya igkis hiyapkiswika ka aynsima mbeyne gitkis avatra ku samah igkis umehekevutnevwi, mmanawa migat utepka ayge gibetkis. Uhokri gawnevevu gimigkis gikakkis gihiyegavu gimigkis ayge. Hawata madikte hiyeg ku pariye umahavepka amadga hawkri gimigkis ayge.